Urutɩ 4
4
A Bowaazʋ na tu a Elimelɛkɩ yele pùor a
1A Bowaazʋ tɩ do na tɩ zɩ̃ a ƴɛ̀rʋ-dɩb zie a tẽw dɩ̃dɔr nʋɔr, ɛ́ wa nyɛ̃ a sob nɛ na tɛr sɔ́r a bɩ́ɛrʋ ƴãw a, a ʋl ƴɛ̀rʋ ʋ na tɩ ƴɛ̀r a, ʋ tɔlɛ. A Bowaazʋ tɩ yel ʋ na: «Bón i! Alɛ ka! Wa zɩ̃ ka!» Ʋ tɩ tɛw na àr ɛ́ taw ta zɩ̃. 2Lɛ n'a a Bowaazʋ tɩ ír nɩbɛ pie a tẽw nɩ-kore pʋɔ ɛ́ yel à ŋá: «Nyɩ wa zɩ̃ a ka!» Ɛ̀ bɛ zɩ̃. 3Al pùorí ʋ yel a sob nɛ na tɛr sɔ́r a bɩ́ɛrʋ ƴãw a: «Fʋ bãwnɩ a na a Nowemi na yi a Mowab tẽw lɛb wa a. Ʋ kʋɔrɛ nɩ a tɩ yɛb Elimelɛkɩ púo. 4Ɩ̃ yel k'ɩ̃ɩ por a yúor fʋ bãwnɩ a ɛ́ yel kʋ̀ b: “Da a púo a nɩbɛ na be ka a niŋé nɩ a ɩ̃ nɩ-bʋʋrɛ nɩ-kore niŋé.” Fʋ̃ʋ wa bɔbr kɛ́ fʋ lɛb de a, fʋ̃ʋ lɛb de, ɛcɛ fʋ̃ʋ bɛ wa bɔbr kɛ́ fʋ lɛb de a, fʋ̃ʋ yel kʋ̀ m ɩ̃ bãwnɩ a, bʋ̃ʋ n'ʋ vɛ̃, nɩr bɛ ka be na tʋ̃ɔ́ lɛb de ʋ, a bɛ ɩ a fʋ̃ʋ ɛ, mãa tu n a fʋ zu.» A sob nɛ yel: «Ɩ̃ bɔbr'a k'ɩ̃ɩ lɛb de a púo.»
5A Bowaazʋ tɩ lɛb'a yel à ŋá: «A ʋlɩ bibir fʋ nãà wa daar a púo a Nowemi zie a, fʋ mɩ̀ na tɛr'ɩ a Mowab tẽw Urutɩ a dɛb-kũu pɔw, k'aa kũu yúor cãà pore a ʋ bʋ̃-sora zu.»
6Lɛ n'a a sob nɛ na tɛr sɔ́r a bɩ́ɛrʋ ƴãw a, sɔw: «Alɛ wa ɩ à ŋá n'a a, ɩ̃ kʋ̃ tʋ̃ɔ́ ɩ, alɛ bɛ ɩ lɛ ɩ̃ na sãw nɩ a ɩ̃ yele bɛr. Fʋ̃ʋ a, lɛb de a ɩ̃ deb zie, ɩ̃ na kʋ̃ tʋ̃ɔ́ lɛb de a ƴãw.»
7A koro za, a Ɩsɩrayɛl tẽw pʋɔ a, a nɩbɛ wa daar bome bɩɩ tɛwr bome a, kãw mɩ́ yaa nɩ a ʋ nafawr kʋ̀ a ʋ tɔ sob, a ɩ a wõ-taa n'a maalɩ a lɛ. À ŋá n'a a dãsɩɛ mɩ́ dɩ a Ɩsɩrayɛl tẽw pʋɔ. 8Alɛ n'a so a sob nɛ na tɩ tɛr sɔ́r a bɩ́ɛrʋ ƴãw a tɩ yel a Bowaazʋ: «Da a púo so ʋ!» Ɛ́ tɩ yaa a ʋ nafawr kʋ̀ ʋ. 9Lɛ n'a a Bowaazʋ tɩ yel a nɩ-kore nɩ a nɩbɛ bɛl za na tɩ be a be a: «Nyɩ dɩrɛ nɩ a dãsɩɛ a dɩ̃a, ɩ̃ na daar a Elimelɛkɩ nɩ a ʋ bidɛbr Kiliyon nɩ Maalon bome za a Nowemi zie a. 10Ɩ̃ mɩ̀ dier'ɩ a Mowab tẽw Urutɩ a Maalon pɔw-kʋɔr, k'ʋʋ ɩ a ɩ̃ pɔw, a kũu yúor cãà pore a ʋ bʋ̃-sori zu, a ʋ yúor taa kpiire a ʋ yɛbr sɔgɔ nɩ a ʋ tẽw yele maalʋ zie ɩ. Nyɩ ɩ n a yele á ŋá dãsɩɛ dem a dɩ̃a.»
