Yel-wula 2
2
A ƴɛ̀rʋ na ƴɛ̀r kʋ̀ a Efɛɛzɩ tẽw Lãw-yir a
1«Sɛb yel a Efɛɛzɩ tẽw Lãw-yir malkɩ:
À ŋá n'a a sob nɛ na tɛr a ŋmar-bie ayopõi a ʋ dʋrʋ nũú ɛ́ cere a salm-zɩɛ fɩ̃tɩlɩ ayopõi sɔgɔ a yere: 2ɩ̃ bãw nɩ a fʋ tome, a balʋ fʋ na bàl fʋ tʋɔra a, nɩ a fʋ kanyir. Ɩ̃ bãwnɩ a na fʋ̃ʋ nɩ a po-to-dem na kʋ̃ tʋ̃ɔ́ taa a. A bɛl na yel kɛ́ bɛ ɩ n nɩ-toni ɛ́ bɛ ɩ nɩ-toni a, fʋ ɩ bɛ na kaa nyɛ̃ bɛ ɩ zir-ŋmarbɛ. 3Fʋ tɛr'ɩ kanyir, fʋ wõ n tuo a ɩ̃ ƴãw ɛ́ bɛ bàl tɩɛ bɛr ɛ. 4Ɛcɛ, ɩ̃ yere fʋ na: fʋ na bɛ cãà nɔnɛ mɛ̃ mɛ̃ a pɛr-tib daar a. 5A na ɩ lɛ a, lɛb tɩɛrɩ a be za fʋ na yi kɛ́ wa lo a! Lɩɛbɩ a fʋ ɩb ɛ́ lɛb de a fʋ dãwdãw ɩ-ɩrɩ. Fʋ̃ʋ bɛ wa lɩɛbɩ a fʋ ɩb a, ɩ̃ waar'ɩ a fʋ zie, ɩ̃ɩ na wa ír'ɩ a fʋ fɩ̃tɩlɛ a ʋ beba zie bɛr. 6Ɛcɛ yel-vla ŋa n'ʋ fʋ tɛr: fʋ bɛ nɔnɛ a Nɩkolayitɩ mɩnɛ#2:6 Nɩkolayitɩ mɩnɛ: A sɛbɛ ŋa pʋɔ tɛwr'a bɛ ƴɛ̀r a bɛ ƴɛ̀rʋ. Kɩrɩta-biir bʋʋrɛ kãw a wulu na bɛ tori a nɛbɛ. Nyɛ̃ 2.15. tome mɛ̃ a mãa mɩ̀ na bɛ nɔnɛ a a ɩ.
7Sob nɛ na tɛr tobe a, ʋ bɛrɛ wone a ʋlɩ bom nɛ a Naaŋmɩn Vʋʋrʋ na yere kʋ̀rɛ a Lãw-yie a.
Sob nɛ na na zɛb tʋ̃ɔ́ a, ɩ̃ na kʋ̀ ʋ nɩ a nyɔ-vʋʋrʋ tɩɛ wɔmɛ ʋ dɩ, a nyɔ-vʋʋrʋ tɩɛ na àr a Naaŋmɩn zaadɛ̃ pʋɔ a#2:7 Nyɛ̃ Yzt 2.8-9..»
A ƴɛ̀rʋ na ƴɛ̀r kʋ̀ a Sɩmɩɩr tẽw Lãw-yir a
8«Sɛb yel a Sɩmɩɩr tẽw Lãw-yir malkɩ:
À ŋá n'a a niw-diere nɩ a po-pàwrɛ yere, a sob nɛ na tɩ kpi ɛ́ lɛb vʋʋrɛ a: 9ɩ̃ bãw nɩ a fʋ kpɩɛrʋ nɩ a fʋ nã́w, ɛcɛ fʋ nɩ̃ɛ na kpɛ naalʋ! Ɩ̃ bãw nɩ a zʋmɛ a bɛlɩ dem na yel kɛ́ bɛ ɩ n Zifʋ mɩnɛ ɛ́ bɛ ɩ Zifʋ a na tʋʋr fʋ a: Sɩtaana lãw nɩbɛ nɛbɛ. 10Ta zɔrɛ a tuo fʋ na na wõ a dɛ̃bɩ̃ɛ ɩ. Nyɛ̃, a Gɛgɛra na ƴãw nɩ nyɩ mɩnɛ gaso pʋɔ k'ʋʋ ɩ nyɩ kaa, ɛ́ nyɩ na nyɛ̃ nɩ kpɩɛrʋ bibie pie. Taa lɛbr pùor ɛ, ɛ́ tɩ ta a fʋ kũu daar, ɩ̃ɩ na kʋ̀ b'ɩ a zɛb-tʋ̃ɔ́fʋ kpawʋɔ na ɩ a nyɔ-vʋʋrʋ a.
