Ezekɩɛl 27
27
Lãw-mʋɔlɛ na kõ a Tɩ́ɩ̀r tẽ-kpɛ̃ɛ ƴãw a
1A Sore tɩ yel mɛ̃ na: 2«A fʋ̃ʋ nɩsaal bie, kõ lãw-mʋɔlɛ ƴãw a Tɩ́ɩ̀r tẽ-kpɛ̃ɛ 3na be a kʋ̃ɔ-kpɛ̃ɛ nʋɔr ɛ́ maalɛ yɛ̀rʋ́ nɩ nɩ-bʋʋr-yaga na kpɩɛr a kʋ̃ɔ-kpɛ̃ɛ-sɔgɔ-ten pʋɔ a. Yel a lɛ a mãa Sore Naaŋmɩn na yere a kʋ̀ ʋ:
Tɩ́ɩ̀r tẽ-kpɛ̃ɛ ɛ, fʋ yel'ɩ à ŋá: Ɩ̃ pɔ̀l'a bɛ cɛ ɩ!
4A fʋ zie cen na tɩ tɔ a kʋ̃ɔ-kpɛ̃ɛ sɔwlɩsɔw,
ɛ́ a bɛlɩ dem na mɛ b a ɩ na fʋ pɔ̀l bɛ cɛ ɩ.
5Bɛ mɛ b'a mɛ̃ gbor-kpɛ̃ɛ a.
Bɛ de nɩ Seniir tãw sɩpɩrɛ tɩɩr
maal'ɩ a fʋ ƴã-gan ziir za.
Bɛ de nɩ Libã tẽw sɛɛdɩr tɩɛ
kɛ́ bɛ maal'ɩ a fʋ dà-wogo.
6Bɛ cɛ n Basan tẽw sɛn tɩɩr
kɛ́ bɛ maal'ɩ a fʋ vue.
Bɛ maal'ɩ a fʋ gàr nɩ sɛɛdɩr tɩɩr
na yi Gɩrɛkɩ mɩnɛ kʋ̃ɔ-kpɛ̃ɛ-sɔgɔ-ten,
ɛ́ bɛ ƴãw wɔb nyɩmɛ pɩ̃ɛmɛ a.
7Bɛ wób'ɩ a fʋ pɛnɛ nɩ Eziptɩ tẽw lɛ̃
bɛ na ƴãw bʋ̃-mawrɩ a.
A mɩ́ ɩ na bɛ nyɛ b zi-zãána bãw.
Pɛn-zɩɩr-mʋɔlɛ nɩ pɛn-zɩɩr
na yi Sɩɩpʋr kʋ̃ɔ-kpɛ̃ɛ-sɔgɔ-tẽw a
pàw nɩ a fʋ yɛ̀rʋ́ bome.
8Sɩdɔ̃ nɩ Aravadɩ ten nɩbɛ nɛbɛ fʋ tɩ de
bɛ ɩ a gbor-duwrbɛ.
Tɩ́ɩ̀r tẽw dem na bãw a tome vla a nɛbɛ
tɩ kaarɛ a gbor-kpɛ̃ɛ zie.
9Bɩbɩlɔsɩ tẽw nuru-tõ-tonbɛ na cɩ a tome pʋɔ,
ɛ́ bãw a tome vla a nɛbɛ
tɩ so a gbor-kpɛ̃ɛ maal-ƴãwfʋ.
A gbor-bɛrɛ na duwre a kʋ̃ɔ-kpɛ̃ɛ zu a
tɩ tɛwr'a àrɛ a fʋ zie,
ɛ́ a gbor-duwrbɛ daar a fʋ yɛ̀rʋ́ bome.
10Pɛrsɩ, Ludɩ nɩ Putɩ sojarɩ pʋɔ nɩ
a fʋ zɛbr-nɩbɛ pʋɔ.
Bɛ mɩ́ bin nɩ a bɛ zɛbr-kur-pãgalɩ
nɩ a bɛ zɛbr-kpawʋʋr a fʋ zie.
Bɛ ɩrɛ na fʋ páwr yúor.
11Aravadɩ dɛbr lãw nɩ nɩ a fʋ sojarɩ gùre a fʋ dacine, ɛ́ Gamadɩ dɛbr gùre a fʋ yir-cõcowli. Bɛ mɩ́ yawlɩ nɩ a bɛ zɛbr-kur-pãgalɩ a dacine na viiri koli fʋ a zu, ɛ́ à à ŋá n'a bɛ mɩ́ ɩ fʋ vɩɛl bɛ cɛ ɩ.»
