Sɛb-sõw yielu 78
78
Sɛb-sõw yielu 78 (77) sob
A Ɩsɩrayɛl nɩbɛ yel-kore na ɩ wulu a
1Asafʋ yielu na wule yã a.
Ɩ̃ nɩbɛ ɛ, nyɩ bɛrɛ wone a ɩ̃ wulu,
nyɩ ƴãw tobr a ɩ̃ ƴɛ̀rʋ ƴãw.
2Ɩ̃ na háa nɩ a nʋɔr lɔb zʋkpaɩ,
ɛ́ ɩ a wulu na be a koro za yele pʋɔ a, a sãá.
3Bɛ manɩ nɩ a koro za yele tɩ wõ, tɩ bãw a na.
A tɩ sãà mɩnɛ man a na kʋ̀ tɩ.
4Tɩ kʋ̃ sɔwl'a a tɩ bibiir zie ɩ.
A yele a Sore na maalɩ a ʋ yúor yi a,
a ʋ kpɛnʋ, nɩ a nɔ-ɓãa-yele ʋ na maalɩ a,
tɩ na man nɩ a za kʋ̀ a nɩbɛ na bɩ́ɛrɛ dɔwr a.
5Ʋ ƴãw nɩ nɛ́ɛ kʋ̀ a Zakɔb bʋʋrɛ,
ʋ tɩr'ɩ wulu a Ɩsɩrayɛl tẽw pʋɔ.
Ʋ ƴãw nɩ nʋɔr kʋ̀ a tɩ sãàkʋm-kore,
kɛ́ bɛ ɩ a bɛ bibiir bãw a yele á ŋá.
6À ŋá n'a a nɩbɛ na bɩ́ɛrɛ dɔwr a,
a bibiir na na dɔw a na bãw a yele á ŋá,
ɛ́ man a kʋ̀ a bɛ mɩ̀ bibiir.
7Lɛ n'a a bɛ bibiir bibiir
na ƴãw a bɛ tɩɛrʋ a Naaŋmɩn ƴãw.
Bɛ kʋ̃ yiiri a ʋ gãda-tome bɛr ɛ,
bɛ na sàwr'ɩ a ʋ nɛ-ƴãwnɩ.
8A lɛn daar a, bɛ kʋ̃ ŋmɛ̃ taa nɩ
a bɛ sãàkʋm-kore daar nɩbɛ
na zawr'ɩ a Naaŋmɩn nʋɔr ɛ́ gaarɩ a ɩ.
A bɛ tɩɛrʋ tɩ lɩɛbɛ nɩ kʋralɛ, ɛ́ bɛ tu a Naaŋmɩn ɛ.
9A Efarayim dɔwlʋ nɩbɛ tam-tɛbrbɛ,
tɩ lɩɛb'a zɔ a zɛbr bibir.
10Bɛ bɛ tɩ sàw a Naaŋmɩn wõ-taa ɩ,
bɛ tɩ zawr'ɩ a wulu deb.
11Bɛ tɩ yiir'ɩ a ʋ gãda-tome,
nɩ a nɔ-ɓãa-yele ʋ na tɩ maalɩ bɛ nyɛ̃ a.
12A Naaŋmɩn tɩ maal'ɩ nɔ-ɓãa-yele,
a bɛ sãàkʋm-kore mimié,
a Eziptɩ tẽw, Tanisɩ#78:12 Tanisɩ: Tẽ-kpɛ̃ɛ na be a Eziptɩ tẽw saa-pɛrɩ́-gʋba-lowr nɩ saa-pɛrɩ́ cara pʋɔ a n'ʋ. Bɛ mɩ̀ bʋɔlɛ ʋ nɩ Sowan. vuo pʋɔ.
13Ʋ ɓar'ɩ a kʋ̃ɔ-kpɛ̃ɛ ƴãw bɛ gãw,
ɛ́ ɩ a kʋ̃ɔ ìr àr mɛ̃ dacĩ-kpɛ̃ɛ a.