11Sob nɛ na tɛr tobe a, ʋ bɛrɛ wone a ʋlɩ bom nɛ a Naaŋmɩn Vʋʋrʋ na yere kʋ̀rɛ a Lãw-yie a.
Sob nɛ na na zɛb tʋ̃ɔ́ a, a kũu ayi sob bɛ páwr ʋ ɛ.»
A ƴɛ̀rʋ na ƴɛ̀r kʋ̀ a Pɛrgam tẽw Lãw-yir a
12«Sɛb yel a Pɛrgam tẽw Lãw-yir malkɩ:
À ŋá n'a a sob nɛ na tɛr a zɛbr-sɔ-kpɛ̃ɛ na dɩrɛ a loge a za ayi ɛ́ a nʋɔr ɩ ɓɩlɓɩl a yere: 13ɩ̃ bãw nɩ a be fʋ na kpɩɛr a: a be a Sɩtaana naalʋ-dà-kɔw na be a n'a. Ɛcɛ, fʋ ƴãw nɩ fãw tu a ɩ̃ pùor. A bibie al pʋɔ bɛ mɩ̀ na saa tɩ kʋ a ɩ̃ dãsɩ-dɩrɛ Ãtɩpasɩ na bɛ lɛbr pùor a nyɩ zie be a, a be a Sɩtaana na kpɩɛr a, fʋ bɛ sàw de m ɛ́ lɛb wa zawrɩ bɛr ɛ. 14Ɛcɛ, yele blã be n be, ɩ̃ na yere fʋ a al ƴãw: nɩbɛ be n a fʋ zie de a Balaam wulu. A Balaam ŋa n'ʋ tɩ wule a Balakɩ, k'ʋʋ bɛlɩ a Ɩsɩrayɛl nɩbɛ ƴãw bɛ 'wɔb tɩbɛ bàwr-maal-nɛnɛ ɛ́ maalɩ pɩ̃ɔ-yele. 15A fʋ zie mɩ̀ a, nɩbɛ be n be de a Nɩkolayitɩ mɩnɛ wulu. 16A na ɩ à ŋá a, lɩɛbɩ a fʋ ɩb. Alɛ bɛ ɩ lɛ a, ɩ̃ kʋ̃ yaa kɛ́ wa a fʋ zie ɩ, ɩ̃ɩ na zɛb'ɩ nɩ a nɩbɛ bɛl nɩ a zɛbr-sɔ-kpɛ̃ɛ na be a ɩ̃ nʋɔrɩ́ a.
17Sob nɛ na tɛr tobe a, ʋ bɛrɛ wone a ʋlɩ bom nɛ a Naaŋmɩn Vʋʋrʋ na yere kʋ̀rɛ a Lãw-yie a.
Sob nɛ na na zɛb tʋ̃ɔ́ a, ɩ̃ na kʋ̀ ʋ nɩ mãan-sɔwla. Ɩ̃ mɩ̀ na kʋ̀ ʋ nɩ kʋsɛ-pla, ɛ́ yo-paala sɛb a kʋsɩɛr zu, yo-paala nɩr za na bɛ bãw, a bɛ ɩ a sob nɛ na páw ʋ a ɩ.»
