Yel-wula 11
11
A dãsɩɛ dem ayi yele
1Bɛ tɩ kʋ̀ m'ɩ bàa-kɛkɛr na ɩ mɛ̃ dali-mána a, ɛ́ yel mɛ̃: «Ìr cen tɩ manɩ a Naaŋmɩn yir nɩ a bàwr-maal-kuur za, ɛ́ sɔ́r a bɛlɩ dem na gbine dume puore a Naaŋmɩn a be a. 2Ɛcɛ, bɛr a Ŋmɩn-yir yẽw davʋra. Taa manɛ ʋ ɛ, bʋ̃ʋ n'ʋ vɛ̃, bɛ bɛr ʋ na kʋ̀ a nɩ-bʋʋr-yoru, bɛ na nɛb a tẽ-sõw tɩ ta cuwr lɩz'a ayi nɩ ayi. 3Ɩ̃ na ƴãw na a ɩ̃ dãsɩɛ dem ayi su ko-tuolu bʋ̃-suuri manɛ nɩ a ɩ̃ ƴɛ̀rʋ, bibie túr dɔwlɩ kɔbr ayi lɩz'a ata (1 260).»
4A dãsɩɛ dem ayi ɩ n a olivʋ tɩɩr ayi, nɩ a fɩ̃tɩlɩ ayi na àr a tẽw za Sore niŋé a. 5Nɩr wa bɔbr k'ʋʋ mal bɛ a, vũu mɩ́ yi n a bɛ nʋɔrɩ́ dɩ a bɛ dɔ̃ dem. À ŋá n'a nɩr za na bɔbr k'ʋʋ mal bɛ a na kpi. 6Bɛ tɛr'ɩ fãw na tʋ̃ɔ́ nyɔw a saa tɛr ʋ ta wa ɩ, a bibie al bɛ na manɛ a Naaŋmɩn ƴɛ̀rʋ a. Bɛ mɩ̀ tɛr'ɩ fãw na tʋ̃ɔ́ ɩ a kʋ̃ɔ a lɩɛbɩ zɩ̃ɩ, ɛ́ ɩ bʋ̃-faar bʋʋrɛ za a páw a tẽw, sɛw lɛ za bɛ na bɔbr a.
7Bɛlɛ wa dɩ a bɛ dãsɩɛ baar'a, a dʋ̃w na yi a kɔ̃tɔmɛ dɔwrʋ bɔw-zulu pʋɔ dúor a na zɛb'ɩ bɛ na, ʋ na tʋ̃ɔ́ bɛ na ɛ́ kʋ bɛ. 8A bɛ kũuni na gã nɩ a tẽ-kpɛ̃ɛ laɩ pʋɔ, a be bɛ na kpa a bɛ Sore a da-gara zu a. Bɛ bʋɔlɛ nɩ a tẽw ʋl kɛ́ Sodɔm nɩ Eziptɩ, ʋ ɩ zʋkpar'ʋ bɛ mɩ́ lɔb. 9Nɩbɛ na yi bʋʋrɛ za, dɔwlʋ za, ƴɛ̀r-pɛ-bʋʋrɛ za nɩ tẽw za pʋɔ a na jɩ́r'ɩ a bɛ kũuni bibie ata nɩ ŋmãa, ɛ́ kʋ̃ sàw bɛ ũù a ɩ. 10Nʋ̃ɔ̀ na ɩrɛ nɩ a tẽw zu nɩbɛ a nɩbɛ bɛ ŋa kũu ƴãw. Bɛ na cɩlɛ na kʋ̀rɛ nɩ taa bome, bʋ̃ʋ n'ʋ vɛ̃, a ƴɛ̀r-manbɛ bɛ ŋa ayi tɩ dɔwrɩ bɛ nɩ yaga.
11Ɛcɛ, a bibie ata nɩ ŋmãa á ŋá pùorí a, nyɔ-vʋʋrʋ pɩɛlʋ na yi Naaŋmɩn zie a tɩ kpɛ n a bɛ pʋɔ bɛ ìr àr. Lɛ n'a dɛ̃bɩ̃ɛ yaga tɩ ɩrɛ a bɛlɩ dem za na nyɛ̃ bɛ a. 12Bɛ tɩ wõ n kɔkɔr-kpɛ̃w ʋ ƴɛ̀rɛ a salom zu a bɛ zie yere: «Nyɩ do wa ka!» Bɛ tɩ do n a salom zu zũzuwr pʋɔ, a bɛ dɔ̃ dem mimié. 13A ʋlɩ pɛr nɛ pʋɔ, a tẽsɔw-kɔbr tɩ dam'ɩ faa faa. A tẽ-kpɛ̃ɛ na põ ziir pie a zi-been tɩ lo na, nɩbɛ túr ayopõi (7 000) kpi a tẽsɔw-kɔbr damnʋ ŋa pʋɔ. Pʋl-vʋ̃ɔ tɩ tɛr'ɩ a bɛl na cɛ a, bɛ danɛ a Naaŋmɩn a be salom zu a.
14A zu-bio ayi sob tɔl'a, ɛ́ a zu-bio ata sob'ɩ ŋan tarɛ fɔ̃w fɔ̃wlɛ.
A wɩɩr ayopõi sob pɛblʋ
15A malkɩ ayopõi sob tɩ pɛbl'ɩ a ʋ wɩ́ɛ. Kɔkɔ-kpɛn tɩ ƴɛ̀rɛ na yire a salom zu yere: «A tɩ Sore pãa so a naalʋ-dɩb a tẽ-daa zu, ʋlɛ nɩ a ʋ Kɩrɩta, ʋʋ na dɩrɛ nɩ naalʋ yome yome za!» 16A nɩ-kore lɩzɛr'ɩ anaar na zɩ̃ a bɛ naalʋ-dà-kɔwr zuru, a Naaŋmɩn niŋé a, tɩ lo na vɔblɩ muru puori a Naaŋmɩn nɩ bɛ tʋɔra-siwru, 17yere nɩ:
«Tɩ puore fʋ nɩ yãanɩ,
Sore Naaŋmɩn kpɛnʋ-za-sob i,
fʋ̃ʋ na be ɛ́ dãw be a,
fʋ sɩrɩ na wul a fʋ fãw kpɛ̃ɛ
ɛ́ zɩɩlɩ a fʋ naalʋ.
18A ten ten nɩbɛ nyɛ̃ nɩ suur,
ɛcɛ, ƴɛrɛŋa a, a fʋ suur ìr'a.
A kũuni ƴɛ̀rʋ maalʋ daar ta na.
A daar ʋl fʋ na na kʋ̀ a sã-ya
a fʋ tõ-tõ-biir, a ƴɛ̀r-manbɛ,
nɩ a bɛlɩ dem za fʋ na so,
ɛ́ bɛ zɔrɛ fʋ a,
a bɛrɛ lãwnɩ a pʋrmɛ.
A bɛlɩ dem na sãwnɛ a tẽw a,
a bɛ sãwfʋ daar'a ta!»
19Lɛ n'a a Ŋmɩn-yir na be a salom zu a tɩ yuo, ɛ́ a Wõ-taa daga sãá a ʋ pʋɔ. A tɩ ɩ n saa-nyɩwrʋ, kɔkɛɛ gɔmɛ, saa tanʋ, tẽsɔw-kɔbr damnʋ nɩ sa-bi-kube na lo yaga za a.
Currently Selected:
Yel-wula 11: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
