Ezekɩɛl 46
46
Tub a mɩnɛ na sʋ̃ɔmɩ càarɩ a nãà a
1À ŋá n'a a Sore Naaŋmɩn yere: «A sɔwlɩsɔw davʋra dɩ̃dɔr na be a saa-pɛrɩ́ a na mɩ́ pàw na gã a bibie ayʋɔb al na tone a. Ɛcɛ, ʋ na mɩ́ yuo nɩ a pɩ̃ɛnʋ-bibir nɩ a cuw-paala cuw daar. 2A nãà na mɩ́ yi n a yẽw davʋrá wa tɔl a dĩo na pɩɛlɩ a zawle a pʋɔ. Ʋ na mɩ́ àr'a pɩɛlɩ a dɩ̃dɔr dàa ɛ́ a bàwr-maalbɛ maalɛ a ʋ nyɩw-a-za-bagɛ nɩ a ʋ ƴã-ɓaarʋ bagɛ. Ʋ na mɩ́ gũu na tɩ tɔ tẽw a dɩ̃dɔr mimirí ɛ́ lɛb yi. A dɩ̃dɔr bɛ tɛr sɔ́r na lɛb pàw ɛ, ɛ́ tɩ ta a zaanʋɔra. 3Bʋ̃ʋ n'ʋ vɛ̃, a pɩ̃ɛnʋ-bibir nɩ a cuw-paala bibir a, a nɩbɛ na mɩ́ wa n a dɩ̃dɔr ŋa ƴãw wa puori a mãa Sore.
4A pɩ̃ɛnʋ-bibir a, a nãà na mɩ́ nyɔw nɩ péli ayʋɔb nɩ pʋ́ra been a ƴã-gan zie kãw za na bɛ sãw a maal'ɩ nyɩw-a-za-bàwr kʋ̀ a mãa Sore. 5Ʋ mɩ̀ na mɩ́ tɩr'ɩ ble de-kʋ̀b kilo lɩzɛr'ɩ pie pʋ́ra za ƴãw, ɛ́ a péli ƴãw a, ʋ na mɩ́ tɩr'ɩ ble lɛ za ʋ na bɔbr a. Ble kilo lɩzɛr'ɩ pie ƴãw a, ʋ na mɩ́ ƴãw nɩ kãá litɩr ayʋɔb dɔwlɩ. 6A cuw-paala bibir a, ʋ na mɩ́ ír'ɩ nadeli-been, péli ayʋɔb nɩ pʋ́ra been a ƴã-gan zie kãw za na bɛ sãw a maal'ɩ bàwr. 7Nadɛr za nɩ pʋ́ra za ƴãw a, ʋ na mɩ́ dɔwlɩ nɩ ble de-kʋ̀b kilo lɩzɛr'ɩ pie, ɛ́ a péli ƴãw a, ʋ na mɩ́ tɩr'ɩ ble lɛ za ʋ na bɔbr a. Ble kilo lɩzɛr'ɩ pie ƴãw a, ʋ na mɩ́ ƴãw nɩ kãá litɩr ayʋɔb dɔwlɩ. 8A nãà wa kpɩɛr a, ʋ na mɩ́ tu n a dɩ̃dɔrɩ́ dĩo ƴãw kpɛ, ɛ́ lɛb tu a zi-been nɛ yi. 9A lɛn daar a tẽw nɩbɛ wa waar kɛ́ bɛ wa puori a mãa Sore, a cuw-bɛrɛ daar a, a bɛl na tu a saa-pɛrɩ́-gʋba-lowr dɩ̃dɔrɩ́ kpɛ a na tu n a saa-pɛrɩ́-dʋrʋ-lowr dɩ̃dɔrɩ́ yi. A bɛl na tu a saa-pɛrɩ́-dʋrʋ-lowr dɩ̃dɔrɩ́ kpɛ a na tu n a saa-pɛrɩ́-gʋba-lowr dɩ̃dɔrɩ́ yi. Nɩr za bɛ yire a dɩ̃dɔr ʋl ƴãw ʋ na tu kpɛ a ɩ, dɩ̃dɔr-yũo ƴãw n'a ʋ na mɩ́ tu yi. 10A nãà na mɩ́ lãw na kpɛ n a nɩbɛ ɛ́ lɛb lãw yi n bɛ.»
Tub na càarɩ a bàwr pɛ-bʋʋrɛ bʋʋrɛ a
11«A cuwr nɩ a yel-bɛrɛ maalʋ daar a, a de-kʋ̀b na mɩ́ ɩ n ble kilo lɩzɛr'ɩ pie nadɛr za nɩ pʋ́ra za ƴãw. A péli ƴãw a, a nãà na mɩ́ tɩr'ɩ ble lɛ za ʋ na bɔbr a. Ble kilo lɩzɛr'ɩ pie ƴãw a, a nãà na mɩ́ ƴãw nɩ kãá litɩr ayʋɔb dɔwlɩ.
12A nãà wa nɔ̃w yã kʋ̀rɛ de-kʋ̀b bom a Sore a, nyɩw-a-za-bàwr'ʋ bɩɩ ƴã-ɓaarʋ bàwr'ʋ a, a fɛr'a kɛ́ bɛ yuo ʋ a saa-pɛrɩ́ dɩ̃dɔr. Ʋ na maal'ɩ a ʋ bagɛ mɛ̃ a pɩ̃ɛnʋ-bibir dem a. Ʋlɛ wa lɛb yire wa báarɛ a, bɛ na pàw nɩ a pan.
