Markɩ 1
1
A Zã-Bati na hieri a Yeezu waa yele a
(Mat 3:1-12, Luk 3:1-18, Zã 1:19-28)
1À ŋá n'a a Yeezu Kɩrɩta, a Naaŋmɩn Bie, Yel-nʋ̃ɔ̀ tĩ. 2Bɛ sɛb'ɩ a naaŋmɩn-ƴɛ̀r-manɛ Ɩzayi sɛbɛ pʋɔ yel à ŋá: «Nyɛ̃, a ɩ̃ nɩ-tona n'ɩ ŋan ɩ̃ tone a fʋ niŋé k'ʋʋ tɩ cɔbrɩ a fʋ sɔ́r.» 3Nɩr kãw kɔkɔr cɩɩrɛ nɩ a wɛja-kpalɛ pʋɔ yere: «Nyɩ cɔbrɩ a Sore sɔ́r, nyɩ maalɩ a ʋ soli ƴãw k'a tori#1:3 Nyɛ̃ Ɩza 40.3..» 4Zã-Bati n'ʋ tɩ be a wɛja-kpalɛ pʋɔ hiere yere: «Nyɩ lɩɛbɩ a nyɩ ɩb ɛ́ de a suob, a Naaŋmɩn tʋ̃ɔ́ dɩ a nyɩ yel-bebe suur kʋ̀ nyɩ.» 5A Zude tẽw lowr dem, nɩ a Zerizalɛm tẽw dem za, tɩ cere nɩ a ʋ zie tɩ yere a bɛ yel-bebe, ɛ́ ʋ kʋ̀rɛ bɛ a suob a Zurdɛ̃ man kʋ̃ɔ pʋɔ.
6A Zã mɩ́ tɩ su n nyɔ̃wmɛ kɔblʋ kparʋ ɛ́ 'lẽ nɩ gán kpàwr a sɩɛmɩ́. Ʋ tɩ 'wɔbr'ɩ sãsowe dɩrɛ nɩ mʋ̃ɔ pʋɔ sɩwr. 7Ʋ tɩ hiere na yere kʋ̀rɛ a nɩbɛ: «A ʋlɩ sob nɛ na waar a ɩ̃ pùorí a, ʋ tɛr'ɩ fãw zuo mɛ̃. Ɩ̃ mɩ̀ bɛ sɛwnɩ na dɔm ɛ́ cɛ̀r a ʋ nafawr bʋ̃-'leni bɛr ɛ. 8Mãa a, kʋ̃ɔ n'a ɩ̃ kʋ̀ n nyɩ a suob, ɛ́ ʋl a, Vʋʋrʋ Sõw n'ʋ ʋ na kʋ̀ n nyɩ a suob.»
A Yeezu na de a suob ɛ́ Sɩtaana bɛlɩ ʋ a
(Mat 3:13—4:11, Luk 3:21-22, 4:1-13)
9A alɩ bibie nɛ pʋɔ n'a a Yeezu tɩ yi a Galile tẽw Nazarɛtɩ, ɛ́ wa a Zã wa kʋ̀ ʋ a suob a Zurdɛ̃ man kʋ̃ɔ pʋɔ. 10Ʋ na tɩ yire a kʋ̃ɔ pʋɔ daadaalɛ a, ʋ tɩ nyɛ̃ nɩ a salom ʋ tawr yuore, ɛ́ a Vʋʋrʋ Sõw siwr a ʋ zu mɛ̃ naŋmam a, 11ɛ́ kɔkɔr yi a salom zu yere: «Fʋ̃ʋ n'ɩ a ɩ̃ Bi-nɔna za, ɩ̃ na nɔ̃w kaa ír a.»
12Daadaalɛ, a Vʋʋrʋ Sõw cã n a Yeezu kpɛ n a wɛja-kpalɛ pʋɔ. 13Ʋ tɩ be n a be bibie lɩz'a ayi, ɛ́ a Sɩtaana bɛlɛ ʋ. Ʋlɛ nɩ wɛ-dʋn tɩ lãw na kpɩɛr, ɛ́ malkɩ mɩnɛ kaarɛ a ʋ zie.
A po-tuurbɛ anaar bɛl a Yeezu na de niwn bʋɔlɩ a
(Mat 4:12-22, Luk 4:14-15, 5:1-11)
14Bɛ na wa nyɔw a Zã pàw baar'a, a Yeezu tɩ wa n a Galile lowr wa hiere a Naaŋmɩn Yel-nʋ̃ɔ̀ yere nɩ: 15«A daar ʋl a Naaŋmɩn na ƴãw a ta na, a Naaŋmɩn Naalʋ dɩb pɩɛl'a: nyɩ lɩɛbɩ a nyɩ ɩb ɛ́ sàw de a Yel-nʋ̃ɔ̀.»