14Zũzuwr'ʋ ʋ mɩ́ tɩ wule nɩ bɛ a sɔ́r a mʋ̃tɔ̃w,
ɛ́ a tɩ̃ɩsɔw ʋ wule nɩ bɛ vũu cãà.
15Ʋ tɩ ɓar'ɩ pie a wɛja-kpalɛ pʋɔ,
kʋ̀ bɛ kʋ̃ɔ a bɛ dɩ vuo ɩ, bɛ nyũ.
16Ʋ tɩ ɩ na bà-gbɛ́ɛ yi a pìir pʋɔ,
mamɛ kʋ̃ɔnɩ darɛ taa.
17Ɛcɛ bɛ tɩ cãà na maalɛ a yel-bebe
a wɛja-kpalɛ kõw ŋa pʋɔ,
ɛ́ zɛbr'ɩ a Naaŋmɩn-na-do-saa-bɛ-pɩɛl-a.
18Bɛ tɩ sʋ̃ɔm'a bul ɩ a Naaŋmɩn kaa,
yel k'ʋʋ kʋ̀ bɛ bʋ̃-dɩrɩ bɛ dɩ tɩw.
19Bɛ tɩ ƴɛ̀r'ɩ faa a ʋ zie yel:
«A Naaŋmɩn na tʋ̃ɔ́ na
cɔbrɩ dɩb kʋ̀ tɩ a wɛja-kpalɛ pʋɔ ɔ?
20Yel-mɩŋa n'a, ʋ ŋmɛ n a pìir,
ɩ kʋ̃ɔ yi bɛ dɩ vuo ɩ, cuure.
Ɛcɛ ʋ mɩ̀ na tʋ̃ɔ́ na kʋ̀ tɩ dipɛ̃,
ɛ́ dʋw nɛn kʋ̀ a ʋ nɩ-bʋʋrɛ ɛ?»
21A Sore tɩ wõ a na, nyɛ̃ suur,
nyɛ̃ nɩ a Zakɔb bʋʋrɛ suur.
A ʋ suur tɩ ìr'ɩ a Ɩsɩrayɛl nɩbɛ ƴãw.
22Bʋ̃ʋ n'ʋ vɛ̃, a ʋ nɩbɛ
bɛ tɩ ƴãw a bɛ tɩɛrʋ a ʋ ƴãw ɛ,
bɛ bɛ tɩ sàw k'ʋʋ na tʋ̃ɔ́ na faa bɛ ɩ.
23Ɛcɛ ʋ tɩ ƴɛ̀r'ɩ a zũzuge zie,
ʋ tɩ yuo nɩ a salom dɩ̃dɛɛ,
24ʋ tɩ ɩ na a mãan wa mɛ̃ saa a, a bɛ guolu ƴãw,
ʋ kʋ̀ bɛ nɩ a salom zu dɩb.
25Ʋ tɩ kʋ̀ bɛ nɩ bʋ̃-dɩrɩ sɛw lɛ za bɛ na bɔbr a,
a nɩsaalbɛ tɩ 'wɔb'ɩ a malkɩ mɩnɛ dipɛ̃.
26A pùorí, a Naaŋmɩn tɩ ɩ na
a saa-pɛrɩ́ sɛsɛb cɛ̀r a salom zu,
ɛ́ fɛr a saa-pɛrɩ́-gʋba-lowr sɛsɛb ƴãw ʋ fure,
27ʋ tɩ ɩ na nɛn wa ƴãw bɛ mɛ̃ saa a,
yãwmɛ mɛ̃ a uuru a,
lili yãwmɛ bɛ dɩ vuo ɩ, mɛ̃ kʋ̃ɔ-kpɛ̃ɛ nʋɔr biire a.
28Ʋ tɩ ɩ na a lo a bɛ laɩ sɔgɔ,
a lo pàw a bɛ pɛnɛ-sɛwr.
