Sɔr-nɛ́ɛ 10
10
A salm-pla wɩɩr
1A Sore tɩ yel'ɩ a Moyiir à ŋá: 2«Ƴãw bɛ ŋmɛ salm-pla nɩ 'hama maal'ɩ wɩɩr ayi. Alɛ n'a bɛ na mɩ́ bʋɔl'ɩ a lãw nɩbɛ ɓã taa, bɩɩ ƴãw a laɩ laɩ nɩbɛ ìr lo a sɔ́r. 3Bɛlɛ wa lãw pɛblɩ a wɩɩr a za ayi a, a lãw nɩbɛ za na mɩ́ ɓã n ta jil koli fʋ a tuor-taa pɛn-sɛw dɩ̃dɔr nʋɔr. 4Bɛlɛ wa pɛblɩ wɩ-been yõ a, a nɩ-bɛrɛ tɛwr nɛbɛ, a Ɩsɩrayɛl dɔwlʋ nɩ-bɛrɛ nɛbɛ na mɩ́ ɓã taa jil koli fʋ. 5Nyɩmɛ wa pɛblɩ a gb'aa dãw-niwn sob lãwnɩ cáarʋ a, a bɛlɩ dem laɩ na be a tuor-taa pɛn-sɛw saa-pɛrɩ́ a, bɛlɛ nɛbɛ lore a sɔ́r. 6Nyɩmɛ wa pɛblɩ a gb'a ayi sob lãwnɩ cáarʋ a, a bɛlɩ dem laɩ na be a saa-pɛrɩ́-dʋrʋ-lowr a nɛbɛ lore a sɔ́r. A sɔ́r loba za ƴãw a, bɛ na mɩ́ pɛbl'ɩ a wɩɩr lãwnɩ cáarʋ. 7Ɛcɛ a lãw nɩbɛ bʋɔlʋ ƴãw a, bɛ bɛ pɛblɛ a wɩɩr lãwnɛ nɩ cáarʋ ɛ.»
8«A bàwr-maalbɛ tɛwr na ɩ a Aarɔ̃ bʋʋrɛ a, bɛlɛ nɛbɛ na pɛblɛ a wɩɩr á ŋá. Nʋɔr'ɩ à ŋà na ƴãw gã kʋralɛ, nyɩɩm nɩ a nyɩ bʋʋrɛ ƴãw a.»
9«Nyɩmɛ wa be a nyɩ tẽw pʋɔ a lɛn daar, ɛ́ wa cere kɛ́ nyɩ tɩ zɛb'ɩ a nyɩ dɔ̃ dem na ŋmãa nɩ nyɩ zɛbr a, nyɩ na mɩ́ pɛbl'ɩ a wɩɩr, lãwnɩ cáarʋ. A lɛ pʋɔ a, ɩ̃ na lɛb'a bãwnɩ nyɩ. Lɛ n'a a mãa Sore nyɩ Naaŋmɩn na faa nyɩ a nyɩ dɔ̃ dem nuru pʋɔ. 10A nʋ̃ɔ̀, a cuw-bɛrɛ nɩ a cuw-paala bibie pʋɔ a, nyɩ na pɛbl'ɩ a wɩɩr ƴãw a nyɩ nyɩw-a-za-bagɛ nɩ a nyɩ lãw-taa bagɛ ƴãw. A na mɩ́ ɩ n à ŋá, ɩ̃ lɛb bãwnɩ nyɩ. Mãa n'ɩ a Sore nyɩ Naaŋmɩn.»
