Zɔb 28
28
A Zɔb ƴɛ̀rɛ nɩ a Yã-bãwfʋ ƴɛ̀rʋ
1Yel-mɩŋa n'a, salm-pla bɔwrɩ be n be,
ɛ́ salm-zɩɛ yɩɩlʋ ziir be be.
2A kure a, tẽsɔw n'a bɛ mɩ́ tuw ír ʋ,
ɛ́ kʋsɩɛr'ʋ mɩ́ nyɩl lɩɛbɩ kur-zɩɛ.
3A salm-tuwrbɛ mɩ́ siw nɩ nɩ vũu a salm-bɔwrɩ pʋɔ.
Bɛ mɩ́ tuw na tɩ ta n a be bɛ na tʋ̃ɔ́ a,
bɔbr'ɩ a kʋsɛ-sɛbla na be liw-varkpara pʋɔ a.
4A salm-tuwrbɛ yuo nɩ bɔwrɩ zãá nɩ a nɩbɛ kpɛb ziir.
Bɛ yawlɩ na zaalɛ, zãá nɩ a nɩsaalbɛ,
be nɩr na kʋ̃ tʋ̃ɔ́ ta a.
5A tẽsɔw zu-sɔw n'ʋ tɩrɛ a bʋ̃-dɩra,
ɛcɛ a ʋ pʋɔ dam'a nyaw taa mɛ̃ vũu na dɩ a.
6A ʋ kʋsɛbɛ pʋɔ n'a kʋsɛ-nyɩwra kãw
bɛ na bʋɔlɛ safɩɩr a be,
ɛ́ a ʋ uuru pʋɔ n'a a salm-zɩɛ be.
7A sɩla bɛ bãw a tẽsɔw pʋ̃ɔmɩ sɛ́ɛ á ŋá ɩ,
ɛ́ sidume mimir bɛ dãw nyɛ̃ a ɩ.
8Wɛ-dʋ̃-faar bɛ dãw nɛ̃ gbɛ́r a be ɩ,
gbẽw bɛ dãw tu a ɩ.
9Ɛcɛ a nɩsaal tuwr'ɩ kʋsɛ-kpam,
ʋ tĩ nɩ a tan sɩɩr ƴãw ɛ́ ŋmɩɛr a wɛlɛ.
10Ʋ wɛr'ɩ bɔwrɩ a pie pʋɔ,
a ʋ mimir nyɛ̃ nɩ bom za na tɛr yúor a.
11Ʋ nɛb'ɩ a bul-nɛ́ɛ kpar
ɛ́ ɩ bom za na tɩ sɔwlɩ a sãá cãàmɩ́.
*
12Ɛcɛ a Yã-bãwfʋ a,
nyɩnɛ n'a bɛ na nyɛ̃ ʋ?
Nyɩn lowr'a a yã kpɩɛr?
13A nɩsaalbɛ bɛ bãw a Yã-bãwfʋ daarʋ ɛ,
ʋ bɛ be a tẽw zu ka ɩ.
14A Kʋ̃ɔ-kpɛ̃ɛ-zulu zulu#28:14 Kʋ̃ɔ-kpɛ̃ɛ-zulu zulu Kʋ̃ɔ-kpɛ̃ɛ na be a tẽsɔw pile a n'ʋ. Be n'a a kʋ̃ɔnɩ mɩ́ yire paalɛ a kʋ̃ɔ-bɛrɛ tɩ na nyɛrɛ a. yel'a:
«Ʋ bɛ be a ɩ̃ pʋ̃ɔmɩ ɛ»,
ɛ́ a kʋ̃ɔ-kpɛ̃ɛ yel: «Ʋ bɛ be a ɩ̃ zie ɩ.»
15Bɛ kʋ̃ tʋ̃ɔ́ de ʋ tɛw nɩ salm-zɩɛ mɩŋa mɩŋa ɩ,
salm-pla na tɩbrɛ a, kʋ̃ tʋ̃ɔ́ ta a ʋ daarʋ ɛ.
16Ofɩɩr tẽw salm-zɩɛ bɛ gbʋ́r ʋ ɛ,
kʋsɛ-nyɩwrɩ kãw bɛ na bʋɔlɛ onisɩ nɩ safɩɩr a, bɛ ta ʋ ɛ.
17A ʋ daarʋ zuo nɩ a salm-zɩɛ
nɩ a bom ʋl bɛ na mɩ́ maal'ɩ a butole a daarʋ,
fʋ̃ʋ saa tɩr salm-zɩɛ mɩŋa duwle a, fʋ bɛ páwr ʋ ɛ,
18bɛ nãà yere a kʋsɛ-zɩɛ ɓõɓõ bɛ na bʋɔlɛ koraɩ a,
nɩ a butoli bʋ̃-maala bʋʋrɛ kãw bɛ na bʋɔlɛ kɩrɩsɩtal a.
A Yã-bãwfʋ vɩɛlʋ sa n a lɛw-vɩɛlɩ vɩɛlʋ.
19A Etiopi tẽw kʋsɛ-nyɩwra ʋl bɛ na bʋɔlɛ topaazʋ a
daarʋ bɛ ta a Yã-bãwfʋ dem ɛ.
A salm-zɩɛ mɩŋa mɩŋa mɩ̀ cãà bɛ ta ʋ ɛ.
*
20Ɛcɛ nyɩnɛ n'a a Yã-bãwfʋ pãa yi a?
Nyɩn lowr'ɩ a yã kpɛb zie?
21Ʋ sɔwl'a, bʋ̃-vʋʋra kãw za kʋ̃ nyɛ̃ ʋ ɛ,
a saa-zu lili kʋ̃ tʋ̃ɔ́ nyɛ̃ ʋ ɛ.
22A bɔw-zulu zulu nɩ a kũu yere na:
«A ʋ yúor na yi a, a lo n a tɩ tobrí.»
23Ɛcɛ Naaŋmɩn bãw nɩ a ʋ yi-waa zie,
ʋl bãw nɩ a be ʋ na be a.
24Ʋlɛ n'ʋ mɩ́ jɩ́r tɩ tɔ a tẽw baarʋ zie,
ɛ́ nyɛ̃ bom za na be a salom pile a.
25Bʋ̃ʋ n'ʋ vɛ̃, ʋlɛ n'ʋ mɩ́ kʋ̀ a ʋ fãw a sɛsɛb,
ɛ́ manɩ a kʋ̃ɔ zɛ̃a,
26ʋ ƴãw nɩ tʋr-bɔw kʋ̀ a saa, ɛ́ puo a saa sɔ́r.
27A lɛn daar'a a Naaŋmɩn tɩ nyɛ̃ a Yã-bãwfʋ ɛ́ nɔ̃w ʋ.
Ʋ tɩ nyɛ̃ ʋ na ɛ́ bɔbr k'ʋʋ bãw a lɛ a ʋ vɩɛlʋ na zɛ̃ a.
28Al pùorí, ʋ tɩ yel'ɩ a nɩsaal:
«A zɔrɛ-a-Sore n'ɩ a Yã-bãwfʋ!
A ta-pɩɛlɛ-yel-faa n'ɩ a yã!»
La Bible en Dagara © Alliance Biblique du Burkina Faso, 2013.