29Bɛ tɩ dɩ na tɩ tɩw tɩw tɩw,
a Naaŋmɩn tɩ kʋ̀ bɛ nɩ a ʋlɩ bom nɛ bɛ na bɔbr a.
30Ɛcɛ, bɛ bɛ tɩ dɩ baarɩ sɛr ɛ,
bɛ tɩ cãà na ƴãw a bʋ̃-dɩrɩ a nʋɔrɩ́,
31ɛ́ a Naaŋmɩn suur ìr a bɛ ƴãw.
Ʋ tɩ kʋ n a nɩ-kpɛn kpɛn,
ʋ tɩ ŋmɛ n a Ɩsɩrayɛl pɔ́lɛ́ lɔb.
32A na saa tɩ ɩ à à ŋá a,
bɛ tɩ cãà na maalɛ a yel-bebe,
bɛ cãà bɛ tɩ sàw tɩɛrɛ a nɔ-ɓãa-yele
a Naaŋmɩn na maalɩ a ɩ.
33Lɛ n'a ʋ tɩ ɩ a bɛ bibie a bɔr mɛ̃ sɛsɛb a,
ɛ́ a bɛ yome baarɩ pʋl-vʋ̃ɔ pʋɔ.
34A Naaŋmɩn na mɩ́ tɩ kʋrɛ bɛ a,
bɛ mɩ́ tɩ lɩɛb'ɩ niwn cɔw ʋ,
bɛ mɩ́ tɩ lɛb'a wa a ʋ zie, bɛ mɩ́ tɩ bɔbr'ɩ a ʋ sõwfʋ.
35Bɛ mɩ́ tɩ lɛb'a bãwnɩ a Naaŋmɩn na ɩ a bɛ pìir a,
a Naaŋmɩn-na-do-saa-bɛ-pɩɛl-a na ɩ a bɛ faarɛ a.
36Ɛcɛ nʋɔr'ʋ bɛ mɩ́ tɩ bɛlɛ nɩ ʋ,
a bɛ ƴɛ̀rʋ bɛ mɩ́ tɩ ɩ sɩza ɩ.
37Bɛ bɛ tɩ tu ʋ nɩ bɛ pʋɔ za ɩ,
bɛ bɛ tɩ tuur a ʋ wõ-taa ɩ.
38Ɛcɛ ʋl na ɩ su-ɓaarʋ sob a, ʋ mɩ́ tɩ dɩ n
a bɛ sãwna suur kʋ̀ bɛ, ɛ́ bɛ ɩ bɛ kpi ɛ.
Kʋralɛ, ʋ mɩ́ tɩ vɔl'ɩ suur,
ʋ bɛ mɩ́ tɩ sàw bɛr a ʋ suur ʋ ìr ɛ,
39ʋ mɩ́ tɩ lɛb'a bãwnɩ a bɛ na ɩ nɩsaalbɛ tɛwr'a,
pɩɛlʋ na tɔlɛ ɛ́ bɛ lɛbr waar a.
40Gb'a a ŋmɩn za, a wɛja-kpalɛ pʋɔ a,
bɛ bɛ tɩ sàw a ʋ nɩ-kpɛ̃ɛnʋ a bɛ zu ɛ,
bɛ tɩ sãwnɛ nɩ a ʋ pʋɔ a zi-kon á ŋá pʋɔ.
41Bɛ tɩ lɛb'a maal tĩ ɩrɛ a Naaŋmɩn kaar,
ɩrɛ a Ɩsɩrayɛl Naaŋmɩn, na ɩ sõw a, ʋ tɛr pʋ-sãwna.
42Bɛ tɩ yiir'ɩ a ʋlɩ bom nɛ ʋ na ɩ a,
a lɛn daar ʋ na tɩ faa bɛ a dɔ̃ sob nuru pʋɔ a.
