Zɔb 22
22
A gb'a ata sob a Elifaazɩ na ƴɛ̀r a Zɔb zie a
1Lɛ n'a a Elifaazɩ na yi Teman a, tɩ de a ƴɛ̀rʋ yel a Zɔb:
2Naaŋmɩn na tʋ̃ɔ́ na tɛr nɩsaal yel-ɩra bɩɩ?
— Nɩsaal na ɩ yã-bãwnɛ a n'ʋ mɩ́ tɛr ʋ mɩŋa yel-ɩra.
3A fʋ mɩnʋ ɩrɛ nɩ a Kpɛnʋ-za-sob ŋmɩn?
Bʋ̃ʋ n'ʋ ʋ páwr a fʋ cenu na vɩɛl a pʋɔ?
4Fʋ tɩɛr kɛ́ fʋ na ƴãwnɛ
a Naaŋmɩn a n'a so ʋ kpãanɛ fʋ,
ɛ́ dɩrɛ nɩ fʋ ƴɛ̀rʋ bɩɩ?
5A fʋ sãwna na bɛ tɛr vuo,
nɩ a fʋ ɩ-faar na bɛ tɛr tɛwfʋ zie a ƴãw nɩ̃ɛ n'a.
*
6A bɛ mɩ́ tɩ sɛw ɛ,
ɛ́ fʋ de a fʋ yɛbr bome bin ɛ́ gùre
kɛ́ bɛ wa ya a bɛ san,
fʋ mɩ́ tɩ faa nɩ a bɛ bʋ̃-suuri,
ɛ́ bɛr bɛ ƴã-gan zawlɛ.
7Fʋ bɛ mɩ́ tɩ kʋ̀ kʋ̃ɔ a kʋ̃ɔ-nyúur sob ɛ,
ɛ́ mɩ́ tɩ sɩb a bʋ̃-dɩrɩ a kɔ̃ sob.
8Fʋ mɩ́ tɩ sõw nɩ a kpãkpãw-kpɛ̃w sob
ʋ faa a bãbàal tẽsɔw,
ɛ́ fʋ ƴãw a fʋ nɩ-nɔna ʋ kpɩɛr a be.
9Fʋ mɩ́ tɩ bɛr'ɩ a pɔw-kɔbɛ
bɛ lɛb kul nũ-zawlɛ ɛ́ fʋ dɔwrɩ a bi-kpebe,
10Alɛ n'a so bɛrɩ ŋmãa jil fʋ,
ɛ́ dɛ̃bɩ̃-kpɛ̃ɛ ùr nyɔw fʋ.
11Lige n'a, fʋ bɛ cãà nyɛrɛ ɩ,
ɛ́ kpɩɛrʋ pili pàw fʋ.
*
12A Naaŋmɩn bɛ be a salom saa-zu za ɩ?
Nyɛ̃ lɛ a ŋmar-bie na do saa sɛw a!
13Alɛ n'a so fʋ yel kɛ́:
«Bʋ̃ʋ n'ʋ a Naaŋmɩn na tʋ̃ɔ́ bãw?
Ʋ na tʋ̃ɔ́ na jɩ́r a zũzuw-sɛbla pʋɔ
bãw a tɩ yele bɩɩ?
14A zũzuwe pàw ʋ nɩ a niwn,
ʋ bɛ nyɛrɛ bom ɛ,
a salom vilovilo tɛwr'ʋ ʋ mɩ́ cere viire!»
15Fʋ nɔ̃w bɔbr'a kɛ́ fʋ tuur a dãwdãw sɛ́ɛ,
a al a nɩ-faar na tɩ tu a bɩɩ?
16Bɛ tɔl'a ɛ́ a bɛ daar bɛ ta ɩ,
mɛ̃ dacin kʋ̃ɔ na tuo a.
*
17Bɛ mɩ́ tɩ yere na càarɛ nɩ a Naaŋmɩn:
«Ʋ bɛr tɩ zoom!»
Ʋlɛ n'ɩ a Kpɛnʋ-za-sob,
ɛcɛ bʋ̃ʋ n'ʋ ʋ na tʋ̃ɔ́ ɩ tɩ?
18Ɛcɛ, ʋlɛ n'ʋ tɩ ɩ a bɛ yie tɛr a!
A ɩ-fa-maalbɛ ɩ-ɩrɩ, a zãá nɩ mɛ̃.
19A nɩ-mɩn na nyɛ̃ na ɛ́ cɩlɛ,
a nɩbɛ na bɛ tɛr sãwna a
na ɩrɛ bɛ na laar yere nɩ:
20«Ãw! A tɩ dɔ̃ dem'ɩ bɛ ŋa kpi pàw pɛr!
Vũu dɩ n a bɛ tɛra za!»
*
21A na ɩ lɛ a, ɩ fʋ̃ʋ nɩ a Naaŋmɩn lɛb kpɛ taa,
ɛ́ a yele za na ɩ n vla, lɛ n'a fʋ na lɛb bãw a nʋ̃ɔ̀.
22Sàw de a wulu na yire a ʋ nʋɔrɩ́ a,
ƴãw a ʋ ƴɛ̀rʋ za a fʋ socir pʋɔ.
23Fʋ̃ʋ wa lɛb wa a Kpɛnʋ-za-sob zie a,
ʋ na lɛb'a maalɩ fʋ ƴãw.
Taa pɩɛlɛ faalʋ kãw za ɩ.
24Al pùorí, lɔb a fʋ salm-zɩɛ bɛr a tẽw,
lɔb a fʋ salm-zɩɛ mɩŋa mɩŋa ƴãw
bà-fʋɔla kʋsɛbɛ pʋɔ.
25Lɛ n'a a Kpɛnʋ-za-sob na ɩ a fʋ salm-zɩɛ,
ʋlɛ n'ʋ na ɩ a fʋ salm-pla na gbõ gã a.
*
26Lɛ n'a ʋ na ɩ a fʋ nʋ̃ɔ̀,
ʋlɛ n'ʋ fʋ na lɩɛbɩ a fʋ niwn cɔw.
27Fʋ̃ʋ wa puore ʋ a, ʋ na bɛr'a wo b,
ɛ́ fʋ na ír'ɩ a nɛ́ɛ fʋ na kõ kʋ̀ ʋ a.
28Fʋ̃ʋ wa yel kɛ́ fʋ na ɩ n bom a,
a na tu n vla, ɛ́ cãà na caalɛ nɩ a fʋ sɔ́r.
29Sɩza, a Naaŋmɩn mɩ́ ɩ n
a pɔ̀lʋ dem tɩɛrʋ a sãw,
ɛcɛ, ʋ mɩ́ ɩ n a bɛlɩ dem
na siwre bɛ tʋɔra a yele maalɩ.
30Ʋ mɩ́ faa nɩ a bɛlɩ dem na bɛ tɛr sãwna a.
A na ɩ lɛ a, ɩrɛ vla, ɛ́ fʋ na so nɩ fʋ tʋɔra.
La Bible en Dagara © Alliance Biblique du Burkina Faso, 2013.