A ƖSƖRAYƐL NƖBƐ NA YI A SINAYI Ɛ́ CEN TƖ TA A MOWAB TẼW TƲR-BƆW ƳÃW A
10:11—21:35
A Ɩsɩrayɛl nɩbɛ bɛr'ɩ a Sinayi wɛja-kpalɛ
11A yome ayi sob bɛ na tɩ yi a Eziptɩ a, a cuwr ayi sob bibie lɩzɛr sob, a zũzuwr#10:11 Nyɛ̃ 9:15-23. tɩ ìr'a do àr a pɛn-sɛw zu-sɔw, a be a wõ-taa kʋsɛ-pamɛ na be a. 12A Ɩsɩrayɛl nɩbɛ tɩ bɛr'ɩ a Sinayi wɛja-kpalɛ, ɛ́ cen tu taa. A zũzuwr tɩ cen na tɩ tɛw Paran wɛja-kpalɛ pʋɔ. 13A dãw-niwn sob tɩ n'ɩ a lɛ bɛ na ìr lo a sɔ́r, tu n a nʋɔr a Sore na tɩ ƴãw a Moyiir yel kʋ̀ bɛ a.
14A zɛbr-nɩbɛ nɩ-pɛ́ɛ na ɓã taa jil koli a Zuda dɩrapo#10:14 Nyɛ̃ 1.52 nɩ a manʋ. a nɛbɛ tɩ de niwn cen. Aminadab bidɛb Nason n'ʋ tɩ ɩ a Zuda dɔwlʋ zɛbr-nɩbɛ nɩ-kpɛ̃ɛ. 15Suwaar bidɛb, Netanɛl, tɩ ɩ n Ɩsakaar dɔwlʋ zɛbr-nɩbɛ nɩ-kpɛ̃ɛ, 16ɛ́ Helon bidɛb Eliyaavʋ ɩ Zabulɔ̃ dɔwlʋ zɛbr-nɩbɛ nɩ-kpɛ̃ɛ.
17Bɛ tɩ wɩl'ɩ a kpɛb-zi-sõw. Lɛ n'a Gɛrson nɩ Merari bʋʋrɛ tɩ tuo ʋ cen nɩ.
18A zɛbr-nɩbɛ nɩ-pɛ́ɛ na ɓã taa jil koli Urubɛn dɩrapo a tɩ lo n a sɔ́r tu bɛ. Sedewuur bidɛb Elisuur'ʋ tɩ ɩ a Urubɛn zɛbr-nɩbɛ nɩ-kpɛ̃ɛ. 19Suurisadaɩ bidɛb Selumiyɛl ɩ Sɩmɩ̃ɔ dɔwlʋ zɛbr-nɩbɛ nɩ-kpɛ̃ɛ, 20ɛ́ Dewuyɛl bidɛb Eliyasafʋ ɩ Gadɩ dɔwlʋ zɛbr-nɩbɛ nɩ-kpɛ̃ɛ.
21Al pùorí, a levitɩ mɩnɛ na ɩ Kehatɩ bʋʋrɛ a tɩ tuo nɩ a kpɛb-zi-sõw bʋ̃-son cen tu n. A levitɩ mɩnɛ ŋmãa mɩ́ tɩ maalɛ nɩ a kpɛb-zi-sõw cɛlɛ nɩ a Kehatɩ bʋʋrɛ.
22A zɛbr-nɩbɛ nɩ-pɛ́ɛ na ɓã taa jil koli Efarayim dɩrapo a mɩ̀ tɩ ìr'a lo a sɔ́r. Amihudɩ bidɛb Elisama n'ʋ tɩ ɩ a Efarayim dɔwlʋ zɛbr-nɩbɛ nɩ-kpɛ̃ɛ. 23Pedasuur bidɛb Gamaliyɛl'ʋ tɩ ɩ Manase dɔwlʋ zɛbr-nɩbɛ nɩ-kpɛ̃ɛ, 24ɛ́ Gideoni bidɛb Avidan ɩ Bɛ̃zamɛ dɔwlʋ zɛbr-nɩbɛ nɩ-kpɛ̃ɛ.
