Bɛn Sɩɩra 26
26
Pɔw-vla kulu tɛr'ɩ nʋ̃ɔ̀
1Sɩr na tɛr pɔw-vla a, ʋ tɛr'ɩ zu-nʋ̃ɔ̀,
ʋ na vʋʋr'a cɛlɩ gb'a ayi.
2Pɔw na tɛr soci-kpɛ̃w a
mɩ́ ƴãw nɩ a ʋ sɩr nʋ̃ɔ̀,
a ʋ sɩr mɩ́ bãw nɩ a ƴã-ɓaarʋ
a ʋ nyɔ-vʋʋrʋ daar za.
3Pɔw-vla ɩ n bʋ̃-kʋ̀ra na vɩɛl vɩɛl a,
sob nɛ na zɔrɛ a Sore a n'ʋ mɩ́ páw ʋ.
4Ʋ tɛr a na bɩɩ ʋ ɩ n nã́w sob a,
a nɩr ŋa mɩ́ tɛr'ɩ su-nʋ̃ɔ̀,
ɛ́ a ʋ niwn mɩ́ vɩɛl kʋralɛ.
A pɔw na bɛ ɩrɛ vla a
5Bome ata kãw be n be ɩrɛ mɛ̃ dɛ̃bɩ̃ɛ,
ɛcɛ anaar sob kãw be n be ƴãwnɛ pʋl-vʋ̃ɔ:
ƴɛ̀rʋ bɛ na ƴɛ̀rɛ a tẽ-kpɛ̃ɛ pʋɔ a,
zu-sɛbla na ɓã taa a,
ziri bɛ na ŋmãa ƴãw nɩr a.
À á ŋá za kpɛ n faa zuo a kũu.
6Ɛcɛ kpɩɛrʋ bɛ be be kpɛ faa zuo
pɔw na nyuur'ɩ ʋ pɔw tɔ,
ɛ́ a nʋɔr bɛ lɛb maal vɩɛl ƴãw pʋɔ a ɩ.
7Pɔw-po-tuo sob mɩ́ ɩrɛ na a kpɩɛr fʋ
man dàa na bɛ 'lẽ vla a ni-kʋ́ɔrɩ nyuru zu a.
Fʋ na bɔbr kɛ́ fʋ tʋ̃ɔ́ ʋ a,
a ɩ na mɛ̃ nãw fʋ na nyɔwr a.
8Pɔw-dã-kuole mɩ́ ɩrɛ nɩ suur yaga,
ʋ bɛ mɩ́ lɛb tʋ̃ɔ́ sɔwlɩ a ʋ faalʋ ɛ.
9Pɔw ɩb na bɛ vɩɛl a mɩ́ sãá nɩ a ʋ jɩ́rʋ
ʋ na mɩ́ jɩ́r fʋ bɛ va mimir a pʋɔ.
Bɛ mɩ́ nyɛ̃ ʋ na bãw a ʋ mimie kpɩmnʋ pʋɔ.
10Powle bɛ wa bãw ʋ tʋɔra nyɔwfʋ a,
fʋ̃ʋ lɛb bãw ƴãw fãw piwre ʋ.
Alɛ bɛ ɩ lɛ, ʋlɛ wa dɛ nyɛrɛ vuo a,
a ʋ yã nʋ̃ɔ̀ n'a.
11Piwre a jɩ́rʋ ʋ na mɩ́ jɩ́r fʋ bɛ va mimir a,
ɛ́ ʋlɛ wa bɛlɩ fʋ a, a ta ɩ uru a fʋ zie ɩ.
12Mɛ̃ sɔr-cene kʋ̃ɔ-nyúur na kʋrɛ
ʋ nyúur kʋ̃ɔ za ʋ na mɩ́ tuori tɔ a,
powle na bɛ bãw ʋ tʋɔra nyɔwfʋ a
mɩ́ sàw nɩ a weru za,
ɛ́ yuo a ʋ lɔw a pime za ƴãw.
A pɔw-vla bɛ na danɛ a
13Pɔw vɩɛlʋ mɩ́ ɩrɛ nɩ a ʋ sɩr nʋ̃ɔ̀,
ɛ́ a ʋ bãwfʋ ɩrɛ k'ʋ tɛr ƴã-ɓaarʋ.
14Pɔw na bɛ ƴɛ̀rɛ yaga a ɩ n Sore bʋ̃-kʋ̀ra,
ɛ́ bom za bɛ man nɩr bɛ na wul vla a ɩ.
15Pɔw na ƴãwnɛ ʋ tʋɔra a
ɩ n maalʋ na ɩ maalʋ a,
ɛ́ bom bɛ be be bɛ nɔnɛ gãw
nɩr na bɛ ɩrɛ pɩ̃ɔ-ɩb a ɩ.
16Mɛ̃ a lɛ a mʋ̃tɔ̃w na mɩ́ do do tɩ ár a,
lɛ n'a a pɔw-vla vɩɛlʋ ŋmɛ̃,
a ʋ yir ʋ na maal tɛr vla a pʋɔ.
17Ƴã-gan na mɛ vla ƴãw niw-vla a
ɩ na mɛ̃ fɩ̃tɩlɛ na 'lere
a fɩ̃tɩlɛ dɔwlʋ zi-sõw zu a.
18Gbɛ-vɩɛlɩ gbɛnakɔɛ na kpɛmɛ a zu
ɩ na mɛ̃ salm-zɩɛ kpule
na dɔwlɩ salm-pla pɛr zu a.
Su-sãwna yele ata kãw
28Yele ayi kãw be n be sãwnɛ mɛ̃ suur,
ɛcɛ ata sob kãw mɩ́ ɩ na ɩ̃ sɩrɩ nyɛ̃ suur:
soja-kʋra nãw-woro na nyɔw a,
nɩbɛ na tɛr yã ɛ́ bɛ bɛ ŋmɛlɛ kaar bɛ a,
ɛ́ baa zuo a za
nɩr na bɛr a vla maalʋ ɛ́ maalɛ a faa a.
A Sore bɛr ʋ na gùre nɩ a zɛbr-sɔ-kpɛ̃ɛ kũu.
A yɛ̀rʋ́ yel-faar
29A yel-libelibe nɩɩr-bɛrʋ kpɛmɛ nɩ a yɛ-yɛrɛ zie,
a bʋ̃-kʋ̀ɔrɛ kʋ̃ tʋ̃ɔ́ bɛ mɩ́ tɛr sãwna ɩ.
La Bible en Dagara © Alliance Biblique du Burkina Faso, 2013.