Sɔr-nɛ́ɛ 21
21
A Ɩsɩrayɛl nɩbɛ na tĩ zɛb tʋ̃ɔ́ a Kanãa tẽw dem a
1A Aradɩ tẽw nãà na tɩ ɩ Kanãa tẽw nɩr kãw ɛ́ tɩ kpɩɛr a Negɛɛvʋ vuo pʋɔ a, tɩ wõ na k'aa Ɩsɩrayɛl nɩbɛ tu n Atarim sɔ́r waar. Ʋ tɩ ŋmãa nɩ bɛ nɩ zɛbr, nyɔw nɩbɛ bɛ mɩnɛ. 2Lɛ n'a a Ɩsɩrayɛl nɩbɛ tɩ kõ nʋɔr ŋa a Sore zie: «Fʋ̃ʋ wa sàw ƴãw a nɩbɛ bɛ ŋa a tɩ nuru pʋɔ a, tɩ na ŋmɛr'ɩ a bɛ tẽ-bɛrɛ bɛr cʋmcʋmcʋm!» 3A Sore tɩ sàw nɩ a nʋɔr ŋa a Ɩsɩrayɛl nɩbɛ na kõ a, ɛ́ ƴãw a Kanãa tẽw dem a bɛ nuru pʋɔ. A Ɩsɩrayɛl nɩbɛ tɩ kʋ bɛ na pàw pɛr, ɛ́ ŋmɛr a bɛ tẽ-bɛrɛ bɛr, ɛ́ por a vuo ʋl yúor kɛ́ Hɔrma, a pɛr lɛ kɛ́ «Ŋmɛr cʋmcʋmcʋm.»
A kur-zɩɛ waab
4A Ɩsɩrayɛl nɩbɛ tɩ yi n a Hoor tãgɛ̃́ tu a Bàa-kɛkɛɛ kʋ̃ɔ-kpɛ̃ɛ lowr kɛ́ bɛ cen jɩɩrɩ koli a Edɔm tẽw. Ɛcɛ a nɩbɛ kanyir za tɩ baar'ɩ a sɔ́r zu. 5Bɛ tɩ nyɔw nɩ a Naaŋmɩn nɩ a Moyiir yere: «Bʋnʋ ƴãw n'a nyɩ ɩ tɩ yi a Eziptɩ? Tɩ wa kpi a wɛja-kpalɛ pʋɔ ƴãw n'a bɩɩ? Dipɛ̃ nɩ kʋ̃ɔ bɛ ka ka ɩ, ɛ́ a nɩbaal-bʋ̃-dɩra ŋa na ɩ a mãan a, ɓa tɩ nʋɔr!» 6Lɛ n'a a Sore tɩ ƴãw wɩɩr a lɔw na vuule a, a wa a bɛ ƴãw. A tɩ dʋ̃ n Ɩsɩrayɛl nɩbɛ yaga bɛ kpi. 7A bɛl na cɛ a tɩ wa na wa páw a Moyiir yel ʋ à ŋá: «Tɩ maal'ɩ yel-bier tɩ na nyɔw a Sore nɩ a fʋ̃ʋ za yere a. Zɛlɩ a Sore ʋ diw a wɩɩr á ŋá bɛr tɩ.» A Moyiir tɩ zɛlɩ nɩ a Sore a nɩbɛ ƴãw, 8ʋ yel ʋ à ŋá: «Maalɩ waab a lɔw na vuule a ƴãw dàa ƴãw. Waab wa dʋ̃ nɩr za ʋ jɩ́r ʋ kaa a, ʋ na baa na.» 9A Moyiir tɩ maal'ɩ waab nɩ kur-zɩɛ, ƴãw dàa ƴãw. Lɛ n'a, waab na mɩ́ tɩ dʋ̃ nɩr, ʋ jɩ́r a kur-zɩɛ waab kaa a, ʋ mɩ́ tɩ baa na.
