Mise 6
6
A Sore tɛr'ɩ nɩ a ʋ nɩ-bʋʋrɛ ƴɛ̀rʋ
1Nyɩ bɛrɛ wone a lɛ a Sore na yere a:
«Ìr cen tɩ dɩ ƴɛ̀rʋ ƴɛ̀r kpɛ m,
yel a lɛ ɩ̃ na nyɛ̃ a, a tã-bɛrɛ nɩ a tãli niŋé.»
2Nyɩɩm tan ɩ, nyɩ bɛrɛ wone,
nɩ nyɩɩm tẽsɔw pɛ́ɛ na bɛ be na dam a:
a Sore tɛr'ɩ nɩ a ʋ nɩbɛ ƴɛ̀rʋ,
ʋ sowre nɩ yele a Ɩsɩrayɛl nɩbɛ.
3Ʋ sowre bɛ na: «Ɩ̃ nɩbɛ ɛ, bʋ̃ʋ n'ʋ ɩ̃ ɩ nyɩ?
Bʋ̃ʋ n'ʋ ɩ̃ ɩ bàl nyɩ? Nyɩ sɔw kʋ̀ m!
4Ɩ̃ na tɛr nyɩ yi n a Eziptɩ tẽw a n'a bɩɩ?
Ɩ̃ na faa nyɩ a gbãgbaalʋ pʋɔ a n'a so bɩɩ?
Bɩɩ ɩ̃ na ƴãw a Moyiir, a Aarɔ̃ nɩ Miriyam#6:4 Miriyam: Ʋ ɩ n pɔw-naaŋmɩn-ƴɛ̀r-manɛ, ɛ́ ɩ a Aarɔ̃ nɩ a Moyiir yeepuule. Nyɛ̃ Ety 15.20.
de nyɩ niwn a n'a so o?
5Ɩ̃ nɩbɛ ɛ, nyɩ lɛb tɩɛrɩ
a lɛ a Mowab tẽw nãà Balakɩ
na tɩ bɔbr k'ʋʋ ɩ nyɩ faa a.
Nyɩ lɛb tɩɛrɩ a lɛ
a Bewɔɔr bidɛb Balaam
na tɩ sɔw ʋ a.
Al pùorí, ɩ̃ bɩɛlɩ nyɩ nɩ
a Sitim tẽw tɩ sãá nɩ a Gilgal tẽw.
Lɛ n'a nyɩ tʋ̃ɔ́ nyɛ̃ a gãda-tome
a mãa Sore na tõ a nyɩ ƴãw a.»
A ʋlɩ bom nɛ a Sore na bɔbr a nɩsaal zie a
6«Bʋ̃ʋ n'ʋ ɩ̃ na tɛr wa n a Sore niŋé?
Bʋ̃ʋ n'ʋ ɩ̃ na gbĩ n dume a Sore,
a Naaŋmɩn-na-do-saa-bɛ-pɩɛl-a niŋé?
Yũon-been nadeli n'a
ɩ̃ na maal'ɩ nyɩw-a-za-bagɛ kʋ̀ ʋ bɩɩ?
7Pʋ́rɩ na yãwmɛ bɛ tɛr nʋɔr a n'a a Sore bɔbr bɩɩ?
Kãá na gbɔlɛ mɛ̃ mamɛ kʋ̃ɔ a n'a bɩɩ?
A ɩ̃ bidɛb-dãw n'ʋ ɩ̃ na de tɩr a ɩ̃ sãwna ƴãw bɩɩ?
A ɩ̃ bʋ̃-dɔwra n'ʋ ɩ̃ na tɩr a ɩ̃ yel-bier ƴãw bɩɩ?»
8Nɩsaal i, a Sore ɩ na fʋ bãw a ʋlɩ bom nɛ na vɩɛl a,
nɩ a ʋlɩ bom nɛ ʋ na bɔbr a fʋ zie a:
bom za bɛ n'ʋ, a bɛ ɩ kɛ́ fʋ tuur a yel-mɩnʋ,
kɛ́ fʋ tɛr nɔ̃wfʋ ɩ-ɩrɩ, ɛ́ tɛr fʋ tʋɔra-siwru
a fʋ Naaŋmɩn zie ɩ.
