Ʋrɔm 4

A Abraham na sàw de a Naaŋmɩn a yele

1A na ɩ à ŋá a, bʋ̃ʋ n'ʋ tɩ na yel a tɩ sãàkʋm-kʋra Abraham ƴãw? Bʋ̃ʋ n'ʋ ʋ páw, ʋ na ɩ nɩsaal a? 2Bɛlɛ wa yel k'aa Abraham ɩ n nɩ-mɩŋa a ʋ ɩ-ɩrɩ zũú a, ʋ na tʋ̃ɔ́ na pɔrɛ a al ƴãw, ɛcɛ Naaŋmɩn niŋé bɛ n'a ʋ na pɔrɛ ɩ. 3A Sɛb-sõw yere na kɛ́ bo? «K'aa Abraham tɩ sàw na de a Naaŋmɩn, a Naaŋmɩn sàw kʋ̀ ʋ a al ƴãw k'ʋʋ ɩ n nɩ-mɩŋa#4:3 Nyɛ̃ Yzt 15.6..» 4Nɩr na tone a, bɛ bɛ mɩ́ nyɛ̃ a ʋ sã-ya ʋ ɩ bʋ̃-mɔlɛ bɛ kʋ̀ ʋ ɛ, ʋ mɩ́ ɩ n bom a na fɛr kɛ́ bɛ kʋ̀ ʋ a. 5Ɛcɛ, nɩr na bɛ ɩrɛ ƴãwn a ʋ tome ƴãw a, ɛ́ sàw de a Naaŋmɩn na mɩ́ ɩ a nɩr na bɛ ƴãwnɛ ʋ, ʋ lɩɛbɩ nɩ-mɩŋa a, a Naaŋmɩn mɩ́ nyɛ̃ nɩ a ʋ sàw-deb, ɛ́ sàw kʋ̀ ʋ k'ʋʋ ɩ n nɩ-mɩŋa. 6A nɩr ʋl a Naaŋmɩn na mɩ́ sàw kʋ̀ k'ʋʋ ɩ n nɩ-mɩŋa, ɛ́ a bɛ ɩ a ʋ ɩ-ɩrɩ zũú n'a a, à ŋá n'a a Daviir ƴɛ̀rɛ a sob nɛ zu-nʋ̃ɔ̀ ƴɛ̀rʋ:

7«Zu-nʋ̃ɔ̀ dem'ɩ a bɛlɩ dem

a Naaŋmɩn na dɩ a bɛ sãwna suur kʋ̀,

ɛ́ ír a bɛ yel-bebe bɛr a.

8Zu-nʋ̃ɔ̀ sob'ɩ a nɩr ʋl

a Sore na bɛ de a ʋ yel-bier

bin gùre nɩ ʋ a#4:8 Nyɛ̃ Ssy 32.1-2..»

9A na ɩ à ŋá a, a zu-nʋ̃ɔ̀ ŋa a, a bɛlɩ dem yɛɛ na ŋma a tɛwr ƴãw n'a ʋ be, bɩɩ a bɛlɩ dem na bɛ ŋma a yɛɛ a ƴãw mɩ̀ n'a? Tɩ yel'ɩ a ƴɛrɛŋa k'aa «Naaŋmɩn tɩ nyɛ̃ nɩ a Abraham sàw-deb, ɛ́ sàw kʋ̀ ʋ a al ƴãw k'ʋʋ ɩ n nɩ-mɩŋa.» 10Ɛcɛ debor daar'a a Naaŋmɩn tɩ sàw kʋ̀ ʋ a lɛ? A Abraham na tɩ ŋmãa a yʋ̀ɔr baar'a n'a bɩɩ, ʋ na bɛ tɩ ŋmãa a yʋ̀ɔr sɛr a n'a? Ʋ na tɩ ŋmãa baar'a bɛ n'a ɩ, ʋ na bɛ tɩ ŋmãa sɛr a n'a. 11A pùorí n'a ʋ tɩ páw a yʋɔr-ŋmãafʋ ʋ ɩ bãwfʋ na wule k'aa Naaŋmɩn tɩ sàw na kʋ̀ ʋ k'ʋʋ ɩ n nɩ-mɩŋa a sàw-deb zũú, ʋ na saa bɛ tɩ ŋmãa a yʋ̀ɔr sɛr a. À ŋá n'a a Abraham lɩɛbɩ a bɛlɩ dem za na sàw de, ɛ́ bɛ ŋma a yɛɛ a sãà, k'aa Naaŋmɩn tʋ̃ɔ́ sàw kʋ̀ bɛ kɛ́ bɛ mɩ́ ɩ n nɩ-mɩn. 12Ʋ mɩ̀ ɩ n a bɛlɩ dem yɛɛ na ŋma a sãà, a pɛr lɛ kɛ́ a bɛlɩ dem na bɛ jɩ́rɛ a bɛ yɛɛ ŋmab tɛwr'a, ɛ́ cɔwrɛ a tɩ sãà Abraham sàw-deb ʋ na tɩ tɛr ɛ́ bɛ ŋmãa a yʋ̀ɔr sɛr a.

