Wulu-ayi-sob 8
8
Naaŋmɩn wul'ɩ a ʋ nɩ-bʋʋrɛ Ɩsɩrayɛl a wɛja-kpalɛ pʋɔ
1Nyɩ ƴãw fãw tuur a nɛ-ƴãwnɩ za ɩ̃ na kʋ̀rɛ nyɩ a dɩ̃a a. A na ɩ na nyɩ vʋʋrɛ, ɛ́ yɛ̀r yãwmɛ. Nyɩ na tʋ̃ɔ́ na so a tẽw a Sore na pɔ yel k'ʋʋ na kʋ̀ n a nyɩ sãàkʋm-kore a. 2Nyɩ lɛb tɩɛrɩ a sɔ́r ʋl za a Sore nyɩ Naaŋmɩn na ƴãw nyɩ cen a wɛja-kpalɛ pʋɔ, yome lɩz'a ayi a. Ʋ ɩ na nyɩ nyɛ̃ kpɩɛrʋ, k'ʋʋ ɩ nyɩ kaa, bãw ʋlɩ bom nɛ na be a nyɩ pʋ̃ɔmɩ a, ɛ́ mɩ̀ bãw, nyɩ na sàwr'ɩ a ʋ nɛ-ƴãwnɩ bɩɩ nyɩ kʋ̃ sàwr. 3A na ɩ lɛ a, ʋ ɩ na nyɩ bãw a kpɩɛrʋ, ɛ́ ɩ nyɩ bãw a kɔ̃ tuo, al pùorí, ʋ kʋ̀ nyɩ a mãan nyɩ dɩ, a bʋ̃-dɩra ŋa nyɩɩm nɩ a nyɩ sãàkʋm-kore na bɛ tɩ bãw a. À ŋá a, ʋ wul nyɩ na kɛ́ bʋ̃-dɩra tɛwr bɛ n'a guole a nɩsaal ɛ, ƴɛ̀rʋ za na yire a Naaŋmɩn nʋɔrɩ́ a guole ʋ na. 4A nyɩ bʋ̃-suuri bɛ zaw ɛ, a nyɩ gbɛ́ɛ bɛ pi a yome lɩz'a ayi á ŋá pʋɔ ɩ. 5A na ɩ lɛ a, nyɩ bãwnɩ a vla k'aa Sore nyɩ Naaŋmɩn n'ʋ bɔbr k'ʋʋ wul nyɩ, mɛ̃ sãà na wule a ʋ bidɛb a. 6Nyɩ tuur a Sore nyɩ Naaŋmɩn nɛ-ƴãwnɩ, nyɩ ɩrɛ mɛ̃ a lɛ ʋ na bɔbr a, ɛ́ zɔrɛ ʋ.
A bɛlʋ na na be a Kanãa tẽw a
7A Sore nyɩ Naaŋmɩn na ɩ na nyɩ kpɛ tẽw na vɩɛl a pʋɔ, bà-fʋɔlɩ nɩ buli tẽw, tẽw a tẽsɔw pʋɔ kʋ̃ɔnɩ na bule yire a zi-tɩ̃tal pʋɔ nɩ a tãw zu a. 8Ble nɩ ɔɔzʋ, divɛ̃ tɩɩr, kãkã-tɩɩr nɩ girenadɩ tɩɩr tẽw n'ʋ. Tẽw olivʋ kãá nɩ sɩwr na ʋr a n'ʋ. 9Bɛ bɛ manɛ a dipɛ̃ kʋ̀rɛ nyɩ a be ɩ, nyɩ mɩ̀ bɛ bɔbr bom guur a be ɩ. Kure be n a tẽw kʋsɛbɛ pʋɔ, ɛ́ nyɩ na tʋ̃ɔ́ tuw ír kur-zɩɛ a ʋ tan pʋɔ. 10Nyɩ na mɩ́ dɩ na sɛw, ɛ́ puori a Sore nyɩ Naaŋmɩn yãanɩ, a tẽ-vla ŋa ʋ na kʋ̀ nyɩ a ƴãw.
