Ɩzayi 38
38
A Ezekɩasɩ bàalʋ nɩ a ʋ sanʋ
(Nyɛ̃ 2Na 20:1-11)
1A ʋlɩ daar nɛ, a nãà Ezekɩasɩ tɩ lo n a ʋ kũu-kʋra bàalʋ. A naaŋmɩn-ƴɛ̀r-manɛ Ɩzayi na ɩ Amɔtɩsɩ bidɛb a tɩ wa na wa nyɛ̃ ʋ yel ʋ: «À ŋá n'a a Sore yere: Cɔbrɩ a fʋ yele ƴãw. Bʋ̃ʋ n'ʋ vɛ̃, fʋ na kpi na, fʋ bɛ lɛbr ìre a fʋ bàalʋ ŋa pʋɔ ɛ.» 2Lɛ n'a a Ezekɩasɩ tɩ lɩɛbɩ a ʋ niwn bɛr a dacin lowr, ɛ́ puori a Sore à ŋá: 3«'Woi! Sore e, ɩ̃ zɛlɛ fʋ na, bãwnɩ a a ɩ̃ ɩb za a fʋ zie na tɩ tori a, ɩ̃ tɩ ɩ n a lɛ na vɩɛl a fʋ zie a kʋralɛ!» A Ezekɩasɩ tɩ kõ na cir mʋta-kʋ̃ɔ yaga.
4Lɛ n'a a Sore tɩ ƴɛ̀r a Ɩzayi zie yel ʋ: 5«Cen tɩ yel a Ezekɩasɩ: “À ŋá n'a a Sore, a fʋ sãàkʋm-kʋra Daviir Naaŋmɩn, yere: Ɩ̃ wõ n a fʋ puoru ɛ́ nyɛ̃ a fʋ mʋta-kʋ̃ɔ. Ɩ̃ na ɩ na a fʋ nyɔ-vʋʋrʋ wõwme yome pie nɩ anũu dɔwlɩ! 6Ɩ̃ na faa nɩ fʋ̃ʋ nɩ a Zerizalɛm a Asiiri tẽw nãà nuru pʋɔ, ɩ̃ɩ na gù n a tẽ-kpɛ̃ɛ ŋa.”»
21Al pùorí a Ɩzayi yel#38:21-22 Bɛ ƴãw nɩ a kan-nɛ́ɛ ayi á ŋá a ka, a zie ŋa na n'a a be a na-mɩnɛ sɛbr ayi sob pʋɔ bɛ na manɛ a ʋlɩ yel-been nɛ a. Nyɛ̃ 2Na 20.: «Bɛ wa n kãkamɛ bɛ na ƴɛ́r bu a, wa pàw a wʋlʋ zie, a nãà tʋ̃ɔ́ sanɩ!»
22Lɛ n'a a Ezekɩasɩ tɩ sowri: «Bãwfʋ buor'ʋ na ɩ ɩ̃ bãw k'ɩ̃ɩ na mɩ́ tʋ̃ɔ́ na lɛb cen a Sore ŋmɩn-yir-kpɛ̃ɛ́?» 7A Ɩzayi yel ʋ: «A Sore na kʋ̀ b'ɩ bãwfʋ, k'ʋʋ ɩ fʋ bãwnɩ a k'ʋʋ na ɩ n a lɛ ʋ na yel a, ʋlɛ n'ɩ ŋa: 8a ɓaarʋ siw nɩ a Akaazɩ tanɛ-dɛ́r na tɩ be a mʋ̃tɔ̃w pʋɔ a zu. A Sore na ɩ na ʋ lɛb tɩ̃wnɩ do dɛr-mimie pie.» Lɛ n'a a mʋ̃tɔ̃w tɩ lɛb wa a dɛr-mimie pie al a ɓaarʋ na tɩ pàw a zu.
A Ezekɩasɩ puoru a ʋ sanʋ pùorí
9Yielu a Zuda tẽw nãà, Ezekɩasɩ, na maalɩ a ʋ bàalʋ nɩ a ʋ sanʋ pùorí a.
