Matie 10
10
A Yeezu nɩ-toni pie nɩ ayi
(Mark 3:13-19, Luk 6:12-16)
1A Yeezu tɩ bʋɔl'ɩ a ʋ po-tuurbɛ pie nɩ ayi wa kʋ̀ bɛ fãw, kɛ́ bɛ diwr'ɩ a kɔ̃tɔ̃-faar ɛ́ sanɛ a bàalʋ za nɩ a nɩ-kɔwlʋ za. 2Nyɩ nyɛ̃ a nɩ-toni pie nɩ ayi bɛl yée: a dãw-niwn sob'ɩ Sɩmʋ̃, bɛ na bʋɔlɛ Pɩɛr a, nɩ a ʋ yɛb Ãdere, Zebede bidɛbr Zakɩ nɩ a ʋ yɛb Zã, 3Filib nɩ Batelemi, Toma nɩ a zuru-yar-diere Matie, Alfe bidɛb Zakɩ nɩ Tade, 4Sɩmʋ̃ na pʋɔ a Zelɔtɩ mɩnɛ lãw#10:4 Zelɔtɩ mɩnɛ lãw: Tẽw maalʋ lãw kãw na tɩ be a Yeezu daar a n'ʋ. Bɛ tɩ bɔbr'a kɛ́ bɛ diw a Ʋrɔm tẽw nɩbɛ nɩ fãw, ɛ́ lɛb de a bɛ tẽw. pʋɔ a, nɩ Zuda Ɩsɩkarɩɔtɩ, a ʋl na wa mɩl a Yeezu a.
A Yeezu tõ n a ʋ nɩ-toni pie nɩ ayi
(Mark 6:7-13, Luk 9:1-6)
5A Pie-nɩ-ayi bɛ ŋa a, a Yeezu tɩ tõ bɛ na, ɛ́ kpaalɩ bɛ à ŋá: «Nyɩ taa tuur yire a bʋʋrɛ bɛl na bɛ ɩ Zifʋ mɩnɛ a zie ɩ, ɛ́ taa kpɩɛr Samaari tẽw kãw za pʋɔ ɩ. 6Ɛcɛ nyɩ nɩ̃ɛ cen a Ɩsɩrayɛl bʋʋrɛ nɩbɛ na ɩ mɛ̃ píir na bɔr a zie. 7Nyɩ hiere a sɔ́r zu k'aa tẽ-vla Naalʋ taw na pɩɛlɩ. 8Nyɩ sanɛ a bàalbɛ, nyɩ sɩ̃wnɛ a kũuni, nyɩ ɩrɛ a kɔn bɛ lɛb vɩɛl, nyɩ diwr a kɔ̃tɔmɛ. Nyɩ páw nɩ mɔlɛ, nyɩ mɩ̀ tɩrɛ mɔlɛ. 9Nyɩ ta tɛr salm-zɩɛ bɩɩ libi-pʋrmɛ a nyɩ bʋ̃-zʋbr pʋɔ ɩ. 10Nyɩ ta tɛr kɔr lo n a sɔ́r ɛ, ta tɛr kparɩ ayi ɛ, ta tɛr nafawr ɛ, ta tɛr dabɔl ɛ. A tõ-tõ-bie sɛwnɩ nɩ a ʋ nʋɔr-dɩb.
11Tẽ-kpɛ̃ɛ bɩɩ tẽle za pʋɔ nyɩ nãà wa ta a, nyɩ sowri bãw a sob nɛ na sɛwnɩ na de nyɩ a sãanʋ a, ɛ́ be a ʋ zie tɩ ta a nyɩ lɛb-cenu daar. 12Nyɩmɛ wa kpɩɛr yir pʋɔ a, nyɩɩm puori a yir dem. 13A yir nɛ dem wa sɛwnɩ a nyɩ puoru a, a nyɩ puoru na wa n nɩ ƴã-ɓaarʋ a bɛ zie, ɛ́ bɛlɛ bɛ wa sɛwnɩ a nyɩ puoru a, a nyɩ puoru ƴã-ɓaarʋ, ʋ lɛb wa a nyɩ zie. 14Nɩr bɛ wa sàw de nyɩ a sãanʋ a, bɩɩ bɛ wa bɛrɛ wone a nyɩ ƴɛ̀rʋ a, nyɩ yi zaa a yir nɛ pʋɔ bɩɩ a tẽw nɛ pʋɔ, ɛ́ tɛb tɛb a nyɩ gbɛ́ɛ uuru bɛr. 15Yel-mɩŋa sɩza, ɩ̃ yere na kʋ̀rɛ nyɩ, a ƴɛ̀rʋ-dɩb bibir a, bɛ kʋ̃ dɔwrɩ a Sodɔm nɩ a Gomɔɔr ten dem man a tẽw nɛ dem ɛ.»
