Ezekɩɛl 24

A Zerizalɛm ɩ na mɛ̃ daasɩ̃ɛ na lo bazɩ̃ɩ a

1A diw-cenu pùorí yome piwaɩ sob, a cuwr pie sob bibie pie sob, a Sore tɩ ƴɛ̀r'ɩ a ɩ̃ zie à ŋá: 2«A fʋ̃ʋ nɩsaal bie, sɛb a dɩ̃a bibir ƴãw sɛbɛ pʋɔ, bʋ̃ʋ n'ʋ vɛ̃, a dɩ̃a bibir tɔr za n'a a Babɩlɔn tẽw nãà tĩ zɛbr'ɩ a Zerizalɛm. 3Lɔb zʋkpar kʋ̀ a nɩ-bʋʋr-gaarɩ bɛ ŋa. Yel kʋ̀ bɛ kɛ́ à ŋá n'a a Sore Naaŋmɩn ƴɛ̀rɛ:

“Cɔbrɩ daasɩ̃ɛ#24:3 Daasɩ̃ɛ: A daasɩ̃ɛ ŋa pɛr bãwfʋ ƴãw a, nyɛ̃ 11.3-7 nɩ a manʋ. . Paalɩ ʋ kʋ̃ɔ.

4De nɛ̃-gbile ƴãw a ʋ pʋɔ,

a nɛ̃-bi-vɩɛlɩ vɩɛlɩ za: gbɛkpɛ̃ɛ nɩ bawŋman.

Báa paalɩ ʋ nɩ a kɔbr-vɩɛlɩ vɩɛlɩ.

5De a píir na vɩɛl zuo a za a nɛn,

sɩɛbɩ a daasɩ̃ɛ pɛr nɩ a kɔbɛ.

Ɩ a ka tɩ pu, bʋ̃ʋ n'ʋ vɛ̃,

a kɔbɛ mɩ̀ sɛw na k'aa bɩ.

6À ŋá n'a a mãa Sore Naaŋmɩn yere:

Wahala wɛ, a tẽ-nɩ-kʋrɛ ƴãw!

Ʋ ŋmɛ̃ na mɛ̃ daasɩ̃ɛ na lo bazɩ̃ɩ bɛ kʋ̃ tʋ̃ɔ́ pɛ́w a.

Wɩl a nɛ̃-gbile za, been been,

ɛ́ ta ŋmɛ gbãw kaa ír ɛ.

7A zɩ̃ɩ a Zerizalɛm na ɩ a cir a

cãà na be a tẽ-kpɛ̃ɛ pʋɔ.

Kʋsɛ-kpálɛ zu n'a bɛ ɩ a cir,

a tẽsɔw bɛ nyũ a ɩ, ɛ́ nɩr bɛ ga tanɛ pàw a ɩ.

8Mãa a, ɩ̃ bɛr'ɩ a zɩ̃ɩ a kʋsɛ-kpálɛ zu,

be a na kʋ̃ tʋ̃ɔ́ sɔwlɩ a,

k'aa ɩ a ɩ̃ su-tʋlʋ kpãkpã ìr, ɛ́ ɩ ɩ̃ yaa a san.

9Sɩza, a mãa Sore Naaŋmɩn yere na:

Wahala wɛ, a tẽ-nɩ-kʋrɛ ƴãw!

Bʋ̃ʋ n'ʋ vɛ̃, ɩ̃ na gbɔw nɩ da-ŋmaarɛ vũu-kpɛ̃ɛ!

10De dàar gbõ taa, gbɔw a vũu,

dʋw a nɛn a bɩ tɩ tɔ, ƴãw mɩɩla,

ɛ́ bɛr a kɔbɛ a dɩ kab cʋmcʋm.

11A pùorí, de a daasɩ̃ɛ dɔwlɩ a vũu-bie zu

ʋ tʋ̃ɔ́ tʋl, a kure mʋ̃ɔ.

Lɛ n'a a dɛwr na be a ʋ pʋɔ a na yi,

ɛ́ a bazɩ̃ɩ dɩ kab.”

12Ɛcɛ à á ŋá za ɩ n zawla. A bazɩ̃ɩ á ŋá za bɛ bɔrɛ a vũumí ɛ. 13Zerizalɛm i, fʋ ɩ n dɛwr sob fʋ na bʋnɩ vʋʋrɩ sãsaralɛ a ƴãw. Ɩ̃ tɩ bɔbr'a k'ɩ̃ɩ ɩ fʋ vɩɛl, ɛcɛ fʋ bɛ sàw ɛ. A na ɩ lɛ a, fʋ kʋ̃ lɛb tʋ̃ɔ́ vɩɛl ɛ, ɛ́ gù a ɩ̃ su-tʋlʋ kpãkpã tɩ ìr a fʋ ƴãw. 14A mãa Sore n'ʋ yere, ɛ́ a na tu na. Ɩ̃ kʋ̃ lɛb pùor, ɛ́ kʋ̃ zɔ nɩbaalʋ ɛ. Ɩ̃ kʋ̃ yel kɛ́ mãa tɩ bãw kɛ́ lɛ bom kãw za ƴãw ɛ. Zerizalɛm i, ɩ̃ na dɩ n fʋ nɩ ƴɛ̀rʋ a fʋ nyɔ-vʋʋrʋ nɩ a fʋ ɩb ƴãw. A mãa Sore Naaŋmɩn n'ʋ yere.»

