Sɛb-sõw yielu 9
9
Sɛb-sõw yielu 9 sob
A Sore n'ɩ a nan dem nɩ a bɛlɩ dem bɛ na dɔwrɛ a faarɛ
1A yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. Bɛ mɩ́ ŋmɩɛr'ɩ bʋ̃-ŋmɩɛrɩ ƴãwn. Daviir yielu kãw n'ʋ.
2Sore e, ɩ̃ na puore fʋ nɩ barka nɩ ɩ̃ pʋɔ za,
ɩ̃ na lɛb'a manɛ a fʋ nɔ-ɓãa-yele za.
3Nʋ̃ɔ̀ na ɩrɛ mɛ̃ na, ɩ̃ɩ cɩlɛ a fʋ ƴãw,
ɩ̃ na yiele na íre nɩ a fʋ yúor,
fʋ̃ʋ Naaŋmɩn-na-do-saa-bɛ-pɩɛl-a.
4A ɩ̃ dɔ̃ dem lɩɛb'a zɔ,
bɛ kaw na tɩ lo kpi a fʋ niŋé.
5Fʋ kpɛ m'a, fʋ dɩ n a ƴɛ̀rʋ vla kʋ̀ m.
Fʋ zɩ̃ n a fʋ naalʋ-dà-kɔw zu,
ɩ ƴɛ̀r-dɩrɛ na tuur yel-mɩŋa a.
6Fʋ dɔwr'ɩ a nɩ-bʋʋr-yoru,
fʋ ɩ na a nɩ-faar kpi,
a bɛ yúor bɛ cãà pore dɩ̃a nɩ bio ɛ.
7A dɔ̃ sob yele baar'a,
ʋ bɛ lɛb tɛr ɩb za towtow ɛ.
Fʋ ŋmɛr'ɩ tẽ-bɛrɛ bɛr, bɛ yiir'ɩ a yele.
8Ɛcɛ a Sore dɩrɛ nɩ naalʋ kʋralɛ,
ʋ bà n a ʋ naalʋ-dà-kɔw a ƴɛ̀rʋ-dɩb ƴãw.
9Ʋlɛ n'ʋ dɩrɛ nɩ a tẽ-daa a ƴɛ̀rʋ nɩ mɩnʋ,
ɛ́ mɩ́ bãw a nɩ-bʋʋrɛ yele kʋ̀ bɛ a tu sɔ́r.
10A Sore n'ɩ a sob nɛ bɛ na dɔwrɛ a sɔwlʋ zie,
a sɔwlʋ zie a kpɩɛrʋ daar.
11A bɛlɩ dem na bãw fʋ a,
bɛ́ ɩrɛ ƴãwn a fʋ ƴãw!
Sore e, fʋ bɛ zawrɛ a bɛlɩ dem
na bɔbr fʋ a bɛrɛ ɩ.
12Nyɩ yiele danɛ nɩ a Sore
na kpɩɛr a Sɩyɔ̃ tẽw pʋɔ a,
nyɩ manɛ a ʋ tõ-bɛrɛ a nɩ-bʋʋrɛ sɔgɔ,
13bʋ̃ʋ n'ʋ vɛ̃, ʋ mɩ́ sowr'ɩ a nɩ-kʋrbɛ a san,
ʋ mɩ́ tɛr'ɩ a nɩbɛ bɛ na kʋ a tɩɛrʋ,
ʋ bɛ yiire a kpɩɛrʋ dem
na kone cɔwr ʋ a bɛrɛ ɩ.
14Sore e, zɔ ɩ̃ nɩbaalʋ!
Nyɛ̃ a kpɩɛrʋ a ɩ̃ dɔ̃ dem na ɩ k'ɩ̃ nyɛrɛ a,
fʋ̃ʋ na na tʋ̃ɔ́ faa mɛ̃ a kũu nuru pʋɔ a.
15Lɛ n'a ɩ̃ na danɩ fʋ a dan-bʋʋrɛ za, a Sɩyɔ̃ tẽw pʋɔ,
ɛ́ cɩlɛ ƴawr'ɩ, fʋ na faa mɛ̃ a ƴãw.
16A nɩ-bʋʋr-yoru lo n a bɔw-zulu bɛ na tuw a pʋɔ,
a bɛ gbɛ́ɛ mɩl'ɩ a mɩ̃ɛ bɛ na sɔwlɩ a.
17A Sore ɩ na bɛ bãw ʋ,
ʋ dɩ n a ƴɛ̀rʋ,
a nɩ-faa lɛb'a kpɛ
a ʋ mɩŋa bɛra pʋɔ. bàalʋ bàalʋ ŋmɛb Tɛw-àrʋ
18A nɩ-faar, bɛ lɛb cen a kpɩmɛ tẽw,
a nɩ-bʋʋr-yoru bɛ ŋa za na yiiri a Naaŋmɩn bɛr a.
19Ɛcɛ Naaŋmɩn bɛ yiire a nã́w sob bɛrɛ ɩ,
a su-siwri dem tɩɛrʋ bɛ be nãà wɛ ɩ.
20Sore e, ìr!
Ta sàw a nɩsaal tʋ̃ɔ́ ɩ!
A nɩ-bʋʋr-yoru ƴɛ̀rʋ,
ʋ dɩ a fʋ niŋé!
21Ɩ kɛ́ dɛ̃bɩ̃ɛ ɩrɛ
a nɩ-bʋʋr-yoru,
Sore e,
bɛ bãwnɩ a bɛ na ɩ
nɩsaalbɛ tɛwr a.
La Bible en Dagara © Alliance Biblique du Burkina Faso, 2013.