10A mãa a, ɩ̃ tɩ yere na:
a ɩ̃ nyɔ-vʋʋrʋ põ-zɛ̃-taa tɛwr'ʋ ɩ̃ vʋʋrɩ,
ɛ́ a fɛr k'ɩ̃ɩ kul.
A kpɩmɛ-tẽw n'a a fɛr k'ɩ̃ɩ be
a yome na cɛ m a ƴãw.
11Ɩ̃ tɩ yere na mɩ̀:
ɩ̃ kʋ̃ lɛb nyɛ̃ a Sore a nɩ-vʋʋrɩ tẽw zu ɛ,
nɩ nɩsaal kãw za a tẽ-daa nɩbɛ pʋɔ ɛ.
12Bɛ taw na faa a ɩ̃ nyɔ-vʋʋrʋ
cen nɩ zãá nɩ mɛ̃,
mɛ̃ dʋ̃-cɩ̃ɩnɛ pɛn-sɛw a.
A ɩ̃ nyɔ-vʋʋrʋ vili na ta a baarʋ zie,
mɛ̃ pɛn-nũu a pɛn-wobre
na ŋma a fomie bɛr baarɩ ɛ́ vile a.
— Sore e, a zaanʋɔra kʋ̃ ta sɛr ɛ,
ɛ́ a ɩ̃ yele baarɩ a fʋ zie,
13ɛ́ ka nɩ a biɓaara a,
a kũu na de m'a.—
A Sore ŋmɛr'ɩ a ɩ̃ kɔbɛ za mɛ̃ gbẽw a.
— Sore e, a zaanʋɔra kʋ̃ ta sɛr ɛ,
ɛ́ a ɩ̃ yele baarɩ a fʋ zie.—
14A ɩ̃ kon ŋmɛ̃ na taa nɩ bɛlaarɛkule kon,
ɩ̃ kone na mɛ̃ ŋmam na kone a.
A ɩ̃ mimie bàl a nɩ a salom úorú.
— Sore e, ɩ̃ bɛ cãà laar ɛ,
ɩ ɩb kãw a ɩ̃ ƴãw.—
15Ɛcɛ bʋ̃ʋ n'ʋ ɩ̃ na yel ʋ ƴɛ̀r sɔw mɛ̃,
ʋlɛ na n'ʋ ɩrɛ a?
A gʋ̃ɔ zawrɩ mɛ̃ na,
a pʋ-sãwna na tɛr mɛ̃ yaga za a ƴãw.
16Sore e, fʋ tɩ bãw nɩ
a ʋlɩ bom nɛ na ɩrɛ mɛ̃ a,
ɛ́ ɩ ɩ̃ lɛb vʋʋrɛ.
Fʋ lɛb'a kʋ̀ m fãw,
fʋ bɛr mɛ̃ na ɩ̃ vʋʋrɛ.
17A ɩ̃ pʋ-sãwna yaga lɩɛb'ɩ nʋ̃ɔ̀.
Bʋ̃ʋ n'ʋ vɛ̃, fʋ nɔ̃w mɛ̃ na
bɛ sàw ɩ̃ kpi ɛ,
fʋ lɔb'ɩ a ɩ̃ yel-bebe za
bɛr a fʋ zikurí a zãá.
18A kpɩmɛ-tẽw a,
nɩr za bɛ íre a fʋ yúor ɛ,
a kũuni bɛ nɛbɛ na danɛ fʋ ɛ.
A bɛlɩ dem na siwr a bɔw-zɩɛ pʋɔ a
bɛ cãà tɩɛrɛ a fʋ pùor-bɛ-lɛbrʋ ɛ.
19A nɩ-vʋʋrɩ tɛwr nɛbɛ
na tʋ̃ɔ́ íre a fʋ yúor mɛ̃ a mãa a dɩ̃a a.
A sãà mɩnɛ na ɩ na
a bɛ bibiir bãw a fʋ pùor-bɛ-lɛbrʋ.
20Sore e, fʋ faa mɛ̃ na.
Tɩ na ŋmɛ n a tɩ bʋ̃-ŋmɩɛrɩ
a tɩ nyɔ-vʋʋrʋ bibi-vɩɛrɩ za,
a fʋ yir pʋɔ, Sore e.
Currently Selected:
Ɩzayi 38: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
