Levitɩ mɩnɛ 2
2
A kukur bom de-kʋ̀b
1«Nɩr wa bɔbr k'ʋʋ de kukur bom kʋ̀ a Sore a, a fɛr'a k'ʋʋ de zɔ̃ pʋr kãá dɔwlɩ ɛ́ ƴãw tɩ-suur-zɔ̃-na-nyùur-vla-vla-a. 2Al pùorí ʋ de a wa kʋ̀ a bàwr-maalbɛ, a Aarɔ̃ bidɛbr. Bɛ na 'wɔ̃w nɩ nũ-kur zɔ̃ na jɛr'ɩ a kãá a, ɛ́ de a tɩ-suur-zɔ̃-na-nyùur-vla-vla-a a za. A bàwr-maalɛ kãw na de nɩ a de-kʋ̀b bome á ŋá bɛ na bʋɔlɛ kɛ́ “Cãà-bãwnɩ#2:2 Cãà-bãwnɩ: Bɛ mɩ́ tɩ nyɩw nɩ a de-kʋ̀b bome á ŋá k'aa Naaŋmɩn tɛr a sob nɛ na nyɩw a a tɩɛrʋ.” a, nyɩw a bàwr-maal-kuur zu. De-kʋ̀b bom bɛ na nyɩw a Sore nɔnɛ a zʋ̀ʋ́r nyũu a n'ʋ. 3A de-kʋ̀b bom ʋl na cɛ a, a Aarɔ̃ nɩ a ʋ bibiir so ʋ: bom na ɩ sõw za a n'ʋ, bʋ̃ʋ n'ʋ vɛ̃, de-kʋ̀b bom bɛ na sɛw kɛ́ bɛ nyɩw a Sore ƴãw a pʋɔ n'a ʋ yi.
4Alɛ wa ɩ de-kʋ̀b bom na sɛ̃ a n'ʋ a, a zɔ̃ kʋ̃ naw nɩ dãbɩl ɛ. A lɛ pʋɔ a, gato na maal'ɩ kãá a n'a nyɩ na wa n, bɩɩ sɛ̃sɛ̃ na bɛ ƴãw dãbɩl ɛ́ waarɩ kãá a. 5Alɛ wa ɩ de-kʋ̀b bom bɛ na mɩ́ sɛ̃ kur-pãgala zu a n'ʋ a, ʋ na ɩ n zɔ̃ bɛ na naw nɩ kãá ɛ́ bɛ ƴãw dãbɩl a. 6Bɛ na nyɔw ʋ na ŋma ŋma, lɛb ɩ kãá waarɩ. Kukur bom de-kʋ̀b'ʋ. 7Alɛ wa ɩ de-kʋ̀b bom na bɩ kure sɛr pʋɔ a n'ʋ a, bɛ na bu n a zɔ̃ nɩ kãá. 8Bɛ na de nɩ a de-kʋ̀b bom bɛ na cɔbrɩ à à ŋá a Sore ƴãw a, wa de ʋ kʋ̀ a bàwr-maalɛ ʋ cen nɩ a bàwr-maal-kuur pɛr. 9A bàwr-maalɛ na ír'ɩ a “Cãà-bãwnɩ” a ʋ pʋɔ nyɩw a bàwr-maal-kuur zu. De-kʋ̀b bom bɛ na nyɩw a Sore nɔnɛ a zʋ̀ʋ́r nyũu a n'ʋ. 10A de-kʋ̀b bom ŋmãa na cɛ a, a Aarɔ̃ nɩ a ʋ bidɛbr so ʋ: bom na ɩ sõw za a n'ʋ, bʋ̃ʋ n'ʋ vɛ̃, de-kʋ̀b bom bɛ na sɛw kɛ́ bɛ nyɩw a Sore ƴãw a pʋɔ n'a ʋ yi.
11Nyɩ bɛ dier de-kʋ̀b bom za na ƴãw dãbɩl a kʋ̀rɛ a Sore ɩ. Nyɩ taa wa nyɩwr de-kʋ̀b bom na ƴãw dãbɩl bɩɩ sɩwr a Sore ƴãw towtow ɛ. 12Nyɩ na tʋ̃ɔ́ na mɩ́ wa n de-kʋ̀b bom na ƴãw dãbɩl bɩɩ sɩwr a wa kʋ̀ a Sore, a lɛn daar nyɩ na mɩ́ waar'ɩ a kukur bʋ̃-dan a. Ɛcɛ nyɩ bɛ nyɩwr a a bàwr-maal-kuur zu a ɩrɛ de-kʋ̀b bom a zʋ̀ʋ́r na nyùur vla vla a ɩ.
13Nyɩ na mɩ́ dɔwlɩ nyaarʋ#2:13 Nyaarʋ: A Nyaarʋ mɩ́ ɩ na a bʋ̃-dɩrɩ nʋmɛ, ʋ mɩ̀ mɩ́ ɩ na a ta sãw ɛ. Alɛ so a nyaarʋ ɩ a Naaŋmɩn nɩ a ʋ nɩ-bʋʋrɛ wõ-taa bãwfʋ. A Naaŋmɩn na ŋmɛ̃ ʋ ŋmɛ̃a a bɛ be na sãw a wõ-taa ŋa bɛr ɛ. Nyɛ̃ 26.44-45, Sɔr-n 18.19 nɩ 2Na 2.19-22. de-kʋ̀b bom za zu. Nyɩ kʋ̃ yiiri a nyaarʋ dɔwlʋ a nyɩ de-kʋ̀b bom zu towtow ɛ, bʋ̃ʋ n'ʋ vɛ̃, a nyaarʋ ɩ n a wõ-taa a Naaŋmɩn na maal'ɩ nyɩ a bãwfʋ. Alɛ n'a so nyɩ na mɩ́ tɩr a nyɩ de-kʋ̀b bom za lãwnɩ a nyaarʋ.
14Nyɩmɛ wa waar'ɩ a nyɩ kukur bʋ̃-dan kɛ́ nyɩ wa kʋ̀ a Sore a, nyɩ na tĩ na sɛ̃ a ble zuru vũumí, al pùorí nyɩ ƴɛ́r a bie. Nyɩmɛ wa dier a waar'ɩ a lɛn daar a, 15nyɩ na cir'ɩ kãá ƴãw a zu ɛ́ dɔwlɩ tɩ-suur-zɔ̃-na-nyùur-vla-vla-a. Kukur bom de-kʋ̀b'ʋ. 16Al pùorí, a bàwr-maalɛ na nyɩw nɩ a al bɛ na bʋɔlɛ a “Cãà-bãwnɩ” a, a pɛr lɛ k'aa bʋ̃-bie nɩ a kãá ŋmãa, de nɩ a tɩ-suur-zɔ̃-na-nyùur-vla-vla-a za.» A al bɛ na nyɩw à à ŋá a ɩ n a Sore dem.
Currently Selected:
Levitɩ mɩnɛ 2: DBDC
Highlight
Share
Compare
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