A dɔwrʋ na waar a
(Mark 13:9-13, Luk 21:12-17)
16«A mãa a, ɩ̃ tone nyɩ na mɛ̃ píir wɛ-baar sɔgɔ a. A na ɩ lɛ a, nyɩ cɩ mɛ̃ wɩɩr a, ɛ́ ɩ pɔwlbɛ mɛ̃ naŋmamɛ a. 17Nyɩ gùre nyɩ tʋɔra a nɩsaalbɛ ƴãw: bɛ na nyɔw nyɩ na cen nɩ ƴɛ̀rʋ-dɩb ziir, ɛ́ fɔb nyɩ a bɛ puoru-diru pʋɔ. 18Bɛ na tɛr nyɩ na cen nɩ Ʋrɔm tẽw na-kpɛ̃ɛ-lɩɛrbɛ nɩ na-mɩnɛ niŋé a mãa ƴãw, kɛ́ nyɩ tɩ dɩ a nyɩ dãsɩɛ a bɛl nɩ a nɩ-bʋʋr-yoru niŋé. 19Bɛlɛ wa nyɔw nyɩ cere nɩ a ƴɛ̀rʋ-dɩb zie a, nyɩ ta dɩ tuo bɔbr a ƴɛ̀r-bie al nyɩ na na yel bɩɩ a lɛ nyɩ na na ƴɛ̀r a ɩ. A ƴɛ̀rʋ daar wa ta a, a ƴɛ̀r-bie al na wa n a nyɩ nʋɔrɩ́. 20Nyɩmɛ bɛ nɛbɛ na ƴɛ̀rɛ ɩ, a nyɩ Sãà Naaŋmɩn Vʋʋrʋ n'ʋ na ƴɛ̀rɛ nɩ a nyɩ nʋɔr. 21Yɛb na mɩ́ nyɔw nɩ a ʋ yɛb tɩr bɛ kʋ, sãà na mɩ́ nyɔw nɩ a ʋ bie tɩr, bibiir na mɩ́ ír'a àr a bɛ sãà mɩnɛ zu, ɛ́ ƴãw bɛ kʋ bɛ. 22Nɩbɛ za na hɩ̃ɛn nyɩ na a ɩ̃ ƴãw. Ɛcɛ sob nɛ wa ƴãw fãw tɩ ta a baarʋ daar a, ʋ na nyɛ̃ nɩ a faafʋ. 23Bɛlɛ wa diwr nyɩ tẽw kãw a, nyɩɩm zɔ cen tẽ-yũo pʋɔ, yel-mɩŋa sɩza, ɩ̃ yere kʋ̀rɛ nyɩ, nyɩ kʋ̃ zɔ cɔlɩ a Ɩsɩrayɛl ten baarɩ ɛ, ɛcɛ a Nɩsaal Bie wa.
24 Po-tuure bɛ dãw zuo a ʋ zu-sob ɛ, ɛ́ tõ-tõ-bie mɩ̀ bɛ dãw zuo a ʋ tõ-tõ-nɩ-kpɛ̃ɛ ɩ. 25A po-tuure wa ŋmɛ̃ mɛ̃ a ʋ zu-sob a, a sɛw ʋ na, a tõ-tõ-bie wa ŋmɛ̃ mɛ̃ a ʋ tõ-tõ-nɩ-kpɛ̃ɛ a, a sɛw ʋ na. Bɛ nɩ̃ɛ na bʋɔlɩ a yir sob Bɛlɩzebul, ɛ́ bɛ nãà yere a yir biir i!»
A ʋlɩ sob nɛ a na sɛw kɛ́ bɛ zɔrɛ a
(Luk 12:2-7)
26«A na ɩ lɛ a, nyɩ ta zɔrɛ nɩr kãw za ɩ. Bom za bɛ be be sɔwlɩ kʋ̃ʋ wa sãá ɩ, ɛ́ yel-sɔwla za bɛ be be bɛ kʋ̃ʋ wa bãw ɛ. 27Bom nɛ ɩ̃ na mɩ́ yel kʋ̀ nyɩ lige pʋɔ a, nyɩ mɩ́ yel ʋ cãàmɩ́, ɛ́ bom nɛ bɛ na mɩ́ waalɩ ƴãw a nyɩ tobe pʋɔ a, nyɩ mɩ́ do gàrʋ́ hier'ʋ. 28Nyɩ ta zɔrɛ a bɛlɩ dem na mɩ́ tʋ̃ɔ́ kʋ a ƴã-gan yõ ɛ́ kʋ̃ tʋ̃ɔ́ a sɩ́ɛ kʋ a ɩ, ɛcɛ nyɩ nɩ̃ɛ zɔrɛ a Naaŋmɩn na na tʋ̃ɔ́ kʋ a ƴã-gan nɩ a sɩ́ɛ za a tẽ-faa pʋɔ a. 29Bɛ bɛ tʋ̃ɔ́ mɩ́ kʋɔrɩ davɩmɛ ayi wɛ-bi-been ɛ? Ɛcɛ a been kãw za bɛ lore tẽw ɛ́ a nyɩ Sãà Naaŋmɩn bɛ bãwnɩ a ɩ. 30Ɛ́ a nyɩɩm a, bɛ sɔr'ɩ a nyɩ zukɔbɛ tɛɛ za bãw a nʋɔr. 31A na ɩ à ŋá a, nyɩ ta zɔrɛ dɛ̃bɩ̃ɛ ɩ, nyɩ zuo nɩ a davɩmɛ za.»
