Matie 6
6
A nɩ-kɔmɛ sõwfʋ yele
1«Nyɩ gùre nyɩ tʋɔra vla, taa wa tuur a nyɩ puoru yel-bɛrɛ#6:1 Puoru yel-bɛrɛ: A Zifʋ mɩnɛ puoru yel-bɛrɛ tɩ ɩ n ata: a puoru, a nɩ-kɔmɛ sõwfʋ nɩ a mʋta-tuo tɛrʋ. kɛ́ a sãá a nɩbɛ nyɛ̃ nyɩ ɛ, alɛ bɛ ɩ lɛ, nyɩ kʋ̃ páw maalʋ a nyɩ Sãà na be a tẽ-vla pʋɔ a zie ɩ. 2A na ɩ à ŋá a, fʋ̃ʋ wa kʋ̀rɛ bom nɩ-kɔmɛ a, ta ɩrɛ gɔmɛ a nɩbɛ niŋé mɛ̃ a lɛ a nɩsaal-libelibe na mɩ́ ɩrɛ a puoru-diru pʋɔ nɩ a sɛ́ɛ pʋɔ, k'aa nɩbɛ tʋ̃ɔ́ danɛ bɛ a ɩ. Yel-mɩŋa sɩza, ɩ̃ yere na kʋ̀rɛ nyɩ, bɛ páw nɩ a bɛ maalʋ baarɩ. 3Fʋ̃ʋ a, fʋ̃ʋ wa kʋ̀rɛ bom nɩ-kɔmɛ a, a fʋ gʋba nũu, ʋ ta bãw ʋlɩ bom nɛ a fʋ dʋrʋ nũu na ɩrɛ a ɩ. 4À ŋá n'a a fʋ nɩ-kɔmɛ sõwfʋ na sɔwlɩ, ɛ́ a fʋ Sãà Naaŋmɩn na mɩ́ nyɛ̃ bom za na sɔwlɩ a, na maalɩ fʋ na.»
A Yeezu wule tɩ nɩ lɛ tɩ na na mɩ́ puore a
(Luk 11:2-4)
5«Nyɩmɛ wa puore a, nyɩ ta mɩ́ ɩrɛ mɛ̃ a nɩsaal-libelibe a ɩ: bɛ mɩ́ nɔnɛ na kɛ́ bɛ àr saaƴẽwn a puoru-diru pʋɔ nɩ a sɔ-carɩ pʋɔ puore, k'aa nɩbɛ za tʋ̃ɔ́ nyɛ̃ bɛ. Yel-mɩŋa sɩza, ɩ̃ yere na kʋ̀rɛ nyɩ, bɛ páw nɩ a bɛ maalʋ baarɩ. 6Fʋ̃ʋ a, fʋ̃ʋ wa puore a, kpɛ tɔl a fʋ di-pɛ-baara za pʋɔ, pàw a pan ɛ́ puore a fʋ Sãà Naaŋmɩn na be a be, a zi-sɔwla ʋl pʋɔ a. A fʋ Sãà Naaŋmɩn na mɩ́ nyɛ̃ bom za na sɔwlɩ a, na maalɩ fʋ na.
7Nyɩmɛ mɩ́ wa puore a, nyɩ ta mɩ́ puule a ƴɛ̀r-been kʋralɛ mɛ̃ a tɩbɛ dem a ɩ: bɛ mɩ́ manɛ kɛ́ bɛlɛ wa ƴɛ̀rɛ yaga a n'a a Naaŋmɩn na de a bɛ puoru. 8A na ɩ lɛ a, nyɩ ta ɩrɛ mɛ̃ a bɛl a ɩ, a nyɩ Sãà Naaŋmɩn mɩ́ bãw nɩ a nyɩ bʋ̃-bɔbra ɛ́ nyɩ bɛ zɛlɩ ʋ sɛr ɛ. 9A na ɩ lɛ a, a nyɩɩm, nyɩ mɩ́ puore à ŋá:
“Tɩ Sãà na be a tẽ-vla pʋɔ,
a nɩbɛ za, bɛ bãw kɛ́ fʋ̃ʋ n'ɩ
a Naaŋmɩn na ɩ sõw#6:9 Sõw: A ƴɛ̀r-bir ŋa pɛr'ɩ k'aa Naaŋmɩn bɛ tɛr ʋ tɔ ɩ. a,
10a fʋ naalʋ, ʋ wa,
a fʋ pʋ-tɩɛrʋ, ʋ maalɩ a tẽw zu
mɛ̃ a tẽ-vla pʋɔ a.
