Urutɩ 1
1
A Elimelɛkɩ yir dem kpɩɛrʋ yele
1A ƴɛ̀r-dɩrbɛ#1:1 Ƴɛ̀r-dɩrbɛ daar: A lɛn daar a Ɩsɩrayɛl nɩbɛ na bɛ tɩ tɛr na-mɩnɛ sɛr a, a yome 1 100 vuo pʋɔ, a Yeezu Kɩrɩta na bɛ wa sɛr a, Naaŋmɩn mɩ́ tɩ tõ n nɩbɛ bɛ tɩ faa a Ɩsɩrayɛl. A nɩbɛ bɛ ŋa nɛbɛ bɛ bʋɔlɛ a ƴɛ̀r-dɩrbɛ. Bɛ mɩ́ tɩ kaarɛ nɩ a Ɩsɩrayɛl nɩbɛ zie ɛ́ dɩrɛ a ƴɛ̀rʋ. daar, kɔ̃ tɩ lo n a Ɩsɩrayɛl tẽw pʋɔ. Lɛ n'a dɛb kãw na tɩ yi Bɛtɩlɛm na be Zuda tẽw a, tɩ ìr, ʋlɛ nɩ a ʋ pɔw nɩ a ʋ bidɛbr ayi, zɔ kpɛ Mowab tẽw kura pʋɔ. 2A dɛb nɛ yúor tɩ dɩ na kɛ́ Elimelɛkɩ, ɛ́ a pɔw dɩ kɛ́ Nowemi, ɛ́ a ʋ bidɛbr ayi dɩ kɛ́ Maalon nɩ Kiliyon. Efarata dɔwlʋ nɩbɛ na yi Bɛtɩlɛm na be Zuda tẽw a tɩ nɛbɛ. Bɛ tɩ ta n a Mowab tẽw kura pʋɔ kpɩɛr a be, 3a Nowemi sɩr Elimelɛkɩ wa kpi ɛ́ cɛ ʋ bɛr, ʋlɛ nɩ a ʋ bidɛbr ayi. 4Bɛ tɩ kul'ɩ a Mowab tẽw pɔwbɛ. A kãw tɩ dɩ na kɛ́ Ɔrpa ɛ́ a kãw dɩ kɛ́ Urutɩ. Bɛ tɩ kpɛ n a be tɩ ta yome pie, 5al pùorí, a Maalon nɩ a Kiliyon mɩ̀ tɩ kpi n bɛ za ayi, ɛ́ a Nowemi cɛ ʋ yõ bɛ tɛr bibiir ɛ, bɛ tɛr sɩr ɛ.
A Urutɩ tu n a Nowemi cen a Bɛtɩlɛm tẽw
6A Mowab tẽw kura pʋɔ be a, a Nowemi tɩ wõ na bɛ yel k'aa Sore kaa nɩ a ʋ nɩ-bʋʋrɛ zie, ɩ a bɛ bʋ̃-kʋ́ɔrɩ maalɩ vla. 7Lɛ n'a ʋ tɩ bɛr a zie ʋl ʋlɛ nɩ a ʋ biir-pɔwbɛ ayi na tɩ kpɩɛr a, ɛ́ yi lo a sɔ́r lɛb kule a Zuda tẽw. 8Ɛcɛ a Nowemi tɩ yel'ɩ a ʋ biir-pɔwbɛ ayi à ŋá: «Nyɩ lɛb kul, ŋa za a ʋ mã zie. A Sore, ʋ maalɩ nyɩ, mɛ̃ a lɛ nyɩ na maalɩ a bɛl na kpi a, nɩ a mãa mɩŋa za a. 9A Sore, ʋ sàw kɛ̀ ŋa za mɩ́ lɛb nyɛ̃ sɩr kul ɛ́ wone nʋ̃ɔ̀ a ʋ sɩr yir.»
Al pùorí, ʋ tɩ weri bɛ na puori bɛ, kɛ́ bɛ tʋ̃ɔ́ bɛr taa. Ɛcɛ a biir-pɔwbɛ tɩ vaa nɩ kɔkɛɛ kone, 10ɛ́ yel ʋ à ŋá: «Ʋ̃ʋ'hʋ̃! Tɩ na páw fʋ na kul a fʋ nɩbɛ zie!» 11Ɛcɛ a Nowemi tɩ lɛb'a yel bɛ: «Ɩ̃ pɔwyaar i, nyɩ lɛb kul, bʋnʋ ƴãw n'a nyɩ bɔbr kɛ́ nyɩ páw mɛ̃? Ɩ̃ na tʋ̃ɔ́ na lɛb dɔw bidɛbr bɛ wa kul nyɩ bɩɩ?#1:11 A koro za a, dɛb wa kul pɔw ɛ́ bɛ dɔw bibiir ɛ́ kpi a, a fɛr'a k'aa ʋ yɛb bɩɩ a ʋ nɩr kãw na pɩɛl'ʋ a bɩɛrɩ a pɔw kʋɔr dɔw nɩ bibiir a kũu yúor cãà pore a tẽw zu ka. Nyɛ̃ Wl-ayi 25.5-10, Yzt 38.6-8, Mat 22.24. 12Ɩ̃ pɔwyaar i, nyɩ lɛb kul ɛ́ bɛr mɛ̃. Ɩ̃ kor'a zuo a sɩr lɛb kulu ƴãw. Ɛ́ mãa mɩ̀ saa na yel: “A cãà na tɛr mɛ̃ ɩb, a tɩ̃ɩsɔw ŋa tɔr za ɩ̃ na tɛr'ɩ sɩr ʋ kʋ̀ m bidɛbr”, 13nyɩ na gù na bɛ tɩ baa a? Nyɩ na zawr'ɩ nɩ-yũo kulu bɩɩ? Ʋ̃ʋ'hʋ̃, ɩ̃ pɔwyaar i! Mãa n'ʋ a Sore ír mimir ƴãw. A yele na do m'a kpɛmɛ na zuo nyɩ.»
