Zakɩ 1

A Zakɩ puore nɩ a nɩbɛ

1A mãa Zakɩ na ɩ a Naaŋmɩn nɩ a Sore Yeezu Kɩrɩta tõ-tõ-bie a, ɩ̃ puore nɩ a Naaŋmɩn nɩ-bʋʋrɛ na yaarɩ be a tẽ-daa za zu a.

A naaŋmɩn-sàw-deb nɩ a yã-bãwfʋ

2Ɩ̃ yɛbr i, a lɛn daar nyɩ na mɩ́ be a kpɩɛrʋ bʋʋrɛ za pʋɔ a, nyɩ mɩ́ tɩɛrɛ kɛ́ nyɩ tɛr'ɩ zu-nʋ̃ɔ̀ yaga. 3Nyɩ bãwnɩ a na, a nyɩ naaŋmɩn-sàw-deb wa tʋ̃ɔ́ a kpɩɛrʋ a, a kpɩɛrʋ mɩ́ wa n nɩ kanyir. 4Ɛcɛ a nyɩ kanyir ɩb, ʋ mɩ́ sãá vla kɛ̀ nyɩ tʋ̃ɔ́ mɩ́ vɩɛl nyɩ za, ta tɛr faalʋ ɛ, bom za ta cɛ nyɩ ɛ. 5Ɛcɛ a nyɩ kãw bɛ wa tɛr a yã-bãwfʋ a, ʋ zɛlɩ a yã-bãwfʋ a Naaŋmɩn zie, ʋʋ na kʋ̀ ʋ na. Ʋ mɩ́ tɩr'ɩ daadaa, ɛ́ bɛ tɩrɛ yere nɩ a sob ɛ. 6Ɛcɛ, ʋ zɛlɛ nɩ naaŋmɩn-sàw-deb ɛ́ ta bʋ́nɛ ɩ, bʋ̃ʋ n'ʋ vɛ̃, sob nɛ na bʋ́nɛ a, ʋ ŋmɛ̃ na taa nɩ a kʋ̃ɔ-kpɛ̃ɛ kʋ̃ɔ-mie sɛsɛb na mɩ́ damnɛ ɛ́ ɓawr ìre nɩ a.

7A nɩr ŋa tɔ sob ta manɛ k'ʋʋ na páw nɩ bom za a Sore zie ɩ, 8ʋl a tɩɛrʋ na mɩ́ põ, ɛ́ a ʋ yele za pʋɔ ʋ bɛ mɩ́ bãw bʋ̃ʋ n'ʋ ʋ bɔbr a ɩ.

A nã́w nɩ a tɛra yele

9A yɛb ʋl na bɛ tɛr a a, ʋ cɩlɛ a Naaŋmɩn na zɛwr ʋ a ƴãw, 10ɛ́ a yɛb ʋl na tɛr a a, ʋ cɩlɛ a Naaŋmɩn na siwre ʋ a ƴãw. Bʋ̃ʋ n'ʋ vɛ̃, ʋ na tɔl'a mɛ̃ mɔ̃-puuru a. 11A mʋ̃tɔ̃w pur'a, a tʋlʋ dɩ a mʋ̃ɔ a ko, a puuru kpa lo ɛ́ a mʋ̃ɔ vɩɛlʋ baarɩ. À ŋá n'a a tɛra sob yele mɩ̀ na baarɩ a ʋ tõ-toni za pʋɔ.

