Zeremi 37
37
A Zeremi sɔw nɩ a nɩbɛ a Sedesɩasɩ na tõ a
1A Babɩlɔn tẽw nãà, Nabikodonozɔɔr, tɩ zɩɩl'ɩ a Zozɩasɩ bidɛb kãw, Sedesɩasɩ, ʋ ɩ a Zuda tẽw nãà. A na ɩ lɛ a, a Sedesɩasɩ tɩ lɩɛr'ɩ a Yoyakim bidɛb, Konɩahu. 2Ɛcɛ a nãà nɩ a ʋ tõ-tõ-bi-bɛrɛ nɩ a Zuda tẽw nɩbɛ bɛ tɩ bɛr wõ a ƴɛ̀rʋ al za a Sore na tɩ ƴãw a naaŋmɩn-ƴɛ̀r-manɛ Zeremi ƴɛ̀r kʋ̀ bɛ a ɩ.
3A na saa tɩ ɩ a lɛ a, a nãà Sedesɩasɩ tɩ tõ n Selemɩa bidɛb, Yehukal, nɩ Maaseya bidɛb, Sefanɩahu, na ɩ a bàwr-maalɛ a, a Zeremi zie, kɛ́ bɛ tɩ yel ʋ: «Tɩ zɛlɛ fʋ na, puori a Sore tɩ Naaŋmɩn kʋ̀ tɩ!»
4A lɛn daar a, bɛ bɛ tɩ ƴãw a Zeremi a gaso pʋɔ sɛr ɛ. Ʋ tɩ so nɩ ʋ tʋɔra, dɛnɛ a nɩbɛ sɔgɔ. 5Lɛb waar, Faarawɔ̃ zɛbr-nɩbɛ tɩ yi n a Eziptɩ. A Babɩlɔn tẽw dem na tɩ zɛbr'ɩ a Zerizalɛm a, tɩ wõ n a yel ŋa, ìr taw zãá nɩ a tẽ-kpɛ̃ɛ blã. 6Lɛ n'a a Sore tɩ ƴɛ̀r a Zeremi zie à ŋá: 7«À ŋá n'a a Sore, a Ɩsɩrayɛl Naaŋmɩn, yere: “Nyɩ cen tɩ yel kʋ̀ a Zuda tẽw nãà na tõ nyɩ kɛ́ nyɩ wa sowri mɛ̃ a: A Eziptɩ tẽw zɛbr-nɩbɛ na tɩ yi a nyɩ sõwfʋ ƴãw a, bɛ lɩɛb'ɩ pùor kul a bɛ tẽw, a Eziptɩ. 8A Babɩlɔn tẽw dem na lɛb'a wa wa zɛb'ɩ a tẽ-kpɛ̃ɛ ŋa, bɛ na de ʋ na ɛ́ nyɩw ʋ bɛr. 9À ŋá n'a a mãa, a Sore, ɩ̃ yere: Nyɩ ta bɛ̀lɛ nyɩ tʋɔra, tɩɛrɛ nɩ k'aa Babɩlɔn tẽw dem sɩrɩ na kul ɛ. Bɛ kʋ̃ kul ɛ! 10Alɛ saa na ɩ mɛ̃ nyɩ zɛb'a tʋ̃ɔ́ a Babɩlɔn tẽw zɛbr-nɩbɛ za na zɛbr'ɩ nyɩ a, ɛ́ tɩ cɛ nɩbɛ blã nyɩ na baw nɩ a nyɩ pime a, bɛ na ìr'a àr a bɛ pɛnɛ-sɛwr pʋɔ, ɛ́ bɛ na wa n bɛ za wa nyɩw a tẽ-kpɛ̃ɛ ŋa bɛr.”»
