Bɛn Sɩɩra 28
28
1Sob nɛ na mɩ́ yáa a faa san a,
na bãw nɩ a Sore san-yaafʋ a ʋ zu.
A Sore na sɔr'ɩ a ʋ sãwna vla vla bin.
2Dɩ suur kʋ̀ a fʋ tɔ na sãw fʋ a.
Lɛ n'a, fʋ̃ʋ wa puore a lɛn daar a,
a Sore na de a fʋ sãwna bɛr a baarɩ.
3Nɩr wa tɛr'ɩ a ʋ nɩsaal-tɔ suur a,
ŋmɩŋmɩn n'a ʋ na tʋ̃ɔ́ zɛlɩ a sanʋ a Sore zie?
4Ʋ bɛ tɛr nɩbaal-zɔba kãw za a ʋ nɩsaal-tɔ zie ɩ,
ŋmɩŋmɩn n'a ʋ na tʋ̃ɔ́ puore a ʋl mɩŋa yel-bebe ƴãw?
5A ʋl na ɩ bʋ̃-kpiira a,
ʋlɛ mɩ́ wa tɛr a pʋ-bier a,
ãa n'ʋ na páw a ʋl mɩŋa
yel-bebe suur-dɩ-kʋ̀b kʋ̀ ʋ?
6Tɩ́ɛrɛ a fʋ nyɔ-vʋʋrʋ baarʋ, ɛ́ bɛr a hɩ̃ɛnʋ.
Tɩ́ɛrɛ a kũu fʋ na na kpi wɛ a,
ɛ́ tuur a Sore nɛ-ƴãwnɩ.
7Bãwnɩ a nɛ-ƴãwnɩ á ŋá,
ɛ́ ta tɛr'ɩ a fʋ tɔ pʋ-bier ɛ.
Bãwnɩ a Naaŋmɩn-na-do-saa-bɛ-pɩɛl-a wõ-taa,
ɛ́ mɩ́ de a sãwna bɛr a baarɩ.
A zɛb-taa
8Àr zãá nɩ a zɛb-taa
ɛ́ fʋ kʋ̃ maal tɛr sãwna ɩ.
Bʋ̃ʋ n'ʋ vɛ̃, suur sob mɩ́ ɩ na a zɛbr ìr.
9A yel-bier sob mɩ́ ƴãw nɩ
damnʋ bárɩ cara pʋɔ,
ʋ mɩ́ ƴãw nɩ taw-taa be wõ-taa na tɩ be a.
10Vũu mɩ́ cãà na dɩrɛ
bɛlɛ wa suur a daar ƴãwnɛ ʋ a,
ɛ́ zɛb-taa kpɩɛr faa dɔwlɛ, ʋlɛ wa cɛlɛ a.
A lɛ nɩr fãw na zɛ̃ a n'a ʋ mɩ́ nyɛ̃ a suur ta,
ɛ́ a ʋ suur ìr tɩ ta a naalʋ ʋ na kpɛ a.
11Taw-taa bɛ na bɛ bãwnɩ a mɩ́ gbɔw nɩ a vũu,
ɛ́ zɛb-taa na ur be be a ɩ a zɩ̃ɩ cir.
12Pɛblɩ vũu-bir zu, ɛ́ ʋ na 'le na,
ɛcɛ pʋʋrɩ mʋtaar ƴãw ʋ, ɛ́ ʋ na kpiiri na.
A fʋ nʋɔr na tʋ̃ɔ́ na ɩ a za ayi.
A nʋɔr na bɛ vɩɛl a yel-faar
13Ŋmɛ-ƴãw, a tuur a nɩr na waalɛ a
nɩ a nɩr na tɛr zɛl-ɓɛra a!
Bɛ sãw nɩ nɩ-yaga na tɩ wone taa vla a yele.
14A nɛ́ɛ na bɛ vɩɛl a ƴɛ̀rʋ dam'ɩ nɩbɛ yaga,
a diw bɛ nɩ tẽw tɩ lʋ̃ɔ nɩ tẽw,
a dá n tẽ-bɛrɛ bɛ na cɔbrɩ
a kpɛmɛ a zɛbr ƴãw a lɔb,
ɛ́ lɔb a nɩ-bɛrɛ yie.
