Ezekɩɛl 44

A nãà yõ so a saa-pɛrɩ́ dɩ̃dɔr

1A nɩr nɛ tɩ lɛb'a tɛr mɛ̃ wa n a yẽw dɩ̃dɔr ʋl na be a zi-sõw saa-pɛrɩ́ a. Ʋ tɩ pàw na. 2A Sore tɩ yel mɛ̃ na: «A dɩ̃dɔr ŋa na pàw na gã, nɩr za bɛ yuore ʋ ɛ. Nɩr za bɛ tuur a ʋ ƴãw tɔlɛ ɩ, bʋ̃ʋ n'ʋ vɛ̃, a mãa Sore, a Ɩsɩrayɛl Naaŋmɩn, ɩ̃ tu n a be kpɛ. A fɛr'a k'ʋʋ pàw gã. 3Ɛcɛ a nãà na tʋ̃ɔ́ na zɩ̃ a be dɩ a bʋ̃-dɩ-sõw a ɩ̃ niŋé, ʋ na dɩrɛ naalʋ a zũú. A zie ŋa pʋɔ kpɛb nɩ a yib ƴãw a, ʋ na mɩ́ tu n a dĩo ʋl na pɩɛlɩ a dɩ̃dɔr a ƴãw.»

A sãanbɛ kʋ̃ tʋ̃ɔ́ kpɛ a Ŋmɩn-yir-kpɛ̃ɛ pʋɔ ɩ

4Al pùorí, a nɩr nɛ tɩ ƴãw na ɩ̃ tu a saa-pɛrɩ́-gʋba-lowr dɩ̃dɔr ƴãw kpɛ cen tɩ ta a Ŋmɩn-yir-kpɛ̃ɛ niŋé. Ɩ̃ tɩ nyɛ̃ na k'aa Sore yúor-vɩɛlʋ-danʋ tɩ paal'ɩ a Ŋmɩn-yir-kpɛ̃ɛ. Ɩ̃ tɩ lo na vɔblɩ muru. 5A Sore tɩ yel mɛ̃ na: «A fʋ̃ʋ nɩsaal bie, cɛlɛ be ɛ́ yuo a fʋ mimie nɩ a fʋ tobe. Bɛrɛ wone a nɛ́ɛ nɩ a tub ɩ̃ na ƴãwnɛ cáarɛ nɩ a ɩ̃ yir a. Baa zuo a za, cɛlɛ be a al na càarɩ a zi-sõw pʋɔ kpɛb nɩ a lɛb yib a.

6Fʋ na yel'a kʋ̀ a Ɩsɩrayɛl nɩbɛ, a nɩ-gaarɩ bɛ ŋa, a lɛ a mãa Sore Naaŋmɩn na yere a: A nyɩɩm Ɩsɩrayɛl nɩbɛ, nyɩ ƴãw nɩ manʋ nɩ a ɩb na bɛ maal'ɩ wob nyɩ na ɩ a. 7A lɛn daar nyɩ na tɩ kʋ̀rɛ mɛ̃ a ɩ̃ dɩb, a bàwr nɛn-kãá nɩ a zɩ̃ɩ a, nyɩ mɩ́ tɩ ɩ n sãan-yɔ-ɓile na bɛ sàwr a ɩ̃ nɛ́ɛ a, bɛ kpɛ a ɩ̃ zi-sõw pʋɔ. À à ŋá a, nyɩ ɩ n a ɩ̃ yir la. A nyɩ ɩb za na bɛ maal'ɩ wob a zũú, nyɩ sãw nɩ a wõ-taa na tɩ lãw tɩ taa a bɛr. 8Nyɩ bɛ tõ a tome nyɩɩm mɩŋa a ɩ̃ zi-sõw pʋɔ ɩ, ɛcɛ nyɩ ɩ n a sãanbɛ bɛ ŋa bɛ lɩɛrɩ nyɩ tõ. 9A mãa Sore Naaŋmɩn yere na: nɩ-sãan kãw za na ɩ yɔ-ɓil ɛ́ bɛ sàwr a ɩ̃ nɛ́ɛ a kʋ̃ lɛb kpɛ a ɩ̃ zi-sõw pʋɔ ɩ, ʋlɛ saa lãw kpɩɛr'ɩ a Ɩsɩrayɛl nɩbɛ a.»