A nyãnyu-ɩb nɩ a po-to-fãw-ɩb a, a Sore bɛ bɛrɛ a tɔlɛ ɩ
9A Sore ƴɛ̀rɛ nɩ a Zerizalɛm tẽ-kpɛ̃ɛ nɩbɛ zie,
ʋʋ na faa nɩ a bɛlɩ dem na ƴãwnɛ ʋ a.
«Nyɩ bɛrɛ wone, Zuda dɔwlʋ nɩbɛ ɛ,
nyɩɩm za na ɓã taa a tẽw pʋɔ a.
10A nyãnyu-bome a po-to-dem
na mɩ́ bɔ gbõ taa a bɛ yie pʋɔ a,
a bʋ̃-mánɩ na bɛ ɩ a ɛ́ bɛ manɛ nɩ a,
— ɛ́ a lɛ bɛ vɩɛl towtow a —,
ɩ̃ na tʋ̃ɔ́ na nyɛ̃ kɛ́ bɛr bɩɩ?
11A bɛlɩ dem na mɩ́ manɛ nɩ bʋ̃-keri na bɛ tori a,
ɛ́ ƴãw a tɩbrʋ bʋ̃-mánɩ na bɛ ɩ a a bɛ vʋɔrɩ pʋɔ a,
ɩ̃ na tʋ̃ɔ́ na yel kɛ́ bɛ bɛ tɛr sãwna ɩ?
12A tẽw ŋa tɛra dem tɛr'ɩ po-to-fãw-ɩb yaga za,
a ʋ nɩbɛ ŋmarɛ nɩ ziri bɛ̀lɛ nɩ a bɛ taabɛ.
13A lɛ n'a so ɩ̃ tĩ ŋmɩɛr nyɩ,
ŋmɩɛrʋ na na wa n a nyɩ loba,
a nyɩ yel-bebe zũú a.
14Nyɩ na mɩ́ dɩ na, ɛ́ kʋ̃ tɩw ɛ,
a nɩbɛ na kone nɩ kɔ̃ a nyɩ tẽw!
A al nyɩ na mɩ́ gbab bin a kʋ̃ mɩ́ gã ɩ,
ɛ́ nyɩmɛ wa maal bin bom a,
ɩ̃ na ɩ na zɛbr ìr sãw ʋ bɛr.
15Nyɩ na mɩ́ bʋ̀r'a, ɛ́ kʋ̃ cɛ ɩ.
Nyɩ na mɩ́ tɔ n a olivʋ tɩ-wɔmɛ kãá, ɛ́ kʋ̃ zɛ a kãá ɩ.
Nyɩ na mɩ́ nɛb'ɩ a divɛ̃ tɩ-wɔmɛ, ɛ́ kʋ̃ nyũ a divɛ̃ ɩ.
16Nyɩ tuur'ɩ a nãà Omiri#6:16 Omiri: A Ɩsɩrayɛl naalʋ-tẽw nãà kãw n'ʋ. Nyɛ̃ 1Na 16.23-28. Akab: A Omiri bidɛb'ʋ. Ʋlɛ n'ʋ tɩ so a Bàál puoru cere vla vla a Ɩsɩrayɛl tẽw pʋɔ. Nyɛ̃ 1Na 18.16-40.
nɩ a ʋ bidɛb Akab yir ɩ-faar nɛ́ɛ.
A bɛ wulu n'a nyɩ tuur.
A lɛ n'a so ɩ̃ na ɩ a nyɩ tẽw ʋ lo,
ɛ́ ɩ a nyɩɩm na kpɩɛr a ʋ pʋɔ a, nyɩ ɩ nɩ-ɩ-laarɩ.
Ɛ́ nyɩ na nyɛ̃ nɩ a vĩ ʋl a ɩ̃ nɩ-bʋʋrɛ na nyɛ̃ a.»
Currently Selected:
Mise 6: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
