Zʋkpaɩ 22
22
1Yo-vla sa tɛra yaga. A nɩbɛ na nɔnɛ fʋ a vɩɛl'a zuo a salm-zɩɛ nɩ a salm-pla.
2Bom ŋa n'ʋ a nãà nɩ a nã́w sob lãw, a Sore n'ʋ maalɩ bɛ za ayi.
3A kpɩɛrʋ wa waar a, a nɩr na bãw maal-ɩb a mɩ́ sɔwl'a. Ɛcɛ a bɛlɩ dem na bɛ bãw bom a mɩ́ cãà na lo a bɛ sɔ́r tɩ páw a tuo.
4A nɩr na siwre ʋ tʋɔra a mɩ́ tɛr'ɩ a Sore zɔba. Ʋ mɩ́ kpɛ n naalʋ, tɛr yúor ɛ́ vʋʋrɩ cɛlɩ.
5Gʋʋr nɩ bɛrɩ n'a mɩ́ pàw a nɩsaal-gõlõgõlõ sɔ́r. Nɩr na bɔbr a nyɔ-vʋʋrʋ a na zãá nɩ ʋ na.
6Ɩ a bibile tɛr mil-vɩɛlɩ a pɛr-tib daar. Ʋ na tɩ kor'a ɛ́ cãà tɛr a.
7A nãà mɩ́ so nɩ a nan dem. Bɛlɩ dem na tɛr samɛ a mɩ́ ɩ n a bɛlɩ dem na pɛ̃w bɛ a gbãgbaar.
8Sob nɛ na ɩrɛ a ɩ-ɩrɩ na bɛ tu mɩnʋ a yàarɛ pàwr a ziir za a nãà wa wob'ɩ a kpɩɛrʋ.
9Nɩr na tɛr nɩsaalʋ a na nyɛ̃ nɩ maalʋ, bʋ̃ʋ n'ʋ vɛ̃, ʋ mɩ́ ɩ n a ʋ bʋ̃-dɩrɩ kʋ̀ a nã́w sob.
10Diw a bɛlɩ dem na mɩ́ ɩrɛ bom za laar a, ɛ́ a zɛb-taa na tɛw na. Taw-taa nɩ tʋ-taa kʋ̃ cãà be ɩ.
11Sob nɛ na nɔnɛ a soci-parpar sob ɛ́ mɩ́ ƴɛ̀rɛ nɩ nɔ̃wfʋ a, a ʋ bá mɩ́ n'ɩ a nãà.
12A Sore mɩ́ gù n a bãwfʋ na ɩ sɩza a, ɛcɛ ʋ mɩ́ ŋmɛ n a nɩsaal-libelibe ƴɛ̀rʋ lɔb.
13A ƴã-tuo sob mɩ́ yel'a: «Gbẽw be n a yẽw! Ʋ na kʋ mɛ̃ nɩ a sɔ́r zu!»
14A pɔw-pɩ̃ɔ-yel-maalbɛ ƴɛ̀rʋ ɩ n bɛra na bɛ vɩɛl a. Bɛlɩ dem a Sore na bɛ de a bɛ yele a na lo n a pʋɔ#22:14 Nyɛ̃ 5.5..
15A bibiir nɔnɛ nɩ a dãbolu. A dabɔl na kpãànɛ bɛ a na ɩ na bɛ bɛr ʋ.
16Nɩr na dɔwrɛ nã́w sob a, ʋ na ƴãw ʋ nɩ naalʋ pʋɔ a baarʋ daar#22:16 A zʋkpar ŋa pɛr na n'ɩ kɛ́ Naaŋmɩn na maal'ɩ a nã́w sob a baarʋ daar, Naaŋmɩn na nɔnɛ a nan dem pùor-tub a.. Nɩr na kʋ̀rɛ nãà bom a, ʋ na lɩɛb'ɩ nã́w sob a baarʋ daar.
Wul-pɛ-bʋʋrɛ bʋʋrɛ
17Ƴãw tobr, bɛr wõ a yã-bãwnbɛ ƴɛ̀rʋ, ɛ́ cɛlɛ a ɩ̃ bãwfʋ zie.
18A na ɩ b'ɩ nʋ̃ɔ̀ fʋ na na tɛr a tɩ́ɛrɛ a fʋ socir pʋɔ ɛ́ a be a fʋ nʋɔrɩ́ kʋralɛ a.
19Ɩ̃ bɔbr'a kɛ́ fʋ ƴãw a fʋ tɩ́ɛrʋ a Sore ƴãw, alɛ n'a so ɩ̃ na ɩ kɛ̀ fʋ mɩ̀ bãw a a dɩ̃a tɔr za.
20Nyɛ̃, ɩ̃ sɛb'ɩ zʋkpaɩ lɩzɛr'ɩ pie na wule yã ɛ́ tɩrɛ bãwfʋ a, a fʋ ƴãw,
21k'ɩ̃ɩ wul fʋ fʋ mɩ́ sɩrɩ ƴɛ̀r a tori. Nɩr wa tone fʋ a, fʋ na ɩ n nɩ-tona na mɩ́ yel a yel-mɩŋa a.
22Ta faa a bãbàal bome ɩ, bãbàal'ʋ. Nɩr na bɛ tɛr sõwne a, ta ƴɛ̀r dĩ nɩ ʋ a ƴɛ̀rʋ-dɩb zie ɩ.
23Bʋ̃ʋ n'ʋ vɛ̃, a Sore na ƴɛ̀r'a kpɛ bɛ. Ʋ na de nɩ a bɛlɩ dem za nãà wa fa a bɛ bʋ̃-tɛrɩ za a nyɔ-vʋʋrʋ.
24Ta nyɔw nɩ suur sob báalʋ ɛ. Ta tuur nɩr na bɛ mɩ́ yaa kɛ́ nyɛ̃ suur a ɩ.
25Alɛ bɛ ɩ lɛ, fʋ na cɔwr'ʋ na lo bɛra pʋɔ.
26Ta ŋmɛ nyãa yel kɛ́ fʋ so nɩ nɩ-yũo samɛ ɩ#22:26 Nyɛ̃ 6.1..
27Bʋ̃ʋ n'ʋ vɛ̃, fʋ̃ʋ bɛ wa tɛr a na ya a, bɛ na de nɩ a fʋ gado tɔr za.
28A póru tʋr-bɔwrɩ kʋsɛbɛ a fʋ sãàkʋm-kore na ƴãw a, taa vire a ƴãwn zi-yoru ɛ.
29Jɩ́r a nɩr na bãw a ʋ tome vla a. Ʋ na tʋ̃ɔ́ na cen tɩ kpɛ tome a nãà zie, ɛ́ ta cãà be a tõ-tonbɛ a nɩbɛ na bɛ bãw a sɔgɔ ɩ.
La Bible en Dagara © Alliance Biblique du Burkina Faso, 2013.