Ɩzayi 8
8
Zɔ fɔ̃wlɛ a zɛbr na-bome ƴãw, zɔ cen tɩ za!
1A Sore tɩ yel mɛ̃ na: «De dapawli-kpɛ̃ɛ, sɛb a zu nɩ sɛbrʋ na tɛr kanʋ a kɛ́ “Fɔ̃wlɛ-a-zɛbr-na-bome-ƴãw-Zɔ-a-zab-ƴãw”.» 2Ɩ̃ tɩ wul'ɩ a dapawle yel-mɩn dem ayi fʋ na na tʋ̃ɔ́ ƴãw a fʋ tɩɛrʋ a bɛ ƴãw a: a bàwr-maalɛ Uriya nɩ Yeverekɩahu bidɛb, Zekarɩahu. 3Al pùorí, ɩ̃ tɩ páw nɩ a pɔw-naaŋmɩn-ƴɛ̀r-manɛ, a ɩ̃ pɔw. Ʋ tɩ tɛr'ɩ pʋɔ dɔw dɛb. Lɛ n'a a Sore tɩ yel mɛ̃: «Por ʋ “Fɔ̃wlɛ-a-zɛbr-na-bome-ƴãw-Zɔ-a-zab-ƴãw”. 4Bʋ̃ʋ n'ʋ vɛ̃, a bie kʋ̃ bãw “Ɩ̃ sãà” bɩɩ “Ɩ̃ mã” bʋɔlʋ sɛr ɛ, ɛ́ bɛ tuo a Damasɩ tẽw na-bome nɩ a Samaari tẽw zɛbr-na-bome cen nɩ a Asiiri tẽw nãà niŋé.»
A Asiiri tẽw dem waar'a mɛ̃ man kʋ̃ɔ na paalɩ pàw bom za a
5A Sore tɩ cãà na lɛb yel mɛ̃ à ŋá:
6«A Zuda nɩbɛ bɛ bɔbr
a Silowe bɔw-wɛra kʋ̃ɔ
na zɔrɛ bɛ̀lbɛ̀l a ɩ.
Ɛ́ a bɛ tɩɛrʋ bàl a Eresin
nɩ a Eremalyahu bidɛb ƴãw.#8:6 A Silowe bɔw-wɛra pʋɔ n'a a kʋ̃ɔ-nyúura mɩ́ tɩ yi a Gihon bul-nʋɔr ƴãw tu kpɛ a Zerizalɛm pʋɔ. A Eresin tɩ n'ɩ a Siiri tẽw nãà, ɛ́ a Eremalyahu bidɛb, Peka, ɩ a Ɩsɩrayɛl tẽw nãà. Nyɛ̃ 7.1.
7A lɛ n'a so ɩ̃ na ɩ a Efaratɩ man kʋ̃ɔ
na yãwmɛ ɛ́ darɛ taa nɩ fãw a,
a do wa páw bɛ,
—a Asiiri tẽw nãà nɩ a ʋ fãw-kpɛ̃ɛ—.
A Efaratɩ man na paal'ɩ
a ʋ bà-dĩo a ziir za,
paalɩ tɩ yi nɛ́ɛ.
8Ʋ na tɩ tɔ n a Zuda naalʋ-tẽw,
ʋ na paal'a yi nɛ́ɛ, paalɩ pàw ʋ,
do tɩ ƴãw ʋ a kɔkɛɛ.
Ʋ na yɛ̀lɩ na, a ʋ kõkowe tɩ zãá,
ʋ na pàw nɩ a fʋ tẽw yɛ̀lʋ za,
Ɩmanɩɛl i#8:8 Nyɛ̃ 7.14..»
A nɩ-bʋʋr-yoru kʋ̃ tʋ̃ɔ́ ɩ a Naaŋmɩn nɩ-bʋʋrɛ bom ɛ
9Nɩ-bʋʋrɛ ɛ, nyɩ màwr,
ɛ́ a pʋl-vʋ̃ɔ kʋ nyɩ!
Nyɩ cɛlɛ be, tẽ-zãánɩ za a!
Nyɩmɛ saa nɔnɛ
nyɩ cɔbrɩ a zɛbr ƴãw,
a pʋl-vʋ̃ɔ gùre nyɩ na.
Ʋ̃ʋ, nyɩmɛ saa nɔnɛ
nyɩ cɔbrɩ a zɛbr ƴãw,
a pʋl-vʋ̃ɔ gùre nyɩ na!
10Nyɩmɛ nɔ̃w nyɩ tɩɛrɩ yele bin,
a na wɛl'a yaarɩ.
Nyɩ ŋmɛ a nɔkpɛn bin
a lɛ nyɩ na na ɩ a ƴãw, a kʋ̃ nyɔw ɛ.
Bʋ̃ʋ n'ʋ vɛ̃, a Naaŋmɩn be n tɩ zie#8:10 Nyɛ̃ 7.14 nɩ 8.8. .
A Sore yõ n'ʋ a sɛw kɛ́ bɛ zɔrɛ
11A Sore nyɔw mɛ̃ na ɛ́ yel mɛ̃ k'ɩ̃ɩ taa cɔwrɛ a nɩbɛ bɛ ŋa ɩb ɛ. À ŋá n'a ʋ yel mɛ̃:
12«Nyɩ kʋ̃ bʋɔlɛ “bʋ-taa”
ʋlɩ bom nɛ za a nɩbɛ bɛ ŋa
na bʋɔlɛ “bʋ-taa” a ɩ.
