Markɩ 5

A Yeezu na sanɩ a Zerazenɩ̃ɛ mɩnɛ tẽw kɔ̃tɔ̃-ìre kãw a

(Mat 8:28-34, Luk 8:26-39)

1Bɛ tɩ ta n a Galile kʋ̃ɔ-kpɛ̃ɛ gãwn ŋa lowr, a Zerazenɩ̃ɛ mɩnɛ tẽw. 2A Yeezu na tɩ yire a gbor pʋɔ wa báarɛ a, daadaalɛ, nɩr kãw kɔ̃tɔ̃-faa na nyɔw a, tɩ yi n yarʋ pʋɔ tuore ʋ. 3Ʋ tɩ kpɩɛr'ɩ yarʋ bɔwrɩ#5:3 Yarʋ bɔwrɩ: Pìir pʋɔ n'a a Zifʋ mɩnɛ mɩ́ tuw a bɔw ũù a bɛ kũu. Lɛ so, nɩr na tʋ̃ɔ́ na kpɩɛr a yàa-bɔw pʋɔ. pʋɔ ɛ́ nɩr za bɛ mɩ́ lɛb cãà tʋ̃ɔ́ nyɔw ʋ 'lẽ ɩ, alɛ saa ɩ bamɛ n'a a. 4Gb'aa yaga za, bɛ tɩ ƴãw ʋ nɩ kpule ɛ́ 'lẽ a ʋ nuru nɩ bamɛ, ɛcɛ ʋ mɩ́ tɩ taw nɩ a za ŋma, ɛ́ nɩr za bɛ tɩ tʋɔr ʋ ɛ. 5Kʋrakʋralɛ, mʋ̃tɔ̃w nɩ tɩ̃ɩsɔw za, ʋ mɩ́ tɩ be n a yarʋ bɔwrɩ pʋɔ nɩ a tan pʋɔ, ŋmɩɛr cɛlsɩ ɛ́ wɛrɛ ʋ tʋɔra nɩ kʋsɛbɛ. 6Ʋ na tɩ cãà zãá ɛ́ nyɛ̃ a Yeezu a, ʋ zɔ na wa lo gbĩ dume a ʋ niŋé. 7Ʋ tɩ cɩɩr'ɩ kpɛ̃w za yel: «Naaŋmɩn-na-do-saa-bɛ-pɩɛl-a Bie, Yeezu u, mãa nɩ fʋ̃ʋ mɩ̀ bʋnʋ? Ɩ̃ zɛlɛ fʋ nɩ yãayãa, a Naaŋmɩn yúor ƴãw, taa dɔwrɛ mɛ̃ ɩ.» 8A Yeezu na tɩ yel ʋ: «Yi zaa a nɩr ŋa pʋɔ, kɔ̃tɔ̃-faa a!», alɛ n'a so ʋ tɩ ƴɛ̀r à à ŋá. 9A Yeezu tɩ sowr'ʋ na: «A fʋ yúor dɩ na kɛ́ bo?» Ʋ sɔw: «Ɩ̃ yúor dɩ na kɛ́: “Bɛ-tɛr-nʋɔr”, tɩ na yãwmɛ a ƴãw.» 10Ʋʋ tɩ zɛlɛ ʋ nɩ yãayãa za, k'ʋʋ ta diw bɛ bɛr a tẽw pʋɔ ɩ.