25A zɛbr-nɩbɛ nɩ-pɛ́ɛ na ɓã taa jil koli a Dan dɩrapo, ɛ́ mɩ́ pàw a pɛr a mɩ̀ pãa tɩ ìr'a lo a sɔ́r. Amisadaɩ bidɛb Ahiezɛɛr'ʋ tɩ ɩ a Dan dɔwlʋ zɛbr-nɩbɛ nɩ-kpɛ̃ɛ. 26Okiran bidɛb Pagiyel ɩ Asɛɛr dɔwlʋ zɛbr-nɩbɛ nɩ-kpɛ̃ɛ, 27ɛ́ Einan bidɛb Ahira ɩ Nɛfɩtali dɔwlʋ zɛbr-nɩbɛ nɩ-kpɛ̃ɛ.
28A bɛ na tu taa à ŋá a n'a a Ɩsɩrayɛl nɩbɛ zɛbr-nɩbɛ tɩ lo a sɔ́r.
Moyiir bɔbr'ɩ nɩr na na wule a sɔ́r a
29A Moyiir tɩ yel'ɩ a Hobab, a ʋ dɩɛm-sãà Erewuyɛl#10:29 Erewuyɛl: A Zetoro na tɩ ɩ a Madian tẽw bàwr-maalɛ a yúor kãw tɩ n'ʋ. Nyɛ̃ Ety 2.16 nɩ 3.1 nɩ a manʋ. na ɩ Madian tẽw nɩr a, bidɛb: «Tɩ cere nɩ a tẽw a Sore na yel k'ʋʋ na kʋ̀ tɩ na a. Wa tɩ cen, tɩ na tɩ ɩ na fʋ pʋɔ a maalʋ a Sore na yel k'ʋʋ na kʋ̀ n a Ɩsɩrayɛl a pʋɔ.» 30A Hobab tɩ sɔw na: «Ɩ̃ bɛ waar ɛ, ɩ̃ na lɛb'a kul a ɩ̃ tẽw nɩ a ɩ̃ yir.» 31A Moyiir lɛb yel ʋ: «Ta zawrɩ tɩ bɛr ɛ. Fʋ bãw nɩ a wɛja-kpalɛ ziir al tɩ na na mɩ́ tʋ̃ɔ́ maalɩ a tɩ laɩ a, fʋ na wule tɩ nɩ a sɔ́r. 32Fʋ̃ʋ wa páw tɩ cen a, tɩ na tɩ ɩ na fʋ pʋɔ a maalʋ a Sore na na kʋ̀ tɩ a pʋɔ.»
33A Ɩsɩrayɛl nɩbɛ tɩ yi n a Sore tãgɛ̃́#10:33 Sore tãgɛ̃́: A Orɛb n'ʋ. Nyɛ̃ Ety 3.1. cen bibie ata. A Sore wõ-taa daga tɩ de bɛ nɩ niwn, k'ʋʋ tɩ bɔ a zie bɛ na na tʋ̃ɔ́ maalɩ a laɩ a bɛr bɛ. 34A mʋ̃tɔ̃w daarɩ́ a, a Sore zũzuwr mɩ́ tɩ be n a bɛ zu-sɔw, a lɛn daar bɛ na mɩ́ tɩ lɛb lore a sɔ́r a. 35A daw-sõw na mɩ́ tɩ lore a sɔ́r a, a Moyiir mɩ́ tɩ yel'a: «Ìr àr, Sore e, a fʋ dɔ̃ dem zɔ yaarɩ, bɛ zɔ bɔr a fʋ niŋé#10:35 Nyɛ̃ Ssy 68.1.!» 36Ɛ́ bɛlɛ wa bine a da-sõw a lɛn daar a, a Moyiir mɩ́ yel'a: «Sore e, lɛb wa! Wa be a Ɩsɩrayɛl yie na bɛ dɩ vuo a sɔgɔ!»
Currently Selected:
Sɔr-nɛ́ɛ 10: DBDC
Highlight
Share
Compare
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