Sàw-deb zũú n'a a lɛ a Naaŋmɩn na yel a mɩ́ tu

13Naaŋmɩn yel'ɩ a Abraham nɩ a ʋ bʋʋrɛ kɛ́ bɛ na so nɩ a tẽ-daa#4:13 Nyɛ̃ Yzt 12.2-3, 17.4-6, 22.15-18.. A Wulu a Abraham na tɩ sàw a ƴãw bɛ n'a a Naaŋmɩn tɩ yel à à ŋá kʋ̀ ʋ ɛ, a Naaŋmɩn na tɩ sàw kʋ̀ ʋ k'ʋʋ ɩ n nɩ-mɩŋa a ʋ sàw-deb zũú a, al ƴãw n'a. 14A bɛlɩ dem na sàwr a Wulu a tɛwr wa nɛbɛ páwr a bome a Naaŋmɩn na yel k'ʋʋ na tɩr a a, a sàw-deb bɛ cãà tɛr pɛr ɛ, ɛ́ a lɛ a Naaŋmɩn na yel a bɛ cãà pʋɔ ɩ. 15Bʋ̃ʋ n'ʋ vɛ̃, a Wulu-bɛ-sàwfʋ n'ʋ mɩ́ so a Naaŋmɩn suur nyɛ́b, ɛcɛ be wulu na bɛ wul a, wulu zawrʋ mɩ̀ bɛ ka be ɩ.

16A na ɩ à ŋá a, a ʋlɩ bom nɛ a Naaŋmɩn na yel k'ʋʋ na tɩr a a, a sàw-deb zũú n'a, k'ʋʋ tʋ̃ɔ́ ɩ maalʋ ʋ na tɩrɛ zawla a, ɛ́ a mɩ̀ ɩ a Abraham bʋʋrɛ za ƴãw a, a bɛlɩ dem na sàwr a Wulu a, nɩ a bɛlɩ dem na sàw de, mɛ̃ a lɛ a Abraham na tɩ sàw de a, ʋl na ɩ a tɩ za sãà a. 17Bʋ̃ʋ n'ʋ vɛ̃, a Sɛb-sõw yel'ɩ à ŋá: «Ɩ̃ ɩ na fʋ ɩ nɩ-bʋʋr-yaga yaga sãà#4:17 Nyɛ̃ Yzt 17.5..» Ʋ ɩ n a tɩ sãà a Naaŋmɩn ʋ na sàw de a niŋé, a Naaŋmɩn ʋl na mɩ́ ɩ a kũuni bɛ vʋʋrɛ a, ɛ́ ɩ a bome na bɛ tɩ be, a be a. 18A Abraham tɩ sàw na de ɛ́ tɩɛrɛ, a na saa tɩ ɩ mɛ̃ zawlalɛ n'a ʋ tɩɛrɛ a. À ŋá n'a ʋ tɩ lɩɛbɩ «nɩ-bʋʋr-yaga sãà», a tu a ƴɛ̀rʋ ŋa a Naaŋmɩn na tɩ ƴɛ̀r kʋ̀ ʋ a: «À ŋá n'a a fʋ bʋʋrɛ nãà yãwmɛ sɛw#4:18 Nyɛ̃ Yzt 15.5..» 19A Abraham tɩ tɛr'a ta yome kʋba (100), ɛcɛ a ʋ naaŋmɩn-sàw-deb bɛ tɩ bàl ɛ, a lɛn daar ʋ na tɩ nyɛ̃ a ʋ ƴã-gan ʋ kpi ʋ za baarɩ a, nɩ a ʋ pɔw Saara ʋ ɩ pɔw-ãan a. 20Ʋ bɛ tɩ bʋnɩ nɩ a lɛ a Naaŋmɩn na yel a ɩ. A ʋ sàw-deb nɩ̃ɛ na lɛb tɩ ɩ ʋ kpɛmɛ ɛ́ danɩ a Naaŋmɩn. 21Ʋ tɩ bãwnɩ a na k'aa Naaŋmɩn tɛr'ɩ fãw na maalɩ a lɛ ʋ na yel a. 22A lɛ n'a so bɛ yel càar'ɩ a Abraham, k'aa ʋ naaŋmɩn-sàw-deb zũú, «Naaŋmɩn sàw na kʋ̀ ʋ k'ʋʋ ɩ n nɩ-mɩŋa#4:22 Nyɛ̃ Yzt 15.6..» 23Ɛcɛ ʋl yõ ƴãw bɛ n'a a ƴɛ̀r-bie á ŋá sɛb k'aa «Naaŋmɩn sàw na kʋ̀ ʋ k'ʋʋ ɩ n nɩ-mɩŋa ɩ.» 24A tɩɩm ƴãw mɩ̀ n'a a sɛb, tɩɩm a na fɛr kɛ́ bɛ nyɛ̃ tɩ ɩ nɩ-mɩn a, tɩɩm na sàw de a Naaŋmɩn na ɩ a tɩ Sore Yeezu ʋ lɛb yi a kũuni pʋɔ a. 25A Naaŋmɩn de ʋ na tɩr a tɩ yel-bebe ƴãw, bɛ kʋ ʋ, ʋʋ ɩ ʋ lɛb yi a kũu pʋɔ kɛ́ tɩ tʋ̃ɔ́ páw a mɩnʋ.

Currently Selected:

Ʋrɔm 4: DBDC

Highlight

Copy

Compare