Wulu-ayi-sob 27
27
A ƖSƖRAYƐL MAALƐ NƖ A WÕ-TAA CUW
27:1—28:68
A kʋsɛbɛ na bà teli a Ebal tãw zu a
1A Moyiir, lãwnɩ a nɩbɛ nɩ-kore, tɩ yel'ɩ à ŋá kʋ̀ a Ɩsɩrayɛl nɩbɛ: «Nyɩ na sàwr'ɩ a nɛ-ƴãwnɩ za ɩ̃ na kʋ̀rɛ nyɩ a dɩ̃a a. 2A ʋlɩ bibir nyɩ na na gãw a Zurdɛ̃ man kɛ́ nyɩ kpɛ a tẽw a Sore nyɩ Naaŋmɩn na kʋ̀rɛ nyɩ a pʋɔ a, nyɩ na de nɩ kʋsɛ-bɛrɛ bin teli, ɛ́ bʋl a nɩ gʋɔr-pla. 3Nyɩmɛ wa dɛ ta a, nyɩ na sɛb'ɩ a wulu ɩ̃ na kʋ̀rɛ nyɩ a nɛ-ƴãwnɩ za ƴãw a kʋsɛbɛ zu. À ŋá n'a nyɩ na tʋ̃ɔ́ kpɛ a tẽw bʋ̀rʋ nɩ sɩwr na gbɔlɛ a pʋɔ, a tẽw a Sore nyɩ sãàkʋm-kore Naaŋmɩn na kʋ̀rɛ nyɩ mɛ̃ a lɛ ʋ na yel kʋ̀ nyɩ a. 4Nyɩmɛ wa gãw a Zurdɛ̃ a, nyɩ na bà n a kʋsɛbɛ á ŋá teli a Ebal tãw zu, mɛ̃ a lɛ ɩ̃ na yere kʋ̀rɛ nyɩ a dɩ̃a a, ɛ́ nyɩ na bʋl a na nɩ gʋɔr-pla. 5Nyɩ na mɛ n bàwr-maal-kuur a Sore nyɩ Naaŋmɩn ƴãw, a be, nɩ kʋsɛbɛ kure tõ-tõ-bom kãw za na bɛ tɔ a. 6Kʋsɛbɛ bɛ na bɛ pɛnɩ a tɛwr'a nyɩ na mɛ n ʋ. Nyɩ na maal'ɩ nyɩw-a-za-bagɛ kʋ̀ a Sore a bàwr-maal-kuur ŋa zu. 7Nyɩ mɩ̀ na maal'ɩ lãw-taa bagɛ, dɩ a bàwr-maal-bome a be nɩ pʋ-pɩɛlʋ, a Sore nyɩ Naaŋmɩn niŋé. 8Nyɩ na sɛb'ɩ a Naaŋmɩn wulu nɛ-ƴãwnɩ za ƴãw a kʋsɛbɛ nyɩ na bin teli a zu, ɛ́ a sɛbrʋ nyɛrɛ vla.»
9Al pùorí, a Moyiir, lãwnɩ a levitɩ mɩnɛ bɛl na ɩ bàwr-maalbɛ a, tɩ cãà na ƴɛ̀r a nɩbɛ zie yel à ŋá: «Ɩsɩrayɛl nɩbɛ ɛ, nyɩ ŋmãa vʋʋrʋ ɛ́ bɛr wõ! A dɩ̃a a, nyɩ lɩɛb'ɩ a Sore nyɩ Naaŋmɩn nɩ-bʋʋrɛ. 10Nyɩ bɛrɛ wone a ʋ ƴɛ̀rʋ, nyɩ sàwr a ʋ nɛ-ƴãwnɩ nɩ a ʋ wulu ɩ̃ na kʋ̀rɛ nyɩ a dɩ̃a a.» 11A ʋlɩ bibir nɛ a, a Moyiir mɩ̀ tɩ yel'ɩ à ŋá kʋ̀ a nɩbɛ: 12«Nyɩmɛ wa gãw a Zurdɛ̃ a, Sɩmɩ̃ɔ, Levi, Zuda, Ɩsakaar, Zuzɛb nɩ Bɛ̃zamɛ dɔwlʋ na àr'ɩ a Garizim tãw zu ƴɛ̀r a nɔ-vla ƴãw a nɩbɛ, 13ɛ́ Urubɛn, Gadɩ, Asɛɛr, Zabulɔ̃, Dan nɩ Nɛfɩtali dɔwlʋ àr a Ebal tãw zu ƴɛ̀r a ŋmɛ-ƴãw ƴɛ̀r-bie.»
