Ebre 8
8
A Yeezu n'ɩ a tɩ bàwr-maal-kara
1A ƴɛ̀rʋ tɩ na ƴɛ̀rɛ a ƴɛ̀r-zu-kpɛ̃ɛ sɩrɩ n'ɩ à ŋà: a bàwr-maal-kara ŋa tɔ n'ʋ tɩ tɛr, ʋl na zɩ̃ a Naaŋmɩn na ɩ kpɛ̃ɛ kpɛ̃ɛ za a naalʋ-dà-kɔw dʋrʋ lowr a saa-zu a. 2Ʋ tone nɩ a ʋ tome a zi-sõw pʋɔ, a pɛn-sɛw-sɩza pʋɔ a Sore na maalɩ, ɛ́ a bɛ ɩ nɩsaal'ʋ maalɩ a.
3Bàwr-maal-kara za a, de-kʋ̀b bome tɩrʋ nɩ bàwr maalʋ ƴãw n'a bɛ mɩ́ ka nũu ƴãw ʋ: lɛ n'a a fɛr k'aa tɩ bàwr-maal-kara ŋa mɩ̀ mɩ́ tɛr bom na de tɩr. 4A Kɩrɩta tɩ be a tẽw zu ka a, ʋ kʋ̃ʋ ɩ bàwr-maalɛ mɩ̀ ɛ, nɩbɛ na faa be be dier a de-kʋ̀b bome tɩrɛ mɛ̃ a lɛ a Naaŋmɩn wulu na ƴãw a. 5Ɛcɛ a bɛ bàwr-maal-ton ɩ n a saa-zu yele ŋmɛ̃-taalʋ, a saa-zu yele dasule, mɛ̃ a lɛ a Moyiir na tɩ bɔbr a pɛn-sɛw maalʋ a Naaŋmɩn yel kʋ̀ ʋ a. Ʋ tɩ yel ʋ na: «Nyɛ̃, fʋ na maal'ɩ a yele za a ŋmɛ̃ taa nɩ a al ɩ̃ na wul fʋ a tãw zu a#8:5 Nyɛ̃ Ety 25.40..» 6Ɛcɛ ƴɛrɛŋa a, bàwr-maal-ton na ɩ kpɛ̃ɛ zuo a n'ʋ bɛ kʋ̀ a Yeezu, bʋ̃ʋ n'ʋ vɛ̃, ʋ ɩ n wõ-taa na vɩɛl zuo a lɔ̃lʋɔrɛ, wõ-taa na maalɩ tu n nɛ́ɛ bɛ na ƴãw a vɩɛl zuo a dãwdãw dem a.
7A Wõ-ta-dãw-niwn sob#8:7 A Sinayi tãw zu wõ-taa n'ʋ. Nyɛ̃ Ety 24.3-8. tɩ sɩrɩ vɩɛl bɛ cɛ a, bɛ kʋ̃ʋ lɛb bɔbr kɛ́ bɛ lɩɛr'ʋ nɩ wõ-taa ayi sob ɛ. 8Ɛcɛ a ʋ nɩbɛ sãwna n'a a Naaŋmɩn tɩ yere à à ŋá:
«Bibie waar'a, a Sore n'ʋ yere,
ɩ̃ na maal'ɩ a Ɩsɩrayɛl nɩbɛ
nɩ a Zuda nɩbɛ Wõ-ta-paala.
9Ʋ kʋ̃ ɩ mɛ̃ a ʋl ɩ̃ na tɩ maal'ɩ
a bɛ sãàkʋm-kore a ʋlɩ bibir
ɩ̃ na tɩ nyɔw bɛ nũú
tɛr yi n a Eziptɩ tẽw pʋɔ a ɩ.
Bɛ bɛ tɩ tɛr a ɩ̃ wõ-taa ŋa ɩ,
lɛ so ɩ̃ mɩ̀ tɩɛ bɛ bɛr, a Sore n'ʋ yel.
10A Sore yere na,
a Wõ-taa n'ɩ ŋa ɩ̃ na na maal'ɩ
a Ɩsɩrayɛl nɩbɛ,
a bibie al pùorí a:
Ɩ̃ na ƴãw nɩ a ɩ̃ Wulu a bɛ tɩɛrʋ pʋɔ,
ɩ̃ na sɛb ʋ na ƴãw a bɛ socie pʋɔ.
Ɩ̃ na ɩ n a bɛ Naaŋmɩn,
ɛ́ bɛ ɩ a ɩ̃ nɩbɛ.
11Kãw kʋ̃ mɩ́ lɛb wule
a ʋ tẽ-bi-tɔ bɩɩ a ʋ yɛb,
yere kʋ̀rɛ ʋ: “Bãw a Sore ɩ”.
Bʋ̃ʋ n'ʋ vɛ̃, bɛ za na bãw mɛ̃ na,
a bile za zie tɩ ta n a kpɛ̃ɛ za,
12ɩ̃ na na dɩ a bɛ sãwna suur kʋ̀ bɛ,
ɛ́ mɩ̀ bɛ cãà tɛr a bɛ yel-bebe tɩɛrʋ a ƴãw.»#8:12 A kan-nɛ́ɛ 8 tɩ tɔ a 12 ƴãw a, nyɛ̃ Zer 31.31-34.
13A Naaŋmɩn na ƴɛ̀rɛ Wõ-ta-paala ƴɛ̀rʋ a, ʋ ɩ na a wõ-ta-dãw-niwn sob ʋ ɩ bʋ̃-kʋra, ɛcɛ bom na lɩɛbɩ bʋ̃-kʋra ɛ́ kore a, ʋ ta n baarʋ.
Currently Selected:
Ebre 8: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