16Ʋ na tɩ cere lanɛ a Galile kʋ̃ɔ-kpɛ̃ɛ a, ʋ nyɛ̃ nɩ Sɩmʋ̃ nɩ ʋ yɛb Ãdere bɛ lɔbr mɩ̃ɛ a kʋ̃ɔ-kpɛ̃ɛ pʋɔ: zʋm-nyɔwrbɛ tɩ nɛbɛ. 17A Yeezu tɩ yel bɛ na: «Nyɩ wa tuur mɛ̃, ɩ̃ɩ na ɩ na nyɩ lɩɛb nɩ-nyɔwrbɛ#1:17 Nɩ-nyɔwrbɛ: A tẽ-vla naalʋ pʋɔ n'a a Yeezu po-tuurbɛ na nyɔwr a nɩbɛ ƴãwn, gaso pʋɔ bɛ n'a ɩ, bɩɩ sɔbr nyɔwfʋ yele bɛ n'a ɩ. .» 18Daadaalɛ, bɛ tɩ bɛr'ɩ a bɛ mɩ̃ɛnɩ ɛ́ tu ʋ. 19A Yeezu na tɩ cãà tɔl blã a, ʋ nyɛ̃ nɩ Zebede bidɛbr, Zakɩ nɩ a ʋ yɛb Zã, bɛ be a bɛ gbor pʋɔ maalɛ a bɛ mɩ̃ɛnɩ ƴãwn. 20Daadaalɛ, ʋ tɩ bʋɔlɩ bɛ na. Bɛ tɩ bɛr'ɩ a bɛ sãà Zebede nɩ a tõ-tõ-biir a gbor pʋɔ ɛ́ cen tɩ tu ʋ.
A Yeezu na kanɩ nɩ nɩbɛ a Kafarnawɔm tẽw ɛ́ sanɩ kɔ̃tɔ̃-ìre kãw a
(Luk 4:31-37)
21A Yeezu nɩ a ʋ po-tuurbɛ tɩ kpɛ n a Kafarnawɔm tẽw pʋɔ. A pɩ̃ɛnʋ-bibir na wa vɩɛrɛ wa báarɛ a, a Yeezu tɩ kpɛ n a bɛ puoru-dĩó tɩ kanɛ nɩ a nɩbɛ. 22A ʋ kanʋ tɩ ɓãá bɛ nɩ nʋɔr, bʋ̃ʋ n'ʋ vɛ̃, nɩr na tɛr fãw a kanʋ tɩ n'a, ʋ bɛ tɩ kanɛ nɩ bɛ mɛ̃ a Naaŋmɩn wulu sɛ-sɛbrbɛ a ɩ. 23Zɩ̃ kɛ́ kɔ̃tɔ̃-ìre kãw tɩ be n a be ŋmɩɛr cɛlsɩ yere nɩ: 24«Tɩɩm nɩ fʋ̃ʋ mɩ̀ bʋnʋ, Nazarɛtɩ tẽw Yeezu u? A tɩ yele sãwfʋ ƴãw n'a fʋ wa kɛ̃! Ɩ̃ bãw fʋ na: a Naaŋmɩn Nɩ-sõw nɛ b!» 25A Yeezu tɩ tanɩ ʋ na yel: «Pàw a fʋ nʋɔr ɛ́ yi zaa a nɩr ŋa pʋɔ!» 26A kɔ̃tɔ̃-faa tɩ dam'ɩ a nɩr ŋa yaga, ɛ́ cɩɩrɩ kpɛ̃w kpɛ̃w za ɛ́ yi zaa a ʋ pʋɔ. 27Pʋl-vʋ̃ɔ tɩ nyɔw nɩ a nɩbɛ za bɛ sowre taa yere nɩ: «Bʋ̃ʋ n'ɩ à à ŋá? Wul-paala n'ɩ á ŋá ʋ na wule nɩ fãw a! Ʋ dɩrɛ nɩ naalʋ a kɔ̃tɔ̃-faar tɛɛ za zu, ɛ́ a sàwr a ʋ nʋɔr.» 28Daadaalɛ, a Yeezu yúor tɩ yi n a Galile tẽw vuo za pʋɔ.
