Bɛn Sɩɩra 30
30
A bibiir wulu
1Sob nɛ na nɔnɛ a ʋ bidɛb a bɛ bɛrɛ a ʋ fɔbrʋ ɛ.
Nɩdaar a, a bidɛb ŋa n'ʋ na ƴãwnɛ ʋ a nʋ̃ɔ̀.
2Sob nɛ na wule a ʋ bidɛb vla a,
nʋ̃ɔ̀ nãà ɩrɛ ʋ nɩ a ʋ ƴãw.
Ʋ na mɩ́ nyʋʋr'ɩ a ʋ ƴãw, a ʋ nɩ-bãwnɩ sɔgɔ.
3Sob nɛ na wule a ʋ bidɛb a
na ɩ na a ʋ dɔ̃ dem kpɛ nyuur,
ɛ́ a ʋ bárɩ niŋé a, nʋ̃ɔ̀ na mɩ́ tɛr ʋ nɩ yaga.
4A sãà wa kpi a,
a na ɩ na mɛ̃ ʋ bɛ kpi a.
Bʋ̃ʋ n'ʋ vɛ̃, a ʋ pùorí a,
ʋ bɛr'ɩ nɩr na ŋmɛ̃ taa nɩ ʋ a.
5A ʋ cãafʋ daar a,
nʋ̃ɔ̀ ɩ ʋ nɩ a ʋ bidɛb nyɛ́b ƴãw,
ɛ́ a ʋ kũu daar a bɛ ɩ ʋ kpɩɛrʋ ɛ.
6Ʋ bɛr'ɩ nɩr na na yáa
a ʋ san a ʋ dɔ̃ dem zie a,
ɛ́ wul a ʋ bárɩ k'ʋʋ bɛ yiiri
a vla bɛ na maalɩ ʋ a ɩ.
7Sob nɛ na sãwnɛ a ʋ bidɛb bɛrɛ a,
a na fɛr'a ʋ sanɩ a ʋ natɩɛ.
A bie dɛ mɩ́ wa yel k'aa kon n'a a,
ʋ mɩ́ zɩnɛ na guur.
8Wur bɛ na bɛ bàl vla a,
a ʋ zɔmnʋ kpɛmɛ na,
bie bɛ na bɛr ʋ ɩ ʋ ɩb mili a,
bɛ bɛ mɩ́ wa tʋ́ɔr ʋ ɛ.
9Ƴãw fãw ɓaalɛ a bibile,
ʋʋ nãà ɩ n ɩb a ur fʋ.
Fʋ̃ʋ wa dɩ̃ɛnɛ nɩ ʋ a, ʋ na ɩ na fʋ kõ.
10Ta ɩ nyɩ lãw laar ɛ,
ʋ taa wa só fʋ wone tuo,
ɛ́ mɩ́ 'wɔb 'wɔb a nʋɔr zawlalɛ ɩ.
11Ta bɛr ʋ ʋ só ʋ tʋɔra ʋ na cãà pɔ̀lɛ a ɩ.
12Ŋmɛ ʋ a lõbowe ƴãw, ʋ na cãà ɩ pʋrɩ a,
alɛ bɛ ɩ lɛ, ʋ na kpɛ n bɛ-won
bɛ cãà sàwr a nʋɔr ɛ.
13Ƴãw fãw tu a fʋ bidɛb wulu pùor,
wul ʋ vla, ʋ taa wa ƴãwnɛ fʋ vĩ nɩ a ʋ ɩ-ɩrɩ ɛ.
A ƴã-ɓaarʋ
14Fʋ na ɩ nã́w sob, ɛ́ kpɛmɛ tɛr ƴã-ɓaarʋ a,
alɛ sa fʋ na tɛr a, ɛ́ lore a bàalʋ kʋralɛ a.
15A ƴã-ɓaarʋ nɩ a fãw sa n a tẽ-daa salm-zɩɛ za.
A ƴã-gã-kpɛ̃w sa n tɛra na bɛ vʋʋr a.
16Naalʋ kãw za bɛ be be ta a ƴã-gan ƴã-ɓaarʋ ɛ,
nʋ̃ɔ̀ kãw za bɛ be be gãw a socir nʋ̃ɔ̀ ɩ.
17A kũu sa fʋ na na ɩrɛ a wʋ̀ʋr a,
a kpi-pɩ̃ɛn sa bàalʋ na bɛ tɛr nãà baarɩ a.
18Bʋ̃-dɩ-nʋʋr bɛ na kʋ̀ bàal
dɩb vʋla na bɛ kpɩɛr a,
ɩ na mɛ̃ dɩb bɛ na kʋ̀ tɩɩb a.
19A yel-ɩra n'ɩ bo,
bɛ na de a kʋ̀ tɩɩb na kʋ̃ tʋ̃ɔ́ a dɩ,
ɛ́ kʋ̃ tʋ̃ɔ́ wõ a nyũu a?
Lɛ n'a a mɩ̀ ŋmɛ̃ a bàal,
a Sore na bɛr ʋ nyɛrɛ a wʋ̀ʋr a zie:
20ʋ mɩ́ jɩ́r'ɩ a dɩb á ŋá, ɛ́ vʋʋrɩ fãa,
mɛ̃ dɛ-vár na kãkori pɔwsɩrale
ɛ́ vʋʋrɩ fãa a.
A nʋ̃ɔ̀
21Ta ɩ a pʋ-sãwna tɛr fʋ ɛ,
ɛ́ ta ƴãw fʋ tʋɔra kpɩɛrʋ nɩ a tɩɛrʋ ɛ.
22A su-nʋ̃ɔ̀ n'ɩ a nɩr nyɔ-vʋʋrʋ,
ɛ́ a ʋ pʋ-pɩɛlʋ mɩ́ ɩ a ʋ nyɔ-vʋʋrʋ bibie a tɔl nidaa.
23Ɩ a fʋ tɩɛrʋ ʋ lɩɛbɩ, mɔwlɩ a fʋ socir,
ɛ́ diw a pʋ-sãwna ʋ zãá nɩ fʋ.
Bʋ̃ʋ n'ʋ vɛ̃, a pʋ-sãwna
sãw nɩ nɩ-yaga nyɔ-vʋʋrʋ,
ʋ bɛ tɛr yel-ɩra ɩ.
24A nyuur nɩ a suur
mɩ́ ɩ na a nyɔ-vʋʋrʋ ɩ ŋmãa,
ɛ́ a tɩɛrʋ ɩ fʋ pʋ̃ɔ̀ kor.
25Fʋ̃ʋ wa tɛr pʋ-pɩɛlʋ a,
a dɩb vʋla mɩ́ kpɩɛr fʋ na,
fʋ mɩ́ cɛlɛ nɩ a alɩ bome nɛ fʋ na dɩrɛ a zie.
La Bible en Dagara © Alliance Biblique du Burkina Faso, 2013.