Sɛb-sõw yielu 80
80
Sɛb-sõw yielu 80 (79) sob
Ɩsɩrayɛl cɩ̃ɩnɛ ɛ, bɛrɛ wone
1Yiel-yielbɛ nɩ-kpɛ̃ɛ sɛbɛ pʋɔ yielu. Sɛb-sõw yielu Asafʋ na maalɩ a. Fomie bʋ̃-ŋmɩɛrɩ n'a bɛ mɩ́ ŋmɩɛr ƴãwn.
2Ɩsɩrayɛl cɩ̃ɩnɛ ɛ, bɛrɛ wone.
Fʋ̃ʋ na kparɛ a fʋ nɩ-bʋʋrɛ cere nɩ mɛ̃ dʋn a,
fʋ̃ʋ a naalʋ-dà-kɔw na be
a seribɛ̃ mɩnɛ zu-sɔw a, sãá nyɩwrɛ.
3Wul a fʋ kpɛnʋ ɛ́ wa faa tɩ,
a Efarayim, Bɛ̃zamɛ nɩ Manase dɔwlʋ nɩbɛ niŋé.
4Naaŋmɩn i, ɩ tɩ lɛb wa,
tɛr nĩw-vla a tɩ ƴãw, ɛ́ tɩ na nyɛ̃ nɩ a faafʋ.
5Sore Naaŋmɩn kpɛnʋ-za-sob i,
debor daar'a a fʋ nɩbɛ na puore fʋ,
ɛ́ fʋ nyɛ̃ nɩ bɛ suur tɩ ta?
6Mʋta-kʋ̃ɔ dɩb'a fʋ mɩ́ kʋ̀ bɛ,
ɛ́ ƴãw bɛ nyũ mʋta-kʋ̃ɔ yaga yaga za.
7Fʋ mɩ́ ɩ na a tɩ sɩman dem zɛbr'ɩ tɩ taa,
ɛ́ a tɩ dɔ̃ dem so tɩ ɩrɛ laar.
8Naaŋmɩn-kpɛnʋ-za-sob i, ɩ tɩ lɛb wa,
tɛr nĩw-vla a tɩ ƴãw, ɛ́ tɩ na nyɛ̃ nɩ a faafʋ.
9Divɛ̃ tɩɛ#80:9 Divɛ̃ tɩɛ: A Naaŋmɩn nɩ-bʋʋrɛ nɛbɛ bɛ mɩ́ de man nɩ a divɛ̃ tɩɛ. kãw tɩ be n Eziptɩ tẽw,
fʋ tɩ vʋ̃ɔ ʋ nɩ a be,
wa diw nɩ-bʋʋr-yoru bɛ ìr ɛ́ fʋ sɛl ʋ.
10Fʋ maal'ɩ a zie bɛr a ʋ niŋé,
ʋ tɛ n nyɩgɛ, ɛ́ tɔm pàw a tẽw za.
11A ʋ ɓaarʋ pàw nɩ a tan,
ɛ́ a wuli pàw a sɛɛdɩr tɩ-bɛrɛ bɛrɛ.
12Ʋ zɔ n gbɛ́ɛ bɛr a tɩ tɔ a kʋ̃ɔ-kpɛ̃ɛ,
ɛ́ a wuli-tɔm-paalɛ tɩ tɔ a Efaratɩ man.
13Bʋ̃ʋ n'ʋ so fʋ sãw a ʋ dàbáw bɛr,
a sɔr-tɔlbɛ za pɔrɛ a ʋ wɔmɛ?
14A tuw pʋɔ duo sãwnɛ ʋ na bɛrɛ,
ɛ́ a mʋ̃ɔ pʋɔ dʋn 'wɔbr ʋ báarɛ.
15Naaŋmɩn kpɛnʋ-za-sob i, lɛb wa!
Be a salom zu ɛ́ bɛl nyɛ̃ a,
kaa a divɛ̃ tɩɛ ŋa zie.
16Gùre a bom fʋ̃ʋ mɩŋa na sɛl a,
a nɩ-bʋʋrɛ bɛ ŋa fʋ na ɩ bɛ kpɛmɛ a.
17A divɛ̃ tɩɛ ŋa a, bɛ nyɩw ʋ na bɛr, ɛ́ cɛ̀ ʋ bɛr,
sãw niwn ƴãw bɛ bɛ bɔr!
18Ír a fʋ nũu dɔwlɩ a nãà na zɩ̃
a fʋ dʋrʋ lowr a zu, a nɩr ŋa fʋ na ɩ k'ʋ kpɛmɛ a.
19Lɛ n'a tɩ kʋ̃ cãà pɩlɛ fʋ ɛ,
fʋ na lɛb'a kʋ̀ tɩ a nyɔ-vʋʋrʋ,
ɛ́ a fʋ yúor'ʋ tɩ na bʋɔlɛ.
20Sore Naaŋmɩn kpɛnʋ-za-sob i, ɩ tɩ lɛb wa,
tɛr nĩw-vla a tɩ ƴãw, ɛ́ tɩ na nyɛ̃ nɩ a faafʋ.
La Bible en Dagara © Alliance Biblique du Burkina Faso, 2013.