11A nɩ-kore nɩ a bɛlɩ dem za na tɩ be a ƴɛ̀rʋ-dɩb zie a, tɩ sɔw na: «Sɩza, tɩ dɩ n a dãsɩɛ! A Sore, ʋ maalɩ a pɔw na waar a fʋ yir a, ʋ ŋmɛ̃ taa nɩ a Arasɛl nɩ a Leya#4:11 Arasɛl nɩ Leya: A Zakɔb pɔwbɛ ayi tɩ nɛbɛ. Nyɛ̃ Yzt 29.11. na mɛ a Ɩsɩrayɛl yir a bɛ ayi a. A fʋ nũu, ʋ kpɛmɛ a Efarata dɔwlʋ pʋɔ, ɛ́ a fʋ yúor yi a Bɛtɩlɛm tẽw za pʋɔ. 12A Sore, ʋ ɩ a pɔw pɔl ŋa dɔw bibiir yaga kʋ̀ b, a fʋ yir tʋ̃ɔ́ ŋmɛ̃ taa nɩ a Zuda nɩ Tamaar bidɛb Perɛsɩ yir.»
A Urutɩ nɩ a Bowaazʋ kul'ɩ taa dɔw Ovɛdɩ
13Lɛ n'a a Bowaazʋ tɩ de a Urutɩ ʋ ɩ a ʋ pɔw. A Sore tɩ maal'ʋ na ɩ k'ʋ tɛr pʋɔ dɔw dɛble. 14A Bɛtɩlɛm tẽw pɔwbɛ tɩ yere nɩ a Nowemi zie: «A Sore tɛr'ɩ danʋ! A dɩ̃a a, ʋ ɩ na bɛ dɔw a sob nɛ na na kaarɛ a fʋ zie a. A fʋ yãw a, bɛ wa pore a ʋ yúor a Ɩsɩrayɛl bʋʋrɛ pʋɔ! 15Ʋ na lɛb'a maalɩ a fʋ nyɔ-vʋʋrʋ ƴãw, ɛ́ tɩɛ fʋ a fʋ koru daar, bʋ̃ʋ n'ʋ vɛ̃, a fʋ bie-pɔw na nɔnɛ fʋ a, ʋlɛ n'ʋ dɔw ʋ kʋ̀ b, a fʋ bie-pɔw zuo nɩ bidɛbr ayopõi a fʋ zie.»
16Lɛ n'a a Nowemi tɩ de a bie dɔwlɩ a ʋ gbɛ́ɛ zu ɛ́ lɩɛbɩ a ʋ guole. 17A sɩman pʋɔ pɔwbɛ tɩ yel'a: «Nowemi tɛr'ɩ bidɛb!» Ɛ́ tɩ bʋɔlɩ a bie yúor kɛ́ Ovɛdɩ. A Ovɛdɩ n'ɩ a Zese sãà ɛ́ a Zese ɩ a Daviir sãà.
A Daviir sãàkʋm-kore
18Nyɩ nyɛ̃ a Daviir sãàkʋm-kore na tĩ a Perɛsɩ zie ɛ́ tu taa a: a Perɛsɩ tɩ dɔw nɩ Ɛsɩron, 19Ɛsɩron dɔw Aram, Aram dɔw Aminadab, 20Aminadab dɔw Nason, Nason dɔw Salma, 21Salma dɔw Bowaazʋ, Bowaazʋ dɔw 22Ovɛdɩ, Ovɛdɩ dɔw Zese, Zese dɔw Daviir.
La Bible en Dagara © Alliance Biblique du Burkina Faso, 2013.