15A nɛ́ɛ na bɛ vɩɛl a ƴɛ̀rʋ
ɩ na bɛ bɛr pɔwbɛ na ɩ pɔwbɛ a,
ɛ́ ɩ kɛ́ bɛ bɛ páw a bɛ tome tɔnɛ ɩ.
16Sob nɛ na cɛlɛ a nɛ́ɛ
na bɛ vɩɛl a ƴɛ̀rʋ zie a kʋ̃ lɛb nyɛ̃ pɩ̃ɛnʋ ɛ,
ɛ́ kʋ̃ lɛb tʋ̃ɔ́ tɛr ƴã-ɓaarʋ ɛ.
17Fʋba mɩ́ fɔb'a ƴãw natɩr,
ɛcɛ ƴɛ̀rʋ ƴɛ̀r sãw a nɩr fʋ na ɩ a bɛr.
18Nɩbɛ yaga kpi n a zɛbr zie,
ɛcɛ bɛ bɛ ta a bɛl a nɛ́ɛ
na bɛ vɩɛl a ƴɛ̀rʋ na kʋ a ɩ.
19Zu-nʋ̃ɔ̀ sob'ɩ sob nɛ a nɛ́ɛ
na bɛ vɩɛl a ƴɛ̀rʋ na bɛ tʋ̃ɔ́ páw a,
sob nɛ a nɛ́ɛ na bɛ vɩɛl a
suur na bɛ ìr a ʋ ƴãw a.
Zu-nʋ̃ɔ̀ sob mɩ̀ n'ɩ sob nɛ na bɛ de a nɛ́ɛ
na bɛ vɩɛl a ƴɛ̀rʋ nyũ-dàa a,
ɛ́ a bamɛ mɩ̀ bɛ 'lẽ ʋ a.
20Bʋ̃ʋ n'ʋ vɛ̃, a fɛrʋ a nɛ́ɛ
na bɛ vɩɛl a ƴɛ̀rʋ na waar'ɩ a
kpɛmɛ na mɛ̃ kure a,
ɛ́ a bamɛ ɩ kur-zɩɛ bamɛ.
21Kũu-faa faa n'ʋ a nɛ́ɛ
na bɛ vɩɛl a ƴɛ̀rʋ ƴãwnɛ,
a kpɩmɛ tẽw beba sa.
22Ɛcɛ a bɛlɩ dem na tu a Sore a,
a nɛ́ɛ na bɛ vɩɛl a ƴɛ̀rʋ kʋ̃ tʋ̃ɔ́ ɩ bɛ bom za ɩ,
a vũu bɛ dɩrɛ bɛ ɩ.
23A bɛlɩ dem na mɩ́ zawrɩ a Sore bɛr a,
a nɛ́ɛ na bɛ vɩɛl a ƴɛ̀rʋ mɩ́ tʋ̃ɔ́ bɛ na.
A na gbɔw nɩ vũu na bɛ kpiire a a bɛ pʋɔ,
a na ta na tu bɛ mɛ̃ gbẽw a,
a na taw bɛ na ɓɛl mɛ̃ nyũo a.
24-25Fʋ̃ʋ wa baw a fʋ púo pàw nɩ gʋʋr a,
fʋ̃ʋ mɩ̀ ƴãw kpàrá a fʋ nʋɔr dɩ̃dɔr ƴãw.
Fʋ̃ʋ wa maal bin
a fʋ salm-pla nɩ a fʋ salm-zɩɛ a,
fʋ̃ʋ mɩ̀ mɩ́ tɩɛrɩ a fʋ ƴɛ̀rʋ vla.
26Gù vla a fʋ zɛl taa ɩrɛ fʋ ŋmɩɛr gbɛ́r ɛ,
fʋ̃ʋ bɛ wa bɔbr kɛ́ fʋ lo
a sob nɛ na jɩɛrɛ fʋ a nuru pʋɔ a.
La Bible en Dagara © Alliance Biblique du Burkina Faso, 2013.