11Zɩ̃ kɛ́ dobaar na bɛ tɛr vuo a tɩ àr'ɩ a tãw ƴãw be bɔbr a bʋ̃-dɩrɩ. 12A kɔ̃tɔ̃-faar tɩ zɛlɛ nɩ a Yeezu yãayãa yere nɩ: «Ƴãw tɩ cen a dobaar á ŋá zie tɩ kpɛ a pʋɔ.» 13Ʋ tɩ kʋ̀ a nɩ sɔ́r. A tɩ yi na tɩ kpɛ a dobaar pʋɔ. A lɛ n'a a dobaar za, na tɩ ta túr-ayi a, tɩ yi a tãw na ɩ cũgbulu a zu, ɛ́ dãw taa tɩ lo a kʋ̃ɔ-kpɛ̃ɛ pʋɔ tu kʋ̃ɔ. 14A doba-cɩ̃ɩnbɛ tɩ zɔ na kul tɩ manɩ a yel ŋa kʋ̀ a nɩbɛ a tẽw pʋɔ nɩ a gue pʋɔ, ɛ̀ bɛ zɔ cen kɛ́ bɛ tɩ nyɛ̃. 15Bɛ tɩ wa n a Yeezu zie, wa nyɛ̃ a kɔ̃tɔ̃-ìre ʋl na tɩ dãw tɛr a kɔ̃tɔ̃-faar yaga bɛ tɛr nʋɔr a, ʋ zɩ̃ su bome ɛ́ lɛb bãw yã. Dɛ̃bɩ̃ɛ tɩ kpɛ bɛ na. 16A bɛlɩ dem na tɩ nyɛ̃ a lɛ a yele na ɩ a, tɩ man na kʋ̀ a nɩbɛ a lɛ a na tɩ ɩ a kɔ̃tɔ̃-ìre zie nɩ a dobaar zie a. 17Lɛ n'a a nɩbɛ tɩ nyɔw zɛlʋ a Yeezu zie, zɛlɛ ʋ yãayãa k'ʋʋ yi zaa a bɛ tẽw pʋɔ. 18A Yeezu na tɩ kpɩɛr a gbor pʋɔ a, a sob nɛ na tɩ dãw ìre a kɔ̃tɔmɛ a, tɩ zɛlɛ ʋ nɩ yãayãa, k'ʋʋ sàw ʋ be a ʋ zie. 19A Yeezu bɛ tɩ sàw ɛ, ɛ́ yel ʋ: «Lɛb kul a fʋ yir, a fʋ yir nɩbɛ zie, tɩ manɩ a yele al za a Sore na maalɩ kʋ̀ b a ʋ su-ɓaarʋ pʋɔ a.» 20A nɩr ʋl tɩ lɛb'a kul tɩ nyɔw a manʋ, manɩ pàw a Dekapol vuo ʋl pʋɔ, a yele al za a Yeezu na tɩ maalɩ a ʋ ƴãw a. A tɩ ɩ n nɔ-ɓãan a nɩbɛ za zie.

A Yeezu sanɩ nɩ pɔw kãw ɛ́ sɩ̃w Zayiir pɔwyale na tɩ kpi a

(Mat 9:18-26, Luk 8:40-56)

21A Yeezu na tɩ lɛb kpɛ a gbor gãw a kʋ̃ɔ-kpɛ̃ɛ a, nɩ-yaga tɩ gbõ n taa ŋmãa viiri koli ʋ, ʋʋ tɩ àr a kʋ̃ɔ-kpɛ̃ɛ nʋɔr. 22Puoru-dĩo nɩ-kpɛ̃ɛ kãw, bɛ na bʋɔlɛ kɛ́ Zayiir a, tɩ ta na. Ʋ na tɩ nyɛ̃ a Yeezu a, ʋ lo na gbĩ dume a ʋ pile, 23ɛ́ zɛlɛ ʋ yãayãa za yere nɩ: «Ɩ̃ pɔwyale ŋmaar'ɩ vʋʋrʋ, wa ír nuru dɔwlɩ a ʋ zu, ʋ tʋ̃ɔ́ nyɛ̃ a faafʋ ɛ́ ta kpi ɛ.» 24A Yeezu tɩ páw ʋ na cere. Nɩ-yaga yaga tɩ tuur'ɩ a Yeezu, ɛ́ tɩ fɩɩrɛ ʋ a ziir za.

