Sɛb-sõw yielu 147
147
Sɛb-sõw yielu 147 (146) sob
A tɩ Sore ɩ n kpɛ̃ɛ ɛ́ tɛr fãw yaga za
1 Aleluya!
À yiele danɛ nɩ a tɩ Naaŋmɩn ɩ n bʋ̃-vla,
lɛ n'a, a ʋ danʋ vɩɛl'a ɛ́ nʋmɛ.
2A Sore lɛb'a mɩɛr a Zerizalɛm,
a Ɩsɩrayɛl nɩbɛ bɛ na diw yaarɩ a,
ʋ lɛb'a kaalɛ bɛ ɓanɛ taa.
3Ʋ mɔwlɛ nɩ a pʋ-sãwnɩ dem,
ɛ́ 'lene a bɛ natɩɛ.
4Ʋ mɩ́ sɔr'ɩ a ŋmar-bie bãw a nʋɔr,
ɛ́ por ŋa za a ʋ yúor.
5A tɩ Sore ɩ n kpɛ̃ɛ ɛ́ tɛr fãw yaga za,
a ʋ yã bɛ tɛr tɛwfʋ zie ɩ.
6A Sore mɩ́ nyɔw nɩ a bãbàalbɛ bɛ lɛb ìr,
ɛ́ siwri a nɩ-faar tɩ tɔ n a tẽw.
7Nyɩ yiele puore nɩ a Sore yãanɩ,
nyɩ ŋmɩɛr korijom danɛ nɩ a tɩ Naaŋmɩn.
8Ʋlɛ n'ʋ mɩ́ ɩ a zũzuge yi pàw a salom.
À ŋá n'a ʋ mɩ́ cɔbrɩ a saa a tẽsɔw ƴãw.
Ʋ mɩ́ ɩ na a mʋ̃ɔ bul a tan zu.
9Ʋ mɩ́ kʋ̀ n a dʋn a bʋ̃-dɩrɩ,
ɛ́ kʋ̀ a a gbagba bili na mɩ́ kone a ƴãw a.
10A wur fãw bɛ n'a ɩrɛ a Sore nʋ̃ɔ̀ ɩ,
nɩ a nɩsaal gbɛ-kpɛn ɛ,
11a Sore pʋɔ mɩ́ pɛlɩ nɩ a bɛlɩ dem na zɔrɛ ʋ a ƴãw,
a bɛlɩ dem na mɩ́ tɩɛrɛ a ʋ nɔ̃wfʋ a.
*
12Zerizalɛm i, íre a Sore yúor,
Sɩyɔ̃ tẽw i, danɛ a fʋ Naaŋmɩn.
13Bʋ̃ʋ n'ʋ vɛ̃, ʋ ɩ n a fʋ pamɛ bʋ̃-kparɩ a kpɛmɛ,
ɛ́ maalɩ a fʋ nɩbɛ na kpɩɛr a fʋ pʋɔ a.
14Ʋ mɩ́ gù n a fʋ tẽw tʋr-bɔwrɩ, fʋ tɛr ƴã-ɓaarʋ,
a ble na vɩɛl vɩɛl a n'a ʋ mɩ́ kʋ̀ b a man.
15Ʋ mɩ́ tɩr'ɩ a ʋ nɛ́ɛ bɛr a tẽw zu,
ɛ́ daadaalɛ a ʋ ƴɛ̀rʋ zɔrɛ.
16Lɛ n'a ʋ mɩ́ ɩ a sa-pupure a lore
ɩ mɛ̃ gon-pɛlɛ na gbil gbil a.
Ʋ mɩ́ ɩ n a sa-bi-mɩrmɩr na gúr a,
a lo pàw a tẽw mɛ̃ tãpɛl-baalʋ a.
17Ʋ mɩ́ ɩ n a kʋ̃ɔ na gúr kpawlɩ a,
ŋmarɛ lore ɩ sa-bi-kube.
Ãa n'ʋ na tʋ̃ɔ́ a ƴawr a na mɩ́ wa n a?
18Ʋlɛ wa tɩrɛ a nʋɔr wa báarɛ a a mɩ́ nyɩl a.
Ʋlɛ wa ɩ a sɛsɛb fure a, a kʋ̃ɔnɩ mɩ́ gbɔlɛ na.
19Ʋ ƴɛ̀r'ɩ a ʋ ƴɛ̀rʋ kʋ̀ a ʋ nɩ-bʋʋrɛ,
ʋ kʋ̀ n a ʋ tub nɩ a ʋ nɛ-ƴãwnɩ a Ɩsɩrayɛl.
20Ʋ bɛ ɩ à à ŋá nɩ-bʋʋrɛ kãw za ƴãw ɛ,
a kãw za bɛ bãw a ʋ nɛ-ƴãwnɩ ɛ.
Aleluya!
La Bible en Dagara © Alliance Biblique du Burkina Faso, 2013.