Sɛb-sõw yielu 55
55
Sɛb-sõw yielu 55 (54) sob
Nɩr a bá-pɛr na mɩl a puoru
1Yiel-yielbɛ nɩ-kpɛ̃ɛ sɛbɛ pʋɔ yielu kãw. Bʋ̃-ŋmɩɛrɩ bɛ na maal'ɩ fomie a n'a, bɛ mɩ́ ŋmɩɛr'ɩ ƴãwn. Daviir yielu kãw na wule yã a.
2Naaŋmɩn i, ƴãw tobr a ɩ̃ puoru ƴãw,
ɩ̃ na mɩ́ wa zɛlɛ fʋ yãayãa a, ta mɩ́ sɔwlɩ ɛ.
3Cɛlɛ be ɛ́ sɔw mɛ̃.
Ɩ̃ bʋnɩ na cere, pʋ-sãwna tɛr mɛ̃
ɛ́ a tɩɛrʋ damnɛ mɛ̃,
4a dɔ̃ sob kɔkɔr ɩ̃ na wone a ƴãw,
nɩ a fɛrʋ a nɩ-faar na fɛrɛ mɛ̃ a ƴãw.
Bɛ de nɩ a faa dɔwlɩ a ɩ̃ zu,
nyɛ̃, suur bɛ bɛrɛ mɛ̃ ɩ.
5A ɩ̃ pʋ̀lá vʋ̃ɔ na,
ɛ́ a kũu dɛ̃bɩ̃ɛ ɩrɛ mɛ̃.
6Dɛ̃bɩ̃ɛ nɩ mawfʋ nyɔw mɛ̃ na,
ɛ́ ƴãw za mĩine mɛ̃.
7Lɛ n'a ɩ̃ tɩ yel:
«Aa! mãa tɩ tɛr pɩgɛ mɛ̃ naŋmam a,
ɩ̃ nãá ƴaw na tɩ nyɛ̃ sɔwlʋ zie.
8Ɩ̃ nãá zɔ na zãá,
tɩ kpɩɛr a wɛja pʋɔ. Tɛw-àrʋ
9Ɩ̃ nãá bɔ n sɔwlʋ zie fɔ̃wlɛ,
a saa-sɛsɛb na fure a ƴãw.»
10Sore e, sãw a ɩ̃ dɔ̃ dem pʋ-tɩɛrʋ bɛr,
bʋ́r a bɛ ƴɛ̀rʋ.
Bʋ̃ʋ n'ʋ vɛ̃, po-to-fãw-ɩb
nɩ taw-taa n'a ɩ̃ nyɛ̃ a tẽw pʋɔ.
11A mɩ́ lʋɔrɛ nɩ a dacin
na viiri koli ʋ a, mʋ̃tɔ̃w nɩ tɩ̃ɩsɔw.
A tẽw pʋɔ a, faalʋ nɩ kpɩɛrʋ n'a,
12ɩ-faar tɛwr'a be a ʋ pʋɔ.
A dɔwr-taa nɩ a nɛb-taa
bɛ yire zaarɛ a ʋ nɩbɛ tuor-taa ziir ɛ.
13Dɔ̃ sob kãw tɩ n'ʋ tʋʋr mɛ̃ a,
ɩ̃ nãá sàw na.
Nɩr na hɩ̃ɛn mɛ̃ a tɩ n'ʋ ìr a ɩ̃ ƴãw a,
ɩ̃ nãá sɔwl'a ʋ ta nyɛ̃ m ɛ.
14Ɛcɛ fʋ̃ʋ n'ʋ, nɩr'ɩ mãa na ɩ been a,
a ɩ̃ tu-ta-tɔ, a ɩ̃ bá-pɛr.
15Mãa nɩ fʋ̃ʋ nɛbɛ mɩ́ tɩ waalɛ,
ɛ́ mɩ́ tɩ lãw cere a Naaŋmɩn yir pʋɔ.
16A ɩ̃ dɔ̃ dem, bɛ ùr kpi!
Bɛ cãà vʋʋrɛ ɛ́ siw a kpɩmɛ tẽw,
a po-tuolu na be a bɛ zie nɩ a bɛ yie pʋɔ a ƴãw.
17Mãa a, a Naaŋmɩn n'ʋ ɩ̃ kone bʋɔlɛ,
ɛ́ a Sore na faa mɛ̃ na.
18A biɓaara, a mʋ̃tɔ̃-tuo nɩ a zaanʋɔra,
ɩ̃ mɩ́ kone nɩ a 'woi! 'woi!
Ɛcɛ ʋ wõ n a ɩ̃ bʋɔlʋ.
19Ʋ faa mɛ̃ na, kʋ̀ m a ƴã-ɓaarʋ,
a lɛn daar a nɩbɛ na tɩ zɛbr'ɩ mɛ̃ a,
bɛ bɛ tɩ dɩ vuo ɩ, a nɩbɛ na tɩ àr a ɩ̃ ƴãw a.
20A Naaŋmɩn na wõ a na, ɛ́ siwri bɛ,
ʋl na dɩrɛ naalʋ dɩta-pɛ-yome za a. Tɛw-àrʋ
Lɩɛbʋ bɛ be a bɛ zie ɩ,
bɛ bɛ zɔrɛ a Naaŋmɩn ɛ.
21A mɩlmɩlɛ ír'ɩ nũu tɔ n a ʋ bárɩ,
ʋ sãw nɩ a bɛ wõ-taa bɛr.
22A ʋ nʋɔr ƴɛ̀rɛ nɩ nɔ-kãá,
ɛ́ zɛbr tɩɛrʋ be a ʋ socir pʋɔ.
A ʋ ƴɛ̀r-bie mɩ́ nʋmɛ na gãw sɩwr,
ɛcɛ sɔ̀rʋ bɛ na vɔ̃ a n'a.
23Lɩɛbɩ a fʋ niw-sʋba ƴãw a Sore,
ʋ na tɩɛ fʋ na tɛr,
ʋ bɛ sàwr a nɩ-mɩŋa dẽdere towtow ɛ.
24Ɛ́ fʋ̃ʋ, Naaŋmɩn i,
fʋ na ɩ na bɛ siw a yàa-bɔw pʋɔ.
Bɛ kʋ̃ vʋʋrɩ a bɛ nyɔ-vʋʋrʋ bibie põ-zɛ̃-taa ɩ,
bɛl na bãw a nɩ-kʋ nɩ a nyãnyuwlu a.
Mãa a, fʋ̃ʋ zie n'a ɩ̃ ƴãw a ɩ̃ tɩɛrʋ.
La Bible en Dagara © Alliance Biblique du Burkina Faso, 2013.