Sɛb-sõw yielu 69
69
Sɛb-sõw yielu 69 (68) sob
A nɩ-mɩŋa bɛ na dɔwrɛ a Naaŋmɩn ƴãw a puoru
1Yiel-yielbɛ nɩ-kpɛ̃ɛ sɛbɛ pʋɔ yielu nɩ yielu Daviir na maalɩ a. Korijom'a bɛ mɩ́ ŋmɩɛr ƴãwn.
2Naaŋmɩn i, faa mɛ̃!
A kʋ̃ɔ ƴãwnɛ mɛ̃ nɩ kɔkɛɛ.
3Mɛ̃mɛrɛ bɔw-zulu pʋɔ n'a ɩ̃ siwr,
ɛ́ a gbɛ́ɛ bɛ be na tɔ zi-kpɛ̃w ɛ.
Ɩ̃ tɔlɛ na siwr a kʋ̃ɔ-zulu pʋɔ,
ɛ́ a kʋ̃ɔ-miwr ɓáw mɛ̃ cere nɩ.
4Ɩ̃ ŋmɛ n a cɛlsɩ tɩ bàl, a kɔkɔr ko n ʋ za.
Ɩ̃ piwr'ɩ a ɩ̃ Naaŋmɩn waa tɩ bàl.
5A bɛlɩ dem na hɩ̃ɛn mɛ̃ zawla a,
bɛ yãwmɛ na zuo a ɩ̃ zukɔbɛ.
A nɩbɛ bɛl na kʋrɛ mɛ̃ a, bɛ tɛr'ɩ fãw,
a bɛl ɩ̃ na bɛ sãw, ɛ́ bɛ tɛr'ɩ mɛ̃ dɔ̃ a.
A bom ɩ̃ na bɛ zu a, ɩ̃ na tʋ̃ɔ́ na lɛb tɩr ʋ bɩɩ?
6Naaŋmɩn i, fʋ bãw nɩ a ɩ̃ dãbolu,
ɛ́ a ɩ̃ sãwna bɛ sɔwlɩ a fʋ zie ɩ.
7Sore, Naaŋmɩn-kpɛnʋ-za-sob i,
a bɛlɩ dem na ƴãw a bɛ tɩɛrʋ a fʋ ƴãw a,
ɩ̃ bɛ bɔbr kɛ́ bɛ nyɛ̃ vĩ a mãa ƴãw ɛ.
Ɩsɩrayɛl Naaŋmɩn i, ta sàw a nɩbɛ na bɔbr fʋ a
nyɛ̃ zʋmɛ a mãa ƴãw ɛ.
8Fʋ̃ʋ ƴãw n'a a zʋmɛ dúor mɛ̃,
ɛ́ a vĩ bɛ sàw ɩ̃ na dʋɔ zu ɛ.
9Ɩ̃ lɩɛb'ɩ zawlɛ a ɩ̃ yɛbr zie,
nɩr a ɩ̃ yɛbr tɩ na lãw sãà nɩ mã a na bɛ bãw a.
10Yel-mɩŋa, a fʋ yir nɔ̃wfʋ dɩrɛ mɛ̃ na mɛ̃ vũu a.
A fʋ zʋm-tʋʋrbɛ zʋmɛ lɛbr'a lore a ɩ̃ zu.
11Ɩ̃ tɛr'ɩ mʋta-tuo kone nɩ,
a wa n zʋmɛ a ɩ̃ zie.
12Ɩ̃ su n kuor bʋ̃-dɛgɛ, bɛ ƴãw nɩ mɛ̃ jil.
13Mãa ƴɛ̀rʋ n'a bɛ mɩ́ nyɔw
a nɩ-yaga tuor-taa zie,
mãa n'ʋ a dã-nyúurbɛ tɛr yiele.
14Ɛcɛ mãa puore fʋ na.
Sore e, a ɩ̃ bɛr-wob daar'a ta.
Naaŋmɩn i, a fʋ nɔ̃wfʋ bɛ dɩ vuo ɩ, sɔw mɛ̃!
Fʋ̃ʋ sɩrɩ n'ɩ a ɩ̃ faarɛ.
15Vɩr mɛ̃ ír a mɛ̃mɛrɛ pʋɔ,
ta bɛr ɩ̃ kpa gbɛ́ɛ ɩ!
Faa mɛ̃ a ɩ̃ bɛ-nɔnbɛ nuru pʋɔ,
faa mɛ̃ a kʋ̃ɔ-zulu pʋɔ!
16Ta bɛr a kʋ̃ɔ-miwr ɓáw mɛ̃ cen nɩ ɛ,
a bɔw-kpol vɔl mɛ̃ ɩ!
Ta sàw bɛ fɔb a yàa-bɔw nʋɔr pàw mɛ̃ ɩ.
17Sore e, sɔw mɛ̃, a fʋ nɔ̃wfʋ na ɩ vɩɛlʋ a ƴãw.
Lɩɛbɩ kaa mɛ̃, a fʋ su-ɓaarʋ na bɛrmɛ a ƴãw.