Tub a levitɩ mɩnɛ ƴãw

10«A levitɩ mɩnɛ taw na zãá nɩ mɛ̃ a lɛn daar a Ɩsɩrayɛl nɩbɛ na tɩ lo sɔr-faa ɛ́ jɛ m bɛr a bɛ ŋmɩn-bɛlɛbɛlɛ tub ƴãw a. À à ŋá a, bɛlɛ so a bɛ sãwna. 11A ɩ̃ zi-sõw pʋɔ a, a levitɩ mɩnɛ na tone nɩ a ɩ̃ tome gùre a Ŋmɩn-yir-kpɛ̃ɛ dɩ̃dɛɛ ɛ́ tɛr tõ-pɛ-bʋʋrɛ bʋʋrɛ za. Bɛ na tʋ̃ɔ́ na mɩ́ kʋ a dʋn bɛ na de tɩr a nyɩw-a-za-bagɛ nɩ a bagɛ al na cɛ a maalʋ ƴãw a. Bɛ na tone nɩ a nɩbɛ tome. 12A lɛn daar a Ɩsɩrayɛl nɩbɛ na tɩ tuur a ŋmɩn-bɛlɛbɛlɛ a, a levitɩ mɩnɛ tɩ sõw bɛ na ɛ́ tɩ ɩ a Ɩsɩrayɛl nɩbɛ lo yel-bier pʋɔ. Alɛ n'a so a mãa Sore Naaŋmɩn yere à ŋá: Ɩ̃ na ìr'ɩ a bɛ ƴãw, ɛ́ bɛlɛ na so a bɛ sãwna. 13Bɛ kʋ̃ taw pɩɛlɩ mɛ̃ ɩ a ɩ̃ bàwr-maalbɛ ɩ. Bɛ kʋ̃ taw pɩɛlɩ a bome na ɩ a mãa yõ sób a ɩ, ɛ́ mɩ̀ kʋ̃ taw pɩɛlɩ a zi-sõw-za-zi-sõw ɛ. À ŋá n'a bɛ na so a bɛ vĩ-ɩb na bɛ maal'ɩ wob bɛ na ɩ a. 14Ɩ̃ na kʋ̀ bɛ nɩ a Ŋmɩn-yir-kpɛ̃ɛ tõ-cãpili tɛwr. Ton za na sɛw k'ʋʋ tõ a be a, bɛ na tõ ʋ na.»

Tub a bàwr-maalbɛ ƴãw

15«A levitɩ mɩnɛ bɛl na ɩ bàwr-maalbɛ, ɩ a Sadɔkɩ#44:15 Sadɔkɩ: Nyɛ̃ 40.46 nɩ a manʋ. bʋ̃-dɔwrɩ a, bɛ tɩ tõ n a ɩ̃ zi-sõw tome a lɛn daar a Ɩsɩrayɛl nɩbɛ na tɩ taw zãá nɩ a mãa Sore a. Alɛ n'a so, bɛl tɛwr nɛbɛ na tʋ̃ɔ́ wa wa tone a ɩ̃ tome. Bɛ na tʋ̃ɔ́ na mɩ́ de a bàwr nɛn-kãá nɩ a zɩ̃ɩ kʋ̀ m. A mãa Sore Naaŋmɩn n'ʋ yere. 16Bɛl tɛwr nɛbɛ na kpɛ a ɩ̃ zi-sõw pʋɔ, ɛ́ na taw pɩɛlɩ a tabal na be a ɩ̃ tome tɛwr ƴãw a. Bɛ na sàwr'ɩ a tub na ƴãw a ton ŋa ƴãw a. 17Bɛ na mɩ́ su n lɛ̃ pɛn bʋ̃-suuri ɛ́ bãw tu a sɔwlɩsɔw davʋra ƴãw tɔl. Bɛlɛ wa tone a bɛ tome a sɔwlɩsɔw davʋra pʋɔ nɩ a Ŋmɩn-yir-kpɛ̃ɛ pʋɔ a, bɛ kʋ̃ mɩ́ su píir kɔblʋ kparɩ ɛ. 18Bɛ na mɩ́ vili nɩ lɛ̃ pɛn a zũú, ɛ́ 'lẽ lɛ̃ pɛn gãw a sɩɛmɩ́. Bɛ kʋ̃ mɩ́ sɛ kpàwr taa wa hanɛ ɩ. 19Bɛlɛ wa lɛb cere a sɔwlɩsɔw davʋra pʋɔ a, a be a nɩbɛ na àr a, bɛ na yaa nɩ a bʋ̃-suuri bɛ na tɩ su a bɛ tome daar a. Bɛ na bin a nɩ a zi-sõw diru pʋɔ, ɛ́ su bʋ̃-suur-yoru. À ŋá n'a a nɩbɛ kʋ̃ tɔ a bɛ bʋ̃-suur-son ɛ#44:19 Nɩbɛ kʋ̃ tɔ a bɛ bʋ̃-suur-son ɛ: A Ɩsɩrayɛl nɩbɛ zie a, a bʋ̃-sõw tɔb ciir'a. A bɛ tɩɛrʋ pʋɔ a, fãw be n a bʋ̃-sõw pʋɔ na tʋ̃ɔ́ kʋ a bɛlɩ dem na bɛ tɛr sɔ́r na tɔ ʋ a. Nyɛ̃ 2Sa 6.6-7..

