Zʋkpaɩ 30
30
AGUUR NƖ LEMUWƐL ƳƐ̀RƲ
30—31
Aguur ƴɛ̀rʋ
1Yake bidɛb, Aguur, ƴɛ̀r-tɩbr tɩbr. Nyɛ̃ a ƴɛ̀rʋ a nɩr ŋa na tɩ yel kʋ̀ a Ɩtɩɛl a, a Ɩtɩɛl nɩ a Ukal a#30:1 Ɩtɩɛl, Ɩtɩɛl nɩ Ukal: A ebre ƴɛ̀rʋ pʋɔ a, a yée á ŋá mɩ̀ na tʋ̃ɔ́ na dɩ kɛ́: Naaŋmɩn i, ɩ̃ bàl'a, ɩ̃ bàl'ɩ ɩ̃ za..
2Sɩza, mãa n'ʋ gem zuo a nɩbɛ za,
ɩ̃ bɛ tɛr nɩsaal yã mɩ̀ ɛ.
3Ɩ̃ mɩ̀ bɛ zanɩ a yã-bãwfʋ na na sõw mɛ̃
ɩ̃ bãw a sob nɛ na ɩ sõw a ɩ.
4Ãa n'ʋ do a salom zu ɛ́ lɛb siw wa?
Ãa n'ʋ dãw ƴãw a sɛsɛb a ʋ nuru pʋɔ?
Ãa n'ʋ na tʋ̃ɔ́ nyɔw a ʋ kpar-kpɛ̃ɛ pili ɛ́ ƴãw kʋ̃ɔ?
Ãa n'ʋ tʋɔrɩ a tẽw ƴãw a tʋr-bɔwrɩ za?
A yúor dɩ na kɛ́ bo?
A ʋ bidɛb yúor dɩ na kɛ́ bo?
Fʋ bãw ʋ na a?
5A Naaŋmɩn ƴɛ̀rʋ bɛ tɛr bʋnʋ ɛ. A Naaŋmɩn ɩ na mɛ̃ zɛbr-kur-pãgala a a bɛlɩ dem na mɩ́ sɔwlɛ a ʋ zie a ƴãw.
6Taa dɔwlɛ bom a ʋ ƴɛ̀rʋ zu ɛ, alɛ bɛ ɩ lɛ, ʋ na yere fʋ na, ɛ́ yel kɛ́ fʋ ɩ n zir-ŋmarɛ.
7Ɩ̃ Naaŋmɩn i, ɩ̃ zɛlɩ nɩ bome ayi a fʋ zie, kʋ̀ m ɩ̃ɩ wa bãw kpi.
8Ɩ a bom nɛ na bɛ tori a nɩ a ziri a zãá nɩ mɛ̃, ta bɛr mɛ̃ ɩ̃ be nã́w pʋɔ zuo bɩɩ ɩ̃ kpɛ naalʋ zuo ɩ. Kʋ̀ m a alɩ bome nɛ tɛwr ɩ̃ na sɛw k'ɩ̃ɩ tɛr tʋ̃ɔ́ vʋʋrɛ nɩ a. 9Bʋ̃ʋ n'ʋ vɛ̃, mãa wa tɛr a zuo a, ɩ̃ na tʋ̃ɔ́ na zawrɩ fʋ bɛr, yere nɩ: «Ãa n'ɩ a Sore?», bɩɩ mãa wa ɩ nã́w sob zuo a, ɩ̃ na tʋ̃ɔ́ na lɩɛbɩ nyãnyuwe sãw a ɩ̃ Naaŋmɩn yúor.
10Ta manɩ tõ-tõ-bie yel-faar kʋ̀ a ʋ nɩ-kpɛ̃ɛ ɩ, alɛ bɛ ɩ lɛ, ʋ na ŋmɛ na ƴãw fʋ, ɛ́ ɩ fʋ lɩɛbɩ a sãwna sob.
11Nɩbɛ be n be mɩ́ ŋmɩɛr ƴãwnɛ a bɛ sãà, ɛ́ bɛ ƴɛ̀rɛ nɔ-vla kʋ̀rɛ a bɛ mã ɩ.
12Nɩbɛ be n be tɩɛr kɛ́ bɛ vɩɛl a, ɛ́ bɛ so a bɛ dɛwr bɛr ɛ.
13Nɩbɛ be n be ɩ pɔ̀lʋ tɛwr, mɩ́ jɩ́rɛ a bɛ taabɛ pɔ̀l-jɩ́rʋ.
14Nɩbɛ be n be a nyɩmɛ ɩ mɛ̃ zɛbr-sɔ-bɛrɛ a, a kokã-nyɩmɛ ɩ mɛ̃ sɔ̀rʋ a. Bɛ báarɛ nɩ a bãbàalbɛ a tẽw pʋɔ, ɛ́ ɩrɛ a nan dem bɛ cãà bere a nɩsaalbɛ pʋɔ ɩ.