11Kʋ̀ tɩ a dɩ̃a dɩb tɩ na bɔbr a.
12Dɩ a tɩ sãwna suur kʋ̀ tɩ,
mɛ̃ a lɛ a tɩɩm tɛɛ za
na mɩ́ dɩ suur kʋ̀
a bɛlɩ dem na sãw tɩ a.
13Ta sàw a bɛlʋ ta tɩ ɛ,
ɛ́ faa tɩ a Faalʋ sob nuru pʋɔ.
[Fʋ̃ʋ sɩrɩ so naalʋ nɩ kpɛnʋ nɩ danʋ, a yome yome za. Amɛn.]”
14Sɩza n'a, nyɩmɛ mɩ́ wa dɩ a nɩsaalbɛ sãwna suur kʋ̀ bɛ a, a nyɩ Sãà na be a tẽ-vla pʋɔ a, mɩ̀ na mɩ́ dɩ n a nyɩ sãwna suur kʋ̀ nyɩ. 15Ɛcɛ nyɩmɛ bɛ mɩ́ wa dɩ a nɩsaalbɛ sãwna suur kʋ̀ bɛ a, a nyɩ Sãà mɩ̀ kʋ̃ dɩ a nyɩ sãwna suur kʋ̀ nyɩ ɛ.»
A mʋta-tuo yele
16«Nyɩmɛ mɩ́ wa tɛr a mʋta-tuo a, nyɩ ta mɩ́ kʋɔlɛ mɛ̃ a nɩsaal-libelibe a ɩ, bɛ mɩ́ sãw nɩ niwn k'aa nɩbɛ za nyɛ̃ bɛ na tɛr a mʋta-tuo a. Yel-mɩŋa sɩza, ɩ̃ yere na kʋ̀rɛ nyɩ, bɛ páw nɩ a bɛ maalʋ. 17Ɛcɛ fʋ̃ʋ a, fʋ̃ʋ wa tɛr a mʋta-tuo a, fʋ̃ʋ pɛ́w a fʋ niwn ɛ́ zɛ a fʋ zu kãa-nyũu, 18a nɩbɛ ta bãwnɩ a fʋ na tɛr mʋta-tuo a ɩ. A fʋ Sãà Naaŋmɩn na nyɛrɛ bom za na sɔwlɩ a, na maalɩ fʋ na.»
Nyɩ bɔbr a na-bome bine a tẽ-vla pʋɔ
(Luk 12:33-34)
19«Nyɩ ta bɔbr na-bome gbone taa a tẽw zu ka, mɔwr nɩ zãzule na mɩ́ sãwnɛ bɛrɛ, ɛ́ a nyãnyuwr mɩ́ kar a pamɛ ɛ́ kpɛ zu a ɩ. 20Nyɩ nɩ̃ɛ bɔbr na-bome gbone taa a tẽ-vla pʋɔ, be mɔwr nɩ zãzule na bɛ sãwnɛ bɛrɛ a, ɛ́ nyãnyuwr bɛ karɛ a pamɛ bɛrɛ ɛ́ zure a. 21A be a fʋ na-bome na be a, be n'a a fʋ tɩɛrʋ mɩ̀ na be.»
Mimie n'a caalɛ a ƴã-gan za
(Luk 11:34-36)
22«A mimie n'ɩ a ƴã-gan fɩ̃tɩlɛ. A fʋ mimie wa ɩ mimi-kpɛn a, a fʋ ƴã-gan za na be n cãà pʋɔ, 23ɛcɛ a fʋ mimie wa ɩ mimi-sãwnɩ a, a fʋ ƴã-gan za na be n lige pʋɔ. A na ɩ lɛ a, a cãà na be a fʋ pʋɔ a, wa ɩ lige a, nyɛ̃ lige na pãa sɛw a!»
