Zɔb 30
30
A Zɔb dɩ̃a wʋ̀ʋr
1Ɛcɛ ƴɛrɛŋa a, bibi-nyɔ-fɛrɛ ɩrɛ mɛ̃ na laar.
A bɛl ɩ̃ na bɛ tɩ sàw na ƴãw a bɛ sãà mɩnɛ pʋɔ
a ɩ̃ baar pʋɔ gùre a ɩ̃ dʋn a.
2Mɔ̃ mɩ̀, bʋ̃ʋ n'ʋ bɛ nãá tʋ̃ɔ́ ɩ?
A bɛ fãw za tɩ baar'a.
3A Nãw-woro nɩ a kɔ̃ tɩ ɩ na bɛ cɛ kɔbɛ tɛwr,
dɩlãpʋɔ pʋɔ n'a bɛ tɩ bɔbr bom kãw kɛ́ bɛ nyĩ,
zie na liw gã ɩ deboru, ɛ́ nɩr za bɛ ka be a.
4Va-nʋʋr'a bɛ tɩ ɓɛlɛ a tuwr pʋɔ,
tɩ-nyɩgɛ n'a tɩ ɩ a bɛ dɩb.
5Bɛ tɩ diw bɛ na bɛr a nɩbɛ pʋɔ,
bɛ tɩ 'húore bɛ na mɛ̃ nyãnyuwr a.
6Tan sɩɩr ƴãw n'a bɛ tɩ kpɩɛr,
tẽsɔw bɔwrɩ nɩ pie bɔwrɩ pʋɔ.
7Bɛ tɩ ùore nɩ a tuw pʋɔ,
ɛ́ tɩ gbõ taa a gʋʋr pile.
8Bɛ tɩ ɩ n yãyaar dem, nɩbɛ na bɛ tɛr pɛr a!
Bɛ tɩ diw bɛ na pɔb'ɩ dabɔlɛ bɛ yi a tẽw pʋɔ.
*
9Ɛcɛ ƴɛrɛŋa a, mãa n'ʋ a nɩbɛ bɛ ŋa lore nɩ nuru,
mãa yele n'a bɛ manɛ.
10Ɩ̃ ɩrɛ bɛ nɩ kɔkɔrʋ bɛ tawr zãánɛ nɩ mɛ̃,
bɛ cɩrɛ nɩ mʋtaar waarɛ mɛ̃ a niwn ɛ́ a bɛ ɩrɛ bɛ bom ɛ.
11Naaŋmɩn n'a n'ʋ bàl mɛ̃ bɛr ɛ́ ƴãw mɛ̃ a vĩ a,
bɛ mɩ́ bɛr'ɩ yã ɛ́ ɩrɛ mɛ̃ lɛ bɛ na bɔbr a!
12Bɛ ìr'ɩ yaga yaga a ɩ̃ dʋrʋ lowr vaarɛ a ɩ̃ gbɛ́ɛ k'ɩ̃ɩ lo,
bɛ puo nɩ sɔ́r waar a ɩ̃ kʋb ƴãw.
13Bɛ fur mɛ̃ nɩ a voru za,
ɛ́ ƴãw fãw tone a ɩ̃ loba ƴãw,
bɛ been kãw za bɛ tɛr sõwfʋ yel-ɩra ɩ.
14Bɛ cɛ n a ɩ̃ yir dacin puo kpɛ,
bɛ darɛ nɩ taa waar a ɩ̃ ƴãw
a dacin ŋmaarɛ nɩ a tã-dɛgɛ pʋɔ.
*
15Pʋl-vʋ̃ɔ nyɔw mɛ̃ na,
a nɩr ɩ̃ na tɩ ɩ a, a tɔl'a mɛ̃ sɛsɛb na fu a,
a ɩ̃ nʋ̃ɔ̀ tɔl'a mɛ̃ zũzuwr a.
16Ɛcɛ ƴɛrɛŋa a, a ɩ̃ nyɔ-vʋʋrʋ báarɛ na cere,
kpɩɛrʋ bibie n'a tɛr mɛ̃.