Zʋkpaɩ na mɩ́ sɔ́r a
15-16A dɩ̃dɩɛlʋ tɛr'ɩ pɔwyaar ayi a mɩ́ yere: «Tɩr, tɩr!» Bome ata kãw be n be bɛ tɛr nãà sɛw ɛ, ɛ́ bɛ be na yel: «A man na» ɩ:
a kpɩmɛ tẽw, a pɔw-ãan,
a tẽsɔw na bɛ bùr a.
A anaar sob be n be: a vũu.
Ʋ bɛ yere towtow: «A man na!» ɩ.
17Nɩr wa ɩrɛ a ʋ sãà laar ɛ́ bɛ sàwr a ʋ mã nʋɔr a, bàa nʋɔr gbagbarɩ na kpol ʋ nɩ a mimie, ɛ́ a sɩlɩ dɩ a ʋ ƴã-gan.
18-19Nyɛ̃ yele ata kãw na gãw a ɩ̃ fãw, ɩ̃ɩ bɛ tʋ́ɔr bãwnɛ a pɛr a:
a sɩla sɔ́r a salom zu,
a waab sɔ́r a pìir zu,
a gbor-kpɛ̃ɛ sɔ́r a kʋ̃ɔ-kpɛ̃ɛ zu.
A anaar sob be n be:
ʋlɛ n'ɩ a dɛb sɔ́r ʋ na mɩ́ tu cen a pɔw zie a.
20Nyɛ̃ a lɛ a pɔw-pɩ̃ɔ-yel-maalɛ ɩb na ŋmɛ̃ a: Ʋ mɩ́ dɩ na, fɩɛl'ɩ a nʋɔr bɛr ɛ́ yel: «Ɩ̃ bɛ maalɩ faa kãw za ɩ!»
21-23Yele ata be n be a tẽ-daa na kʋ̃ tʋ̃ɔ́ a, ɛ́ a mɩ́ ɩ ʋ màwr:
gbãgbaa na wa lɩɛb'ɩ nãà a,
gẽgemi sob na dɩrɛ zuo a,
pɔw-faa na wa nyɛ̃ sɩr kul a.
Ɛcɛ a anaar sob mɩ̀ be n be:
a tõ-tõ-bi-pɔw na wa lɩɛrɩ
a ʋ nɩ-kpɛ̃ɛ pɔw a.
24A tẽw zu ka a, dʋ̃-bʋʋrɛ anaar kãw na ɩ cãpili cãpili a be n be, ɛcɛ a tɛr'ɩ yã-bãwfʋ bɛ gbʋ́r ɛ.
25A nyɩrɩ, a bɛ tɛr fãw ɛ, ɛcɛ a mɩ́ wob'ɩ a bʋ̃-dɩrɩ ɓã taa a bʋ̃-dieri-deb daar.
26A tasɩ́ɛ#30:26 Tasɩ́ɛ: A Wiile bʋɔlɛ a nɩ kɛ́ sasɩɛ., a bɛ tɛr kpɛ̃w ɛ, ɛcɛ a mɩ́ maal'ɩ a kpɛb ziir a pìir pʋɔ.
27A sãsoge, a bɛ tɛr nãà ɩ, ɛ́ mɩ́ lãw ƴaw tu taa vla.
28A tacɩra bɛ na na tʋ̃ɔ́ nyɔw nɩ a nũú, ɛcɛ ʋ kpɩɛr a na-mɩnɛ yie pʋɔ a.
29-31Bʋ̃-vʋʋrɩ ata kãw be n be mɩ́ sãá vɩɛlɩ vɩɛlɩ, ɛ́ a cenu vɩɛl:
a gbẽw, a dʋn pʋɔ dʋ̃-gãdaa
na bɛ tɩ̃wnɛ pùor bom kãw za niŋé a,
a nʋra na mɩ́ ìr àr'ɩ a ʋ nafɩlɛ a, bɩɩ a bʋrale.
A anaar sob be n be:
a nãà na mɩ́ de a ʋ zɛbr-nɩbɛ niwn a.
32Fʋ̃ʋ wa ɩ dãbol-ɩb zɛw fʋ tʋɔra, ɛ́ a pùorí fʋ lɛb tɩ́ɛrɩ a, fʋ̃ʋ ta lɛb háa nʋɔr ɛ.
33Bʋ̃ʋ n'ʋ vɛ̃, fʋ̃ʋ wa puw bʋ̀r-kãá a, a na yi n kãá, fʋ̃ʋ wa ŋmɛ a nyʋɔr a, zɩ̃ɩ na ƴaw na yi, fʋ̃ʋ wa dam nɩr suur a, a na wa n nɩ zɛbr.
La Bible en Dagara © Alliance Biblique du Burkina Faso, 2013.