A Ezekɩɛl pɔw kũu

15A Sore tɩ yel mɛ̃ na: 16«A fʋ̃ʋ nɩsaal bie, ɩ̃ na ùr'a ír a sob nɛ fʋ na mɩ́ nyɛ̃ nʋ̃ɔ̀ ɩrɛ fʋ a. Ɛcɛ fʋ kʋ̃ maalɩ a ʋ kuor ɛ, fʋ kʋ̃ tɛr a 'woi 'woi ɛ, ɛ́ kʋ̃ kõ ɩ. 17Taa wule a fʋ kpɩɛrʋ ɛ, taa tuur a ko-tuolu tub ɛ. Ɛcɛ, 'lẽ a fʋ zu-pɛn-vila, ƴãw a fʋ nafawrɩ. Taa pàwr a fʋ niwn, ɛ́ taa dɩrɛ a kuor bʋ̃-dɩrɩ ɛ#24:17 A ko-tuolu daar a, bɛ mɩ́ kone nɩ yaga yaga, bɛ mɩ́ fɔr'ɩ a zu, ɛ́ cere nɩ gbɛ-zawl (nyɛ̃ 2Sa 15.30), bɛ mɩ̀ mɩ́ pàw nɩ a niw-cɛ̃cɛrʋ (nyɛ̃ 2Sa 19.15). .»

18Ɩ̃ tɩ ƴɛ̀r'ɩ a nɩbɛ zie a biɓaara, ɛ́ a zaanʋɔra a ɩ̃ pɔw kpi. A bio daarɩ́ biɓaara a, ɩ̃ tɩ ɩ n a lɛ a Sore na tɩ yel kʋ̀ m a. 19A nɩbɛ tɩ sowri mɛ̃ na k'ɩ̃ɩ man a ɩ̃ ɩb pɛr kʋ̀ bɛ. 20Ɩ̃ tɩ sɔw bɛ na: «À ŋá n'a a Sore tõ m k'ɩ̃ɩ yel kʋ̀ nyɩ, 21a nyɩɩm Ɩsɩrayɛl nɩbɛ: “A mãa Sore Naaŋmɩn, ɩ̃ na bɛr'a bɛ dɛw a ɩ̃ zi-sõw bɛr. Ɛcɛ, ʋ ɩ n a nyɩ dɛpaal bom, ʋ ɩ n a nyɩ mimie nʋ̃ɔ̀, ɛ́ ɩ a nyɩ nyɔ-vʋʋrʋ tɩɛrʋ bom. Bɛ na kʋ n a nyɩ bidɛbr nɩ a nyɩ pɔwyaar nyɩ na bɛr a Zerizalɛm a nɩ zɛbr-sɔ-kpɛ̃ɛ. 22Lɛ n'a nyɩ na ɩ mɛ̃ a Ezekɩɛl a. Nyɩ kʋ̃ pàw a nyɩ niwn ɛ́ kʋ̃ dɩ a kuor bʋ̃-dɩrɩ ɛ. 23Nyɩ na tɛr'ɩ a nyɩ zu-pɛn-vili a zũú ɛ́ ƴãw a nyɩ nafawrɩ. Nyɩ kʋ̃ kõ a kuor ɛ́ kʋ̃ tɛr a 'woi 'woi ɛ. 24A Ezekɩɛl ɩ n bãwfʋ a nyɩ zie. Nyɩ na ɩ n a lɛ tɔr za ʋ na ɩ a. Ɛ́ a yele wa ta a, nyɩ na bãw na kɛ́ mãa n'ɩ a Sore Naaŋmɩn.”»

25Ɛcɛ a fʋ̃ʋ nɩsaal bie, bɛrɛ wone: «bibir kãw, ɩ̃ na de nɩ a zi-sõw na ɩ a bɛ sɔwlʋ zie, a bɛ mimie nʋ̃ɔ̀, a bɛ dɛpaalʋ bom nɩ a bɛ tɩɛrʋ a, ɛ́ bɛr bɛ. Ɩ̃ mɩ̀ na de nɩ a bɛ bidɛbr nɩ a bɛ pɔwyaar. 26A ʋlɩ bibir nɛ a, nɩr na cɩ̃ɛ a na wa na wa man a yele kʋ̀ b. 27A ʋlɩ bibir nɛ a, a nɩr na cɩ̃ɛ a waa na ɩ n a fʋ zɛl ʋ cɛ̀r. Fʋ na ƴɛ̀rɛ na, fʋ kʋ̃ cãà ɩ a ɓil ɛ. Fʋ na ɩ n bãwfʋ a bɛ zie. Lɛ n'a bɛ na bãw kɛ́ mãa n'ɩ a Sore Naaŋmɩn.»

Currently Selected:

Ezekɩɛl 24: DBDC

Highlight

Copy

Compare