A kpɩɛrʋ nɩ a bɛlʋ yele

12Zu-nʋ̃ɔ̀ sob'ɩ a nɩr ʋl na mɩ́ dɩ kanyir a kpɩɛrʋ pʋɔ a. Bɛlɛ wa ɩ ʋ kaa baar'a, ʋ na páw nɩ a dɛpaal-kpawʋɔ na ɩ a nyɔ-vʋʋrʋ na be kʋralɛ, a Naaŋmɩn na yel k'ʋʋ na kʋ̀ n a bɛlɩ dem na nɔnɛ ʋ a. 13Bɛlʋ wa ta nɩr a, ʋ ta yere: «Naaŋmɩn n'ʋ bɛlɩ mɛ̃ ɩ.» Bɛlʋ kʋ̃ tʋ̃ɔ́ bɛlɛ Naaŋmɩn yel-faa maalʋ ƴãw ɛ, ɛ́ Naaŋmɩn mɩ̀ bɛ bɛlɛ nɩr k'ʋʋ maalɩ yel-faa ɩ. 14Ŋa za pʋ-tɩɛrʋ bʋ̃-bɔbra tɔr za n'ʋ mɩ́ bɛlɩ ʋ, ʋlɛ n'ʋ mɩ́ darɛ ʋ, ɛ́ ɩ zʋm-pĩi bɛra nyɔw ʋ. 15Al pùorí, pʋ-tɩɛrʋ bʋ̃-bɔbra za na bɛ vɩɛl a mɩ́ tɛr'ɩ pʋɔ dɔw a yel-bier, ɛ́ a yel-bier wa kɛrɩ tɩ ta a ʋ tab zie a, ʋ mɩ́ dɔw nɩ a kũu. 16Ɩ̃ yɛb-nɔnɩ i, nyɩ ta bɛlɛ nyɩ tʋɔra ɩ: 17bʋ̃-kʋ̀ra za na bɛ tɛr tɔ a, ƴãw-taa bom za na vɩɛl bɛ cɛ a, saa-zu n'a a yire siwr. Naaŋmɩn zie n'a a yire, ʋl na ɩ a salom zu bʋ̃-caalɩ Íre a, ʋl na bɛ bãw lɩɛbʋ, ɛ́ bɛ lɩɛbɛ kɛ̀ ɓaarʋ lɩɛbɛ tuur a. 18Ʋ nɔnɛ na dɔw tɩ nɩ a ʋ ƴɛ̀rʋ na ɩ a yel-mɩŋa a, kɛ́ tɩ tʋ̃ɔ́ ɩ niw-dierbɛ a ʋ bʋ̃-íri za pʋɔ.

A Naaŋmɩn ƴɛ̀rʋ bɛr-wob nɩ a tub

19Ɩ̃ yɛb-nɔnɩ i, nyɩ bãw nɩ a yel ŋa: nɩr za n'ʋ a fɛr k'ʋʋ mɩ́ páwr a bɛr-wob ƴãw, ɛ́ ta páwr a ƴɛ̀rʋ ƴãw ɛ, ta páwr a suur nyɛ́b ƴãw ɛ. 20A nɩsaal suur bɛ maalɛ a lɛ na vɩɛl a Naaŋmɩn zie a ɩ. 21A na ɩ à ŋá a, nyɩ ír dɛwr za bɛr a nyɩ zie nɩ a po-tuolu yel-bɛ-sɛwrɩ za. Nyɩ sàw de a ƴɛ̀rʋ nɩ su-nʋ̃ɔ̀ a Naaŋmɩn na ƴãwnɛ a nyɩ pʋɔ a, a ƴɛ̀rʋ ŋa na tʋ̃ɔ́ na faa nyɩ.

22Nyɩ taa wa bɛlɛ nyɩ tʋɔra ɩ a Naaŋmɩn ƴɛ̀rʋ bɛr-wonbɛ tɛwr ɛ, nyɩ mɩ́ sɩrɩ tu a ƴɛ̀rʋ pùor a nyɩ ɩ-ɩrɩ pʋɔ. 23Nɩr wa bɛrɛ wone a ƴɛ̀rʋ ɛ́ bɛ tuur a, ʋ ŋmɛ̃ na taa nɩ nɩr na jɩ́rɛ a ʋ niwn caala pʋɔ a. 24Ʋ na jɩ́r ʋ tʋɔra baarɩ ɛ́ tɔl cen a, daadaalɛ, ʋ lɛb'a yiiri a lɛ ʋ na ŋmɛ̃ a bɛr. 25Ɛcɛ sob nɛ na mɩ́ ƴãw fãw jɛl a Naaŋmɩn wulu na vɩɛl ʋ za ɛ́ mɩ́ ɩ tɩ so tɩ tʋɔra, ɛ́ mɩ́ tu a wulu ŋa pùor vla a, ʋ bɛ mɩ́ bɛr wõ a bɛr-wob tɛwr ɛ́ lɛb yiiri bɛr a pùorí ɛ, ʋ mɩ́ tu n a pùor. A sob ŋa na nyɛ̃ nɩ nʋ̃ɔ̀ a ʋ yele za pʋɔ.

26Nɩr wa yel k'ʋʋ puore na, ɛ́ bɛ mɩ́ maal tɛr a ʋ nʋɔr a, ʋ bɛlɛ nɩ ʋ tʋɔra: a ʋ Naaŋmɩn puoru bɛ tɛr pɛr ɛ. 27A Naaŋmɩn Sãà niŋé a, a puoru na vɩɛl ɛ́ ɩ sɩza a n'ɩ ŋa: ɛ́ fʋ kaarɛ a bi-kpebe nɩ a pɔw-kɔbɛ zie a bɛ kpɩɛrʋ pʋɔ, ɛ́ gùre fʋ tʋɔra a tẽ-daa dɛwr za ƴãw.

Currently Selected:

Zakɩ 1: DBDC

Highlight

Copy

Compare