Nyɩ kʋ̃ zɔrɛ a ʋlɩ bom nɛ bɛ na zɔrɛ a ɩ,
nyɩ taa zɔrɛ ʋ ɛ.»
13A Sore, a kpɛnʋ-za-sob'ʋ
nyɩ na bãw k'ʋʋ ɩ n sõw.
Ʋlɛ n'ʋ a fɛr kɛ́ nyɩ zɔrɛ,
ʋlɛ n'ʋ a sɛw k'ʋʋ ɩrɛ nyɩ dɛ̃bɩ̃ɛ.
14Ʋ na ɩ n zi-sõw#8:14 Ʋ na ɩ n zi-sõw, a pɛr lɛ k'ʋʋ na be n a ʋ nɩbɛ sɔgɔ, ɛ́ a beba ŋa waar'ɩ ƴɛ̀rʋ-dɩb, kɛ̀ loba lore.,
kʋsɩɛr ƴãw bɛ na ŋmɩɛr gbɛ́ɛ a,
pìir kʋsɩɛr na ɩrɛ bɛ lore a,
a Ɩsɩrayɛl yie a za ayi ƴãw.
Ʋ na ɩ n mɩ̃ɛ nɩ bɛra
a Zerizalɛm tẽw dem ƴãw.
15Ʋ na mɩ́ ɩ na nɩ-yaga
kàwr tɩ lo kar.
A bɛra na mɩ́ nyɔw bɛ na
bɛ kʋ̃ tʋ̃ɔ́ faa ɩ.
A naaŋmɩn-ƴɛ̀r-manɛ ɩ n gbili ɛ́ cɛlɛ
16Ɩ̃ maal'a bine a ɩ̃ ƴɛ̀rʋ sɛbrʋ, ɩ̃ kpàrɛ nɩ a wulu a na sɛw k'ɩ̃ɩ lʋɔrɩ tɩr a bɛrɛ: a ɩ̃ po-tuurbɛ tɛwr nɛbɛ ɩ̃ dier a kʋ̀rɛ. 17Ɩ̃ gùre nɩ a Sore. Ʋ bɛ ŋmɛlɛ kaar a Zakɔb yir dem a ƴɛrɛŋa ɩ, ɛcɛ ʋl ƴãw n'a ɩ̃ ƴãw a ɩ̃ tɩɛrʋ. 18A mãa mɩŋa, nɩ a bibiir a Sore na kʋ̀ m a, tɩ ɩ n bãwfʋ, nɩ a lɛ a nɩdaar yele na na ɩ a bãwfʋ a Ɩsɩrayɛl tẽw pʋɔ, a Sore, a kpɛnʋ-za-sob, na kpɩɛr a Sɩyɔ̃ tãw zu a yúor ƴãw.
19Bɛ mɩnɛ yere na: «Nyɩ sowri a kpɩmɛ na mɩ́ waalɛ ɛ́ 'hũ'hune yere a nɩdaar yele a. A tɛr'ɩ sɔ́r kɛ́ nɩ-bʋʋrɛ kãw mɩ́ sowre a ʋ ŋmɩmɛ ɛ́ kabrɛ a kũuni a nɩ-vʋʋrɩ ƴãw.» Bɛlɛ wa yere à à ŋá a nyɩ zie a, 20nyɩ na sɔw na: «A wulu nɩ a Sore ƴɛ̀rʋ lɛb-deb'a fɛrɛ.» Nɩr bɛ wa ƴɛ̀r à à ŋá a, ʋ kʋ̃ nyɛ̃ a zi-wɛl-paala ɩ.
Lige na vʋ̃ɔnɛ pʋ̀lá a
21A nɩbɛ na tɔlɛ nɩ a tẽw pʋɔ,
bàl bɛ za ɛ́ kɔ̃ kʋrɛ.
A kɔ̃ na ɩ na bɛ nyɛ̃ suur,
wa tɩ ŋmɩɛr ƴãwn
a bɛ nãà nɩ a bɛ Naaŋmɩn.
Bɛ na mɩ́ lɩɛb'a kaa a salom,
22al pùorí bɛ jɩ́r a tẽw
nyɛ̃ a ɩ kpɩɛrʋ tɛwr,
lige, lige na vʋ̃ɔnɛ pʋ̀lá a,
tɩ̃ɩsɔw-varkpara.
23Sob nɛ na be a tɩ̃ɩsɔw ŋa pʋɔ a
kʋ̃ tʋ̃ɔ́ yi zaa a ʋ pʋɔ ɩ.
Bie dɔw nɩ a tɩ ƴãw
A koro za a,
a Sore tɩ ɩ na a Zabulɔ̃
nɩ a Nɛfɩtali ten nyɛ̃ vĩ#8:23 Zabulɔ̃ nɩ Nɛfɩtali: A Asiiri tẽw dem tɩ zɛb'a tʋ̃ɔ́ a ten á ŋá a Yeezu Kɩrɩta na bɛ tɩ wa sɛr a yome 734 nɩ 732 vuo pʋɔ, de nɩ a ziir na be a Zurdɛ̃ man saa-pɛrɩ́ a, nɩ a Galile tẽw..
Ɛcɛ a nɩdaar a,
ʋ na ɩ na a sɔ́r na lanɛ a kʋ̃ɔ-kpɛ̃ɛ a,
a tẽw na be a Zurdɛ̃ man saa-pɛrɩ́ a,
nɩ a Galile na ɩ a sãanbɛ vuo a,
a tɛr yúor.
Currently Selected:
Ɩzayi 8: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