Bɛ ƴãw nɩ a Zeremi gaso pʋɔ
11A lɛn daar a Babɩlɔn tẽw zɛbr-nɩbɛ na tɩ taw zãá nɩ a Zerizalɛm blã, a Faarawɔ̃ zɛbr-nɩbɛ zũú a, 12a Zeremi tɩ bɔbr'a k'ʋʋ yi a Zerizalɛm cen a Bɛ̃zamɛ tẽw tẽsɔw pob yele ƴãw, a ʋ yir pʋɔ. 13Ʋ na tɩ ta a Bɛ̃zamɛ dɩ̃dɔr ƴãw a, ʋ tɩ tuor'ɩ a soja-zi-gùrbɛ nɩ-kpɛ̃ɛ na dɩ kɛ́ Yiriya a. A Yiriya tɩ ɩ n Selemɩa bidɛb, ɛ́ ɩ Hananɩa yãw. Ʋ tɩ nyɔw nɩ a naaŋmɩn-ƴɛ̀r-manɛ Zeremi yel ʋ: «Zɔba n'a fʋ zɔrɛ cere a Babɩlɔn tẽw nɩbɛ zie!» 14A Zeremi tɩ sɔw na: «Ziri n'a! Ɩ̃ bɛ zɔrɛ cere Babɩlɔn tẽw nɩbɛ zie ɩ!»
Ɛcɛ a Yiriya bɛ tɩ sàw kʋ̀ ʋ ɛ. Ʋ tɩ nyɔw ʋ na, tɛr ʋ cen nɩ a ʋ nɩ-bɛrɛ zie. 15A nɩ-bɛrɛ tɩ nyɛ̃ nɩ nɩ a Zeremi suur ɛ́ pɔb ʋ. Al pùorí bɛ pàw ʋ a sɛ-sɛbrɛ Yehonatan yir bɛ na tɩ nyɔw lɩɛbɩ ʋ ɩ gaso a pʋɔ. 16Bɛ tɩ ƴãw nɩ a Zeremi a gaso dile kãw pʋɔ.
Ʋ tɩ be n a be tɩ cɛlɩ. 17Al pùorí, a nãà Sedesɩasɩ tɩ tõ na bɛ tɩ tɛr a Zeremi wa n. A ʋ yir pʋɔ a, a nãà tɩ sɔwl'a sowri ʋ à ŋá: «Fʋ tɛr'ɩ Sore ƴɛ̀rʋ na ƴɛ̀r kʋ̀ m bɩɩ?» A Zeremi sɔw: «Ʋ̃ʋ!», ɛ́ tɩ yel ƴãw pʋɔ: «Fʋ na lo n a Babɩlɔn tẽw nãà nuru pʋɔ.» 18Al pùorí, a Zeremi sowri a nãà Sedesɩasɩ: «Bʋ̃ʋ n'ʋ ɩ̃ ɩ sãw a fʋ̃ʋ, a fʋ tõ-tõ-bi-bɛrɛ nɩ a Zerizalɛm tẽw nɩbɛ za, nyɩ ƴãw bɛ ƴãw mɛ̃ a gaso pʋɔ? 19A nyɩ naaŋmɩn-ƴɛ̀r-manbɛ bɛl na tɩ yel k'aa Babɩlɔn tẽw nãà kʋ̃ wa zɛb'ɩ a nyɩɩm nɩ a tẽw ŋa a, bɛ wa?»
20A Zeremi pãa lɛb tɩ yel'a ƴãw pʋɔ: «Ƴɛrɛŋa a, ɩ̃ sore, ɩ̃ nãà a, bɛr wõ mɛ̃. Sàw de a ɩ̃ yãayãa zɛlʋ. Ta ƴãw ɩ̃ lɛb cen a sɛ-sɛbrɛ Yehonatan yir ɛ, alɛ bɛ ɩ lɛ, ɩ̃ na tɩ kpi n a be.»
21Lɛ n'a a nãà Sedesɩasɩ tɩ yel kɛ́ bɛ ƴãw a Zeremi a soja-zi-gùrbɛ davʋra pʋɔ, ɛ́ kʋ̀rɛ ʋ bibie za dipɛ̃-vilovilo been, a dipɛ̃-maalbɛ sɔ́r pʋɔ, ɛ́ gù a dipɛ̃ tɩ baarɩ a tẽ-kpɛ̃ɛ pʋɔ. À ŋá n'a a Zeremi tɩ be a soja-zi-gùrbɛ davʋra pʋɔ.
Currently Selected:
Zeremi 37: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
