Ƴɛ̀r-dɩrbɛ 5
5
A zɛb-tʋ̃ɔ́fʋ yielu a Debora nɩ a Barakɩ na yieli a
1A ʋlɩ bibir nɛ a, a Debora nɩ a Avinowam bidɛb, Barakɩ, tɩ yiel'ɩ a yielu ŋa:
2«A Ɩsɩrayɛl tẽw pʋɔ a,
ŋa za cɔbr'a gù a zɛbr,
a Naaŋmɩn nɩ-bʋʋrɛ
de nɩ bɛ tʋɔra tɩr a zɛbr ƴãw:
nyɩ puore a Sore yãanɩ!
3Nyɩɩm na-mɩnɛ,
nyɩɩm nɩbɛ niw-dierbɛ,
nyɩ ƴãw tobr vla!
Mãa a, ɩ̃ na yiele nɩ a Sore ƴãw,
ɩ̃ na zɛwr'ɩ a Sore, a Ɩsɩrayɛl Naaŋmɩn.
4Sore e, fʋ na tɩ yi a Edɔm tẽw wa a,
fʋ na tɩ yi a Seyiir tan pʋɔ siw a,
a tẽsɔw tɩ dam'a,
a zũzuwe tɩ bɛr'ɩ a kʋ̃ɔnɩ a cir,
sa-zʋba tɩ mĩ na,
5a tan tɩ yʋʋr'ɩ a fʋ niŋé,
a fʋ̃ʋ Sinayi tãw Sore,
a Ɩsɩrayɛl Naaŋmɩn niŋé.
6A Anatɩ bidɛb Samgaar daar,
a Yayɛl daar, a nɩbɛ na mɩ́ zɔm nyɔ̃wmɩ
tɔ̃w tu taa cere a tɩ zawr'ɩ a tẽw bɛr,
a bɛlɩ dem na yʋ̀ɔr a, tɩ tuur'ɩ sɛ-pɩlɩ.
7Nɩ-bɛrɛ bɛ tɩ cãà be ɩ,
nɩ-bɛrɛ bɛ tɩ cãà be a Ɩsɩrayɛl tẽw pʋɔ ɩ,
ɛ́ gù a mãa Debora tɩ ìr,
ɩ̃ tɩ ìr, mɛ̃ mã a, a Ɩsɩrayɛl ƴãw.
8Bɛ tɩ kaarɛ na íre ŋmɩn-paalɛ,
ɛ́ daadaalɛ a zɛbr mɩ́ tɩ n'a.
Ɛcɛ a Ɩsɩrayɛl tẽw pʋɔ a,
zɛbr-kur-pãgala been bɩɩ kafin been,
bɛ tɩ be be nɩbɛ tùr-lɩz'a ayi (40 000) ƴãw ɛ.
9A Ɩsɩrayɛl zɛbr-nɩbɛ nɩ-bɛrɛ nɛbɛ ɩ̃ lãw nɩ,
nɩ a Naaŋmɩn nɩ-bʋʋrɛ bɛl
na sàw de bɛ tʋɔra tɩr a zɛbr ƴãw a.
Nyɩ puore a Sore yãanɩ!
10Nyɩɩm na zɔm bòn-nyamɛ na pɛlɩ a#5:10 Bòn-nyamɛ na pɛlɩ a: Na-mɩnɛ nɩ nɩ-yée nɛbɛ mɩ́ tɩ zɔm a bòn-nyamɛ.,
nyɩɩm na zɩnɛ tẽsɔw pɛn-zʋmzʋm zu a,
nyɩɩm na lo a sɛ́ɛ cere a, nyɩ hiere a ʋ yele!
11A kʋ̃ɔnɩ ziir a, dʋ̃-cɩ̃ɩnbɛ manɛ nɩ a Sore yel-vɩɛlɩ,
a ʋ yel-vɩɛlɩ a Ɩsɩrayɛl nɩ-bɛrɛ ƴãw,
a lɛn daar a Naaŋmɩn nɩ-bʋʋrɛ
na yi a tẽw dɩ̃dɛɛ ƴãw a.
12Zaw ìr, Debora a, zaw ìr!
Zaw ìr, cɛ yielu!
Avinowam bidɛb Barakɩ i,
ìr, tɛr a fʋ zɛbr-nɩ-nyɔwrɩ lɛb wa n!
13A bɛl na cãà vʋʋrɛ a
cen na tɩ páw a nɩ-bɛrɛ,
a Sore nɩ-bʋʋrɛ ɓã n taa a ɩ̃ zie mɛ̃ gãdaar a.
14A bɛlɩ dem na zɛb tʋ̃ɔ́ a Amalesitɩ mɩnɛ a,
Efarayim'a bɛ yi wa.
Bɛ̃zamɛ tu bɛ na kpɛ pʋɔ a bɛ zɛbr-nɩbɛ pʋɔ.
Nɩ-bɛrɛ yi n a Makɩɩr dɔwlʋ pʋɔ,
ɛ́ zɛbr-nɩbɛ nɩ-bɛrɛ yi a Zabulɔ̃ dɔwlʋ pʋɔ.
15A Ɩsakaar nɩ-bɛrɛ wa na wa páw a Debora,
a Ɩsakaar nɩbɛ na tu a Barakɩ a,
wa n fɔ̃wlɛ wa páw ʋ a tɩ̃tal pʋɔ.
Ɛcɛ a Urubɛn dɔwlʋ pʋɔ a,
bɛ ŋmɛ n a nɔkpɛn a ka baarʋ.