25Pɔw kãw tɩ be n be, a sɩɛ cire tɩ maalɩ yome pie nɩ ayi, ɛ́ a zɩ̃ɩ cãà bɛ ŋmãa ɩ. 26Ʋ tɩ wõ n tuo yaga a tɩ̃ɩnɩ dem zie, sãw nɩ a ʋ libie za bɛr ɛ́ a cãà bɛ tɛr saba ɩ, ɛ́ a bàalʋ nɩ̃ɛ lɛb bãw kpɛ faa. 27Ʋ na tɩ wõ a Yeezu yele a, ʋ yi n a pùorí, a nɩ-yaga pʋɔ luwluw wa tɔ a Yeezu kparʋ. 28Ʋ tɩ tɩɛr'ɩ ʋ pʋɔ: «Mãa ɩ mɛ̃ ɩ̃ tʋ̃ɔ́ na tɔ a ʋ bʋ̃-suuri tɛwr'a, ɩ̃ na sanɩ na.» 29A ʋlɩ pɛr nɛ pʋɔ, a ʋ zɩ̃ɩ na tɩ cire a tɩ ŋmãa na, ʋʋ nyɛ̃ bãw k'ʋʋ sanɩ na. 30Daadaalɛ, a Yeezu tɩ bãwnɩ a na fãw na yi a ʋ pʋɔ a. Ʋ tɩ lɩɛb'ɩ a nɩ-yaga pʋɔ sowre: «Ãa n'ʋ tɔ a ɩ̃ bʋ̃-suuri?» 31A ʋ po-tuurbɛ tɩ sɔw ʋ na: «Fʋ nyɛ̃ nɩ a zu-sɛbla na nɛbr fʋ a ziir za a, ɛ́ fʋ sowre: “Ãa n'ʋ tɔ m?”» 32Ɛcɛ a Yeezu tɩ jɩ́rɛ nɩ a ziir za k'ʋʋ bãw a ʋlɩ pɔw nɛ na n'ʋ ɩ a lɛ a. 33A pɔw na tɩ bãw ʋlɩ bom na ɩ ʋ a, dɛ̃bɩ̃ɛ kpɛ ʋ na ʋ màwr, ɛ́ cen tɩ lo gbĩ dume a Yeezu pile ɛ́ yel a yel-mɩŋa za kʋ̀ ʋ. 34Ɛcɛ a Yeezu tɩ yel ʋ na: «Ɩ̃ pɔwyaa a, a fʋ naaŋmɩn-sàw-deb faa fʋ na: cere nɩ ƴã-ɓaarʋ ɛ́ a fʋ bàalʋ baarɩ.»

35A Yeezu na tɩ cãà ƴɛ̀rɛ a, nɩbɛ tɩ yi n a puoru-dĩo nɩ-kpɛ̃ɛ yir wa yere kʋ̀rɛ a puoru-dĩo nɩ-kpɛ̃ɛ: «A fʋ pɔwyaa kpi na, bʋnʋ ƴãw n'a fʋ cãà bàlɛ a Wul-wul-kara?» 36A Yeezu bɛ tɩ cɛlɛ a bɛ ƴɛ̀rʋ á ŋá zie ɩ, ɛ́ tɩ yel a puoru-dĩo nɩ-kpɛ̃ɛ: «Ta zɔrɛ dɛ̃bɩ̃ɛ ɩ, bɛr bom za ɛ́ sàw de Naaŋmɩn.» 37Ʋʋ bɛ tɩ sàw nɩr za bɩɛlɩ ʋ ɛ, alɛ bɛ ɩ Pɩɛr, Zakɩ nɩ a ʋ yɛb Zã a. 38Bɛ tɩ ta n a puoru-dĩo nɩ-kpɛ̃ɛ yir. A Yeezu nyɛ̃ nɩbɛ na zɔrɛ tʋɔr-taa, kone ŋmɩɛr'ɩ cɛlsɩ yaga za a. 39Ʋ tɩ kpɛ na yel bɛ: «Bʋ̃ʋ n'ʋ so nyɩ zɔrɛ tʋɔr taa kone ŋmɩɛr'ɩ cɛlsɩ à ŋá? A powle bɛ kpi ɛ, ʋ gúre na!» 40Ɛcɛ a nɩbɛ tɩ ɩrɛ ʋ na laar. Ʋ tɩ ƴãw na bɛ yi bɛ za, ʋʋ tɛr a bie sãà nɩ a ʋ mã nɩ a po-tuurbɛ ata bɛl na tɩ bɩɛl'ʋ a, kpɛ n a be a bie na be a. 41Ʋ tɩ nyɔw nɩ a bie nũú ɛ́ yel ʋ: «Talita kum», a pɛr lɛ kɛ́: «Powle e, fʋ̃ʋ n'ʋ ɩ̃ yere, ìr.» 42Daadaalɛ, a powle tɩ ìr'a cere. Ʋ tɩ tɛr'ɩ yome pie nɩ ayi. Bɛ na tɩ nyɛ̃ a lɛ a, a tɩ ɩ n nɔ-ɓãan a bɛ zie bɛ dɩ vuo ɩ. 43Ɛcɛ a Yeezu tɩ kpãa bɛ nɩ kpɛ̃w za, kɛ́ bɛ taa wa sàw nɩr za bãwnɩ a ɩ, ɛ́ yel kɛ́ bɛ kʋ̀ bʋ̃-dɩrɩ a powle.

Currently Selected:

Markɩ 5: DBDC

Highlight

Copy

Compare