Bɛn Sɩɩra 22
22
A ƴã-tuo sob
1A ƴã-tuo sob ŋmɛ̃ na mɛ̃ kʋsɩɛr
bɛ na ɩɛr'ɩ pɛr a,
a nɩbɛ za mɩ́ 'húore ʋ nɩ a ʋ faalʋ ƴãw.
2A ƴã-tuo sob ŋmɛ̃ na mɛ̃ bin na gbil gã a,
sob nɛ za na ɓáw ʋ a
mɩ́ mɩr mɩr'ɩ a nũu bɛr.
A bi-sãwnɩ yele
3Vĩ n'a a bidɛb-wul-guura sãà zie,
pɔwyaa wa n'ʋ a, a mɩ́ ɩ ʋ nɩ sãwna.
4Powle na bãw yã a na nyɛ̃ nɩ sɩr,
ɛcɛ a ʋl na ƴãwnɛ nɩbɛ vĩ a,
mɩ́ ɩ na a ʋ sãà nyɛrɛ niw-sʋba.
5Pɔw na bɛ ƴãwnɛ nɩbɛ a,
ƴãwnɛ nɩ a ʋ sãà nɩ a ʋ sɩr vĩ,
bɛ za ayi kʋ̃ bãw kɛ́ nɩr'ʋ ɛ.
6Yelu fʋ na yere nɩr,
ɛ́ a bɛ ɩ a yelu daar a,
ɩ na mɛ̃ cuw yielu
fʋ na yiele kuor daar a.
Ɛcɛ a fʋ̀ba nɩ a kpãàfʋ
ɩ n yã-bãwfʋ kʋralɛ.
Dãbol sob bɛ tɛr wulu ɛ
9Dãbol sob fʋ na wule a,
ɩ na mɛ̃ kʋsele fʋ na lɛb mɛrɛ
lali-ŋmɛrnyɛ̃ ƴãw a,
bɩɩ mɛ̃ nɩr na gúr kpalfala fʋ sɩ̃wnɛ a.
10Dãbol sob zie fʋ na ƴɛ̀rɛ a,
ɩ na mɛ̃ gʋ̃ɔ-gúre fʋ na ƴɛ̀rɛ nɩ a:
ʋ mɩ́ wa sowri fʋ na kɛ́: «Bʋ̃ʋ n'ʋ?»
11Kone a nɩr na kpi a,
bʋ̃ʋ n'ʋ vɛ̃, ʋ bɛ cãà nyɛrɛ a cãà ɩ.
Mɩ̀ kone a dãbol sob,
bʋ̃ʋ n'ʋ vɛ̃, ʋ bɔr'ɩ a yã bɛr.
Kone a nɩr na kpi a bɛ̀lbɛ̀l,
bʋ̃ʋ n'ʋ vɛ̃, ʋ nyɛ̃ nɩ pɩ̃ɛnʋ.
Ɛcɛ a dabol sob nyɔ-vʋʋrʋ
kpɛ n faa zuo a kũu.
12Kũu kuor mɩ́ kõ na cɛlɩ bibie ayopõi,
ɛ́ dãbol sob bɩɩ nɩ-faa kuor kõ
a bɛ nyɔ-vʋʋrʋ bibi-vɩɛrɩ za.
13Ta ƴɛ̀rɛ nɩ dãbol sob yaga ɩ,
ɛ́ taa lore sɔ́r nɩ gẽgemi sob ɛ.
Cɩrɛ a ʋ ƴãw taa wa bãwnɛ niw-sʋba ɩ,
ɛ́ taa wa páwr dɛwr
ʋlɛ wa mɩrɛ ʋ tʋɔra a ɩ.
Dɛrɛ ʋ, fʋ̃ʋ wa bɔbr kɛ́ fʋ tɛr ƴã-ɓaarʋ
ɛ́ a ʋ dãbol-ƴɛ̀rʋ ta damnɛ fʋ a.
14Bʋ̃ʋ n'ʋ tɩbrɛ zuo a kur-mɔrmɔr#22:14 Kur-mɔrmɔr: Kure kãw bʋʋrɛ farsɩ na bʋɔlɛ pʋlɔ̃ a n'ʋ. ?
Sɔwfʋ been yõ n'ʋ: a dãbol sob'ʋ.
15Biire bɩɩ nyaarʋ nɩ vʋɔra,
bɩɩ kur-gbil tuofʋ
ɩ n mɔlɛ zuo dãbol sob tɛrʋ.