17A tɩ̃ɩsɔw a, a 'wɔbrʋ mɩ́ 'wɔb mɛ̃ na
tɩ tɔ a ɩ̃ kɔbɛ, ɛ́ a ɩ̃ jiile bɛ be na pɩ̃ɛnɩ ɛ.
18Naaŋmɩn ŋmʋr'a nyɔw mɛ̃ a kparʋ ƴãw,
ʋ fɩɩrɩ mɛ̃ nɩ a kɔkɛɛ mɛ̃ kparʋ kɔkɔr na ɩ fɩɩra a.
19Ʋ lɔb mɛ̃ na ƴãw mɛ̃mɛrɛ pʋɔ,
mãa n'ɩ ŋan ɩ mɛ̃ uuru nɩ tãpɛlʋ a.
*
20Ɩ̃ Naaŋmɩn i, ɩ̃ lɔbr'ɩ cɛlsɩ bʋɔlɛ nɩ fʋ,
ɛ́ fʋ bɛ sɔwr a ɩ̃ bʋɔlʋ ɛ, ɩ̃ àr'ɩ a fʋ niŋé,
ɛ́ fʋ bɛ ŋmɛlɛ kaar mɛ̃ ɩ.
21Fʋ lɩɛb'ɩ po-to-sob a ɩ̃ zie,
a fʋ fãw za n'a fʋ dɔwrɛ nɩ mɛ̃.
22Fʋ ɩ n a sɛsɛb ɓáw mɛ̃, garɛ nɩ mɛ̃ mɛ̃ wur a,
saa-sɛsɛb fure na ŋmɩɛr mɛ̃ a ziir za,
23Ɩ̃ bãwnɩ a na, kũu zie n'a fʋ cere nɩ mɛ̃,
a bʋ̃-vʋʋrɩ za tuor-taa zie.
24Ɛcɛ sob nɛ na na kpi a,
ʋ bɛ mɩ́ dɔl nũu bɔbr ɩ nyɔwfʋ zie ɩ?
Sob nɛ na be kpɩɛrʋ pʋɔ a,
ʋ bɛ mɩ́ kone bʋɔlɛ sõwne ɩ?
25Ɛcɛ, ɩ̃ bɛ mɩ́ tɩ lãw nɩ
a bɛlɩ dem a na wone a kone ɩ?
A nã́w sob kpɩɛrʋ bɛ mɩ́ tɩ kpɩɛr mɛ̃ ɩ?
26Ɩ̃ɩ na tɩ tɩɛrɛ a nʋ̃ɔ̀ a, kpɩɛrʋ n'a ta m,
ɩ̃ tɩ gùre nɩ cãà ɛ́ lige n'a ta.
*
27A socir mɩ́ tʋɔr mɛ̃ nɩ gerger,
a ɩ̃ kpɩɛrʋ bibie á ŋá ƴãw.
28Kpɩɛrʋ n'a ɩ̃ tɛr cere nɩ, cãà bɛ ka be a ɩ̃ ƴãw ɛ!
Ɩ̃ mɩ́ ìr'ɩ a nɩ-yaga sɔgɔ ŋmɩɛr cɛlsɩ bɔbr'ɩ sõwfʋ.
29A ɩ̃ kon ɩ na ɩ̃ lɩɛbɩ gbõgbo-cili yɛb ɛ́ vìíri ɩ a ɩ̃ taabɛ.
30A ɩ̃ ƴã-gan ko na 'lawrɛ,
ƴã-tʋlʋ vuule mɛ̃ n'a tɩ tɔ a kɔbɛ.
31A ɩ̃ korijom ŋmɩɛr'ɩ kuor zʋkpaɩ tɛwr,
ɛ́ a kon-konbɛ kɔkɛɛ nɩ a ɩ̃ wele dem de taa.
La Bible en Dagara © Alliance Biblique du Burkina Faso, 2013.