Sɛb-sõw yielu 26
26
Sɛb-sõw yielu 26 (25) sob
Nɩr na bɛ tɛr sãwna a puoru
1Daviir so ʋ.
Sore e, dɩ n mɛ̃ a ƴɛ̀rʋ wul a ɩ̃ yel-mɩŋa,
bʋ̃ʋ n'ʋ vɛ̃, sãwna bɛ be a ɩ̃ cenu pʋɔ ɩ,
ɛ́ a tɩɛrʋ ɩ̃ na ƴãw a fʋ ƴãw a,
kʋ̃ bãw damnʋ ɛ.
2Ŋmãa a ɩ̃ pùor nyɛ̃, Sore e, ɩ m kaa,
jɛl a ɩ̃ tɩɛrʋ nɩ a ɩ̃ pʋɔ za.
3A fʋ nɔ̃wfʋ ɩ-ɩrɩ be n a ɩ̃ niŋé,
ɛ́ a fʋ yel-mɩŋa sɔ́r zu n'a ɩ̃ cere.
4Ɩ̃ bɛ lãw zɩnɛ nɩ nɩ-bɛlbɛ ɩ,
mãa nɩ nɩsaal-libelibe bɛ lãw cere ɩ.
5Ɩ̃ bɛ nɔnɛ a yel-fa-maalbɛ lãw ɛ,
ɩ̃ bɛ lãw zɩnɛ nɩ nɩ-faar ɛ.
6Ɩ̃ na pɛ́w nɩ a ɩ̃ nuru,
a wul ɩ̃ na bɛ tɛr sãwna a,
ɛ́ ɩ̃ na cen na viiri koli
a fʋ bàwr-maal-kuur, Sore e,
7puore nɩ fʋ a yãanɩ,
ɛ́ manɛ a fʋ nɔ-ɓãa-yel-maalɩ za.
8Sore e, ɩ̃ nɔnɛ nɩ a yir fʋ na kpɩɛr a,
nɩ a zie ʋl a fʋ yúor-vɩɛlʋ-danʋ na be a.
9Ta ɩ mãa nɩ a yel-bebe dem ɩ been ɛ,
taa íre a ɩ̃ nyɔ-vʋʋrʋ mɛ̃ a nɩ-kʋrbɛ dem a ɩ.
10A bɛ nuru tõ n tõ-faar na bɛ maal'ɩ wob a,
a paal'ɩ bʋ̃-kʋ̀rɩ a nɩbɛ na ŋmɛ n bɛ a nʋɔr a.
11Mãa a, sãwna bɛ be a ɩ̃ cenu pʋɔ ɩ,
zɔ ɩ̃ nɩbaalʋ ɛ́ faa mɛ̃.
12Sɔr-vla zu n'a ɩ̃ be,
ɩ̃ na manɛ nɩ a Sore vɩɛlʋ a lãw nɩbɛ pʋɔ.
La Bible en Dagara © Alliance Biblique du Burkina Faso, 2013.