A cenu na cere tɛwr tɩ ta Pisiga tãgɛ̃́ a
10A Ɩsɩrayɛl nɩbɛ tɩ ìr'a lo a sɔ́r, tɩ maalɩ a bɛ laɩ Ovɔtɩ. 11Al pùorí, bɛ tɩ yi n a Ovɔtɩ ɛ́ tɩ maalɩ a bɛ laɩ Iye-Avarim, a wɛja-kpalɛ pʋɔ, Mowab tẽw saa-pɛrɩ́. 12A pùorí, bɛ tɩ maalɩ a bɛ laɩ Zerɛdɩ bà-fʋɔla nʋɔr. 13Bɛ tɩ yi n a be, ɛ́ tɩ lo gãw a Arnon, maalɩ a bɛ laɩ a be. A bàa ŋa na yi a Amoritɩ mɩnɛ tẽw a tɔl'ɩ a wɛja-kpalɛ pʋɔ, ɛ́ ɩ a Mowab tẽw nɩ a Amoritɩ mɩnɛ tẽw tʋr-bɔw. 14Bɛ ƴɛ̀r'ɩ a ʋ ƴɛ̀rʋ a Sore zɛbr sɛbɛ pʋɔ, a be bɛ na yel kɛ́: «...Vahɛb na be Sufa a, nɩ a ʋ bà-gbɛ́ɛ, a Arnon 15nɩ a ʋ bà-gbɛ́ɛ, a Arnon bà-fʋɔla ʋl na be a Aar lowr a, na ɩ a Mowab tʋr-bɔw a...» 16Bɛ tɩ yi n a be ta a zie ʋl bɛ na bʋɔlɛ Bule a. A be n'a a Sore tɩ yel à ŋá kʋ̀ a Moyiir: «Bʋɔlɩ a nɩbɛ ɓã taa, ɩ̃ɩ na kʋ̀ bɛ nɩ kʋ̃ɔ.» 17A lɛ n'a a Ɩsɩrayɛl nɩbɛ tɩ cɛ a yielu ŋa:
«A kʋ̃ɔ, a ìr do a bule pʋɔ, ɛ́ bɛ cáarɛ!
18Bule a nɩ-bɛrɛ na tuw a,
a nɩbɛ nɩ-bɛrɛ na yaw a,
na tuw nɩ a bɛ nɩ-bɛrɛ dabɔlɛ a
nɩ a bɛ nɩ-kpɛ̃ɛnʋ dabɔlɛ a!»
A Ɩsɩrayɛl nɩbɛ tɩ yi n a wɛja-kpalɛ pʋɔ ɛ́ cen Matana, 19tɩ yi a be cen Nahaliyɛl, a pùorí bɛ cen Bamɔtɩ. 20Bɛ pãa tɩ yi n a be cen a fʋɔla ʋl na tu tɔl a Mowab tẽw pʋɔ a, ɛ́ cere wɩɛr a Pisiga tãw nyʋɔrɩ́ a. Fʋ̃ʋ wa be a tãw ŋa zu a, fʋ mɩ́ nyɛ̃ nɩ a wɛja-kpalɛ za.
A Ɩsɩrayɛl nɩbɛ zɛb'a tʋ̃ɔ́ na-mɩnɛ: Sihon nɩ Ɔgɩ
21A Ɩsɩrayɛl nɩbɛ tɩ tõ n nɩbɛ bɛ tɩ yel a Amoritɩ mɩnɛ nãà, Sihon, à ŋá: 22«Tɩ bɔbr'a kɛ́ tɩ tu a fʋ tẽw pʋɔ tɔl. Tɩ bɛ bɩ̀ɛrɛ a sɔ́r kpɩɛr a póru pʋɔ, bɩɩ a divɛ̃ tɩɩr póru pʋɔ ɛ, tɩ bɛ nyúur a buli kʋ̃ɔ ɩ. A sɔ-kʋɔr-kpɛ̃ɛ n'ʋ tɩ na tu, ɛ́ gù tɩ wa tɩ tɔl a fʋ tẽw za pʋɔ.»
