Matie 21

A Yeezu kpɛ n a Zerizalɛm tẽw pʋɔ nɩ dɛpaalʋ

(Mark 11:1-11, Luk 19:28-40, Zã 12:12-19)

1Bɛ na tɩ pɩɛlɛ a Zerizalɛm a, ɛ tarɛ a Bɛtɩfaze tẽw, a Olivʋ tɩɩr tãw zu a, a Yeezu tõ n a ʋ po-tuurbɛ ayi, 2ɛ́ yel bɛ: «Nyɩ cen a tẽw ŋa na be a nyɩ nidaa a, nyɩ na tɩ ta n daadaalɛ nyɛ̃ bõw-nyãw na 'lẽ àr'ɩ ʋ bile a, nyɩ cɛ̀r ʋ, ɛ́ tɛr a wa kʋ̀ m. 3Ɛ́ nɩr wa ƴɛ̀rɛ a nyɩ zie a, nyɩɩm sɔw à ŋá: “A Sore tɛr'ɩ a yel-ɩra.” Ʋ na bɛr a na kʋ̀ nyɩ daadaalɛ nyɩ wa n.

4A ɩ n à à ŋá, k'aa naaŋmɩn-ƴɛ̀r-manɛ ƴɛ̀r-bie á ŋá tʋ̃ɔ́ tu:

5“Nyɩ yel a Sɩyɔ̃ tẽw dem:

a nyɩ nãà n'ɩ ŋan waar a nyɩ zie,

siwr ʋ tʋɔra zɔm bõw-nyãw,

bõw-nyãw bile#21:5 Nyɛ̃ Zak 9.9..”»

6A po-tuurbɛ tɩ cen na, a tɩ ɩ mɛ̃ a lɛ a Yeezu na yel kʋ̀ bɛ a. 7Bɛ tɩ tɛr'ɩ a bõw-nyãw nɩ a ʋ bile wa n, wa yɛ́r a bɛ bʋ̃-suuri dɔwlɩ a zu, ɛ́ a Yeezu do zɔm. 8Nɩ-yaga yaga tɩ yɛ́rɛ nɩ a bɛ bʋ̃-suuri a sɔ́r zu. Bɛ mɩnɛ tɩ karɛ nɩ a tɩɛ váar lɔbr ƴãwn a sɔ́r zu. 9A nɩbɛ na tɩ de a Yeezu niwn a, nɩ a bɛl na tɩ tuur a, tɩ cáarɛ na yere nɩ: «Ozaana#21:9 Ozaana: A ƴɛ̀r-bir ŋa a, cɛl'ʋ bɛ mɩ́ ŋmɛ danɩ nɩ nɩr. Ʋ ŋmɛ̃ na mɛ̃ a Dagara kuryii a. a Daviir bidɛb! A Naaŋmɩn, ʋ maalɩ a sob nɛ na waar a Sore yúor ƴãw a! Ozaana a salom zu za!»

10A Yeezu na wa kpɛ a Zerizalɛm a, a zie za dam'a. A nɩbɛ tɩ sowre na: «Ãa n'ɩ a sob ŋa?» 11A zu-sɛbla tɩ sɔw na: «A naaŋmɩn-ƴɛ̀r-manɛ Yeezu na yi Nazarɛtɩ, Galile tẽw a n'ʋ.»

A Yeezu na diw a yɛ-yɛrbɛ a Ŋmɩn-yir-kpɛ̃ɛ pʋɔ a

(Mark 11:15-19, Luk 19:45-48, Zã 2:13-22)

12A Yeezu tɩ kpɛ n a Ŋmɩn-yir-kpɛ̃ɛ pʋɔ diw a bɛlɩ dem za na kʋɔrɛ ɛ́ daar bome a be a. Ʋ tɩ ŋmɛ n a libi-tɛwrbɛ tabalɛ nɩ a naŋmã-kʋ̀ɔrbɛ dà-kɔwr lɔb. 13Al pùorí ʋ yel bɛ: «A Naaŋmɩn yel'ɩ a Sɛb-sõw pʋɔ à ŋá: “Bɛ na bʋɔlɛ nɩ a ɩ̃ yir kɛ́ puoru yir.” Ɛ́ nyɩɩm wa de ʋ, ʋ ɩ nyãnyuwr sɔwlʋ zie#21:13 Nyɛ̃ Ɩza 56.7 nɩ Zer 7.11.!»