43Bɛ tɩ yiir'ɩ a yele ʋ na maalɩ
a ɩ bãwfʋ a Eziptɩ tẽw pʋɔ a,
a nɔ-ɓãa-yele ʋ na tɩ maalɩ a Tanisɩ#78:43 Nyɛ̃ 78.12 nɩ a manʋ. vuo pʋɔ a:
44a bɔw-wɛrɩ kʋ̃ɔ na tɩ lɩɛbɩ zɩ̃ɩ,
a Eziptɩ tẽw dem kʋ̃ tʋ̃ɔ́ nyũ a.
45Ʋ tɩ ɩ na nakpon wa wa dʋnɛ a nɩbɛ,
ɛ́ lɔn wa wa sãw a tẽw za.
46Ʋ tɩ ɩ na sãsow-nãa-nʋrɩ só a bɛ bʋ̃-kʋ́ɔrɩ,
sãsoge só a bɛ tome tɔnɛ.
47Ʋ tɩ sãw nɩ a bɛ divɛ̃ tɩɩr bɛr nɩ sa-bi-kube,
ɛ́ sãw a bɛ sɩkomɔɔr#78:47 Sɩkomɔɔr tɩɩr: Nyɛ̃ 1Na 10.27 nɩ a manʋ. tɩɩr bɛr
nɩ saa na wa tɩ zuo a.
48Sa-bi-kube tɩ só a bɛ nĩi nɩ a bɛ píir,
saa tɩ só a bɛ dʋn tanɛ kʋrɛ.
49Naaŋmɩn tɩ bɛr'ɩ a ʋ suur k'ʋ ìr
a Eziptɩ tẽw dem ƴãw,
a ʋ suur na tɩ 'lere mɛ̃ vũu a, su-tʋlʋ,
ʋ bɛ tɩ nyɔw a ʋ suur ɛ, ʋ tɩ tõ n malkɩ mɩnɛ
na ƴãwnɛ wahala a bɛ wa a bɛ ƴãw.
50Ʋ tɩ tõ n a ʋ suur tome,
ʋ bɛ tɩ gù a Eziptɩ tẽw dem a kũu ƴãw ɛ,
ʋ tɩ bɛr bɛ na kʋ̀ a jɛ̀lmɛ̃ bàalʋ.
51Naaŋmɩn tɩ kʋ n a bɛ bidɛb-dãw-dɔwrɩ,
a bɛ dɛpaal-biir nɩ a bɛ pɔwsɩ-biir
a Kam#78:51 Kam: A Nowe bidɛbr ata ƴen sob'ʋ. Nyɛ̃ Ety 7.13, 10.6-20. Ʋ tɩ ɩ n a Eziptɩ tẽw nɩbɛ sãàkʋm. pɛnɛ-sɛwr pʋɔ.
52Al pùorí, ʋ tɩ ɩ a ʋ nɩbɛ yi
mɛ̃ dʋn na yire zaw pʋɔ a.
Ʋ tɩ tɛr'ɩ a ʋ nɩbɛ kpɛ n a wɛja-kpalɛ pʋɔ,
mɛ̃ píir nɩr na kparɛ a.
53Ʋ tɩ tɛr bɛ na cen nɩ, bom za bɛ dam bɛ ɩ,
dɛ̃bɩ̃ɛ za bɛ ɩ bɛ ɩ,
ɛ́ a man kʋ̃ɔ tɩ paalɩ pàw a bɛ dɔ̃ dem.
54Al pùorí, ʋ tɩ tɛr bɛ na kpɛ n a ʋ Tẽ-sõw pʋɔ,
ʋ tɩ tɛr bɛ na ta n a tãw ʋ na zɛb de a zu.
55Ʋ tɩ diw nɩ nɩ-bʋʋrɛ a bɛ niŋé bɛ ìr,
ɛ́ ʋ põ a Kanãa tẽw kʋ̀ bɛ, ŋa mɩ́ tɛr ʋ zie.
Ʋ tɩ ɩ n a Ɩsɩrayɛl dɔwlʋ dɔwlʋ nɩbɛ kpɩɛr
a bɛ pɛnɛ-sɛwr pʋɔ.