A Yeezu sanɩ nɩ bàalbɛ yaga
(Mat 8:14-17, Luk 4:38-41)
29Bɛ tɩ yi n a puoru-dĩó cen Sɩmʋ̃ nɩ Ãdere yir daadaalɛ, bɛlɛ nɩ Zakɩ nɩ Zã. 30Zɩ̃ kɛ́ ƴã-tʋlʋ tɩ gaal'ɩ a Sɩmʋ̃ dɩɛm-mã. Pɛtɛlʋlɛ, bɛ tɩ por'ɩ a yúor kʋ̀ a Yeezu. 31Ʋ tɩ taw na ta nyɔw ʋ nũú ʋ ìr, a ƴã-tʋlʋ baarɩ ʋʋ kaarɛ a bɛ zie. 32A zaanʋɔra na wa ta, a mʋ̃tɔ̃w kpɛ baarɩ a, a nɩbɛ tɛr'ɩ a bàalbɛ za nɩ a bɛlɩ dem za na ìre kɔ̃tɔmɛ a, wa n a Yeezu zie. 33A tẽw nɩbɛ za tɩ gbõ n taa a dɩ̃dɔr nʋɔr. 34A Yeezu tɩ sanɩ nɩ bàalbɛ yaga na tɩ tɛr bàal-pɛ-bʋʋrɛ za a, ɛ́ mɩ̀ diw kɔ̃tɔ̃-faar yaga bɛr a nɩbɛ zie. Ʋ bɛ tɩ sàw a kɔ̃tɔ̃-faar ƴɛ̀rɛ ɩ, a na faa tɩ bãw ʋ a ƴãw.
A Yeezu cɔlɛ nɩ a Galile tẽw hiere a Yel-nʋ̃ɔ̀
(Luk 4:42-44)
35A bio daarɩ́, a Yeezu tɩ ìr'ɩ zi-lige yi cen wɛja pʋɔ tɩ be a be puore. 36A Sɩmʋ̃ nɩ a ʋ taabɛ tɩ yi na nyɔw a ʋ bɔb. 37Bɛ na wa nyɛ̃ ʋ a, bɛ yel ʋ na: «A nɩbɛ za bɔbr fʋ na.» 38A Yeezu tɩ yel bɛ na: «Nyɩ ɩ tɩ cen zi-yoru, a tẽ-kpɔwlɩ pʋɔ, ɩ̃ mɩ̀ tɩ hieri a Yel-nʋ̃ɔ̀ a be, al ƴãw n'a ɩ̃ wa.» 39Lɛ n'a ʋ tɩ cɔlɛ a Galile tẽw lowr za hiere a Yel-nʋ̃ɔ̀ a puoru-dirú, diwr'ɩ a kɔ̃tɔ̃-faar.
A Yeezu na sanɩ kɔ̃w a
(Mat 8:1-4, Luk 5:12-16)
40 Kɔ̃w kãw tɩ cen na tɩ páw a Yeezu, lo gbĩ dume a ʋ niŋé ɛ́ zɛlɛ ʋ yere nɩ: «Fʋ̃ʋ wa bɔbr a, fʋ na tʋ̃ɔ́ na ɩ ɩ̃ lɛb vɩɛl.» 41Nɩbaalʋ tɩ kpɛ n a Yeezu, ʋ dɔl nũu tɔ n ʋ ɛ́ yel: «Ɩ̃ bɔbr'a, lɛb vɩɛl.» 42Pɛtɛlʋlɛ, a ʋ kɔnʋ tɩ baar'a, ɛ́ ʋ lɛb vɩɛl. 43Daadaalɛ, a Yeezu tɩ nyɔw ʋ na yere. Ʋ tɩ diw ʋ na, 44ɛ́ yel ʋ: «Taa wa nanɩ pore a yúor kʋ̀rɛ nɩr za ɩ, ɛcɛ cen tɩ wul fʋ tʋɔra a bàwr-maalɛ. Ɛ́ fʋ na lɛb vɩɛl a, tɩr a bom#1:44 A bom ʋl a Moyiir na ƴãw nʋɔr kɛ́ bɛ mɩ́ tɩr a: A Moyiir tɩ ƴãw nɩ nʋɔr kɛ́ kɔ̃w za na lɛb nyɛ̃ ʋ tʋɔra a, cen a bàwr-maalɛ tɩ jɩ́r ʋ kaa, ʋʋ tɩr lili ayi, pʋrali ayi nɩ peli-pɔw na tɛr yũon-been ɛ́ bɛ tɛr faalʋ kãw za a, bɛ maal'ɩ bàwr a ʋ ƴãw, ʋ tʋ̃ɔ́ lɛb kpɛ a nɩbɛ pʋɔ. ʋl a Moyiir na ƴãw nʋɔr kɛ́ bɛ mɩ́ tɩr a, a na wul'ɩ a nɩbɛ kɛ́ fʋ lɛb'a vɩɛl.» 45Ɛcɛ ʋ tɩ yire na wa báarɛ ɛ́ nyɔw a yel ŋa hieri, ŋmɛ yaarɩ a ziir za. A na tɩ ɩ lɛ a, a Yeezu bɛ mɩ́ lɛb tɩ tʋ̃ɔ́ kpɛ tẽ-kpɛ̃ɛ kãw za pʋɔ cãàmɩ́ ɛ. Ʋ mɩ́ tɩ be n a wɛja pʋɔ, ɛ́ a nɩbɛ yire a ziir za waar a ʋ zie.
Currently Selected:
Markɩ 1: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