A ƴɛ̀rʋ na ƴɛ̀r kʋ̀ a Tɩatɩɩr tẽw Lãw-yir a
18«Sɛb yel a Tɩatɩɩr tẽw Lãw-yir malkɩ:
À ŋá n'a a Naaŋmɩn Bie yere, ʋl a mimie na ɩ mɛ̃ vũu-'lera ɛ́ a gbɛ́ɛ nyɩwrɛ mɛ̃ kur-zɩɛ bɛ na kàr a. 19Ɩ̃ bãw nɩ a fʋ tome, a fʋ nɔ̃wfʋ, a fʋ sàw-deb, a nɩbɛ sõwfʋ tɩɛrʋ fʋ na tɛr a, nɩ a fʋ kanyir. A tome fʋ na bɩɛrɩ tõ a, a yãwmɛ na zuo a al fʋ na de niwn tõ a. 20Ɛcɛ, yel ŋa ƴãw n'a ɩ̃ yere fʋ: fʋ bɛr'ɩ a Zezabɛl#2:20 Zezabɛl: A ka a, a yúor ŋa pɛr'ɩ nɩr na bɛ tu a Naaŋmɩn a. Nyɛ̃ 1Na 16.31, 19.1-2, 2Na 9.22., a pɔw ŋa na yel k'ʋʋ ɩ n naaŋmɩn-ƴɛ̀r-manɛ ɛ́ tule a ɩ̃ tõ-tõ-biir, ɛ́ wule bɛ bɛ maalɛ a pɩ̃ɔ-yele ɛ́ 'wɔbr a tɩbɛ bàwr-maal-nɛnɛ a. 21Ɩ̃ bɛr'ɩ vuo kʋ̀ ʋ k'ʋʋ lɩɛbɩ a ʋ ɩb, ɛcɛ, ʋ bɛ bɔbr k'ʋʋ lɩɛbɩ a ʋ ɩb, bɛr a ʋ pɩ̃ɔ-yele ɩ. 22Lɛ so ɩ̃ na lɔb ʋ dɔwlɩ kpɩɛrʋ na bɛ tɛr manʋ a gado zu, ʋlɛ nɩ a bɛlɩ dem na lãw maalɛ a pɔw-gaa yel-bebe a, bɛlɛ bɛ wa bɛr a ɩ-faar ʋ na wule bɛ a. 23Ɩ̃ mɩ̀ na kʋ n a ʋ bibiir. Lɛ n'a a Lãw-yie za na bãw kɛ́ mãa n'ɩ a sob nɛ na jɛlɛ a pʋʋr, ɛ́ bãw a nɩsaalbɛ tɩɛrʋ a. Ɩ̃ na mɩ́ ya n a nyɩ za been been man nɩ a ʋ tome.
24Ɛcɛ, a nyɩɩm na be a Tɩatɩɩr ɛ́ bɛ tu a wul-ziri ŋa pùor, ɛ́ bɛ zànɩ a ʋlɩ bom nɛ a nɩbɛ bɛ ŋa na bʋɔlɛ a “Sɩtaana yel-sɔwlɩ sɔwlɩ” a, ɩ̃ yere nɩ à ŋá kʋ̀rɛ nyɩ: ɩ̃ bɛ lɛb dɔwlɛ nyɩ tuor ƴãw pʋɔ ɩ. 25Ɛcɛ, a ʋlɩ bom nɛ nyɩ na tɛr a, nyɩ ƴãw fãw fɩɩr'ʋ tɛr ɛ́ gù ɩ̃ wa wa.
26-28Sob nɛ na na zɛb tʋ̃ɔ́, ɛ́ tõ a ɩ̃ tome tɩ ta n a baarʋ daar a, ɩ̃ na kʋ̀ ʋ nɩ fãw a nɩ-bʋʋrɛ zu, mɛ̃ a lɛ a mãa mɩŋa na páw fãw a ɩ̃ Sãà zie a. Gãda-ɩb'a ʋ na tɛr kaarɛ nɩ a bɛ zie, ɛ́ mɩ́ ŋmɛr bɛ bɛr mɛ̃ yawra bʋ̃-mɩɛrɩ a. Ɩ̃ mɩ̀ na kʋ̀ ʋ nɩ a zi-vɩɛ-ŋmara.
29Sob nɛ na tɛr tobe a, ʋ bɛrɛ wone a ʋlɩ bom nɛ a Naaŋmɩn Vʋʋrʋ na yere kʋ̀rɛ a Lãw-yie a.»
Currently Selected:
Yel-wula 2: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