56Ɛcɛ bɛ tɩ ɩ n a Naaŋmɩn-na-do-saa-bɛ-pɩɛl-a kaa,
bɛ tɩ jɛrɛ na, bɛ sàwr a nɛ́ɛ ʋ na ƴãw a ɩ.
57Bɛ tɩ lo n sɔr-faa mɛ̃ a bɛ sãàkʋm-kore a,
bɛ bɛ tɩ tu a Naaŋmɩn ɛ,
ɛ́ ƴaw lɩɛbɩ mɛ̃ tam na pʋnɩ a.
58Bɛ tɩ tɛr'ɩ a bɛ maalʋ-ziir,
ƴãw k'a Sore nyɛ̃ suur,
bɛ tɩ tɛr'ɩ a bɛ ŋmɩmɛ dasuli, ɩ kɛ̀ nyuur ɩrɛ ʋ.
59A Naaŋmɩn tɩ nyɛ̃ a na,
nyɛ̃ suur jɛ a Ɩsɩrayɛl nɩbɛ bɛr.
60Ʋ tɩ yi na kɛ́ bɛr a ʋ yir a Silo tẽw,
a pɛn-sɛw ʋ na tɩ maalɩ a nɩsaalbɛ sɔgɔ a.
61A wõ-taa daga na ɩ a ʋ kpɛnʋ
nɩ a ʋ yúor-vɩɛlʋ-danʋ bãwfʋ a,
ʋ tɩ bɛr ʋ nɩ dɔ̃ dem nuru pʋɔ, bɛ cen nɩ.
62Ʋ tɩ nyɛ̃ nɩ nɩ a nɩbɛ ʋ na so a suur,
lɛ n'a ʋ tɩ zawrɩ a ʋ nɩbɛ bɛr bɛ kpi a sʋɔ kũu.
63Vũu tɩ dɩ n a pɔlbili,
ɛ́ a pɔwsɩrali bɛ tɩ wõ bɛ yieli a bɛ kul-taa ƴãw ɛ.
64A zɛbr-sɔ-kpɛ̃ɛ tɩ kʋ n a bàwr-maalbɛ,
ɛ́ a pɔw-kɔbɛ bɛ tɩ ŋmãa lãw-mʋɔlɛ ɩ.
65Lɛ n'a a Sore tɩ zaw ìr mɛ̃ gʋ̃ɔ-gúre a,
mɛ̃ gãdaa dãa na ɩrɛ a.
66Ʋ tɩ yi n a pùorí wa ŋmɛ a ʋ dɔ̃ dem
ƴãw bɛ vĩ na bɛ tɛr baarʋ a.
67Ʋ tɩ bɛr'ɩ a Zuzɛb yir dem,
ʋ bɛ tɩ sàw kaa ír a Efarayim dɔwlʋ ɛ.
68Zuda dɔwlʋ n'ʋ ʋ tɩ kaa ír,
Sɩyɔ̃ tãw n'ʋ ʋ tɩ nɔ̃w.
69Be n'a ʋ tɩ ŋmãa a ʋ zi-sõw,
ʋ kpɛmɛ mɛ̃ a salom a,
be n'a ʋ tɩ ƴãw ʋ ʋ àr kʋralɛ, mɛ̃ a tẽsɔw a.
70A Sore mɩ̀ tɩ kaa na ír a ʋ tõ-tõ-bie Daviir,
ʋ cen na tɩ nyɔw ʋ a píir zaw pʋɔ.
71Pi-cɩ̃ɩnʋ zu n'a ʋ nyɔw ʋ,
wa ƴãw k'ʋ ɩ a Ɩsɩrayɛl nɩbɛ ʋ na so a cɩ̃ɩnɛ.
72A Daviir tõ n a ʋ ton nɩ soci-vla,
ʋ kaa nɩ a Naaŋmɩn nɩ-bʋʋrɛ zie nɩ yã-bãwfʋ.
La Bible en Dagara © Alliance Biblique du Burkina Faso, 2013.