Ezekɩɛl 8
8
A tɩbɛ maalʋ a Ŋmɩn-yir-kpɛ̃ɛ pʋɔ
1A nɩbɛ bɛ na tɩ diw cen nɩ baar'a yome ayʋɔb sob a, a cuwr ayʋɔb sob bibie anũu sob daar a, ɩ̃ tɩ zɩ̃ n a ɩ̃ yir, ɛ́ a Zuda tẽw nɩ-kore tɩ zɩ̃ a ɩ̃ niŋé#8:1 A yome ayʋɔb sob: A pɛr lɛ k'aa Yeezu Kɩrɩta na bɛ tɩ wa sɛr a yome 592 tɩ ta n a yome 591, nyɛ̃ 2.1 nɩ a manʋ.- A Zuda tẽw nɩ-kore: bɛ ɩ n a nɩ-kore bɛl na tɩ pʋɔ a nɩbɛ na tɩ yi a Zuda naalʋ-tẽw ɛ́ bɛ tɩ diw cen nɩ a. A nɩr niŋé zɩma tɩ ɩ n tub kɛ́ bɛ tʋ̃ɔ́ zanɩ nɩ fʋ yã, nyɛ̃ 14.1 nɩ 20.1.. Be n'a a Sore Naaŋmɩn fãw tɩ siw a ɩ̃ zu.
2Ɩ̃ tɩ nyɛ̃ nɩ bom kãw na tɩ ŋmɛ̃ mɛ̃ nɩsaal a. Bom kãw na tɩ ɩ mɛ̃ a ʋ sɩɛ n'ʋ a pile a, a ʋ ƴã-gan tɩ ɩ na mɛ̃ vũu a. A zu-sɔw a, cãà kãw tɩ n'ʋ, nyɩwrɛ mɛ̃ salm-zɩɛ bɛ na zuw a. 3Ʋ tɩ tur'ɩ bom kãw na ɩ mɛ̃ nũu a, ɛ́ nyɔw mɛ̃ a zukɔbɛ ƴãw. Lɛ n'a a yel-nyɛra ŋa na yi a Naaŋmɩn zie a pʋɔ, a Vʋʋrʋ tɩ zɛw mɛ̃ do n a salom nɩ a tẽsɔw cará, ɛ́ cen nɩ mɛ̃ a Zerizalɛm. Ɩ̃ tɩ be n a tẽ-kpɛ̃ɛ saa-pɛrɩ́-gʋba-lowr dɩ̃dɔr sɔwlɩsɔw, a be bɛ na bin tɩɩb kãw na ɩ zʋm bom a Naaŋmɩn zie a#8:3 Kapaw a tɩɩb ŋa na ɩ n Tamuuzʋ na ɩ Mezopotami tẽw ŋmɩn kãw a.. 4Ɛcɛ a be a, a Ɩsɩrayɛl Naaŋmɩn yúor-vɩɛlʋ-danʋ tɩ wul'ɩ ʋ tʋɔra ɩ̃ nyɛ̃, mɛ̃ a lɛ ʋ na tɩ dãw wul ʋ tʋɔra ɩ̃ nyɛ̃ a bà-fʋɔla pʋɔ a#8:4 Nyɛ̃ 3.22-23.. 5A Naaŋmɩn tɩ yel mɛ̃ na: «A fʋ̃ʋ nɩsaal bie, jɩ́r a saa-pɛrɩ́-gʋba-lowr sɔ́r.» Ɩ̃ tɩ jɩ́r'ɩ a be lowr. A bàwr-maal-kuur dɩ̃dɔr saa-pɛrɩ́-gʋba-lowr a, a tɩɩb na ɩ zʋm bom a Naaŋmɩn zie a tɩ be n a kpɛb zie. 6Ʋ tɩ yel'a ƴãw pʋɔ: «A fʋ̃ʋ nɩsaal bie, fʋ nyɛ̃ nɩ a lɛ bɛ na ɩrɛ a a? A ka a, a Ɩsɩrayɛl nɩbɛ ɩrɛ nɩ ɩb na bɛ maal'ɩ wob a, kɛ́ bɛ tʋ̃ɔ́ ɩ k'ɩ̃ taw zãá nɩ a ɩ̃ zi-sõw. Fʋ na cãà na nyɛ̃ yele a mɩnɛ mɩ̀ na bɛ maal'ɩ wob a.»