A Tɩ́ɩ̀r tẽw n'ɩ a yɛ̀rʋ́ tẽ-kpɛ̃ɛ
12«A Tarsisɩ tẽw nɩbɛ maalɛ nɩ yɛ̀rʋ́ a fʋ zie nɩ na-bʋ̃-pɛ-bʋʋrɛ za. Bɛ dàar'ɩ a fʋ yɛ̀rʋ́ bome nɩ salm-pla, kure bɩɩ kur-pla mɔrmɔr nɩ kur-mɔrmɔr. 13Mɔ̃ mɩ̀, Yavan, Tubal nɩ Mesɛkɩ#27:13 Tubal nɩ Mesɛkɩ: A ten á ŋá ayi be n a tɩ dɩ̃a Tirki tẽw pʋɔ. ten maalɛ nɩ fʋ nɩ yɛ̀rʋ́. Bɛ tɩ kʋ̀rɛ fʋ nɩ yɛ̀rʋ́ bome á ŋá: gbãgbaar nɩ kur-zɩɛ bome. 14A Bɛtɩ-Togarma tẽw nɩbɛ tɩ kʋɔrɛ nɩ fʋ nɩ tõ-tõ-wie, zɛbr wie nɩ mílɛ̀#27:14 Mílɛ̀: Ʋ ɩ n bõw daa na do wur nyãw ʋ dɔw a. A mílɛ̀ bɛ dɔwr ɛ, dʋ̃-ãan n'ʋ. Nyɛ̃ 1Na 10.25, 2Na 5.17, 1Bi-yel 12.41, 2Bi-yel 9.24.. 15A Dedan tẽw dem mɩ̀ tɩ maalɛ nɩ fʋ nɩ yɛ̀rʋ́. A nɩbɛ na kpɩɛr a kʋ̃ɔ-kpɛ̃ɛ-sɔgɔ-ten yaga pʋɔ a waar'a wa dàar yɛ̀rʋ́ bome a fʋ zie. Bɛ mɩ́ ya b'a nɩ wɔb nyɩmɛ nɩ dàar na kpɛmɛ ɛ́ tɩbrɛ bɛ bʋɔlɛ ebɛn a. 16A Siiri tẽw dem dàar'ɩ bʋ̃-yaga a fʋ zie, ɛ́ mɩ̀ kʋ̀rɛ fʋ kʋsɛ-bi-nyɩlɩ, gàn-vɩɛlɩ zɩɩr, gàn-mawrɩ, lɛ̃ pɛnɛ, kʋsɛ-bʋʋrɛ kãw bɛ na bʋɔlɛ koraɩ nɩ iribi a. 17A Zuda nɩ a Ɩsɩrayɛl ten nɩbɛ dàar'ɩ bome a fʋ zie, ɛ́ mɩ́ kʋɔr'ɩ fʋ Minitɩ tẽw ble, ci, sɩwr, kãá nɩ tɩ-suur-zɔ̃-na-nyùur-vla-vla-a. 18A Damasɩ tẽw dem dàar'ɩ a bʋ̃-yaga fʋ na maalɛ bɛ dɩ vuo a, nɩ na-bʋ̃-pɛ-bʋʋrɛ za. Bɛ mɩ́ ya b'a nɩ Hɛlbon tẽw divɛ̃ nɩ Sahaar tẽw píir kɔblʋ. 19A Dan nɩ Yavan dɔwlʋ nɩbɛ na tɩ be a Uzal tẽ-kpɛ̃ɛ pʋɔ a mɩ́ tɩ ya n a alɩ bome nɛ a na fɛr kɛ́ bɛ kʋ̀ b a nɩ kure bɛ na zuw ír a, kanɛl tɩ-pɛgɛ zɔ̃ nɩ bàa-kɛkɛɛ na nyùur vla vla a. 20A Dedan nɩbɛ tɩ kʋɔrɛ nɩ fʋ nɩ gàn-vaarɩ wie zɔmnʋ ƴãw. 21A Arabi tẽw nɩ a Kedaar tẽw nɩ-bɛrɛ tɩ n'ɩ a fʋ bʋ̃-daarbɛ. Bɛ mɩ́ tɩ ya b'a nɩ péli, píir nɩ bʋʋr. 22A Saba nɩ a Araema#27:22 Saba nɩ Araema: A be n a Arabi tẽw saa-pɛrɩ́-dʋrʋ-lowr. Nyɛ̃ Yzt 10.7, 1Na 10.1. ten yɛ-yɛrbɛ kʋɔrɛ nɩ fʋ nɩ bome. Bɛ mɩ́ dà a na, ɛ́ kʋɔr'ɩ fʋ parfɛ̃ na vɩɛl vɩɛl a, kʋsɛ-bi-nyɩlɩ bʋʋrɛ bʋʋrɛ za nɩ salm-zɩɛ. 23A Haran, a Kane nɩ a Edɛn tẽ-bɛrɛ, a Saba tẽw yɛ-yɛrbɛ, a Asuur nɩ a Kilimadɩ tẽ-bɛrɛ kʋɔrɛ nɩ fʋ nɩ bome. 24Bɛ kʋɔrɛ nɩ fʋ nɩ bʋ̃-suuri a dàarʋ na kpɛmɛ a. Bɛ mɩ́ wa n nɩ a fʋ kʋɔrʋ zie bʋ̃-suur-vɩɛlɩ zɩɩr-kãbalɩ, kpar-mawrɩ, tẽsɔw pɛn-yɛrɩ bʋʋrɛ bʋʋrɛ, mie bɛ na pal a kpɛ a. 25Gbor-bɛrɛ n'a tuore a fʋ yɛ̀rʋ́ bome.»