11Ɛcɛ nyɩ gùre nyɩ tʋɔra vla taa yiire a Sore nyɩ Naaŋmɩn bɛrɛ, bɛ wa tuur a ʋ nɛ-ƴãwnɩ, a ʋ tub nɩ a ʋ wulu ɩ̃ na kʋ̀rɛ nyɩ a dɩ̃a a ɩ. 12Nyɩ na mɩ́ dɩ na a man nyɩ, nyɩ na ŋma n yir-vɩɛlɩ kpɩɛr. 13Nyɩ na tɛr'ɩ nĩi nɩ píir nɩ bʋʋr yaga. Nyɩ na tɛr'ɩ salm-pla nɩ salm-zɩɛ yaga nɩ bʋ̃-tɛrɩ bʋʋrɛ za. 14A lɛn daar a, nyɩ gù vla taa ɩrɛ pɔ̀lʋ tɩ yiir'ɩ a Sore nyɩ Naaŋmɩn na n'ʋ ɩ nyɩ yi a Eziptɩ a ɩ, a be nyɩ na tɩ ɩ gbãgbaar a. 15Ʋlɛ n'ʋ tɛr nyɩ tɔl'ɩ a wɛja-kpalɛ ŋa na ɩ kpɛ̃ɛ ɛ́ ɩrɛ dɛ̃bɩ̃ɛ a pʋɔ, a wɛja-kpalɛ na ɩ wɩɩr a lɔw na vuule#8:15 Nyɛ̃ Sɔr-n 21.6. a nɩ nan tɛwr a pʋɔ. A tẽw ŋa na ko ʋ za a pʋɔ a, ʋ ɩ na kʋ̃ɔ tɛ yi a nyɩ ƴãw, pì-kpɛ̃w kpãkara pʋɔ. 16A wɛja-kpalɛ ŋa pʋɔ a, ʋ kʋ̀ nyɩ nɩ a mãan, bʋ̃-dɩra a nyɩ sãàkʋm-kore na bɛ tɩ bãw a. Ʋ ɩ na nyɩ nyɛ̃ kpɩɛrʋ, k'ʋʋ ɩ nyɩ kaa, ɛ́ wa maalɩ nyɩ vla a pùorí. 17Nyɩ taa wa nanɩ tɩɛrɛ nyɩ pʋɔ yere nɩ: «Tɩmɛ nɛbɛ bãw a lɛ tɩ na ɩ tɛr a a, a tɩ fãw yõ zũú n'a.» 18Nyɩ cãà bãwnɩ a Sore nyɩ Naaŋmɩn na n'ʋ kʋ̀rɛ nyɩ a fãw nyɩ tʋ̃ɔ́ mɩ́ tɛr a a. À ŋá n'a ʋ mɩ́ cãà ɩ tɛr a wõ-taa ʋ na maal'ɩ a nyɩ sãàkʋm-kore, mɛ̃ à ŋá ʋ na ɩrɛ a dɩ̃a a.
19Nyɩmɛ wa yiiri a Sore nyɩ Naaŋmɩn bɛr a, nyɩmɛ wa tuur ŋmɩn-yoru pùor, tone a, ɛ́ lore gbine a niŋé a, mãa n'ʋ yere kʋ̀rɛ nyɩ a dɩ̃a, nyɩ na baar'ɩ cɔ̃cɔ̃. 20Nyɩmɛ bɛ wa wone a Sore nyɩ Naaŋmɩn ƴɛ̀rʋ a, nyɩ na baar'a, mɛ̃ a nɩ-bʋʋr-yoru bɛl a Sore na na ɩ bɛ baarɩ a nyɩ tab daar a.
Currently Selected:
Wulu-ayi-sob 8: DBDC
Highlight
Share
Compare
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
