Zʋkpaɩ 6
6
Yã na wul càar'ɩ a nɩ-yoru samɛ a
1Ɩ̃ bie e, a ɩ mɛ̃ fʋ ŋmɛ n nyãa yel kɛ́ fʋ̃ʋ so a fʋ bá san na ya, 2fʋ ƴɛ̀r'a a fʋ ƴɛ̀rʋ nyɔw fʋ, ɛ́ fʋ lo a ƴɛ̀rʋ fʋ na ƴɛ̀r a bɛra pʋɔ. 3A lɛ pʋɔ a, fʋ lo n a san-sowre nuru pʋɔ, ɛ́ a fɛr'a kɛ́ fʋ faa fʋ tʋɔra. Cen tɩ páw ʋ, zɛlɩ ʋ yãayãa, sɔbr ʋ niwn. 4Ta yel kɛ́ fʋ pɩ̃ɛnɩ ɛ, ta ũù mimir ɛ, ɛ́ gù a yele tɩ maalɩ. 5Faa fʋ tʋɔra a bɛra ŋa pʋɔ mɛ̃ wal-daa a, mɛ̃ lile a bɛra sob nuru pʋɔ a#6:5 A kan-nɛ́ɛ 1-5 sob ƴãw a, nyɛ̃ 20.16, 22.26-27..
A ƴã-tuo sob nɩ a nyɩra yele
6Ƴã-tuo sob i, nyɛ̃ a nyɩra a! Jɩ́r a lɛ ʋ na ɩrɛ a kaa, ɛ́ fʋ na lɩɛb'ɩ yã-bãwnɛ. 7Ʋ bɛ tɛr nɩr na piwre ʋ a ɩ, bɛ tɛr tõ-tõ-biir nɩ-kpɛ̃ɛ ɩ, bɛ tɛr tome zu-sob ɛ. 8Ɛcɛ, a ũon a, ʋ mɩ́ bɔ n a bʋ̃-dɩrɩ ɓã-taa. A bʋ̃-dieri daar a, ʋ mɩ́ cɔbr'ɩ a bʋ̃-dɩrɩ maal bin. 9Ɛ́ a fʋ̃ʋ, ƴã-tuo sob i, debor'a fʋ na gã tɩ ta? Debor'a fʋ na ìr a fʋ gʋ̃ɔ pʋɔ? 10Gʋ̃ɔ blã, zánʋ blã, gã dɔl blã weri a nuru, 11ɛ́ a nã́w n'a ta ùr fʋ mɛ̃ nyãnyuwe a, ɛ́ a kɔ̃ ta fʋ mɛ̃ nɩ-farɛ a.
A zir-ŋmarɛ ŋmɛ̃a
12A nɩr na mɩ́ ŋmarɛ a ziri a ɩ n nɩ-bɛ-tɛr-bir, ɩ-fa-maalɛ. 13Ʋ mɩ́ kpɩmnɛ nɩ a mimir bɛ̀lɛ nɩ a ʋ taabɛ, ʋ mɩ́ tʋɔr'ɩ a gbɛ́ɛ kabrɛ nɩ, ʋ mɩ́ manɛ na wule nɩ a nobie. 14A faa tɛwr'a ʋ nɔnɛ. Kʋralɛ n'a ʋ mɩ́ cɔbrɛ a yel-faa, ʋ mɩ́ ɩrɛ na a nɩbɛ zɛbr taa. 15Alɛ n'a so a ʋ loba na ùr ʋ, ʋ na sãw nɩ a pɛr nɛ pʋɔ ɛ́ a bɛ tɛr tɩ̃ɩ ɛ.
A yele al a Sore na hɩ̃ɛn a
16-19Yele ayʋɔb be n be a Sore hɩ̃ɛn, bɛ mɩ́ bɔbr k'ʋʋ nyɛ̃ a ɩ:
a pɔ̀l-jɩ́rʋ, a nʋɔr na ŋmarɛ ziri a,
a nuru na kʋrɛ a nɩbɛ na bɛ tɛr sãwna a,
a socir na cɔbrɛ yel-faar maalʋ a,
a gbɛ́ɛ na zɔrɛ tɩ maalɛ a yel-faar a,
a dãsɩɛ sob na ŋmarɛ ziri a.