A Yeezu sàw-deb bɩɩ a ʋ zawrʋ
(Luk 12:8-9)
32«Sob nɛ za na sàw yel a nɩbɛ niŋé k'ʋʋ ɩ n a ɩ̃ po-tuure a, ɩ̃ mɩ̀ na sàw nɩ a ɩ̃ Sãà na be a tẽ-vla pʋɔ a niŋé k'ʋʋ ɩ n a ɩ̃ nɩr. 33Ɛcɛ sob nɛ za na yel a nɩbɛ niŋé k'ʋʋ bɛ bãw mɛ̃ a, ɩ̃ mɩ̀ na yel'ɩ a ɩ̃ Sãà na be a tẽ-vla pʋɔ a niŋé k'ɩ̃ɩ bɛ bãw ʋ ɛ.»
Ƴã-ɓaarʋ bɛ n'a ɩ̃ wa n ɛ, zɛbr'a
(Luk 12:51-53, 14:26-27)
34«Nyɩ ta tɩɛrɛ kɛ́ ƴã-ɓaarʋ n'a ɩ̃ wa ƴãw a tẽw zu ɛ: ƴã-ɓaarʋ bɛ n'a ɩ̃ wa n ɛ, zɛbr'a. 35Ɩ̃ wa na wa bʋ́r nɩr nɩ ʋ sãà, pɔwyaa nɩ ʋ mã, bie-pɔw nɩ ʋ sɩr-mã. 36A nɩsaal dɔ̃ dem na mɩ́ ɩ n a ʋ yir dem tɛɛ za. 37Nɩr na nɔnɛ a ʋ sãà bɩɩ a ʋ mã zuo mɛ̃ a bɛ sɛwnɩ mɛ̃ ɩ. Nɩr na nɔnɛ a ʋ bidɛb bɩɩ a ʋ pɔwyaa zuo mɛ̃ a bɛ sɛwnɩ mɛ̃ ɩ. 38Nɩr na bɛ de a ʋ da-gara tuo tuur'ɩ mɛ̃ a bɛ sɛwnɩ mɛ̃ ɩ. 39Nɩr na bɔbr k'ʋʋ tɛr a ʋ nyɔ-vʋʋrʋ a, ʋ na bɔr ʋ na bɛr, ɛ́ nɩr na sàw bɔr a ʋ nyɔ-vʋʋrʋ bɛr a ɩ̃ ƴãw a, ʋ na lɛb'a pàw ʋ.»
A maalʋ yele
(Mark 9:41)
40«Sob nɛ za na sàw de nyɩ a, sàw na de m, ɛ́ sob nɛ za na sàw de m a, sàw na de a ʋlɩ sob nɛ na tõ m a. 41Nɩr na sàw de naaŋmɩn-ƴɛ̀r-manɛ, ʋ na ɩ naaŋmɩn-ƴɛ̀r-manɛ a ƴãw a, ʋ na páw nɩ naaŋmɩn-ƴɛ̀r-manɛ maalʋ, ɛ́ nɩr na sàw de nɩ-mɩŋa, ʋ na ɩ nɩ-mɩŋa a ƴãw a, ʋ na páw nɩ nɩ-mɩŋa maalʋ. 42Yel-mɩŋa sɩza, ɩ̃ yere na kʋ̀rɛ nyɩ, nɩr na ƴãw a bibi-cãpili bɛ ŋa kãw ʋ nyũ, ŋmale pʋɔ kʋ̃ɔ ɓaarʋ saa n'a a, ʋ na ɩ a ɩ̃ po-tuure a ƴãw a, ʋ kʋ̃ guu a ʋ maalʋ ɛ.»
Currently Selected:
Matie 10: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