13Bibir za, nyɩ na mɩ́ maal'ɩ bàwr nɩ yũon-been péle a ƴã-gan zie kãw za na bɛ sãw a kʋ̀ a Sore. A de-kʋ̀b ŋa na mɩ́ ɩ n biɓaara za. 14Biɓaara za mɩ̀ a, nyɩ na mɩ́ de nɩ zɔ̃ kilo anũu na jɛr'ɩ kãá litɩr ayi a kʋ̀ a Sore. A tub á ŋá na càar'ɩ a bibir za de-kʋ̀b ŋa, a na be n be kʋralɛ. 15A fɛr'a kɛ́ bɛ mɩ́ de a péle, a zɔ̃ nɩ a kãá kʋ̀ a Sore a ɩ nyɩw-a-za-bàwr biɓaara za, ɛ́ a ɩrɛ à à ŋá kʋralɛ.»
A nãà bibiir gbã-dɩrʋ
16À ŋá n'a a Sore Naaŋmɩn yere: «A nãà wa ŋmãa a ʋ tẽsɔw zie kãw kʋ̀ a ʋ bie kãw a, a zie ŋa na pʋɔ nɩ a bie ŋa gbã-dɩrʋ pʋɔ ɛ́ bɛ na kʋ̀ ʋ nɩ a sob ŋa bibiir. 17Ɛcɛ, a nãà wa kʋ̀ a ʋ tẽsɔw zie kãw a ʋ tõ-tõ-bie kãw a, a zie ŋa na ɩ n a tõ-tõ-bie ŋa sób ɛ́ tɩ ta a lɛb-bɛrʋ yũon#46:17 Lɛb-bɛrʋ yũon: Yome lɩz'a ayi nɩ pie za pʋɔ a, a Ɩsɩrayɛl nɩbɛ mɩ́ tɩ sɛw na kɛ́ bɛ lɛb bɛr a bɛ tẽ-bi-taabɛ na lo a samɛ gbãgbaalʋ pʋɔ a, bɛ lɛb so bɛ tʋɔra. A mɩ̀ mɩ́ tɩ sɛw na kɛ́ bɛ lɛb kʋ̀ a bɛ gbã-dɩrbɛ a yir, tẽsɔw bɛ na kʋɔrɩ san zũú a. Nyɛ̃ Lev 25.8-55. , al pùorí ʋ lɛb ɩ a nãà sób. Bʋ̃ʋ n'ʋ vɛ̃, a nãà bibiir so a nãà tɔr za tɛra. 18Ɛcɛ a bɛ tɛr sɔ́r k'aa nãà de bom a tẽw nɩr kãw na so a, faa a ʋ zi-sóra ɛ́ bɛr ʋ ɛ. A ziir ʋ na na kʋ̀ a ʋ bibiir a na yi n a ʋ zi-sóra pʋɔ, lɛ n'a bɛ kʋ̃ diw nɩr za a ɩ̃ nɩ-bʋʋrɛ pʋɔ a zie ʋ na so a pʋɔ ɩ.»
A Ŋmɩn-yir-kpɛ̃ɛ bʋ̃-dɩrɩ ɩb ziir
19Al pùorí, a nɩr nɛ tɩ ɩ na ɩ̃ tu a tu-kpɛb zie ʋl na pɩɛlɩ a saa-pɛrɩ́-gʋba-lowr dɩ̃dɔr a yi. Ʋ tɩ tɛr mɛ̃ na tu n a zi-sõw diru a bàwr-maalbɛ na so a lowr. Ʋ tɩ wul mɛ̃ nɩ zie a nidaa, a mʋ̃tɔ̃w-kpɛb-lowr. 20Ʋ tɩ yel mɛ̃ na: «A ka n'a a bàwr-maalbɛ na mɩ́ dʋw a dʋn bɛ na maal'ɩ a bàwr a yel-bebe suur-dɩ-kʋ̀b a nɛnɛ a bɩ. A ka mɩ̀ cãà n'a bɛ na mɩ́ ɩ a de-kʋ̀b bome a bɩ. À ŋá n'a bom za kʋ̃ yi a yẽw davʋrá ɩ, ɛ́ bɛ kʋ̃ ɩ a nɩbɛ pɩɛlɩ a bʋ̃-sõw ɛ#46:20 Nyɛ̃ 44.19 nɩ a manʋ..»
21Al pùorí, ʋ tɩ tɛr mɛ̃ na kpɛ n a yẽw davʋra pʋɔ tɩ ɩ ɩ̃ tɔl a ʋ gõgone anaar niŋé: davʋra mɩ́ tɩ be n a gõgon za ƴãw. 22A davʋrɩ anaar á ŋá tɩ ɩ n cãpili ɛ́ a zɛ̃a ɩ been, mɛtɩr lɩzɛr a wogo, ɛ́ a yɛ̀lʋ ɩ mɛtɩr pie nɩ anũu. 23Kʋsɛbɛ dacin tɩ mɛ na viiri koli davʋra za. Bɛ tɩ mɛ n damɛ lanɩ nɩ a dacin. 24A nɩr nɛ tɩ yel mɛ̃ na: «A bʋ̃-dɩrɩ ɩb ziir'a. A ka a, a Ŋmɩn-yir-kpɛ̃ɛ tõ-tõ-biir na mɩ́ dʋw nɩ a dʋn a nɩbɛ na maal'ɩ a bàwr a nɛnɛ.»
Currently Selected:
Ezekɩɛl 46: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
