Zʋkpaɩ 20
20
1A divɛ̃ mɩ́ ƴãw na fʋ ɩrɛ nɩbɛ laar, ɛ́ dã-kpɛn ƴãw fʋ pàwr gɔmɛ. Nɩr wa de ʋ mɩŋa bɛr a kuole ʋ a kʋ̃ tʋ̃ɔ́ ɩ yã-bãwnɛ ɩ.
2Nãà a suur na ìr a ŋmɛ̃ na mɛ̃ gbẽw na ùore a. Nɩr wa damnɛ a nãà suur a, ʋ cɩɛr'ɩ kũu-pire.
3Nɩr na zɔrɛ a zɛbr a ɩ n nɩr na sɛwnɩ ƴãwfʋ a. Dãbole tɛwr nɛbɛ mɩ́ nyɛrɛ a suur.
4A na ɩ a sɩ̃ɔ a, a ƴã-tuo sob bɛ bɔbr a kɔb ɛ, ɛcɛ a bʋ̃-dieri daar a, ʋ na bɔ na ɛ́ kʋ̃ nyɛ̃ bom ɛ.
5A nɩsaal tɩ́ɛrʋ mɩ́ sɔwl'a mɛ̃ kʋ̃ɔ na be tẽsɔw pɛrɩ́ a. Nɩr na tɛr yã a n'ʋ na páw a 'wɔ̃w.
6Nɩ-yaga mɩ́ yere na bɛ na ɩ nɩ-vɩɛlɩ a. Ɛcɛ nɩr fʋ na bɛ bʋ́nɛ nɩ a, ãa n'ʋ na tʋ̃ɔ́ nyɛ̃ ʋ?
7A nɩ-mɩŋa mɩ́ tuur'ɩ a lɛ na sɛw taa nɩ a. Zu-nʋ̃ɔ̀ dem'ɩ a ʋ bibiir a ʋ pùorí.
8A nãà wa zɩ̃ a ƴɛ̀rʋ-dɩb ƴãw a, ʋ mɩ́ nyɛ̃ nɩ a faa daadaalɛ.
9Ãa n'ʋ na tʋ̃ɔ̀ yel: «Ɩ̃ pɛ́w nɩ a ɩ̃ pʋɔ, a ɩ̃ yel-bier dɛwr za bɛ cãà be ɩ!»
10A Sore bɛ nɔnɛ kɛ́ bɛ mɩ́ tɛr nyãnyu-ɩb nɩ a tɩbrʋ bʋ̃-mánɩ nɩ a wogo bʋ̃-mánɩ ɛ.
11Bibile tɔr za mɩ́ wul'ɩ a ʋ ɩ-ɩrɩ pʋɔ a ʋ cenu na vɩɛl ɛ́ tori a.
12Tobe a wob ƴãw, mimie a nyɛ́b ƴãw, a Sore n'ʋ maalɩ a.
13Ta nɔnɛ a gʋ̃ɔ kɛ̀ nã́w taa wa kpɩɛr fʋ ɛ. Yuo a fʋ mimie ɛ́ fʋ na dɩ na tɩw.
14A bʋ̃-daarɛ mɩ́ yel'a: «A daarʋ kpɛmɛ na zuo!» Ɛ́ ʋlɛ wa lɛb cere a, ʋ̃ʋ cɩlɛ ʋ na páw fʋ a ƴãw.
15Salm-zɩɛ nɩ lɛw-bʋʋrɛ bʋʋrɛ za ʋr'a. Ɛcɛ a bʋ̃-vla na bɛ tɛr ʋ tɔ a n'ɩ ƴɛ̀rʋ na tɩrɛ bãwfʋ a.
16Nɩr wa ŋmɛ nyãa yel kɛ́ fʋ pɛ̃w libir nɩr fʋ na bɛ bãw a, de a ʋ bʋ̃-suura ʋ ɩ a san bãwfʋ bom. Tɛr a bãwfʋ bom ŋa, bʋ̃ʋ n'ʋ vɛ̃, ʋ sàw na kɛ́ fʋ pɛ̃w libir nɩr fʋ na bɛ bãw a.
17A bʋ̃-dɩ-zura mɩ́ nʋmɛ nɩ a pɛr-tib daar, ɛ́ a nʋɔr wa paalɩ baarɩ a ɩ kʋsɛbɛ.
18Nɩr na mɩ́ ɩ bɛ wul ʋ yã a mɩ́ tʋ̃ɔ́ nɩ a ʋ yele maalɩ. Fʋ̃ʋ wa cere zɛbr zie a, fʋ̃ʋ cɔbrɩ vla.
19Nɩr na mɩ́ manɛ a ʋ taabɛ yel-faar a mɩ́ ɩ na kɛ̀ yel-sɔwla yi. A na ɩ lɛ a, ta tuur a nɩbɛ na ƴɛ̀rɛ zuo a ɩ.
20Nɩr wa ŋmɩɛr ƴãwn a ʋ sãà nɩ a ʋ mã a, a ʋ nyɔ-vʋʋrʋ na baar'a mɛ̃ fɩ̃tɩlɛ na kpiiri zi-lige pʋɔ a.
21Tɛra fʋ na paw fɔ̃w zuo tɛr a pɛr-tib daar a kʋ̃ tʋ̃ɔ́ wa n maalʋ a pùorí ɛ.
22Ta yere: «Ɩ̃ na yáa nɩ a faa bɛ na maalɩ mɛ̃ a san ɛ!» Nɩ̃ɛ vɛ̃ kɛ́ ƴãw a fʋ tɩ́ɛrʋ a Sore ƴãw, ʋʋ na faa fʋ na.
23A Sore bɛ nɔnɛ a tɩbrʋ bʋ̃-mánɩ na bɛ tori a ɩ. Bome bʋ̃-keri na bɛ tori a, a bɛ vɩɛl ɛ#20:23 Nyɛ̃ 11.1..
24A Sore n'ʋ kaarɛ a nɩsaal cenu. Ŋmɩŋmɩn n'a a nɩsaal na tʋ̃ɔ́ bãw a be ʋ na cere a?
25Bɛra n'ʋ a nɩsaal zie, ʋ na bʋnɩ yel: «Bʋ̃-sõw n'ʋ», nɩ ʋ na kõ a nɛ́ɛ baarɩ ɛ́ bãw tɩ́ɛrɩ a.
26Nãà na ɩ yã-bãwnɛ a mɩ́ diw nɩ a nɩ-faar yaarɩ. Ʋ mɩ́ nɛb bɛ na ŋmɛr.
27A tɩɛrʋ ɩ n fɩ̃tɩlɛ a Sore na kʋ̀ a nɩsaal a, ʋ mɩ́ caal'ɩ a nɩsaal pʋɔ zi-sɔwlɩ za.
28A nɔ̃wfʋ ɩb nɩ a pùor-bɛ-lɛbrʋ mɩ́ gù n a nãà. A nɔ̃wfʋ ɩb'a na tʋ̃ɔ́ ɩ a ʋ naalʋ tɛr fãw.
29A fãw n'a ɩ a pɔlbili dɛpaalʋ, ɛ́ a zukɔbr-pɛlɛ ɩ a dɛb-nyamɛ vɩɛlʋ.
30Natɩɛ na 'wɔbr fʋ a na tʋ̃ɔ́ na sanɩ a faalʋ, ɛ́ a ŋmɩɛrʋ ɩ fʋ páw a socir vɩɛlʋ.
La Bible en Dagara © Alliance Biblique du Burkina Faso, 2013.