20A bàwr-maalbɛ kʋ̃ mɩ́ fɔr zu ɛ. Bɛ kʋ̃ mɩ́ bɛr a bɛ zukɔbɛ a ɩ zarkpara ɩ, ɛcɛ bɛ na mɩ́ ŋma a nɩ vla vla. 21Bɛ been kãw za bɛ nyúur divɛ̃ ɛ́ bãw kpɩɛr a pʋ̃ɔmɩ davʋrá ɩ. 22Bàwr-maalɛ bɛ kule pɔw-kʋɔr bɩɩ pɔw na zawrɩ a ʋ sɩr bɛr a ɩ. Ʋ na kul'ɩ Ɩsɩrayɛl pɔwkole bɩɩ a bàwr-maalɛ kãw pɔw-kʋɔr.

23A bàwr-maalbɛ na zanɩ nɩ nɩ a ɩ̃ nɩ-bʋʋrɛ bɛ bãw a bom na ɩ sõw nɩ a bom na bɛ ɩ sõw a, a bom na vɩɛl nɩ a bom na tɛr dɛwr a. 24Bɛ na ɩ n ƴɛ̀r-dɩrbɛ a ƴɛ̀rʋ-dɩb ziir, ɛ́ bɛ na mɩ́ dɩ n a ƴɛ̀rʋ tu n a ɩ̃ nɛ́ɛ. Bɛ na mɩ́ maal'ɩ a cuwr tu n a tub nɩ a nɛ-ƴãwnɩ ɩ̃ na ƴãw a. Bɛ na ƴãw nɩ fãw a pɩ̃ɛnʋ-bibir ɩ sõw a ɩ̃ ƴãw.

25 Bàwr-maalɛ bɛ tɛr sɔ́r na taw pɩɛlɩ kũu ɛ, alɛ bɛ ɩ lɛ, ʋ na ɩ n dɛwr sob. Ɛcɛ ʋ na tʋ̃ɔ́ na pɩɛlɩ a ʋ sãà, a ʋ mã, a ʋ bie kãw, a ʋ yɛb kãw, bɩɩ a ʋ yeepuule kãw na bɛ kul sɩr a kũu. 26Al pùorí, ʋ na so n a ʋ dɛwr bɛr, ɛ́ gù bibie ayopõi, ʋʋ pãa lɛb de a ʋ tome. 27A bibir nɛ ʋ na na lɛb kpɛ a zi-sõw sɔwlɩsɔw davʋra pʋɔ a, ʋ na maal'ɩ bàwr a ʋ yel-bier suur-dɩ-kʋ̀b ƴãw. A mãa Sore Naaŋmɩn n'ʋ yere. 28A bàwr-maalbɛ na tone nɩ a ɩ̃ tome. Bɛ kʋ̃ páw zie kãw za a Ɩsɩrayɛl tẽw pʋɔ ɩ, bʋ̃ʋ n'ʋ vɛ̃, mãa n'ʋ na ɩ a bɛ dem. 29A de-kʋ̀b bome nɩ a dʋn bɛ na maal'ɩ a bagɛ a yel-bebe suur-dɩ-kʋ̀b ƴãw a n'a na mɩ́ ɩ a bɛ dɩb. Bɛ na mɩ́ so nɩ bom za bɛ na de kʋ̀ m#44:29 Bom za bɛ na mɩ́ de kʋ̀ m: Nyɛ̃ Sɔr-n 18.14, Wl-ayi 2.34 nɩ a manʋ. a Ɩsɩrayɛl tẽw pʋɔ a. 30A bàwr-maalbɛ na mɩ́ so nɩ a bʋ̃-dieri bʋ̃-dan nɩ bom za bɛ na mɩ́ de a Ɩsɩrayɛl nɩbɛ tɛra pʋɔ kʋ̀ m a. A nɩbɛ na mɩ́ kʋ̀ bɛ nɩ a zɔ̃-vɩɛlɩ vɩɛlɩ zie k'ɩ̃ɩ tʋ̃ɔ́ maalɩ a bɛ yie. 31Ɛcɛ a bàwr-maalbɛ bɛ tɛr sɔ́r na 'wɔb lili nɩ dʋn na kpi a ɩ, bɩɩ wɛ-dʋ̃w na kʋ a ɩ.»

Currently Selected:

Ezekɩɛl 44: DBDC

Highlight

Copy

Compare