Zozue 1
1
A Zozue lɩɛr'ɩ a Moyiir
1A Sore tõ-tõ-bie Moyiir kũu pùorí a, a Sore tɩ yel'ɩ a Moyiir sõwne, Zozue, na ɩ Nun bidɛb a: 2«A ɩ̃ tõ-tõ-bie Moyiir kpi na. Ƴɛrɛŋa a, ìr gãw a Zurdɛ̃ ŋa, fʋ̃ʋ nɩ a nɩ-bʋʋrɛ bɛ ŋa za, kpɛ a tẽw ʋl ɩ̃ na kʋ̀rɛ a Ɩsɩrayɛl nɩbɛ a pʋɔ. 3Ɩ̃ kʋ̀rɛ nyɩ nɩ zie za nyɩ nãà wa nɛbr gbɛ́r a, mɛ̃ a lɛ ɩ̃ na tɩ yel kʋ̀ a Moyiir a. 4A saa-pɛrɩ́-dʋrʋ-lowr tɩ tɔ a saa-pɛrɩ́-gʋba-lowr a, a nyɩ tẽw na yi n a wɛja-kpalɛ tɩ tɔ a Libã tan. A saa-pɛrɩ́ tɩ tɔ a mʋ̃tɔ̃w-kpɛb-lowr a, ʋ na yi n a man-kpɛ̃ɛ, a Efaratɩ, tɩ tɔ a Mediterane kʋ̃ɔ-kpɛ̃ɛ, lãwnɩ a Hititɩ mɩnɛ tẽw. 5A fʋ cãafʋ daar za a, nɩr za kʋ̃ tʋ̃ɔ́ bà gbɛ́r a fʋ niŋé ɩ, bʋ̃ʋ n'ʋ vɛ̃, ɩ̃ na be n a fʋ zie mɛ̃ a lɛ ɩ̃ na tɩ be a Moyiir zie a. Ɩ̃ kʋ̃ tɩɛ fʋ bɛr towtow ɛ, ɩ̃ kʋ̃ zawrɩ fʋ bɛr towtow ɛ́ bɛ sõw fʋ ɛ. 6Kpɛmɛ ɛ́ dɩ kanyir, bʋ̃ʋ n'ʋ vɛ̃, fʋ̃ʋ n'ʋ na de a tẽw kʋ̀ a nɩ-bʋʋrɛ bɛ ŋa bɛ so ʋ, a tẽw ŋa ɩ̃ na pɔ yel k'ɩ̃ɩ na kʋ̀ n a bɛ sãàkʋm-kore a. 7Dɛ́ kpɛmɛ ɛ́ dɩ kanyir yaga. Ƴãw fãw tuur a wulu a ɩ̃ tõ-tõ-bie Moyiir na lʋɔrɩ kʋ̀ b a: taa zawrɛ ʋ bɛrɛ towtow ɛ, lɛ n'a bom za na mɩ́ tu b. 8A wulu sɛbɛ ŋa ƴɛ̀r-bie kʋ̃ yi zaa a fʋ nʋɔrɩ́ ɛ. Tɛr a tɩ́ɛrɛ mʋ̃tɔ̃w nɩ tɩ̃ɩsɔw za, kɛ́ fʋ tʋ̃ɔ́ ƴãw fãw ɩrɛ mɛ̃ a lɛ na sɛb a wulu sɛbɛ pʋɔ a, lɛ n'a a fʋ yele za na mɩ́ tu vla vla za. 9Ɩ̃ bɛ yel kʋ̀ b kɛ́ fʋ kpɛmɛ ɛ́ dɩ kanyir e? Ta màwr ɛ, ta zɔrɛ dɛ̃bɩ̃ɛ ɩ, bʋ̃ʋ n'ʋ vɛ̃, a mãa Sore fʋ Naaŋmɩn, ɩ̃ na be n a fʋ zie, be za fʋ na cere a.»
A Zozue cɔbrɛ nɩ a Zurdɛ̃ gãwfʋ
10Lɛ n'a a Zozue tɩ yel a nɩbɛ nɩ-bɛrɛ: 11«Nyɩ cɔlɩ a laɩ yel a Ɩsɩrayɛl nɩbɛ à ŋá: “Nyɩ cɔbrɩ bʋ̃-dɩrɩ, bʋ̃ʋ n'ʋ vɛ̃, ka nɩ bibie ata a, nyɩ na gãw nɩ a Zurdɛ̃ ŋa, kpɛ so a tẽw a Sore nyɩ Naaŋmɩn na kʋ̀rɛ nyɩ kɛ́ nyɩ so a.”» 12Al pùorí, a Zozue tɩ yel'ɩ à ŋá kʋ̀ a Urubɛn, a Gadɩ nɩ a Manase dɔwlʋ ŋmãa nɩbɛ: 13«Nyɩ cãà bãwnɩ a lɛ a Sore tõ-tõ-bie Moyiir na yel kʋ̀ nyɩ a: “A Sore nyɩ Naaŋmɩn kʋ̀rɛ nyɩ nɩ a pɩ̃ɛnʋ a tẽw ʋl ʋ na kʋ̀rɛ nyɩ a Zurdɛ̃ saa-pɛrɩ́ a pʋɔ”. 14A nyɩ pɔwbɛ, a nyɩ bibiir nɩ a nyɩ dʋn na be n a vuo ŋa pʋɔ a Moyiir na tɛr nyɩ wa n a. Ɛcɛ a nyɩɩm dɛbr za na na tʋ̃ɔ́ a zɛbr zɛb a, nyɩ na de nɩ a nyɩ zɛbr bome, de nɩ a nyɩ yɛbr niwn gãw a man. Nyɩ na sõw bɛ na 15tɩ ta n a lɛn daar a Sore na na kʋ̀ bɛ a pɩ̃ɛnʋ mɛ̃ a lɛ ʋ na kʋ̀ nyɩ a, ɛ̀ bɛ mɩ̀ so a tẽw ʋl a Sore nyɩ Naaŋmɩn na kʋ̀rɛ bɛ a. Al pùorí nyɩ na lɛb'a cen a tẽw nyɩ na so a pʋɔ, ɛ́ nyɩ na so nɩ a tẽw, a ʋl a Sore tõ-tõ-bie Moyiir na kʋ̀ nyɩ nyɩ so a Zurdɛ̃ saa-pɛrɩ́ gãwn a.»
16Bɛ tɩ sɔw nɩ a Zozue: «Bom nɛ za fʋ na yere kʋ̀rɛ tɩ a, tɩ na ɩ na, ɛ́ zie nɛ za fʋ na na tõ tɩ a, tɩ na cen na. 17Tɩ na sàw nɩ a fʋ nʋɔr yel za ƴãw, mɛ̃ a lɛ tɔr za tɩ na tɩ sàw a Moyiir nʋɔr a. Sɩza, a Sore fʋ Naaŋmɩn na be n a fʋ zie mɛ̃ a lɛ ʋ na tɩ be a Moyiir zie a. 18Nɩr za wa gaarɛ bɛ sàwr a lɛ za fʋ na yere kʋ̀rɛ tɩ a, bɛ na kʋ ʋ na. Fʋ̃ʋ ƴãw a, kpɛmɛ ɛ́ dɩ kanyir!»
La Bible en Dagara © Alliance Biblique du Burkina Faso, 2013.