14Zɔn nɩ wʋbr tɩ taw na ta a Yeezu zie a Ŋmɩn-yir-kpɛ̃ɛ pʋɔ be, ʋʋ tɩ sanɩ bɛ. 15A bàwr-maal-nɩ-bɛrɛ nɩ a Naaŋmɩn wulu sɛ-sɛbrbɛ na tɩ nyɛ̃ a nɔ-ɓãa-yele ʋ na maalɩ a, nɩ a bibiir na tɩ cáarɛ a Ŋmɩn-yir-kpɛ̃ɛ pʋɔ yere nɩ kɛ́: «Ozaana a Daviir bidɛb a», a tɩ ɩ na mɛ̃ bɛ ɩ ŋmɩn a. 16Bɛ tɩ sowr'ʋ na: «Fʋ wone nɩ a lɛ bɛ na yere a#21:16 Nyɛ̃ Ssy 8.3.?» A Yeezu tɩ sɔw bɛ na: «Ʋʋ ɩ̃ wone a na. Nyɩ bɛ dãw kanɩ a Sɛb-sõw ƴɛ̀r-bie á ŋá ɩ? “Fʋ ɩ n a ɩb, bibiir nɩ bi-pɩɩlɛ tɛɛ za tɩ danɛ fʋ.”» 17Ʋ tɩ bɛr bɛ nɩ a be, ɛ́ yi a tẽw pʋɔ cen Betani tɩ gã.

A Yeezu na ŋmɛ ƴãw a kãkãw ʋl na bɛ wɔ̃ a

(Mark 11:12-14,20-24)

18A bio daarɩ́ biɓaara, a Yeezu na tɩ lɛb waar a tẽw pʋɔ a, kɔ̃ tɩ nyɔw ʋ na. 19Ʋ tɩ nyɛ̃ nɩ kãkã-tɩɛ ʋ àr a sɔ́r nʋɔr, ʋ taw ta nyɛ̃ k'ʋ ɩ váar tɛwr. Lɛ n'a ʋ tɩ yel ʋ: «Fʋ kʋ̃ lɛb wɔ̃ wɔm za ɩ.» Ɛ́ daadaalɛ a kãkã-tɩɛ ko àr. 20A po-tuurbɛ na tɩ nyɛ̃ a lɛ a, nʋɔr ɓãá bɛ na bɛ yere: «Ŋmɩŋmɩn za n'a a kãkã-tɩɛ ko a pɛr nɛ pʋɔ?» 21A Yeezu tɩ sɔw bɛ na: «Yel-mɩŋa sɩza, ɩ̃ yere na kʋ̀rɛ nyɩ: bibir kãw nyɩmɛ wa tɛr a naaŋmɩn-sàwfʋ ɛ́ bɛ bʋ́nɛ a, à à ŋá ɩ̃ na ɩ a kãkã-tɩɛ a, lɛ tɛwr bɛ n'a nyɩ na mɩ́ tʋ̃ɔ́ ɩ ɛ, ɛcɛ nyɩmɛ mɩ̀ saa mɩ́ yel a tãw ŋa: “Ìr a ka tɩ lo a kʋ̃ɔ-kpɛ̃ɛ pʋɔ a”, a na tu n a lɛ. 22Bom nɛ za nyɩ nãà wa zɛlɛ a puoru pʋɔ nɩ naaŋmɩn-sàw-deb a, nyɩ na páw ʋ na.»

Nyɩnɛ n'a a Yeezu páw a sɔ́r ɩrɛ nɩ à à ŋá ʋ na ɩrɛ a?

(Mark 11:27-33, Luk 20:1-8)

