Sɛb-sõw yielu 22
22
Sɛb-sõw yielu 22 (21) sob
Ɩ̃ Naaŋmɩn i, ɩ̃ Naaŋmɩn i, bʋ̃ʋ n'ʋ so fʋ zawrɩ mɛ̃ bɛr?
1A yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. A «Zi-wɛl-paala wala» yielu kɔkɔr'ʋ bɛ mɩ́ yiel'ɩ. Daviir yielu kãw n'ʋ.
2Ɩ̃ Naaŋmɩn i, ɩ̃ Naaŋmɩn i,
bʋ̃ʋ n'ʋ so fʋ zawrɩ mɛ̃ bɛr?
Bʋ̃ʋ n'ʋ so fʋ zãá nɩ mɛ̃ à ŋá,
bɛ faarɛ mɛ̃, bɛ bɛrɛ wone a ɩ̃ cɛlsɩ?
3Ɩ̃ Naaŋmɩn i, ɩ̃ mɩ́ bʋɔlɩ fʋ nɩ
a mʋ̃tɔ̃w, fʋ bɛ sɔw ɛ,
a tɩ̃ɩsɔw mɩ̀, ɩ̃ɩ kʋ̃ bãw pɩ̃ɛnʋ ɛ.
4Ɛcɛ fʋ zɩ̃ n a fʋ naalʋ-dà-kɔw zu,
fʋ̃ʋ Naaŋmɩn na ɩ sõw
a Ɩsɩrayɛl danɛ kʋralɛ a.
5A tɩ sãàkʋm-kore mɩ́ tɩ ƴãw nɩ
a bɛ tɩɛrʋ a fʋ ƴãw,
bɛ mɩ́ tɩ ƴãw nɩ a bɛ tɩɛrʋ a fʋ ƴãw,
ɛ́ fʋ mɩ́ tɩ faa bɛ na.
6Bɛ mɩ́ tɩ lɔbr'ɩ cɛlsɩ cɔwr fʋ,
ɛ́ bɛ mɩ́ tɩ cɩ̃ɛ na.
Bɛ mɩ́ tɩ ƴãw nɩ a bɛ tɩɛrʋ a fʋ ƴãw,
ɛ́ bɛ bɛ mɩ́ tɩ nyɛ̃ vĩ ɛ.
7Mãa a, zãzul nɛ m, ɩ̃ bɛ cãà ɩ nɩr ɛ,
a nɩbɛ tʋʋr mɛ̃ na, nɩbɛ za jewre mɛ̃ na.
8Bɛlɩ dem za na mɩ́ nyɛ̃ m a,
bɛ mɩ́ kpɔwrɛ mɛ̃ na,
bɛ mɩ́ mem'ɩ nʋɔr ɛ́ viire zuru.
9Bɛ mɩ́ yere nɩ a ɩ̃ ƴãw:
«Ʋ de nɩ a ʋ yele kʋ̀ a Sore,
ãa, a Sore ʋ faa ʋ!
Mɛ̃ a Sore taa nɔnɛ ʋ, ʋ faa ʋ!»
10Sore e, fʋ̃ʋ n'ʋ ír mɛ̃ a ɩ̃ mã púorí,
ƴãw ɩ̃ zɩ̃ a ʋ gbɛ́ɛ zu bom bɛ ɩrɛ mɛ̃ ɩ.
11Ɩ̃ na tɩ yire a vʋr pʋɔ wa báarɛ a,
fʋ̃ʋ n'ʋ bɛ de m kʋ̀.
Ɩ̃ na tɩ yire a ɩ̃ mã púorí wa báarɛ a,
fʋ̃ʋ n'ɩ a ɩ̃ Naaŋmɩn.
12Ƴɛrɛŋa a yel-faa na pɩɛlɩ,
ɛ́ sõwfʋ bɛ ka be a, ta zãá nɩ mɛ̃ ɩ.
13A ɩ̃ dɔ̃ dem ɩ na mɛ̃ nadɛɛ yaga
na ŋmãa jil mɛ̃ a.
Bɛ jile na kole mɛ̃,
mɛ̃ Basan tẽw dʋ̃-bɛrɛ bɛrɛ a.
14Bɛ ɩ na mɛ̃ gben na háa a nɛ́ɛ a ɩ̃ ƴãw a,
gben na ùore ɛ́ tawr cɩɛrɛ a.
15A ɩ̃ fãw za báarɛ na mɛ̃ kʋ̃ɔ na zɔrɛ a,
ɛ́ a ɩ̃ kɔbɛ yɔwrɛ a za.
A ɩ̃ socir ɩ na mɛ̃ sɩ-suur a,
ʋ nyɩlɛ nɩ a ɩ̃ pʋsabɛ pʋɔ.
