Sɔr-nɛ́ɛ 13
13
A Moyiir tõ n nɩbɛ bɛ tɩ cɔlɩ jɩ́r a Kanãa tẽw
1A Sore tɩ ƴɛ̀r'ɩ a Moyiir zie yel á ŋá: 2«Tõ nɩbɛ bɛ cen tɩ cɔlɩ jɩ́r a Kanãa tẽw kaa, ɩ̃ na kʋ̀rɛ a Ɩsɩrayɛl nɩbɛ a. Dɔwlʋ za pʋɔ a, bɛ na tõ n nɩr bɛ na kaa ír a nɩ-bɛrɛ pʋɔ a.» 3A Moyiir tɩ ɩ n a lɛ a Sore na yel a. Ʋ tɩ be n a Paran wɛja-kpalɛ pʋɔ ɛ́ tõ nɩbɛ na tɩ ɩ a Ɩsɩrayɛl nɩbɛ nɩ-bɛrɛ bɛ za a. 4A bɛ yée n'ɩ á ŋá:
Zakuur bidɛb, Samua, na yi Urubɛn dɔwlʋ pʋɔ a.
5Hori bidɛb, Safatɩ, na yi Sɩmɩ̃ɔ dɔwlʋ pʋɔ a.
6Yefune bidɛb, Kalɛb, na yi Zuda dɔwlʋ pʋɔ a.
7Zuzɛb bidɛb, Yigeyal, na yi Ɩsakaar dɔwlʋ pʋɔ a.
8Nun bidɛb, Hosea, na yi Efarayim dɔwlʋ pʋɔ a.
9Arafu bidɛb, Palti, na yi Bɛ̃zamɛ dɔwlʋ pʋɔ a.
10Sodi bidɛb, Gadiyɛl, na yi Zabulɔ̃ dɔwlʋ pʋɔ a.
11Susi bidɛb, Gadi, na yi Zuzɛb bidɛb Manase dɔwlʋ pʋɔ a.
12Gemali bidɛb, Amiyɛl, na yi Dan dɔwlʋ pʋɔ a.
13Mɩkayɛl bidɛb, Setuur, na yi Asɛɛr dɔwlʋ pʋɔ a.
14Vofesi bidɛb, Nabi, na yi Nɛfɩtali dɔwlʋ pʋɔ a.
15Maki bidɛb, Gewuyɛl, na yi Gadɩ dɔwlʋ pʋɔ a.
16A nɩbɛ a Moyiir na tɩ tõ bɛ tɩ cɔlɩ jɩ́r a Kanãa tẽw kaa a, yée n'ɩ à á ŋá. A Moyiir tɩ por'ɩ a Nun bidɛb Hosea kɛ́ Zozue#13:16 Hosea nɩ Zozue: Ebre ƴɛ̀r-bi-pɛ-been n'ʋ wa n a yée á ŋá ayi. A za ayi pɛr'ɩ: «A Sore faarɛ na.».
17A Moyiir na tɩ tone a nɩbɛ bɛ ŋa a, ʋ tɩ yel bɛ na: «Nyɩ tu a Negɛɛvʋ lowr kpɛ a tẽw pʋɔ, al pùorí nyɩ kpɛ a tan pʋɔ, 18ɛ́ maal jɩ́rɛ a lɛ a tẽw na ŋmɛ̃ a: a nɩbɛ na kpɩɛr ʋ a, bɛ tɛr'ɩ fãw bɩɩ bɛ bɛ tɛr fãw, bɛ yãwmɛ na bɩɩ bɛ bɛ yãwmɛ. 19Nyɩ jɩ́r nyɛ̃, a tẽw vɩɛl'a bɩɩ ʋ bɛ vɩɛl, a ziir bɛ na kpɩɛr a, pɛnɛ-sɛwr laɩ n'a bɩɩ tẽ-bɛrɛ bɛ na mɛ dacine viiri koli a n'a. 20Nyɩ jɩ́r nyɛ̃, a tẽsɔw vɩɛl'ɩ a kɔb ƴãw bɩɩ ʋ bɛ vɩɛl, tɩɩr be n be bɩɩ tɩɩr bɛ ka be. Nyɩ tɩ kpɛ socir pɔr a tẽw tɩ-wɔmɛ wa n.» Bʋ̃ʋ n'ʋ vɛ̃, divɛ̃ tɩ-wɔ̃-dan daar tɩ n'a.