Ɛcɛ a yele ayopõi sob mɩ́ be n be
a Sore na hɩ̃ɛn a: ʋlɛ n'ɩ a nɩr na ƴãwnɛ yɛbr tãá a.
Gùre fʋ tʋɔra a pɩ̃ɔ-yele ƴãw
20Ɩ̃ bie e, sàwr a fʋ sãà nʋɔr, taa zawrɛ a fʋ mã wulu bɛrɛ ɩ. 21Ƴãw a a fʋ socir pʋɔ kʋralɛ, ƴãw a a fʋ kɔkɔrɩ́ mɛ̃ pɩ̃ɛmɛ a. 22A na mɩ́ wule fʋ nɩ a sɔ́r a fʋ cenu nɩ a fʋ lɛb-waa pʋɔ, a na mɩ́ gù b'ɩ a fʋ gaa zie, ɛ́ fʋ̃ʋ wa ìr a, a na mɩ́ ƴɛ̀rɛ nɩ fʋ na. 23Bʋ̃ʋ n'ʋ vɛ̃, a nɔ-ƴãwna ɩ na mɛ̃ fɩ̃tɩlɛ a, ɛ́ a wulu ɩ mɛ̃ cãà a. A kpãàfʋ nɩ a yelu n'a mɩ́ ɩ kɛ̀ tɩ àr a nyɔ-vʋʋrʋ sɔ́r zu. 24A na gù b'ɩ a pɔw na bɛ ɩrɛ vla a ƴãw, a pɔw fʋ na bɛ bãw a nɔ-kãá ƴãw. 25Taa bɔbr a pɔw ŋa tɔ a ʋ vɩɛlʋ zũú ɛ, taa sàwr a ʋ jɩ́rʋ tʋ̃ɔ́ fʋ ɛ. 26Bʋ̃ʋ n'ʋ vɛ̃, a pɔw-yɛm a, bʋ̃-dɩrɩ blãlɛ n'a ʋ mɩ́ bɔbr, ɛcɛ a pɔw na tɛr sɩr a, a fʋ nyɔ-vʋʋrʋ za n'ʋ ʋ mɩ́ de. 27Nɩr na tʋ̃ɔ́ na ƴãw vũu a ʋ bʋ̃-zʋbɛ pʋɔ, ɛ́ a kparʋ za bɛ dɩ ɛ? 28Nɩr na tʋ̃ɔ́ na do vũ-bie zu, ɛ́ a bɛ ɓor ʋ a gbɛ́ɛ ɩ? 29À ŋá n'a a mɩ̀ ŋmɛ̃ nɩr na tawr pɩɛlɛ a ʋ tɔ pɔw a zie. Sob nɛ na tʋɔr ʋ a kʋ̃ vɛ̃ bɛ nyɛ̃ dɔwrʋ ɛ. 30Nyãnyuwe kɔ̃ na kpɩɛr ʋ zu k'ʋʋ dɩ paalɩ nyagɛ a, bɛ bɛ mɩ́ ɩrɛ ʋ laar ɛ. 31Ɛcɛ bɛlɛ wa nyɔw ʋ a, ʋ na ya n gb'a ayopõi dɔwlɩ, ʋ na tɩr'ɩ a ʋ bʋ̃-tɛrɩ za. 32Nɩr na gã nɩ pɔw-tɛr-sɩr a bɛ tɛr yã ɩ. Ʋ na ɩrɛ à à ŋá a, a ʋl mɩŋa nyɔ-vʋʋrʋ n'ʋ ʋ sãwnɛ. 33Ʋ na nyɛ̃ nɩ ŋmɩɛrʋ nɩ yo-sãw, ɛ́ a ʋ vĩ kʋ̃ tɛr baarʋ ɛ. 34Bʋ̃ʋ n'ʋ vɛ̃, a nyuur na ƴãw nɩ su-yãyaar a pɔw sɩr, ʋʋ kʋ̃ zɔ nɩbaalʋ a san yaafʋ ƴãw ɛ. 35Ʋ kʋ̃ sàw de libir a yele á ŋá maalʋ ƴãw ɛ. Bɛlɛ saa na kʋ̀ ʋ bʋ̃-kʋ̀rɩ yaga za a, ʋ kʋ̃ lɩɛbɩ a ʋ tɩ́ɛrʋ ɛ.
La Bible en Dagara © Alliance Biblique du Burkina Faso, 2013.