23Ɛcɛ a Sihon bɛ tɩ sàw bɛ na tɔl ɛ. Ʋ tɩ ɓã n a ʋ zɛbr-nɩbɛ za taa yi tuor'ɩ a Ɩsɩrayɛl nɩbɛ tɩ ta Yahasɩ, a wɛja-kpalɛ pʋɔ, ŋmãa nɩ bɛ a zɛbr. 24A Ɩsɩrayɛl nɩbɛ tɩ zɛb'a tʋ̃ɔ́ bɛ, de a bɛ tẽw za na yi a Arnon, a saa-pɛrɩ́-dʋrʋ-lowr, ɛ́ tɩ tɔ a Yabɔkɩ, a saa-pɛrɩ́-gʋba-lowr a, ɛ́ mɩ̀ lɛb tɩ tɔ a Amɔ̃ tẽw tʋr-bɔw a saa-pɛrɩ́ a, tʋr-bɔw bɛ na gù vla vla a. 25Bɛ tɩ zɛb'a de a Amoritɩ mɩnɛ tẽ-bɛrɛ za, tɩ lãwnɩ a Hɛsɩbon nɩ a tẽli-kpɔwlɩ, ɛ́ zɩ̃ a za pʋɔ. 26A Hɛsɩbon tɩ n'ɩ a Amoritɩ mɩnɛ nãà, Sihon, tẽ-kpɛ̃ɛ za. Bʋ̃ʋ n'ʋ vɛ̃, ʋ tɩ zɛb'ɩ nɩ a Mowab tẽw na-dãw-niwn sob de a zie ʋl za na cen tɩ sãá a Arnon a. 27À ŋá n'a a zʋkpa-lɔbrbɛ ƴɛ̀r a yel ŋa ƴɛ̀rʋ:
«Nyɩ wa a Hɛsɩbon,
nyɩ lɛb mɛ a Sihon tẽ-kpɛ̃ɛ!
28Vũu yi n a Hɛsɩbon pʋɔ,
vũu-zɛl ɩ n pelem yi a Sihon tẽ-kpɛ̃ɛ pʋɔ.
Ʋ dɩ n Aar, a Mowab tẽw pʋɔ,
ɛ́ dɩ a Arnon tãli ŋmɩmɛ.
29Baw-bio wɛ, Mowab i!
Nyɩ wɛ na, nyɩɩm Kemɔsɩ#21:29 Kemɔsɩ: A Mowab tẽw dem ŋmɩn n'ʋ dɩ a lɛ. puor-puorbɛ ɛ!
A dɛbr na bɛ tʋ̃ɔ́ kpi a, nɩ a pɔwbɛ a,
gaso nɩbɛ n'ɩ bɛ za,
bɛ nyɔw tɩ kʋ̀ a Amoritɩ mɩnɛ nãà Sihon.
30Ɛcɛ tɩ tɛ n a Amoritɩ mɩnɛ kʋ.
Ƴɛrɛŋa a, Hɛsɩbon bɛ cãà be ɩ,
ɛ́ a tẽw za sãw cen tɩ tɔ Divon.
Tɩ sãw nɩ bom za tɩ sãá nɩ Nofa,
tɩ sãá nɩ Medeva mɔ̃ mɩ̀.»
31À à ŋá n'a a Ɩsɩrayɛl nɩbɛ tɩ zɩ̃ a Amoritɩ mɩnɛ tẽw pʋɔ. 32A Moyiir tɩ tõ n nɩbɛ bɛ tɩ piwri bãw a Yazɛɛr, al pùorí a Ɩsɩrayɛl nɩbɛ zɛb de a tẽ-kpɛ̃ɛ ŋa nɩ a tẽli-kpɔwlɩ, ɛ́ diw a Amoritɩ mɩnɛ bɛr a be. 33Bɛ tɩ lɩɛb'a tu zi-yoru a pùorí, lo Basan sɔ́r. A Basan tẽw nãà, Ɔgɩ, tɩ yi n daadaalɛ, ʋlɛ nɩ a ʋ zɛbr-nɩbɛ za, tuori a Ɩsɩrayɛl nɩbɛ, k'ʋʋ zɛb'ɩ bɛ Edɩrɛyɩ. 34A Sore tɩ yel'ɩ a Moyiir à ŋá: «Taa zɔrɛ ʋ ɛ! Ɩ̃ na ƴãw ʋ nɩ a fʋ nuru pʋɔ, ʋlɛ nɩ a ʋ zɛbr-nɩbɛ za, nɩ a ʋ tẽw za. Fʋ na ɩ ʋ na, mɛ̃ a lɛ fʋ na ɩ a Amoritɩ mɩnɛ nãà, Sihon, na tɩ dɩrɛ a naalʋ a Hɛsɩbon a.» 35A Ɩsɩrayɛl nɩbɛ tɩ zɛb'a tʋ̃ɔ́ a Ɔgɩ nɩ a ʋ bidɛbr nɩ a ʋ zɛbr-nɩbɛ za. Bɛ bɛ tɩ cɛ nɩr bɛr ʋ cãà vʋʋrɛ ɩ, ɛ́ bɛ de a ʋ tẽw.
Currently Selected:
Sɔr-nɛ́ɛ 21: DBDC
Highlight
Share
Compare
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