14Lɛ n'a a biir-pɔwbɛ ayi lɛb tɩ maal vaa kɔkɛɛ kone. A Ɔrpa wa nyɔw nɩ a ʋ sɩr-mã weri puor'ʋ a ɩ a bɛr-taa, ɛcɛ a Urutɩ tɩ zawr'a, ɛ́ sɛ mɛr ʋ. 15A Nowemi tɩ yel'ɩ a Urutɩ: «Nyɛ̃, a fʋ yẽtaa lɛb'a cen a ʋ nɩ-bʋʋrɛ nɩ a ʋ ŋmɩmɛ zie. Tu a fʋ yẽtaa lɛb kul.»
16Ɛcɛ a Urutɩ tɩ sɔw na: «Ta fɛrɛ mɛ̃ k'ɩ̃ɩ zawrɩ fʋ bɛr ɛ́ lɛb kul a ɩ̃ yir zãá nɩ fʋ ɛ.
A be fʋ na na cen a, bɛ n'a ɩ̃ na cen,
a be fʋ na na kpɩɛr a, be n'a ɩ̃ na kpɩɛr.
A fʋ nɩ-bʋʋrɛ na ɩ n a ɩ̃ nɩ-bʋʋrɛ,
ɛ́ a fʋ Naaŋmɩn ɩ a ɩ̃ Naaŋmɩn.
17A be fʋ na na kpi a, be n'a ɩ̃ mɩ̀ na kpi,
ɛ́ a be n'a bɛ na ũù mɛ̃.
A Sore, ʋ dɔwrɩ mɛ̃ ɛ́ lɛb dɔwrɩ ƴãw pʋɔ,
a kũu yõ bɛ wa n'ʋ bʋ́r mãa nɩ a fʋ̃ʋ a!»
18A Nowemi na tɩ nyɛ̃ a Urutɩ ʋ bɔbr a ʋ tub tuotuo a, ʋ bɛr'a bɛ cãà ƴɛ̀rɛ a ƴɛ̀rʋ a ʋ zie ɩ.
19Lɛ n'a bɛ tɩ lãw cen bɛ za ayi tɩ ta a Bɛtɩlɛm tẽw. Bɛ na tɩ ta a, a tɩ ɩ n damnʋ a tẽw za pʋɔ a bɛ ƴãw. A pɔwbɛ tɩ yere na: «Alɛ! Nowemi n'ʋ bɩɩ?» 20Ɛcɛ a Nowemi tɩ yel bɛ na: «Nyɩ ta cãà bʋɔlɛ mɛ̃ Nowemi ɛ, a pɛr lɛ kɛ́ Zu-nʋ̃ɔ̀ sob ɛ, nyɩ bʋɔlɛ mɛ̃ Maara, a pɛr lɛ kɛ́ Baw-bio sob. Bʋ̃ʋ n'ʋ vɛ̃, a Kpɛnʋ-za-sob ɩ na ɩ̃ wõ tuo bɛ dɩ vuo ɛ. 21Ɩ̃ tɩ tɛr a na yi n a ka cen nɩ, ɛ́ nũ-zawlɛ n'a a Sore ɩ ɩ̃ lɛb waar. A na ɩ à ŋá a, nyɩ ta cãà bʋɔlɛ mɛ̃ Nowemi ɛ, bʋ̃ʋ n'ʋ vɛ̃, a Sore Kpɛnʋ-za-sob ír'ɩ mimir ƴãw mɛ̃ ɛ́ ɩ m a kpɛ.»
22À ŋá n'a a Nowemi tɩ yi a Mowab tẽw lɛb wa, ʋlɛ nɩ a ʋ bie-pɔw Urutɩ na yi a Mowab tẽw a. Bɛ tɩ ta n a Bɛtɩlɛm a lɛn daar bɛ na tĩ cɩɛr a ɔɔzʋ a.
La Bible en Dagara © Alliance Biblique du Burkina Faso, 2013.