23A Yeezu na tɩ kpɛ a Ŋmɩn-yir-kpɛ̃ɛ pʋɔ kanɛ nɩ a nɩbɛ a, a bàwr-maal-nɩ-bɛrɛ nɩ a Zifʋ mɩnɛ nɩ-kore tɩ taw na ta a ʋ zie sowr'ʋ: «Nyɩnɛ n'a fʋ páw a sɔ́r ɩrɛ à à ŋá? Ɛ́ ãa n'ʋ kʋ̀ fʋ a sɔ́r kɛ́ fʋ ɩrɛ à à ŋá?» 24A Yeezu tɩ sɔw bɛ na: «Ɩ̃ mɩ̀ na sowri nyɩ nɩ sowr-been yõ, nyɩmɛ wa sɔw kʋ̀ m a, ɩ̃ mɩ̀ na yel a kʋ̀ nyɩ a be ɩ̃ na páw a sɔ́r ɩrɛ à à ŋá a. 25A suob a Zã na tɩ tɩrɛ a, nyɩnɛ n'a ʋ tɩ yi? Naaŋmɩn zie n'a bɩɩ nɩsaalbɛ zie n'a?» Bɛ tɩ tɩɛr'ɩ bɛ pʋɔ à ŋá: «Tɩmɛ wa yel kɛ́ Naaŋmɩn zie n'a a, ʋ na yel tɩ na: “Ɛ́ bʋ̃ʋ n'ʋ so nyɩ bɛ sàw de ʋ?” 26Ɛ́ tɩmɛ wa yel kɛ́ nɩsaalbɛ zie n'a, a na fɛr'a kɛ́ tɩ bãwnɩ a a zu-sɛbla na kʋ̃ bɛr tɩ a. Bʋ̃ʋ n'ʋ vɛ̃, a nɩbɛ za zie a, a Zã tɩ ɩ n naaŋmɩn-ƴɛ̀r-manɛ.» 27Lɛ n'a bɛ tɩ sɔw à ŋá kʋ̀ a Yeezu: «Tɩ bɛ bãw ɛ.» Ʋ mɩ̀ lɛb yel bɛ: «Ɩ̃ mɩ̀ kʋ̃ yel kʋ̀ nyɩ a be ɩ̃ na páw a sɔ́r ɩrɛ à à ŋá a ɩ.»

A bibiir ayi zʋkpar

28A Yeezu tɩ cãà na lɛb yel: «Nyɩ tɩɛr'ɩ ŋmɩn yel ŋa ƴãw? Nɩr kãw tɩ tɛr'ɩ bibiir ayi. Ʋ tɩ yel'ɩ a dãw-niwn sob: “Ɩ̃ bie e, cen tɩ tõ a divɛ̃ tɩɩr púo pʋɔ a dɩ̃a.” 29A bie nɛ tɩ sɔw na: “Ɩ̃ bɛ cere ɩ”, ɛ́ blã wa pʋɔ ʋ nyɛ̃ a bɛ vɩɛl ɛ, ʋ cen. 30A sãà tɩ cen nɩ a ayi sob zie tɩ yel a ʋlɩ bʋ̃-been nɛ. Ʋ tɩ sɔw na: “Ɩ̃ sãà a, ɩ̃ cere na”, ɛ́ bɛ cen ɛ. 31A bɛ ayi pʋɔ a, buor sob'ʋ maalɩ a ʋ sãà pʋ-tɩɛrʋ?» Bɛ tɩ sɔw na: «A dãw-niwn sob'ʋ.» Lɛ n'a a Yeezu tɩ yel bɛ: «Yel-mɩŋa sɩza, ɩ̃ yere na kʋ̀rɛ nyɩ: zuru-yar-dierbɛ nɩ pɔw-yɛmɛ na dãw nyɩ nɩ a Naaŋmɩn Naalʋ pʋɔ. 32Bʋ̃ʋ n'ʋ vɛ̃, Zã tɩ dãw na wa a nyɩ zie, wa wul nyɩ a yel-mɩŋa sɔ́r, ɛ́ nyɩ bɛ sàw de a ʋ ƴɛ̀rʋ ɛ. Ɛcɛ a zuru-yar-dierbɛ nɩ a pɔw-yɛmɛ tɩ sàw na de a ʋ ƴɛ̀rʋ. Ɛ́ a nyɩɩm, nyɩ na saa nyɛ̃ à à ŋá a, nyɩ cãà bɛ lɩɛbɩ a nyɩ ɩb a pùorí kɛ́ nyɩ tʋ̃ɔ́ sàw de a ʋ ƴɛ̀rʋ ɛ.»