16Yir dàar bɛ na ƴãw a nyɔw taa vla a,
bɛ tawr yaarɛ a tẽsɔw kɔbr wa dam a ɩ.
Lɛ n'a nɩr na tu n ʋ pʋɔ za
bom ʋ na tɩɛrɩ vla vla bin a,
kʋ̃ sàw bom dam ʋ a daar wa ta a ɩ.
17Yel fʋ na tɩɛr'ɩ yã yel kɛ́ fʋ na ɩ na a,
ʋ mɩ́ ɩ na mɛ̃ vɩɛlʋ bom kãw
na ƴãw dacĩ-saala zu a.
18A kʋsɛ-cãpʋrmɛ na dɔwlɩ a dacin zu a,
sɛsɛb wa fure a, a bɛ ganɛ ɩ.
Lɛ mɩ́ n'a a sob nɛ zie a dãbol-tɩɛrʋ
na mɩ́ ƴãwnɛ a dɛ̃bɩ̃ɛ a:
dɛ̃bɩ̃-sãsaralɛ, ɛ́ ʋ faa lo!
A báalʋ pùor-tub
19Nɩr wa ŋmɛ mimir a,
a mʋta-kʋ̃ɔ mɩ́ yi na,
ɛ́ nɩr wa tɔ a socir a,
a ʋ tɩɛrʋ mɩ́ sãá na.
20Nɩr wa lɔbr lili nɩ kʋsɛbɛ a,
ʋ mɩ́ ɩ na a ƴaw,
nɩr na yere a ʋ bá a sãwnɛ nɩ a báalʋ.
21Fʋ̃ʋ wa vʋ̃ɔ sʋɔ bá ƴãw a,
a yele za bɛ sãw ɛ: ʋ na tʋ̃ɔ́ na lɛb wa.
22Fʋ̃ʋ nɩ ʋl wa zɛb taa a,
taa zɔrɛ dɛ̃bɩ̃ɛ ɩ:
nyɩ na tʋ̃ɔ́ na lɛb kpɛ taa.
Ɛcɛ fʋ̃ʋ wa tʋʋr ʋ,
fʋ̃ʋ bɛ wa bʋɔlɛ ʋ nɩr,
fʋ̃ʋ wa manɛ a ʋ yel-sɔwlɩ
bɩɩ fʋ̃ʋ wa sɔwlɛ yere ʋ a,
a yele á ŋá na ɩ n bá za ʋ zɔ.
23Ɩ a fʋ tɔ kpɛ-ta sob, ʋ na ɩ nã́w sob a,
lɛ n'a ʋlɛ wa tɛr a a lɛn daar a,
fʋ na nyɛrɛ maalʋ.
Tu a ʋ pùor a ʋ kpɩɛrʋ daar,
ʋlɛ wa dɩ a gbãw a lɛn daar a,
fʋ na páw nɩ a fʋ dem.
24Mɛ̃ a lɛ fʋ na mɩ́ nyɛ̃
kʋ̃ɔ-tʋlʋ úuru bɩɩ zʋ̀ʋ́r
bãw kɛ́ vũu be n be a,
lɛ mɩ́ n'a, fʋ̃ʋ wa wone zʋmɛ na tʋʋr a,
fʋ mɩ́ bãw kɛ́ zɩ̃ɩ na cir'a.
25Ɩ̃ bɛ be za na zɔ vĩ bá gub ƴãw ɛ,
ʋlɛ wa tɛr ɩ̃ yel-ɩra a, ɩ̃ bɛ sɔwlɛ ɩ.
26Ɛcɛ ʋlɛ wa n'ʋ so yele fɛrɛ mɛ̃ a,
bɛlɩ dem za nãà mɩ́ wa wõ a a,
na mɩ́ cɩ́rɛ nɩ a ʋ ƴãw.
Puoru kɛ́ fʋ tʋ̃ɔ́ so fʋ tʋɔra
27Ɩ̃ bɔbr'a kɛ́ nɩr nãá piwre a ɩ̃ nʋɔr,
ɛ́ kpà a ɩ̃ nɔgbãbie dɩ̃dɔr.
Lɛ n'a a ɩ̃ ƴɛ̀rʋ kʋ̃ʋ mab ɩ ɩ̃ lo ɩ,
ɛ́ a ɩ̃ nʋɔr kʋ̃ ɩ ɩ̃ bɔr ɛ.
La Bible en Dagara © Alliance Biblique du Burkina Faso, 2013.