18Ta lɩɛbɩ zikur cɔw a mãa fʋ tõ-tõ-bie ɩ.
Ɩ̃ be n kpɩɛrʋ pʋɔ, sɔw mɛ̃ fɔ̃w.
19Taw pɩɛlɩ mɛ̃, kaa a ɩ̃ zie,
faa mɛ̃, a ɩ̃ dɔ̃ dem ƴãw.
20Fʋ bãwnɩ a na bɛ na tʋʋr mɛ̃ a,
fʋ bãw nɩ a ɩ̃ vĩ, a ɩ̃ yúor na sãw a.
A ɩ̃ dɔ̃ dem za n'ɩ bɛ ŋan a fʋ niŋé.
21A zʋmɛ ɩ m'ɩ kpɩɛrʋ, a ɩ m'ɩ bàalʋ.
Ɩ̃ gù n nɩbaal-zɔba ɩb kãw, ɛ́ bɛ nyɛ̃ bom ɛ,
gù mɔwl-mɔwlbɛ, ɛ́ bɛ nyɛ̃ nɩr ɛ.
22Bɛ ƴãw nɩ tɩ̃ɩ a ɩ̃ bʋ̃-dɩrɩ pʋɔ,
ɛ́ kʋ̃ɔ-nyúur wa kpɩɛr mɛ̃ a, bɛ̃ɛ kʋ̀ m dã-miiru.
23A bɛ cuw dɩb, a lɩɛbɩ bɛra,
bɛlɛ nɩ a bɛ bárɩ zie.
24A bɛ mimie, a zɔ̃wnɛ ta tɩ cãà nyɛrɛ ɩ.
Ɩ kɛ̀ bɛ gʋ̀r zɩgɛ kʋralɛ.
25Nyɛ̃ nɩ bɛ suur yaga za,
ʋ dɩrɛ bɛ mɛ̃ vũu a.
26A bɛ laɩ, ʋ lɩɛbɩ kár,
nɩr za ta cãà kpɩɛr a bɛ pɛnɛ-sɛwr pʋɔ ɩ.
27Bʋ̃ʋ n'ʋ vɛ̃, bɛ bɛ bɛrɛ a sob nɛ
fʋ na ŋmɛ baarɩ a ɩ,
ɛ́ a bɛlɩ dem fʋ na ŋmɛ ƴãw natɩɛ baarɩ a,
bɛ ɩ na bɛ lɛb bãw nyɛrɛ wʋ̀ʋr dɔwlɛ.
28Dier a bɛ sãwna za ɓanɛ taa,
ɛ̀ bɛ taa wa sãanɛ nɩ-mɩn a fʋ niŋé ɩ.
29Sãw a bɛ yée bɛr a nɩ-vʋʋrɩ sɛbɛ#69:29 Nɩ-vʋʋrɩ sɛbɛ: A sɛbɛ ʋl pʋɔ a Naaŋmɩn bárɩ yée na sɛb a n'ʋ. Nyɛ̃ Ety 32.32, Dan 12.1. pʋɔ,
taa sɔrɛ bɛ ƴãwn a nɩ-mɩn pʋɔ ɩ.
30Mãa a, bãbàal nɛ m ɛ́ wone tuo,
Naaŋmɩn i, a fʋ faafʋ, ʋ ɩ ɩ̃ lɛb ìr àr!
31Ɩ̃ na yiele na íre nɩ a fʋ yúor,
ɩ̃ na danɛ fʋ na, fʋ na ɩ kpɛ̃ɛ a.
32Sore e, à ŋá n'a nʋmɛ a fʋ zie
zuo nadɛr na tɛr ɩ́lɛ́ nɩ nafɩlɛ a.
33A su-siwri dem nyɛ̃ a na ɛ́ cɩlɛ.
«Nyɩɩm na bɔbr a Naaŋmɩn a,
nyɩmɛ so nyɔ-vʋʋr-wogo!
34Bʋ̃ʋ n'ʋ vɛ̃, a Sore bɛrɛ na wone a nan dem,
ʋ bɛ zawrɛ a ʋ nɩbɛ na be a gaso pʋɔ a bɛrɛ ɩ.
35Ɛ́ nyɩɩm, salom nɩ tẽw, nyɩ danɛ ʋ,
lãwnɩ a kʋ̃ɔ-bɛrɛ nɩ bom za na damnɛ a pʋɔ a!
36Bʋ̃ʋ n'ʋ vɛ̃, Naaŋmɩn na faa nɩ a Sɩyɔ̃,
ʋ na lɛb'a mɛ a Zuda tẽw tẽ-bɛrɛ,
a ʋ nɩbɛ na lɛb'a só a kpɩɛr.
37A na ɩ n a ʋ tõ-tõ-biir bibiir gbã-dɩ-bom,
ɛ́ a bɛlɩ dem na nɔnɛ a Sore a
na tɛr'ɩ a bɛ kpɛb zie a be.»
La Bible en Dagara © Alliance Biblique du Burkina Faso, 2013.