21Lɛ n'a a nɩbɛ bɛ ŋa tɩ yi a Sin wɛja-kpalɛ pʋɔ ɛ́ cɔlɩ jɩ́r a Kanãa tẽw tɩ ta n Erehovʋ na pɩɛlɩ Lebo-Hamatɩ a. 22A Negɛɛvʋ lowr'a bɛ tɩ tu kpɛ a tẽw pʋɔ, ɛ́ cen tɩ sãá Ebrɔ̃. Be n'a a Ahiman, Sesaɩ nɩ Talmaɩ dɔwlʋ nɩbɛ tɩ kpɩɛr: a nɩ-kɛra jarmam Anakɩ bʋʋrɛ nɛbɛ. Bɛ tɩ ŋmãa nɩ a Ebrɔ̃ tẽw maalɩ yome ayopõi, ɛ́ bãw ŋmãa a Tanisɩ#13:22 Tanisɩ: Tẽ-kpɛ̃ɛ na be a Eziptɩ tẽw saa-pɛrɩ́-gʋba-lowr nɩ saa-pɛrɩ́ cara pʋɔ a n'ʋ. Bɛ mɩ̀ bʋɔlɛ ʋ nɩ Sowan. tẽw a Eziptɩ. 23Bɛ tɩ yi n a be cen Ɛsɩkɔl fʋɔla pʋɔ tɩ cɛ divɛ̃ tɩɛ wule na tɛr a divɛ̃ tɩ-wɔ̃-cãacul a, ƴãw dà-wogo ƴãw nɩbɛ ayi tuo. Bɛ mɩ̀ tɩ pɔr'ɩ girenadɩ tɩɛ wɔmɛ nɩ kãkamɛ. 24Bɛ tɩ por'ɩ a zie ʋl yúor kɛ́ Ɛsɩkɔl fʋɔla, a pɛr lɛ kɛ́ divɛ̃ tɩ-wɔ̃-cãacul fʋɔla, a divɛ̃ tɩ-wɔ̃-cãacul a Ɩsɩrayɛl nɩbɛ na tɩ ŋmãa a be a ƴãw.
A nɩbɛ a Moyiir na tõ a man nɩ a lɛ a yele na ɩ a
25A tɩ maal'ɩ bibie lɩz'a ayi ɛ́ a nɩbɛ na cen tɩ cɔlɩ jɩ́r a tẽw kaa a lɛb wa. 26Bɛ tɩ lɛb'a wa páw a Moyiir, a Aarɔ̃ nɩ a Ɩsɩrayɛl nɩbɛ lãw za a Paran wɛja-kpalɛ pʋɔ, a Kadɛsɩ. Bɛ tɩ yel'ɩ a alɩ bome nɛ bɛ na nyɛ̃ a kʋ̀ bɛ za, ɛ́ wul bɛ a tẽw tɩ-wɔmɛ. 27À ŋá n'a bɛ tɩ manɩ kʋ̀ a Moyiir: «Tɩ cen nɩ a tẽw ʋl pʋɔ fʋ na tõ tɩ a. Yel-mɩŋa sa ziri, tẽw bʋ̀rʋ nɩ sɩwr na gbɔlɛ#13:27 Tẽw bʋ̀rʋ nɩ sɩwr na gbɔlɛ a: Nyɛ̃ Ety 3.8 nɩ a manʋ na be a be a. a n'ʋ. Nyɛ̃ a tẽw tɩ-wɔmɛ a mɩnɛ. 28Ɛcɛ a nɩbɛ na kpɩɛr a tẽw a tɛr'ɩ fãw, ɛ́ a ten ɩ tẽ-bɛrɛ bɛrɛ bɛ na mɛ dacine viiri koli a. Tɩ mɔ̃ mɩ̀ nyɛ̃ nɩ a nɩ-kɛra jarmam Anakɩ bʋʋrɛ a be. 29A Amalesitɩ mɩnɛ kpɩɛr'ɩ a Negɛɛvʋ vuo pʋɔ. A Hititɩ mɩnɛ, a Zebi tẽw dem nɩ a Amoritɩ mɩnɛ be n a tan vuo pʋɔ, ɛ́ a Kanãa tẽw dem kpɩɛr a Mediterane kʋ̃ɔ-kpɛ̃ɛ nʋɔr nɩ a Zurdɛ̃ man nʋɔr.»
30Kalɛb tɩ ɩ na a nɩbɛ na zɛbr'ɩ a Moyiir a, bɛ ɩ gbili. Ʋ tɩ yel'a: «Nyɩ ɩ tɩ cen! Tɩ do tɩ zɛb de a tẽw. Tɩ na tʋ̃ɔ́ na!» 31Ɛcɛ a nɩbɛ bɛl nɩ a ʋl na tɩ do a tɩ yel'a: «Tɩ kʋ̃ tʋ̃ɔ́ zɛb'ɩ a nɩbɛ bɛ ŋa ɩ, bɛ tɛr'ɩ fãw zuo tɩ.» 32Ɛ́ tɩ tĩ manɛ a tẽw bɛ na cen tɩ cɔlɩ a faalʋ a Ɩsɩrayɛl nɩbɛ niŋé. Bɛ tɩ yere na: «A tẽw tɩ na cɔlɩ jɩ́r kaa a ɩ n tẽw na báarɛ a ʋ nɩbɛ a, ɛ́ a nɩbɛ tɩ na nyɛ̃ a be a ɩ nɩbɛ na kɛrɩ yaga bɛ za a. 33Tɩ mɔ̃ mɩ̀ nyɛ̃ nɩ nɩ-kɛrɩ jarmam jarmam, a Anakɩ bʋʋrɛ. Tɩ tɩ nyɛ̃ na tɩ ɩ mɛ̃ sãsoge a, a bɛ zie, ɛ́ a lɛ n'a a bɛl tɛɛ za mɩ̀ tɩ nyɛ̃ tɩ.»
Currently Selected:
Sɔr-nɛ́ɛ 13: DBDC
Highlight
Share
Compare
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
