Ezekɩɛl 35

Naaŋmɩn-ƴɛ̀r-manɛ ƴɛ̀rʋ na ƴɛ̀r a Edɔm tẽw dem ƴãw a

1A Sore tɩ yel mɛ̃ na: 2«A fʋ̃ʋ nɩsaal bie, lɩɛb a fʋ niwn cɔw a Edɔm tẽw tan vuo, ɛ́ yere a bɛlɩ dem na kpɩɛr a ʋ pʋɔ a, a ɩ̃ yúor ƴãw. 3Yel a lɛ a mãa Sore Naaŋmɩn na yere a kʋ̀ bɛ: Ɩ̃ na ìr'ɩ a nyɩ ƴãw! Ɩ̃ na wul'ɩ a ɩ̃ fãw a fʋ̃ʋ Edɔm tẽw, ɩ̃ na sãw fʋ na bɛr ɛ́ ɩ fʋ lɩɛbɩ wɛja-kpalɛ. 4Ɩ̃ na ɩ n a fʋ tẽ-bɛrɛ lɩɛbɩ deboru, bɛ na sãw nɩ a fʋ tẽw za bɛr. Lɛ n'a fʋ na bãw kɛ́ mãa n'ɩ a Sore. 5Kʋralɛ n'a fʋ bɛ nɔ̃w a Ɩsɩrayɛl nɩbɛ ɩ. A bɛ kpɩɛrʋ daar a, a bɛ sãwna na wa baar'a, fʋ zɛb'ɩ bɛ na nɩ zɛbr-sɔ-kpɛ̃ɛ. 6Alɛ n'a so, ɩ̃ pɔ n nɩ a ɩ̃ nyɔ-vʋʋrʋ, à ŋá n'a a mãa Sore Naaŋmɩn yere: Ɩ̃ na ɩ na zɩ̃ɩ cir a fʋ zie. Sɩza, a zɩ̃ɩ fʋ na cir a bɔbr'a kɛ́ bɛ yáa a san. Fʋ cir'ɩ a zɩ̃ɩ bɛ bʋnɩ nɩ ɛ, a na ɩ lɛ a, a fʋ zɩ̃ɩ mɩ̀ na cir'a. 7Edɔm i, ɩ̃ na sãw nɩ a fʋ tẽw bɛr, ɩ̃ na ɩ na ʋ lɩɛbɩ wɛja-kpalɛ, ɩ̃ɩ na kʋ n a bɛlɩ dem za na na tɔlɛ a be a. 8Ɩ̃ na ɩ na kũuni pàw a fʋ tan. A bɛlɩ dem za bɛ na na kʋ a zɛbr zie a na lo n a fʋ tãli zu, a fʋ bà-fʋɔlɩ nɩ a fʋ kʋl-bɔwrɩ pʋɔ. 9Ɩ̃ na ɩ na a fʋ tẽw lɩɛbɩ wɛja-kpalɛ kʋralɛ, nɩbɛ kʋ̃ cãà kpɩɛr a fʋ tẽ-bɛrɛ pʋɔ ɩ. Lɛ n'a fʋ na baw kɛ́ mãa n'ɩ a Sore.

10Fʋ yel'a: “A Ɩsɩrayɛl nɩ a Zuda naalʋ-ten ayi na ɩ n a ɩ̃ sób, ɩ̃ na de nɩ a ten á ŋá a Sore na kpɩɛr a.” 11Fʋ tɩ tɛr'ɩ a nɩ nyuur, ɛ́ ìr a ƴãw nɩ po-to-fãw-ɩb. Fʋ bɛ tɩ nɔnɛ a ɩ. A na ɩ lɛ a, ɩ̃ pɔ n nɩ a ɩ̃ nyɔ-vʋʋrʋ, à ŋá n'a a mãa Sore Naaŋmɩn yere: Ɩ̃ mɩ̀ na ɩ b'ɩ a lɛ. Lɛ n'a ɩ̃ na wul a Ɩsɩrayɛl nɩbɛ sob nɛ na nɛ m a, a lɛn daar ɩ̃ nãà wa sowri fʋ bom a. 12Lɛ n'a fʋ na bãw k'aa mãa, a Sore, ɩ̃ wõ n a fʋ zʋmɛ a lɛn daar fʋ na tɩ yel: “Bɛ sãw nɩ a Ɩsɩrayɛl tẽw tan bɛr. A ɩ n a tɩ sób ƴɛrɛŋa! Tɩ na tʋ̃ɔ́ na de a!” 13Fʋ pɔ n dɛblʋ a ɩ̃ zu, ɛcɛ a mãa a, ɩ̃ bɛ yiiri a fʋ ƴɛ̀rʋ fʋ na ƴɛ̀r a ɩ̃ ƴãw a ɩ.

14À ŋá n'a a mãa Sore Naaŋmɩn yere: A lɛn daar a nɩ-bʋʋrɛ za nãà wa be a nʋ̃ɔ̀ pʋɔ a, ɩ̃ na sãw fʋ na bɛr cʋmɛcʋmɛ. 15Fʋ cɩlɩ na fʋ na nyɛ̃ bɛ sãw a ɩ̃ nɩ-bʋʋrɛ Ɩsɩrayɛl bɛr a. A na ɩ à ŋá a, ɩ̃ mɩ̀ na ɩ b'ɩ a lɛ. A fʋ tan, a fʋ tẽw za a, bɛ na sãw a na bɛr. Lɛ n'a nɩsaal za na bãw kɛ́ mãa n'ɩ a Sore.»

Currently Selected:

Ezekɩɛl 35: DBDC

Highlight

Copy

Compare