Sɛb-sõw yielu 49
49
Sɛb-sõw yielu 49 (48) sob
A nɩsaal bɛ kpiir tɛrɛ bom cere nɩ ɛ
1Yiel-yielbɛ nɩ-kpɛ̃ɛ sɛbɛ pʋɔ yielu. Koore bibiir yielu. Sɛb-sõw yielu.
2Nyɩɩm nɩ-bʋʋrɛ za a, nyɩ bɛrɛ wone yel ŋa,
nyɩ ƴãw tobr, nyɩɩm tẽ-daa nɩbɛ za a,
3nɩ-sãsaralɛ nɩ nɩ-yée e,
na-mɩnɛ lãwnɩ nan dem i!
4Yã-bãwfʋ ƴɛ̀rʋ n'a ɩ̃ na ƴɛ̀rɛ,
a ɩ̃ tɩɛrʋ na ɩ n nɩr na tɛr yã a tɩɛrʋ.
5Ɩ̃ ƴãw nɩ tobr a zʋkpaɩ ƴãw,
korijom'ʋ ɩ̃ na ŋmɩɛr ír'ɩ a ɩ̃ zʋkpa-bir.
6Bʋnʋ ƴãw n'a ɩ̃ na zɔrɛ dɛ̃bɩ̃ɛ
a bibi-faar na mɩ́ wa vɩɛ a?
A lɛn daar nɩsaal-libelibe
na mɩ́ wa viiri koli mɛ̃ bɔbr a ɩ̃ faa a?
7Bɛ mɩ́ ɩrɛ na ƴãwn a bɛ tɛra ƴãw,
bɛ mɩ́ pɔrɛ nɩ nɩ a bɛ naalʋ na bɛ dɩ vuo a.
8Ɛcɛ nɩsaal za kʋ̃ tʋ̃ɔ́ ya de
a ʋ nɩsaal-tɔ nyɔ-vʋʋrʋ a Naaŋmɩn zie ɩ,
bɩɩ ya de a ʋl mɩŋa nyɔ-vʋʋrʋ ɛ.
9A bɛ nyɔ-vʋʋrʋ daarʋ zuo na,
ɛ́ bɛ be za nãà ta ɩ.
10Bɛ tɩɛrɛ kɛ́ bɛ na vʋʋrɛ nɩ kʋralɛ,
ɛ́ kʋ̃ bãw a bɔw-zɩɛ bɩɩ?
11Ɛcɛ, ãa n'ʋ bɛ nyɛ̃ a,
a yã-bãwnbɛ kpiir'a mɛ̃ a dãbol-bul a,
ɛ́ mɩ́ bɛr a bɛ bʋ̃-tɛrɩ kʋ̀ nɩ-yoru.
12Bɛ na saa de a bɛ yée por'ɩ a bɛ tẽsɔwr a,
a bɔw-zɩɛ n'ɩ a bɛ yir-pɛ-baara,
a bɛ kpɛb zie n'ɩ a be, kʋrakʋralɛ,
13A nɩsaal nɩ a ʋ dɛpaalʋ za a,
ʋ bɛ cɛlɛ ɩ, ʋ ŋmɛ̃ na taa nɩ a dʋn na kpiir a.
14Ɛcɛ a nɩbɛ na ƴãw a bɛ tɩɛrʋ za a bɛl mɩŋa ƴãw a,
à ŋá n'a a bɛ yele na ŋmɛ̃,
a bɛl na nɔnɛ a bɛ mɩŋa ƴɛ̀rʋ bɛr-wob a,
à ŋá n'a a bɛ nɩdaar yele na ŋmɛ̃: Tɛw-àrʋ
15Bɛ pàw bɛ na mɛ̃ píir a, a kpɩmɛ tẽw,
a kũu n'ɩ a bɛ cɩ̃ɩnɛ.
— A nɩ-mɩn na dɩrɛ nɩ naalʋ a bɛ zu. —
A bɛ dasule na bɔr'ɩ fɔ̃w fɔ̃wlɛ,
a kpɩmɛ tẽw n'ʋ na ɩ a bɛ kpɛb zie.
16Ɛcɛ a Naaŋmɩn na ya na ír mɛ̃ a kpɩmɛ tẽw pʋɔ,
sɩza n'a ʋ na de m'a. Tɛw-àrʋ
17Nɩr wa kpɩɛr naalʋ a, a ʋ tɛra yúor wa yire a,
fʋ̃ʋ ta zɔrɛ dɛ̃bɩ̃ɛ ɩ.
18A ʋ kũu daar a, ʋ bɛ tɛrɛ bom za cere nɩ ɛ,
a ʋ na-bome bɛ tuur ʋ siwr a bɔw pʋɔ ɩ.
19Ʋlɛ saa nyɛ̃ ʋ wone nʋ̃ɔ̀ a ʋ nyɔ-vʋʋrʋ pʋɔ a,
ɛ́ mʋʋrɛ ʋ tʋɔra a yele za na cere vla a,
20ɛcɛ a na fɛr'a ʋ lɛb tɩ páw a ʋ sãà mɩnɛ
na kʋ̃ lɛb nyɛ̃ a cãà towtow a.
21A nɩsaal nɩ a ʋ dɛpaalʋ za a, ʋ bɛ bãw a pɛr ɛ,
ʋ ŋmɛ̃ na taa nɩ a dʋn na kpiir a.
La Bible en Dagara © Alliance Biblique du Burkina Faso, 2013.