A lãw-mʋɔlɛ ŋmãa na cɛ a Tɩ́ɩ̀r tẽw ƴãw a
«Fʋ tɩ paal'ɩ yɛ̀rʋ́ bome,
tuo to-tɩbrʋ tɩbrʋ a kʋ̃ɔ-kpɛ̃ɛ sɔwlɩsɔw.
26A fʋ gbor-duwrbɛ tɛr fʋ na cen nɩ a kʋ̃ɔ-zulu pʋɔ,
ɛ́ a kʋ̃ɔ-kpɛ̃ɛ sɔwlɩsɔw a,
a saa-pɛrɩ́ sɛsɛb ŋmɛ b'a ka.
27A fʋ bʋ̃-dɩrɩ, a fʋ yɛ̀rʋ́ bome, a fʋ tɛra za,
a gbor-duwrbɛ na be a gbor-kpɛ̃ɛ pʋɔ a,
a nuru-tõ-tonbɛ na tɩ maalɛ a fʋ gbee ƴãwn a,
a yɛ-yɛrbɛ na kaarɛ a fʋ yɛ̀rʋ́ zie a,
a sojarɩ na tone a fʋ tome a,
a zu-sɛbla na tɩ be a gbor-kpɛ̃ɛ pʋɔ a,
a kʋ̃ɔ-kpɛ̃ɛ kʋ̃ɔ lim'ɩ a za,
a lɛn daar a gbor na tɩ tu kʋ̃ɔ a.
28A fʋ gbor-duwrbɛ na mɩ́ wa ŋmɩɛr cɛlsɩ a,
a bɛlɩ dem na kpɩɛr a kʋ̃ɔ-kpɛ̃ɛ nʋɔr a mɩ́ màwr'a.
29Lɛ n'a, a bɛlɩ dem za na tɛr a gbor-vue a
na yi na ɛ́ bɛr a bɛ gbor-bɛrɛ.
A gbor-duwrbɛ nɩ a nɩbɛ za
na be a gbor pʋɔ a na siw nɩ tẽsɔw.
30Bɛ kone na ƴãwn fʋ, kone zɛbr'ɩ.
Bɛ 'wɔ̃w nɩ tanɛ ƴãw a bɛ zurú,
ɛ́ ɓiile a tãpɛlʋ pʋɔ.
31A fʋ̃ʋ ƴãw a, bɛ na fɔr'ɩ a zu,
ɛ́ su ko-tuolu bʋ̃-suuri#27:31 Nyɛ̃ 7.18 nɩ a manʋ. .
Bɛ na kone na ƴãwn fʋ,
bɛ na kone nɩ lãw-mʋɔl-tʋlʋ.
32A bɛ kpɩɛrʋ pʋɔ a,
bɛ na kone nɩ lãw-mʋɔlɛ ƴãwn fʋ,
bɛ na kone na yere nɩ:
“Ãa n'ʋ tɩ ŋmɛ̃ mɛ̃ a Tɩ́ɩ̀r tẽw a kʋ̃ɔ-kpɛ̃ɛ sɔwlɩsɔw?”
33Fʋ na mɩ́ tɩ wɩlɛ a fʋ yɛ̀rʋ́ bome a,
nɩ-bʋʋr-yaga mɩ́ tɩ páw nɩ bʋ̃-páwrɩ.
A fʋ tɛra na bɛ gbʋ́r a nɩ a fʋ yɛ̀rʋ́ bome
tɩ ƴãw nɩ a tẽw zu na-mɩnɛ tɛra pʋɔ.
34Ƴɛrɛŋa a, kʋ̃ɔ-mie ŋmɛ b'a ŋmɛr,
a ɩ na fʋ bɔr a kʋ̃ɔ-zulu pʋɔ.
A fʋ yɛ̀rʋ́ bome nɩ a fʋ nɩbɛ za
lãw na lim'ɩ fʋ a kʋ̃ɔ-zulu pʋɔ.
35Nʋɔr ɓãa nɩ a bɛlɩ dem
na kpɩɛr a kʋ̃ɔ-kpɛ̃ɛ-sɔgɔ-ten pʋɔ a, a fʋ ƴãw.
A bɛ na-mɩnɛ màwr'ɩ dɛ̃bɩ̃-mawfʋ, niwn sɔb bɛ na.
36A nɩ-bʋʋr-sãanbɛ yɛ-yɛrbɛ nʋɔr ɓãa na,
bɛ fuole ƴãwn fʋ.
Fʋ lɩɛb'ɩ dɛ̃bɩ̃-bom, fʋ bɔr'a a nʋɔr kʋ!»
Currently Selected:
Ezekɩɛl 27: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