7Lɛ n'a ʋ tɩ tɛr mɛ̃ cen nɩ a Ŋmɩn-yir-kpɛ̃ɛ davʋra dɩ̃dɔrɩ́. Ɩ̃ tɩ nyɛ̃ nɩ vʋɔr ʋ be a dacin pʋɔ. 8Ʋ tɩ yel mɛ̃ na: «A fʋ̃ʋ nɩsaal bie, puo a dacin.» Ɩ̃ puo a dacin, ɩ tɔlʋ zie ʋ be be. 9Ʋ tɩ yel mɛ̃ na: «Kpɛ ɛ́ jɩ́r nyɛ̃ a ɩb na bɛ maal'ɩ wob ɛ́ ɩrɛ kɔkɔrʋ a nɩbɛ bɛ ŋa na ɩrɛ a ka a.» 10Ɩ̃ tɩ kpɛ na nyɛ̃ à ŋá: Wɩɩr nɩ dʋn na ɩrɛ kɔkɔrʋ a tɩ wi na pàw a dacine na viiri koli mɛ̃ a. A Ɩsɩrayɛl ŋmɩn-bɛlɛbɛlɛ za tɩ wi na ƴãw a dacine zu. 11A Ɩsɩrayɛl nɩbɛ nɩ-kore lɩz'a ata nɩ pie tɩ àr'ɩ saaƴẽwn a ŋmɩn-bɛlɛbɛlɛ niŋé. A bɛ pʋɔ a, Safan bidɛb, Yaazaniyahu, tɩ be n be. Ŋa za tɩ tɛr'ɩ tɩ-suur-zɔ̃-na-nyùur-vla-vla-a nyɩwfʋ-kole a nũú, ɛ́ a tɩ-suur-zɔ̃-na-nyùur-vla-vla-a zʋ̀ʋ́r tɩ dúor a salom zu. 12A Naaŋmɩn tɩ sowri mɛ̃ na: «A fʋ̃ʋ nɩsaal bie, fʋ nyɛ̃ nɩ a lɛ a Ɩsɩrayɛl nɩbɛ nɩ-kore na sɔwlɛ ɩrɛ, ŋa za a ʋ beba zie a ʋ ŋmɩn-bɛlɛbɛlɛ niŋé a? Bɛ yere na: “A Sore kʋ̃ tʋ̃ɔ́ nyɛ̃ tɩ ɛ, ʋ zawr'ɩ a tẽw bɛr.”» 13A Naaŋmɩn tɩ yel'a ƴãw pʋɔ: «Fʋ na nyɛ̃ na kɛ́ bɛ cãà na ɩrɛ ɩb a mɩnɛ mɩ̀ na bɛ maal'ɩ wob a.»
14Ʋ tɩ tɛr mɛ̃ na cen nɩ a Ŋmɩn-yir-kpɛ̃ɛ saa-pɛrɩ́-gʋba-lowr dɩ̃dɔr lowr. Pɔwbɛ tɩ zɩ̃ n a be ɛ́ kone a Tamuuzʋ kũu#8:14 Tamuuzʋ: Mezopotami tẽw ŋmɩn kãw n'ʋ. Bɛ mɩ́ tɩ maalɛ nɩ a ŋmɩn ŋa kuor a yome za. Nyɛ̃ 8.3.. 15Ʋ tɩ sowri mɛ̃ na: «A fʋ̃ʋ nɩsaal bie, fʋ nyɛ̃ nɩ vla a? Fʋ na nyɛ̃ nɩ yele na bɛ maal'ɩ wob a, a zuo à á ŋá.»
16Ʋ tɩ tɛr mɛ̃ na cen nɩ a Ŋmɩn-yir-kpɛ̃ɛ sɔwlɩsɔw davʋra lowr. A zi-sõw kpɛb zie a, a davʋra nɩ a bàwr-maal-kuur cará a, dɛbr tɩ be n be ta mɛ̃ dɛbr lɩzɛr'ɩ anũu a. Bɛ tɩ ŋmɛlɩ nɩ kpaar cɔw a zi-sõw, lɩɛbɩ a niŋe cɔw a saa-pɛrɩ́, ɛ́ tɩ gbĩ dume gũu tɩ tɔ tẽw a mʋ̃tɔ̃w niŋé. 17A Naaŋmɩn tɩ sowri mɛ̃ na: «A fʋ̃ʋ nɩsaal bie, fʋ nyɛ̃ a na a? A Zuda nɩbɛ bɛ ŋa bɛ ɩrɛ a ɩb na bɛ maal'ɩ wob a tɛwr a ka ɩ. Bɛ paal'ɩ a tẽw nɩ po-to-fãw-ɩb mɩ̀, ɛ́ bɔbr tuotuo kɛ́ bɛ ɩ a ɩ̃ suur ìr. Bɛ wule nɩ a bɛ fãw nɩ suur. 18A mãa mɩ̀ a, ɩ̃ mɩ̀ na ɩrɛ na nɩ su-tʋlʋ kpãkpã. Ɩ̃ kʋ̃ tɛr'ɩ bɛ mimi-baalʋ ɛ, ɩ̃ kʋ̃ zɔ nɩbaalʋ ɛ. Bɛlɛ saa cɩɩrɛ bʋɔlɛ mɛ̃ a, ɩ̃ kʋ̃ bɛr wõ bɛ ɩ.»
Currently Selected:
Ezekɩɛl 8: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