A ŋmɛ-ƴãw pie nɩ ayi
14A levitɩ mɩnɛ na yel'ɩ a Ɩsɩrayɛl nɩbɛ za nɩ kɔkɔr-kpɛ̃w:
15«Ŋmɛ-ƴãw, a páw sob nɛ na pɛnɩ tɩɩb bɩɩ nyɩl kure maal'ɩ dasule kãw tɛr sɔwlɛ maalɛ a. A Sore bɛ nɔnɛ a bom ŋa tɔ a nɩsaalbɛ nuru na maalɩ a ɩ.» Ɛ́ a nɩbɛ za na sɔw na: «Amɛn!»
16«Ŋmɛ-ƴãw, a páw sob nɛ na bɛ ƴãwnɛ a ʋ sãà nɩ a ʋ mã a.» Ɛ́ a nɩbɛ za na sɔw na: «Amɛn!»
17«Ŋmɛ-ƴãw, a páw sob nɛ na vire a ʋ tɔ sob tẽsɔw tʋr-bɔwrɩ kʋsɛbɛ ƴãwnɛ zi-yoru a.» Ɛ́ a nɩbɛ za na sɔw na: «Amɛn!»
18«Ŋmɛ-ƴãw, a páw sob nɛ na ɩ kɛ̀ zɔ̃w bɔrɛ a ʋ sɔ́r a.» Ɛ́ a nɩbɛ za na sɔw na: «Amɛn!»
19«Ŋmɛ-ƴãw, a páw sob nɛ na bɛ dɩrɛ a ƴɛ̀rʋ a tuur sɔ́r a nʋʋra, a bi-kpieb nɩ a pɔw-kʋɔr ƴãw a.» Ɛ́ a nɩbɛ za na sɔw na: «Amɛn!»
20«Ŋmɛ-ƴãw, a páw sob nɛ na gã nɩ a ʋ sãà pɔw kãw a, bʋ̃ʋ n'ʋ vɛ̃, ʋ bɛ tɛr sɔ́r ɛ, a ʋ sãà so bɛ.» Ɛ́ a nɩbɛ za na sɔw na: «Amɛn!»
21«Ŋmɛ-ƴãw, a páw sob nɛ na gã nɩ dʋ̃w a.» Ɛ́ a nɩbɛ za na sɔw na: «Amɛn!»
22«Ŋmɛ-ƴãw, a páw sob nɛ na gã nɩ a ʋ yeepuule a, a ʋ sãà pɔwyaa n'ʋ bɩɩ a ʋ mã pɔwyaa n'ʋ a.» Ɛ́ a nɩbɛ za na sɔw na: «Amɛn!»
23«Ŋmɛ-ƴãw, a páw sob nɛ na gã nɩ a ʋ pɔw mã a.» Ɛ́ a nɩbɛ za na sɔw na: «Amɛn!»
24«Ŋmɛ-ƴãw, a páw sob nɛ na sɔwlɩ kʋ nɩr a.» Ɛ́ a nɩbɛ za na sɔw na: «Amɛn!»
25«Ŋmɛ-ƴãw, a páw sob nɛ na sàw de libie, ɛ́ kʋ nɩr na bɛ sãw a.» Ɛ́ a nɩbɛ za na sɔw na: «Amɛn!»
26«Ŋmɛ-ƴãw, a páw sob nɛ na bɛ ŋmɛlɛ kaar a Naaŋmɩn wulu nɛ-ƴãwnɩ, ɛ́ bɛ sàwr a a.» Ɛ́ a nɩbɛ za na sɔw na: «Amɛn!»
Currently Selected:
Wulu-ayi-sob 27: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