16A ɩ̃ kɔkɔr ko n ʋ za, a ɩ̃ zɛl mɛr'ɩ a lán.
Fʋ bin mɛ̃ nɩ a yàa-bɔw nʋɔr.
17Yel-fa-maalbɛ ŋmãa na jil mɛ̃,
a baar bɛ ŋa piw mɛ̃ nɩ a ziir za,
bɛ cɔr'ɩ a ɩ̃ nuru nɩ a gbɛ́ɛ puo.
18Ɩ̃ na tʋ̃ɔ́ na sɔ́r a ɩ̃ kɔbɛ za.
Nɩbɛ nyɛ̃ m'a, bɛ jɩ́rɛ mɛ̃ nɩ gbẽgbẽ,
19bɛ pone nɩ a ɩ̃ kparɩ,
ɛ́ ŋmɩɛr gbãw dier a ɩ̃ bʋ̃-suuri.
20Ɛcɛ fʋ̃ʋ a, Sore e, ta maal àr zãá a lɛ ɩ,
fʋ̃ʋ na ɩ a ɩ̃ fãw a, wa fɔ̃w wa faa mɛ̃.
21Ta sàw a zɛbr-sɔ-kpɛ̃ɛ kʋ m ɛ,
piw mɛ̃ tɛr a baar bɛ ŋa nyɩ́mɛ ƴãw!
22Taw faa mɛ̃ a bɛ nʋɔrɩ́, na ɩ mɛ̃ gbẽw nʋɔr a,
faa mɛ̃ a bɛ ɩ́lɛ́ ƴãw, na ɩ mɛ̃ wɛ-náab ɩ́lɛ́ a!
Fʋ sàw nɩ a ɩ̃ bʋɔlʋ!
23Ɩ̃ na pore nɩ a fʋ yúor a ɩ̃ yɛbr sɔgɔ,
ɛ́ danɛ fʋ a lãw nɩbɛ sɔgɔ yere:
24«Nyɩɩm na zɔrɛ a Sore a, nyɩ danɛ ʋ,
nyɩ íre a ʋ yúor, nyɩɩm Zakɔb bʋʋrɛ za a,
nyɩ màwr a ʋ niŋé, nyɩɩm Ɩsɩrayɛl bʋʋrɛ za a!
25Ʋ bɛ jewri a bãbàal a na wone a ɩ,
ʋ bɛ jɛ ʋ bɛr ɛ, ʋ bɛ lɩɛbɩ zikur cɔw ʋ ɛ,
ʋ bɛr'a wõ ʋ a lɛn daar ʋ na tɩ kone bʋɔlɛ ʋ a.»
26Sore e, a fʋ̃ʋ zũú n'a ɩ̃ na tʋ̃ɔ́ danɛ fʋ
a lãw-kpɛ̃ɛ nɩbɛ pʋɔ.
A nɛ́ɛ ɩ̃ na kõ kʋ̀ b a, ɩ̃ na ír a nɩ
a bɛlɩ dem na ƴãwnɛ fʋ a niŋé.
27A bãbàalbɛ na dɩ na tɩw.
Bɛlɩ dem na bɔbr a Sore a,
bɛ danɛ ʋ ɛ́ tɛr nyɔ-vʋʋr-wogo!
28A ta-tẽw dem za na lɛb'a bãwnɩ a,
ɛ́ bɛ na lɛb'a wa a Sore zie.
A nɩ-bʋʋr-yoru yie za
na wa na wa gbĩ dume a ʋ niŋé.
29Bʋ̃ʋ n'ʋ vɛ̃, a Sore ɩ n nãà,
ʋlɛ n'ʋ dɩrɛ naalʋ a nɩ-bʋʋr-yoru zu.
30A tẽw nũ-kpɛn dem za na dɩ na
ɛ́ gbĩ dume gũu tɩ tɔ tẽw a ʋ niŋé.
Bɛlɩ dem za na lɛb lɩɛbɛ uuru a,
na gbĩ n dume gũu tɩ tɔ tẽw a ʋ niŋé
— a bɛlɩ dem na kpiir a.
31A bɛ bʋʋrɛ na tone ʋ na,
bɛ na ƴɛ̀rɛ nɩ a Sore ƴɛ̀rʋ kʋ̀rɛ a nɩbɛ
na dɔwr lɩɛrɛ taa a.
32Bɛ na man na kʋ̀ a bɛlɩ dem na na dɔw a,
a ʋlɩ bom nɛ ʋ na ɩ faa a ʋ nɩbɛ a.
La Bible en Dagara © Alliance Biblique du Burkina Faso, 2013.