16Bʋ̃ʋ n'ʋ so nyɩ àr a dʋn zawr ƴãw,
bɛrɛ wone a dʋ̃-cɩ̃ɩnbɛ na bʋɔlɛ a bɛ dʋn a?
Sɩza n'a, a Urubɛn dɔwlʋ pʋɔ a,
bɛ ŋmɛ n a nɔkpɛn a ka baarʋ.
17A Zurdɛ̃ saa-pɛrɩ́, a Galaadɩ pʋɔ a,
a dɔwlʋ bɛ dam dam ɛ.
A Dan dɔwlʋ nɩbɛ àr'a kɔw a bɛ gbee,
a Asɛɛr dɔwlʋ nɩbɛ mɩ̀ àr'a pɩɛlɩ
a bɛ gbee siwfʋ zie, a kʋ̃ɔ-kpɛ̃ɛ nʋɔr.
18A Zabulɔ̃ nɩbɛ bɛl a,
mɛ̃ a Nɛfɩtali nɩbɛ a,
bɛl sàw na cɛ blã na kpi a zɛbr zie.
19A na-mɩnɛ na ɩ dɔ̃ dem a,
a Kanãa tẽw na-mɩnɛ
ìr'a ŋmãa nɩ a Taanakɩ zɛbr,
a Megido bàrʋ nʋɔr,
ɛcɛ bɛ bɛ páw zɛbr bom za ɩ,
bɛ bɛ páw libir ɛ!
20A ŋmar-bie na be a salom zu a
tɩ pʋɔ nɩ a zɛbr pʋɔ,
a tɩ tuur'ɩ a sɛ́ɛ zɛbr'ɩ a Sɩsera.
21A fʋɔla na zɔrɛ a dɩta-pɛ-yome za a,
a Kison bà-fʋɔla, ʋ gbaal'ɩ a dɔ̃ dem cen nɩ.
Nyɩ ɩ tɩ nyar tɩ za cere nɩ a zɛbr!
22Wie tɩ gar'a wa tɔl
panɛ a tẽsɔw nɩ a nafɩlɛ.
23A Sore malkɩ yere na:
nyɩ ŋmɛ ƴãw a Merozi tẽw,
nyɩ ŋmɛ ƴãw ʋ, nyɩ ŋmɛ ƴãw
a nɩbɛ na kpɩɛr a ʋ pʋɔ a,
bɛ na bɛ wa sõw a Sore a ƴãw,
bɛ bɛ lãwnɩ a ʋ gãdaar zɛb ɛ.
24A Sore, ʋ maalɩ fʋ gãw a pɔwbɛ za,
Kenitɩ nɩr Ebɛɛr pɔw Yayɛl i,
ʋ̃ʋ, a Sore, ʋ maalɩ fʋ gãw a pɔwbɛ za
na kpɩɛr a pɛn-sɛw pʋɔ a.
25A Sɩsera zɛlɩ nɩ kʋ̃ɔ, a Yayɛl kʋ̀ ʋ bʋ̀rʋ,
bʋ̀r-kʋ̃ɔ na ɩ kãá a koli-nyúura vla vla pʋɔ.
26Al pùorí, ʋ tur ɓáw a kpawbir nɩ a gʋba,
ɛ́ a dʋrʋ tɛr a tõ-tõ-bie 'hama.
Ʋ ŋmɛ n a Sɩsera,
ʋ ŋmɛ ʋ nɩ a zu ŋmɛr cʋmcʋm,
ʋ ŋmɛ ʋ nɩ a tacɩɩl puo.
27Ʋ siwr'a lore a ʋ niŋé, ʋ lore na,
ʋ gã nɩ a ʋ gbɛ́ɛ ƴãw a tẽw,
ʋ siwr'a, ʋ lore na, ʋ kpi na.
28A Sɩsera mã vuole nɩ a tokoro vʋɔrɩ́,
a tokoro kur-dali voru pʋɔ n'a
ʋ jɩ́rɛ kone yere nɩ: “Bʋ̃ʋ n'ʋ so
a ʋ zɛbr-torko kɔwrɛ à ŋá?
Bʋ̃ʋ n'ʋ so ʋ kɔwrɛ a waa ƴãw?”
29A ʋ cɛnbɛ na bãw yã a sɔwr'ʋ na,
ʋ mɩ̀ lɛb yere a bɛ sɔwfʋ ƴɛ̀r-bie à ŋá:
30“Bʋnʋ bɛ ka be ɩ, a sojarɩ wobr'ɩ
a bome bɛ na zɛb de a ɓanɛ taa,
bɛ pone a na:
soja ŋa za pɔwsɩrale been bɩɩ ayi,
Sɩsera so pɛn-zɩɩr-mʋɔlɛ na maw maw a,
ʋ̃ʋ, pɛn na maw gb'a ayi a n'ʋ
bɛ vile a zɛb-tʋ̃ɔ́nɛ nyũumɩ́.”
31Sore e, a fʋ dɔ̃ dem za,
bɛ kpi, mɛ̃ a lɛ a Sɩsera na kpi a!
Ɛcɛ a fʋ nɩ-nɔnɩ ɩ mɛ̃ a mʋ̃tɔ̃w
na mɩ́ wa pur nyɩwrɛ ʋ za a!»
Ɛ́ a tẽw tɩ tɛr'ɩ ƴã-ɓaarʋ yome lɩz'a ayi.
La Bible en Dagara © Alliance Biblique du Burkina Faso, 2013.