A Naaŋmɩn bɩɩ a libir
(Luk 16:13)
24«Nɩr za kʋ̃ tʋ̃ɔ́ ɩ na-mɩnɛ ayi tõ-tõ-bie ɩ: ʋ na hɩ̃ɛn nɩ a dãw-niwn sob, ɛ́ nɔnɛ a ayi sob, bɩɩ ʋ na tu n a kãw pùor, ɛ́ bɛr a kãw. Nyɩ kʋ̃ tʋ̃ɔ́ lãw ɩ a Naaŋmɩn nɩ a libir tõ-tõ-biir ɛ.»
Nyɩ ƴãw a nyɩ tɩɛrʋ za Naaŋmɩn ƴãw
(Luk 12:22-31)
25«Lɛ so ɩ̃ yere kʋ̀rɛ nyɩ: a nyɩ nyɔ-vʋʋrʋ ƴãw a, nyɩ ta tɩɛrɛ bʋ̃ʋ n'ʋ nyɩ na dɩ ɛ, ɛ́ a nyɩ ƴã-gan ƴãw a, nyɩ ta tɩɛrɛ bʋ̃ʋ n'ʋ nyɩ na su ɛ. A nyɔ-vʋʋrʋ bɛ zuo a bʋ̃-dɩrɩ ɛ? Ɛ́ a ƴã-gan bɛ zuo a bʋ̃-suuri ɛ? 26Nyɩ nyɛ̃ a mʋ̃ɔ pʋɔ lili a, a bɛ bʋ̀rɛ ɩ, bɛ cɩɛr ɛ, bɛ suur bowe pʋɔ ɩ, ɛ́ a nyɩ Sãà na be a tẽ-vla pʋɔ a, guole a. Nyɩ bɛ zuo a lili polpol lɛ ɩ? 27Nyɩ buor sob'ʋ na tɩɛrɛ za, wa ɩ a ʋ nyɔ-vʋʋrʋ ʋ wõwme dɔwlɩ blã?
28A bʋ̃-suuri ƴãw a, bʋ̃ʋ n'ʋ so nyɩ mɩ́ dɩ tuo tɩɛrɛ? Nyɩ jɩ́r nyɛ̃ a lɛ a póru mɔ̃-puuru na mɩ́ bule ìre a: a bɛ tone wone tuo ɩ, bɛ wóbr pɛnɛ ɩ, 29ɛcɛ mãa n'ʋ yere kʋ̀rɛ nyɩ, a Salomɔ̃ tɔr za, nɩ a ʋ dɛpaalʋ vɩɛlʋ za, bɛ tɩ su ta a mɔ̃-puuru á ŋá been kãw za ɩ. 30A Naaŋmɩn mɩ́ wa su a póru pʋɔ mʋ̃ɔ à ŋá a, al na mɩ́ be dɩ̃a ɛ́ bio bɛ na lɔb a ƴãw vũumí a, ʋ na ɩ n ŋmɩn kʋ̃ su nyɩ vla zuo lɛ, nyɩɩm a naaŋmɩn-sàwfʋ na bɛ saalɩ a! 31A na ɩ lɛ a, nyɩ ta mɩ́ dɩ tuo tɩɛrɛ yere nɩ: bʋ̃ʋ n'ʋ tɩ na dɩ? Bʋ̃ʋ n'a tɩ na nyũ? Bʋ̃ʋ n'ʋ tɩ na su ɛ? 32Tɩbɛ dem nɛbɛ mɩ́ bɔbr à á ŋá za kʋralɛ. Ɛcɛ a nyɩ Sãà na be a tẽ-vla pʋɔ a, bãwnɩ a na nyɩ na tɛr à á ŋá za yel-ɩra a. 33Nyɩ mɩ́ de niwn bɔbr a Naaŋmɩn Naalʋ nɩ a ʋ nyɔ-vʋʋr-vla, ʋʋ na kʋ̀ nyɩ nɩ a al za na báa cɛ a dɔwlɩ. 34A na ɩ lɛ a, nyɩ ta zɔrɛ dɛ̃bɩ̃ɛ a bio ƴãw ɛ, a bio na tɛr'ɩ a ʋ mɩŋa tɩɛrʋ. Bibir za nɩ ʋ bàlʋ.»
Currently Selected:
Matie 6: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