A divɛ̃ tɩɩr po-kʋ́ɔrbɛ na ɩ po-to-dem a zʋkpar

(Mark 12:1-12, Luk 20:9-19)

33«Nyɩ cãà lɛb bɛr wõ zʋkpar kãw. Yir sob kãw tɩ be n be kɔ divɛ̃ tɩɩr púo, mɛ dacin viiri koli, tuw bɔw pìir zu a wɔmɛ nɛbrʋ ƴãw, maalɩ a bʋ̃-gùre zaba ʋ kɛrɩ yaga, al pùorí, ʋ de ʋ kʋ̀ tõ-tõ-biir na ɩ divɛ̃ tɩɩr po-kʋ́ɔrbɛ a, ɛ́ yɔ. 34A wɔmɛ pɔrʋ daar na wa ta a, ʋ tõ n a ʋ tõ-tõ-biir a divɛ̃ tɩɩr po-kʋ́ɔrbɛ zie kɛ́ bɛ tɩ tɩr a ʋ dem. 35Ɛcɛ a divɛ̃ tɩɩr po-kʋ́ɔrbɛ tɩ nyɔw nɩ a ʋ tõ-tõ-biir, pɔb a kãw, kʋ a ƴen sob, ɛ́ lɔb a kãw nɩ kʋsɛbɛ kʋ. 36Ʋ tɩ lɛb'a tõ tõ-tõ-biir bɛ mɩnɛ bɛ yãwmɛ zuo a dãw-niwn dem. Ɛcɛ a divɛ̃ tɩɩr po-kʋ́ɔrbɛ mɩ̀ tɩ ɩ bɛ nɩ a lɛn tɔr za. 37Ʋ wa baa na tõ a ʋ bidɛb a bɛ zie tɩɛr'ɩ ʋ pʋɔ: “Bɛ na tɩ tɛr'ɩ ƴãwfʋ a ɩ̃ bie zie.” 38Ɛcɛ a divɛ̃ tɩɩr po-kʋ́ɔrbɛ na wa nyɛ̃ a bie a, bɛ yel'a kʋ̀ taa: “A gbã-dɩrɛ n'ʋ. Nyɩ wa tɩ nyɔw ʋ kʋ ɛ́ so a gbã-dɩ-bome!” 39Bɛ tɩ nyɔw ʋ nɩ a divɛ̃ tɩɩr púo pʋɔ lɔb bɛr dapùorí, ɛ́ kʋ ʋ.

40A na ɩ à ŋá a, a divɛ̃ tɩɩr púo sob wa wa a, ʋ na ɩ n a divɛ̃ tɩɩr po-kʋ́ɔrbɛ bɛ ŋa ŋmɩn?» 41Bɛ tɩ sɔw ʋ na: «Ʋ na kʋ n a nɩ-faar bɛ ŋa po-to-kʋb, ɛ́ de a divɛ̃ tɩɩr púo kʋ̀ nɩ-yoru, a daar mɩ́ wa ta bɛ kʋ̀ ʋ a wɔmɛ.»

42A Yeezu lɛb yel bɛ: «Nyɩ bɛ dãw kanɩ a ƴɛ̀r-bie á ŋá a Sɛb-sõw pʋɔ ɩ?

“A kʋsɩɛr ʋl a yir-mɩɛrbɛ na ír lɔb bɛr a,

lɩɛb'ɩ a yir pɛr kʋsɩɛr,

a Sore n'ʋ tõ à à ŋá:

nɔ-ɓãa-yel ʋ a tɩ zie#21:42 Nyɛ̃ Ssy 118.22-23..”

43Alɛ so ɩ̃ yere kʋ̀rɛ nyɩ: bɛ na de nɩ a Naaŋmɩn Naalʋ a nyɩ zie, kʋ̀ nɩ-bʋʋr-yoru na na ɩrɛ ʋ wɔnɛ wɔmɛ a. [ 44Nɩr wa lo a kʋsɩɛr ŋa zu a, a ʋ sob na lo na kar, ɛ́ sob nɛ zu a kʋsɩɛr ŋa nãà wa lo a, ʋ na ƴɛ̀r ʋ na ŋmɛr.]» 45A bàwr-maal-nɩ-bɛrɛ nɩ a Faarizɩ̃ɛ mɩnɛ na tɩ wõ a ʋ zʋkpaɩ á ŋá a, bɛ tɩ bãwnɩ a na bɛlɛ na nɛbɛ a Yeezu ƴɛ̀rɛ jɩɛrɛ nɩ a. 46Bɛ tɩ bɔbr'a kɛ́ bɛ nyɔw ʋ, ɛcɛ bɛ tɩ zɔ n a zu-sɛbla dɛ̃bɩ̃ɛ, bʋ̃ʋ n'ʋ vɛ̃, a zu-sɛbla zie a, a Yeezu tɩ ɩ n naaŋmɩn-ƴɛ̀r-manɛ.

Currently Selected:

Matie 21: DBDC

Highlight

Copy

Compare